James Bond-Thunderbolt-17

THE RED EYED CATACOMB

Constabe Santos a zawhna ngaithla chungin Bond chuan a kawr chu a ha tha mawlh mawlh a. Santos chuan lawng bula thilpuak a awm thu te, lawng bathlara mi engemawzat an awm thu leh vaukam lam atanga langtheilo lama lawngleng thlak anih thute chu a sawi suam suam a.

Bond chuan lawng sira a intauh deuh avanga engmah a hriatloh thuin a lo chhang mai a. Mahse a thiltih tumah chuan va hlawhtlingin a insawi a, Santosa chu tangkai a tih thu hrilhin lawmthu te a sawi nghal bawk a; a tuk zing lama Commissioner va hmuh a tum thu nen chuan.

Leiter a car dahna lam a pan ding a, hotel a thlen veleh Leiter a chu phone a kovin, an pahnih chuan Police HQ lam an pan ta nghal a.

Bond chuan Leiter chu thil awmdan a hrilh nghal zung zung a, an thil tawn chu an hotute hriattir ngei pawh a hun ta nia a hriatthu a sawi bawk a. London ah chuan dar 8:00am a ni a, atom bomb puah hmain darkar 40 chauh an nei tawh a, Bond chuan a rinhlelhna chu upbo mai chiah a ngai ta lo.

Thu tak deuh hian Leiter pawh chuan, "A pawi tawh hauhlo. Kei pawhin CIA ho tan a copy ka siam ve nghal anga, chu mai ni lovin Manta pawh ka chah nghal dawn a ni," a ti ta a.

Mak ti deuh hian Bond chuan, "Engvang teh hluai chuan maw?" alo ti hû a.

"Â, Casino ah khan mit len chungin ka hun tamtak ka hmang a, an ro zawn tura shareholder ni thei awm deuh chu ngun takin ka chik hlawm a. A rualin an awmkhawm deuh zel a, a langah chuan holiday nuam taka hmang anga lan an tum hle. Mahse helamah hi chuan an hlawhchham ti ila a dik ber ang. Largo chauh a nelawmin mi a tiphur thiam ber a, midang ho chu private detective ang maia tak run vek mai an ni. Chicago a Mafia ho inbeihna lar tak, St. Valentine's Day a inthahna thlen hnu a Torrio te pawl lam hmel nen khan ka tehkhin ber mai."

"Suit leh Tuxedo ha mah se anni anga misual rual tihhriat ka la hmu ngai lo. A mawiah cigar an zu a. Zu pawh an dawn ve tak na a, an nihna tak an thup thei mawlh lo. An awmdan kha thupek zawm te pawh an ang ber zawkin ka hria. An zingah chuan mit latak pakhat ka hmu fuh tlat mai a ni."

"Chupa chu pa tereuh te, chal chuar deuh, lu lian tak si, tarmit chhah zet mai bun hi a ni a. A hmel chuan Mormon mi, tihpalh thil thu a nawhchizawrhna a lutpalh hi a ang ber. A bulhnai ka then chuan mi pahnih hnenah 'nuam a tihthu' a hrilh tih ka hre hman a. A hun tam zawk chu a ngaihna hriatloh hmel deuh hian a hawikual mai mai a. Chupa hmel chu ka hmuh tawh hnu ni ngeiin ka inhre tlat. Mahse ka ngaihtuah chhuah theih mai loh avangin hotel reception ka pan a, ka school kalpui thin Europe a pem ta hmu a ka inhriat thu leh a hming ka hriatchhuah theihloh thu ka va hrilh a. Ani lahin min hmelhriat viau mai si a, a zahthlak deuh riau mai si a, min lo tanpui thei angem," tiin ka va zawt a...

"Kan inzui phei a, tarmit a chu ka kawhmnuh ta a. Kan inzuilet leh a, register kan keu va. Membership card kan en a, chupa hming chu Emil Traut tiin a inziak a. Swiss passport a hmang. Yatch a Largo a pawlte zinga mi chu alo ni ngei mai. A Swiss passport ber chu thil min hriatchhuahtirtu chu a ni. Tunhma a East German Physicist Kotze tia an koh kha ila hria em? Kum nga vel Malta khan khawthlang lamah a rawn tlanchhia a, a hriat zawng zawng chu Joint Scientific Intelligence ho hnenah a sawifai vek a. Chumi hnu chuan pawisa tam tham tak pek anih avangin Switzerland lamah lutin a bo hlen ta daih a. Awle, James. Hepa hi ka sawi ngei chu a ni. CIA ka chhuahsan hma khan a file ka khawihhman nual a. A hunlai kha chuan kan chetfuhna tak pawh a ni a, a hmel hi file ah ka hmu a, ka la hailo reng reng. Khapa kha Kotze-a a ni chiang lutuk. Physicist thiam turu lutuk chuan Disco lawngah eng nge a tih reng reng? A inrem thlurh lo maw?"

Police HQ chu an thleng ta a. Inhnuai ber chu alo eng tawh a, duty Sergeant hnenah chuan an in-report ta a. Inchunga inbiakpawhna penetor chu an pan chho ta a. Bond chu pindan laiah chuan a vei a vei kual a, "Felix, engtin nge kan chet zel ang le?" a han tilet ve thung a.

"Vawiin tlaia iva hriat te nen phei chuan an vaia man vek mai a nia ka duh ni,"

"Engvang ringawtin maw? Largo chuan minute nga pawh tling lovah ukil a ko thei reng. Kan thil hriatte hi Largo tan phat theih loh a awm dawn em ni? Traut chu Kotze pawh lo ni se rohlu an zawn avangin leilung lam chinchang hria an mamawh thuin awlsam takin an lo phamar thei ang chu. Disco pindan hnuaia pindan ruk pawh bungraw danglam tak tak   an dah lakchhuahnan a an tih a lo ni maithei bawk. Va enfiah ila, an phamar leh thei thovang. Ralveng an dah pawh kha miin thla 6 lai eng nge an hman chiah hriat tuma an zawh tawh avangin vengtu neih chu tul angin an sawi leh thei tlat. 'Mr. Bond chuan zanah lehnghal engati nge a rawn enthlak a? Petacchi chu kan hriat mi a ni hauhlo. Miss Vitali te chhungkaw hming chu engpawhnise, kan lo hrelo a ni...' tiin an pha mar vek mai ang. Chu achhapah dan hmang vekin min chhulet nek thei zawk asin,"

Leiter chuan, "Chuti chu engtin nge kan tih tak ang? Bomb hmangin kan va tipil mai dawn em ni?" alo ti a.

"Ni lo ve, kan nghak rih dawn a ni. Kan thil hriat chin kan report fai vek anga, mahse Windsor field  vela sipai rual an rawn thawnluh mai lohnan kan ziak fimkhur hle tur a ni ang. Manta submarine chauh kan Mamawh rih ang. Duh ang thalin Disco chu kan enthla thei dawn a. Tunah chuan min rinhlelhna an la nei lo va, Largo thil ruahmanna hi ro zawng tur anga an chetdan hian ala hliahkhuh vek a. Tunah chuan bomb chu lakchhuah a, target no-1 a dah chiah an hmabak tawh a ni. Chu chu darkar 30 chauhvin a dal tawh. Bomb a phurlai emaw, a lachhuaklai emaw kan manpalh anih loh chuan tunah engmah kan ti thei rihlo. Atom bomb phurtu Vindicator thlawhna  pawh kha a awm hlat vak a rinawmlo. Chuvangin naktukah thlawhna kan hawh anga, Mel 100 bial tuipui chu uluk takin kan dap dawn a ni. Helai hnaivai, tuipui pawnlang si ah hian an thukru anih a rinawm ber. An fing hle a ni. Tui leh khua in a zir bawk a, a awm hnaivai anih chuan kan hmuchhuak ngei ang. Khaile, report chu thawn ila, i mu hahdam nghal teh ang. Thuthawn tawp lamah khan darkar 10 tal chu min biak theih loh tur thu  hrilh nghal bawk tur a ni ang. Telephone pawh rawn biak theih lohva phawi sa a tha ang. Kan thuthawn hian Potamac leh Thames a tibuai ngei ang tih a chiangin ka hria" a ti ta a.

................................................................

Darkar ruk a han ral chuan khua a var fel a, boruak pawh a thiang nuam hle. Windsor airfield pawh rang takin an thlengphei a. Chulai a hnathawkte chuan Jeep hmangin tuiah pawha tum thei Grumman Amphibian thlawhna chu a dahna in atangin an rawn hnukchhuak a.

Bond te pahnih chu thlawhna ah chuan an chhang fel thuai a, Leiter-an a khawl a tinung fel chiah tihin an lam pan hian airfield ah chuan thuthawn kengtu pakhat hi motor cycle in a rawn tlanphei a. Bond chuan, "Thlawk vat ang. Saw, lehkha buaipui chi a lokal" a ti a.

Leiter chuan thlawhna brake chu a han thlah a, thlawhna tumhmun, chhimlam leh hmarlam hawia intan tlangah chuan chak takin an tlan ta a. An thlawhna radio chu a rawn chiau vawr vawr a, Leiter chuan fimkhur takin vanlam chu a han thlirkual a. Van chu a thiang kûk mai a. Leiter chuan a khalhna chu hnalamah a han nawr awn a, thlawhna chu a tlanchak ta tial tial a. A insawh bap a, a thlawkkang ta a. Radio chu a rawn ti leh vawr vawr a, Leiter chuan a off ta daih a.

Bond chuan a malah chuan tuipui awmdan ziahna chart chu a han pharh a. An thlawhdan chu hmarlam hawiin a ni a. A hmasa berin target no1 ni thei tur Grand Bahamas thliarkar chu en hmasak phawt an tum a ni. 

Feet 1200 a sangah an thlawk a, an hnuailamah chuan Berry Island chu Emerald lunghlu ang mai hian tuifinriat dumpawl kuk maiah chuan a inzam ngiai mai a. Bond chuan, "Ka sawi kha I hrethiam tawh em? Tui feet 50 vela thuka thil liantham deuh awm chu a lang thei vek asin. Vindicator te anga thlawhna lian te chu thlawhna kalkawng pangngaia tlat chu ni se an hmu daih tawh ang. Chuvangin tunah hian thlawhna thlawh tlemna bial ka thai hrang bik a, mi hrutloh laiah an tumtir ngei a rinawm a ni. Rinthu in kal ta ila.... Disco khan chhimchhak a pan zan kha han ngaihtuah let ila, inbumna anih ka ring tlat mai. Chuvangin khawthlang lam leh hmar lama dap chi anih ka ring. Disco kha darkar 8 vel a thang bo va, darkar 2 vel chu hnathawkin a din a rinawm a. Darkar 6 chhung darkar khata knot 30 vela chaka an kal chuan..... Mi bumnana an tlan chhung kha darkar1 paih leh in, darkar 5 vel ala awm a. Grand Bahamas atanga Bimini thliarkar vel hi ka ring deuh va, chu aia dik thei tur chhang ka hrelo a ni," a ti ta a.

"Commissioner kha I hmu em?"

"Hmu e, a hote zinga mi engemaw zat chuan Disco chu chhunzan zawmin entlang nen an thlithlai reng e. A lo chechhuak palh a, kan la haw hmanlo anih chuan Bahama airway thlawhna pakhat hmangin kan enzui ve thung ang. Thu pahnih khat lek ka hrilh khan a tiphawklek tlat a ni. Governor hnena engkim hrilh kha a duh a, mahse ka khap ta rih a ni. Pa fel tak ni mahse tuemaw thlawpna telling chuan mawhphurhna lian lutuk a duhlo ni berin ka hria a, a ka hup nan Prime Minister hming ka hmang ringawt mai a ni. Manta chu eng hun velah nge alo thlen I rin?"

Nuam ti zanlo deuh hian Leiter chuan, "Vawiin tlaiah. Nizana ka chah ringawt mai kha ka rilru a buai deuh niin ka hria. James, duh aiin thawm ka ngah lutuk dawn niin ka hria. Chhun khaw engah chuan tha ka tilo hnuhnawh ta riau mai. Engemaw pawi teh hrep le!!?" a ti ta nuah nuah a.

Leiter chuan hmalam a han thlir a, chutah, "Saw Grand Bahamas chu a rawn lang ta. Rocket base saw kan va inhriarttir dawn em ni? Thlawhhnaih phalloh a ni a, mahse kan thleng ta rau rau va, a tawp thlengin kan su tawh mai a niang chu. Minute 2/1 lekah chuan min rawn hrawk nasa ngawt ang," a ti ta nuah nuah a, a radio chu a herhnung ta nghal a.

Vaukam Mel 50 zeta sei, mawi zet mai dungtluan chuan an thlawk zel a, an hmalamah chuan aluminium a sak niawm tak in hi a ding tlar tuarh bawk a. Chung zingah chuan inchhawng te reuh te te ang deuh rawng chi hrang hrang hi a ding fur bawk a.

Leiter chuan, "Kil khata balloon eng saw warning a ni a, thlawhna leh sangha mantute hmuhtur a tarlan a ni. Tukin hian kahchhuah chhin tur an nei a, tuipui chung, chhimlam deuhvah kan thlawh a that ka ring. Enchhinna puitling anih avangin khawchhak lam Mel 50 vela awm Ascension island lam hawiin an kahchhuah ka ring. African vaukam khawmual bul mai an tum dawn tihna anih chu. Kan hnung lawkah Atlas Missile in min rawn umzui mai ang tih a hlauhawm alawm," a ti mawlh mawlh a.

Amah vek chuan heti hian a han sawizawm leh a, "Veilama khawl sen leh var bula pencil ang deuh va lawrchhuak saw I hmu anga. Atlas emaw, Titan Intercontinental Missile emaw anih saw. Polaris Missile emaw pawh a ni maithei bawk. A dang phnihte saw chu Matador, Snark emaw Thunderbird Missile emaw a ni ang! Laipui ang maia dawn chhuak ngoh saw camera a missile chhuizuina a nih saw. Thleng ang deuh pahnih saw radar an ni a. Saw! Pakhat chuan kan awmna lam a rawn hawi ruau ruau saw. Reilote ah min rawn hrawk ngei ang. Thliarkar lai taka concrete phah saw missile la hmantlak kohlet lehna anih thung saw. Missile kal diklo tihchhiatna hmunpui erawh ka hre thei mailo tlat mai. Leihnuai lamah an dah a ni mahna! Tunah hian chu laiah chuan officer lian tak tuin emaw ro relin kan thlawhna hnawtbo turin thu a pe mek ngei ang,"

An luchung radio atang chuan aw hian, "NIAKOI, NIAKOI, Luh phallohna hmun I rawn thleng tlat mai. Ka thusawi I hre thei em? Chawplehchilhin chhimlam pan nghal rawh. Hei hi Grand Bahamas Rocket Base a ni e. Inthiar fihlim rawh, inthiar fihlim rawh," a rawn ti ta a.

Leiter chuan, "Kan duhtawk chu kan hmu tawhin ka hria. Buaina insiam belhchhah chu a that ka ringlo," tih pahin a thlawhna chu a bir kawitir ta nghal a. Amah vek chuan, "Ka sawi awmzia chu I hre tawh mai em? Khalai hmun kha dollar vaibelchhe hmun li a then a hmunkhat vel man anih loh chuan ka hming pawh hi a diklo tawp ang. Nassau atangin Mel 100 vel lek a ni a, Disco tan chuan duhthusam a ni," a ti ta a.

An lu chunga radio bawk chuan, "NIKOI, NIKOI, luh phalloh chin lut a biak I chhan duh bawkloh avangin report ini ang. Chhimlam pan zel la, tui awmdan en ngun ang che,  Over" a rawn ti leh ta a.

"Rocket an kapchhin dawn anih chu. Ngun deuhvin lo en ang che. Saw, radar hmai pawhin khawchhak lam a kawh lehtak saw. Insangmar teuhvin sana tam tak hmaah an thu hlawm ang chu."

Minute 15 hnu velah chuan thliarkar tereuh te te an hmu leh ta a. Thliarkar tesep an nih avangin tuichungah chuan an langthei tawk tawk a ni ber e. Leiter chuan thlawhna chu tuichung meter 100 velah a thlawhhniamtir a, kikawi deuhvin a khalh ta a. Tui chu a fim tha bawk a, tuichhunga sangha te bakah tiauvut te thleng chuan an hmuthei a. Thlawhna hlimthla chu hlau tih hriat deuh hian diamond-shaped Stingray pharh duai mai chu chirh zingah chuan a inphum vat a. An thlawk hniamin, thliarkar vel chu a lang fiah bawk a, thil thuhruk hmel hmang hmuh tur a vang hle. 

Thlawhna chu Bimini chhim leh hmar hawizawngin a thlawhtir leh ta a. Khua ang deuh va ngaihtheihah te pawh chuan hotel a awm ve zauh zauh va. Lawng thenkhat bathlara nilum lo ai mek te chuan an ban an rawn vai sap sap hlawm bawk a. Lawng pakhat chunga nula pakhat, ruak ngal ngata nilum lo ai mek pawh chuan thlawhna hmel a hmuh veleh chuan rang takin inhrukpuan ala a, a intuam tha nghal vat a.

Leiter chuan, "A pumin a buang ka ti!!!" a ti lang lang a. Chhimlam hawiin Cat Cays lamah an thlawk zel a, sangha manna lawng an hmu zeuh zeuh zel bawk a. "Kan kalna lam hi a diklo aniang a! Kan thilzawn chu heng laiah hian awm se sangha mantu hovin an hmu daih tawh law'ng maw?" a han ti leh bauh va.

Bond chuan thlawk zel turin alo hrilh a. Mel 20 vel an thlawh leh hnu chuan khawmuala chhiarthamloh, lei pawng deuh hlek lai hi an va thleng a. Tui dumpawl ruih mai pawh chu a lang hring leh ta a. Shark pathum hi chulaiah chuan an inzui kual mek a.

Chulai chu an thlawh pel a, reilote ah tui chu a thuk leh tawh tih hriat deuh mai hian a dumpawl leh ta kuk mai a. Nguai zet hian Leiter chuan, "Khati zawng kha a ni mai. Mel 50 vel kan thlawhna leh chuan Andros kan thleng tawh ang," a tichuai ta raih a.

Bond chuan hriatchhuah a nei ta thut mai. Shark pathum te kha!! Tui feet 30 vel leka thukah an inzui kual sek mai, enge an tih ang le? 

"Felix, kir leh vat teh. Engemaw a awm.."

Thlawhna chu a in her a, feet 50 vel leka sangah chuan an thlawk ta a. Bond chuan a bula tukverh chu a han hawng a, a entlangna focus chu her rem zelin ngun takin a han thlir leh ta a. Shark pahnih chu awlsam takin a hmunghal mai a, pakhat dang erawh chu tuipui mawngah hian chianglo ruai hian a lang thei a, engemaw nawr vel ni hian a hriattheih a. Tuipui mawng lang rang ruk maiah chuan hnuhma ngil zet mai hi Bond chuan a hmu leh ta a.

"Helaiah hian tum rawh. Felix, kan hmuchhuak ta niin ka hria,"

Leiter chuan Bond chu a en zawk a, "Ka tumdik thei em ang chu maw! Tui hi darthlalang ang maia tle anih avangin chetsual pawh a awl viau asin," a ti a. Thlawhna chu a thlawkkual pawp a,  her kualin, a hmalam chu a tihniam ta a. Reilo teah thlawhna chu a che lawih a, tuiah chuan a tumfel ta der mai. Leiter chuan thlawhna chu a tihlum a, thlawhna chu a tawlh riai riai a, Bond a duhna tak atanga yard 10 vela hlaah chuan a ding ta a. Tui chunga shark pahnih te chu thlawhna lo tum pawh hre awm hian an lang lo. An inzui kual pap pap a, an rawn hnaih em avangin an mitte pawh chu chiang takin a hmuhtheih a.

Bond chuan tuichhung chu ngun deuh chuan a han thlir ta a, a rin ang chiah a ni. Tuipui mawnga lung niawm tak te chu a lem vek an ni. Tarpaulin hlai tak tlang sir zei zeite pawh chu a hmuhtheih ta a. Shark pakhat hian kilkhat chu a lo nawr kaw huau tawh a, a hnuaia luh tum chuan alo bei mek a.

"Kan ring dik e. Tarpaulin lian takin an khuh a nih hi,"

Leiter pawh chuan Bond a awmna lam atang chuan a han bih ve a. Radio a police ho hriattir nghal mai chi emni ang? London hrilh nghal mai a tha angem? Mahse Bond chuan tihchi ah a ngai ta lo. Disco a radio operatorin alo hriatpalh hlauh chuan thil pawi lutuk a ni dawn tlat a ni.

Bond chuan zu luhchilh a, bomb chu ala awm leh awmloh zu chian hmasak chu thil pawimawh ber niin a hria a. Shark zinga pakhat an thah chuan a dangin an buaipui zui nghal mai dawn tih pawh a hre bawk.

Leiter chu a thu tha leh a, a hmelah chuan phur tih hriat deuh mai hian, "Lalpa leh!! Kan hmuchhuak ta ngei mai!!" Bond a hnungzanga ben thuk pah chuan a han ti a.

Bond chuan a walther pistol chu a phawi a, shark pahnihte lo lan leh hun chu a nghak ta a. Shark hmasak zawk chu Hammerhead chi, feet 12 vel zeta sei hi a ni a. A lu a thle buk buk a, hnuai lama an thian pakhat chevel chu a thlir ve deuh ni hian a hriat a. Bond chuan a silai chu a ban pakhata nghatin, shark hnungzanga pangparh lochhuak bul tak chu nguih deuh hian a tinzawn a, a hmetper ta a.

Silai ri chu a khawk kal rawih rawih a, shark chuan hre awm pawh hian a lang lo va. Bond chuan a han kapnawn leh a, shark chu tuichung ah a rawn inperh chhuak uaih a. A tlaper chuai a, a tal ta but but mai a.

Silaimu chuan a hnungzang ruh a khawih anih ngei a rinawm. Muang leh khawr deuh hian a hleuhkual pup pup a, a lu chu tuichung ah a rawn lang zuau va. A ha hriamtak chu a then var thu a, a inperh ut ut a.

A chetdan chu shark pakhat zawk chuan alo en reng a, fimkhur deuh chuan a panhnai a. Thawi deuh thuak hian a han su a, a rawn hnaih leh a. Shark hliam chu a hnim emaw tih mai tur hian a han nawk a, a ha zum leh hriamtak mai chuan a unaupa chu a han pet ta hlawk mai a. A lu a thing a,  a hleuhsawn ta a. A sehna bawr vel atang chuan thisen a rawn bawchhuak nghal pup pup mai a. Tuichhunga awm zawk pawh kha a rawn chho tawh a, chung shark pahnih te chuan an thian engmah tithei tawhlo ni ngeia lang chu an beihrawn ta a. Chu shark hliam chu a thitawh ni ngei hian a lang a, mahse a nervous system in hna ala thawh avangin ala che tual tual reng a. Shark pahnih te chuan an han hap a, an hleuhsawn a, an rawn beinawn leh a.

Shark pathumte chu tui chuan a len hla tial tial a, reilote ah hmuhphak lovah an awm ta a.

Bond chuan Leiter hnenah chuan a Silai chu pein, "Ka zu lut dawn e. Ka rei deuh pawh a ni maithei a, sangha te kha darkar chanve vel chhunga chu an lokir tawh lovang. Mahse an rawn kir leh anih chuan pakhat kaphliam la; min kohchhuah I duh anih chuan tui hi chhuk zawkin I rawn kap pawp pawp dawn nia. Tui infawkin min rawn hriattir phain ka ring," a ti a. A thawmhnaw a phelh a, oxygen cylinder chu a ak nghal mawlh mawlh bawk a. Thlawhna chhung chu a chep bawk si a, a buaithlak phian lehnghal a. Thlawhna a luh leh pawh a harsat dawn avangin a hmanrua chu tuichhunga kalsan mai a ngaih a ring nghe nghe a ni.

Thinur deuh hian Leiter chuan, "I ruala luh ve theih ka duh hle mai. Ka kuta thirkawm hi tuihleuhnan a hmantlak tlat si lo. Tui ka hleuh ve theihnan thelret lam thil engemaw ngaihtuah tur a ni," a ti bawrh bawrh a.

"Thlawhna hi ilo enkawl a ngai alawm. Tunah pawh tui hian yard100 aia thui min lensawn tawhin ka ring. Ka zu luhna turah khuan engin nge min lo hmuak tih ka hre miahlo lehnghal. Ni5 lai khuti khuan a awm tawh a, min chetkhalhtu te pawh an awm tawh maithei a ni,"

Leiter chuan thlawhna chu a tinung a, an tumna lai vel nia a ngaih lamah chuan a khalhphei leh a. "Vindicator pianhmang kha I hria maw? Bomb leh a tihpuahna te pilot in a dahthatna kha I hretel turah ka ngai a nia," a lo ti a.

"Aw hria e. London ah engkim min hrilh vek tawh. Anih leh aw," tih pahin Bond chu cockpit atang chuan a chhuak a, tuiah chuan a zuangthla ta a.

Ding takin tuipui mawng lam chu a pan nghal a, a hnuai lamah chuan sangha chi hrang hrang hi an lo phu sup sup a. Bill fish leh Barracuda te chi bakah sa ei chi an ni deuh vek hlawm.

Bond a tuihleuhna tur chu hmanhmawhlo takin an lo kian hlawm a. Ani chuan shark pakhatin tarpaulin a nawrkau lam chu a pan ding nghal a. Tuipui chhuata alo inkilhbehna thir tialnei chu a phawi a.   Hmehen chu phawrhin lehlamin chemte chu a him a, chu tarpaulin hnuaiah chuan a tawlhlut ta a

A rinlawk leh beisei ai daihin tui chu a lo bawlhhlawh a, a uak lek lek a. A thawkna dawt nghet taka seh chung chuan tarpaulin thlawhna a khuh pawn sanglai chu a pan nghal a. A chungah chuan thlawhna thlaparh duai mai chu alang tle deuh ruau ruau va. Thlawhna thla hnuaiah chuan mihring taksa chhe vek tawh hi chakai, starfish leh rannung dangte chuan an lo bawr nuai nuai a. Lohtheihloh anih avangin hreh tak chung siin ruang bulah chuan ava thingthi ta a.

Rang takin mihring ban chhetawh tak a rangkachak sana leh rangkachak thova siam identification zungbun chu a phelh a, chu ruang nghawnga hliam hnuhma zau tak atang chuan tuifinriat rannung hnuhma a ni lovang tih a hrethei nghal mai a. Chutah a banbun chhar chu a hmehen chuan a han chhun a, "Giuseppe Petacchi, No 15932" tih hi alo inchhu kalh a.

Bond chuan sana leh banbun chu a bun a, thlawhna ruangam chu a panphei ta a. A han enkual a, thlawhna chu a insawh zawngin a meilam chu a bung tih ava hmu nghal mai bawk a. Chutah a kawngkhar pakhat atang chuan a zu lut ta a.

Bond chuan thlawhna chhung thimzet mai chu a han chhunkual a, mitmu sen vir ver tam tak hian an lo thlir thup mai a, thil che zeuh hmuh tur a tam hle bawk. Bond chuan thlawhna dung tluan chuan a han chhuneng a, octopus tereuh te te za chuang zet tur chu thimtham lam chuhin an darh sang sang a, an rawng chu an thlak zung zung bawk a. Chung octopus rual te chu thilnung pakhat, che sup sup te pawh an ang hial zawk a ni. Bond chuan chunglam a han dakchho va, chunglamah chuan hnathawktu pakhat ruang puam chhe tawh tak chu alo lang lung lung a. A taksaah chuan octopus rual an lo uai fur a, light engah chuan an inkhawhsawn sup sup mai a, hmun kilkhawr leh thimlai apiang an chauh hlawm a.

Bond chu a thilhmuh rapthlak tak avang chuan a intipachang lui tlat a, a hmehen chuan thlawhna chhung chu a enkual zel a. Tur dahna bur, a sena intial chu a chhar thuai a, a kawnghren karah chuan a zep a. Ruang awm zawng zawng chu ngun takin a chhiar a, atom bomb dahna lai pawh chu ngun takin a en a, a rin ang ngeiin a lo ruak hiau tawh mai. Pilot thutna hnuaia bomb fuse an dahna te chu a en leh vek a, a hma ang bawkin engmah alo awm tawh lo. A ke a octopus rualin an rawn manna chu a chemte chuan a vai leh thawt thawt a, a dinhmun chu nuam a tihloh em avangin inthiarfihlim zai a rel ta a.

Thlawhna hnathawktu te ID leh thiltul tam tak la thei a ni a, mahse chulai hmun thim leh nelawmlo tak maiah chuan rei tak awm thei niin a inhre tawhlo a ni.

Thlawhna tukverhah chuan a putchhuak a. Tarpaulin khuhna atanga a vahchhuah leh hnu chuan hmanhmawh takin chunglamah chuan a hleuh chho ta a. Feet20 a vel a hleuh hnu chuan a beng a rawn na ut ut a, chawlh hmasak a tul a ni tih a hrechhuak zawk a. A beng na a reh hma chuan a han chawl hlek a, chunglama thlawhna tumna zawnah chuan a hleuh chhunzawm leh ta a. Tuichung a thlen veleh thlawhna keah chuan a inham tang a, a thawkna dawt leh cylinder chu a phelh zung zung a, a kam a thuah leh bawrh bawrh hnu chuan Leiter chuan thlawhna chhunga chuan a pawtlut ta a.