THUNDERBOLD-13

My Name Is Emilio Largo

An thlenna hotel speedboat Chrysler khawl hmang chu darkar 1 ah dollar 20 in an hmang a. Vaukam thlanglam hawizawng chuan Silver Cay, Long Cay leh Balmoral island te chu chak takin an tlanpel a. Delaporte Point chu an hel a, vaukama mel 5 vel an tlan hnu chuan Old Fort Point chu an thleng ta a. Chulai vel vaukama chengte chu hausa tak tak an ni tih an hmantua leh eng ilo an chhawp atang chuan a hriat mai a.

Thui pawh an tlan leh hmain tuipui thuk chin deuhva lawng dumpawl ding chu an hmuthei ta a. Lawng sirah chuan thirchakai pahnih a inthlak thla a, Leiter chuan, "Saw lawng saw a nalh kher mai. Inbual paha khalh vel mai mai atan ka duh hle mai," a han ti a, a faifuk zui nghal raih raih a.

"Italy ram, Messina a Rodriques ho sak anih saw. Anni chuan 'Aliscafos' an ti mai a. Lawng hnuaiah sawn hydrofoil an hmang a, a tlan tawh chuan a body saw tuichungah a inchhem kang a, a thlawk a ni ber mai. Lawng hnunglam leha a tikaltu propeller chaihvin tui a dek thei a ni. Police Commissioner chuan knot 50 vela chaka tlanthei niin a sawi nghe nghe. Tuipui thuk aiin vaukam hnaihah a hmantlak zawk. Mahse passenger 100 lai phur chungin chak tak in a tlanthei a ni. He lawng tak hi chu mi 40 vel phur tura duan ni ngeiin a lang. Hmunruak dang chu a hnathawktute awmna leh bungraw phurhna in a khat a ni. Dollar maktaduai chanve man thuak chu a ni ngei ang,"

An lawng khalhtu chuan tihian a rawn tuihnih ve bauh va.

"Bay Street velah chuan tun atanga ni reilo teah rohlu zawng turin an chhuak dawn niawmin an sawi a, chanpual neiho chu tunhnai khan an rawn thlengkim vek tawh a ni. Hmanni deuh khan a tawpna a thil finfiah turin an chhuak zankhua zak a. Exhuma leh Watlings Island lamah an kal niawmin a sawi a ni. Chulam chu Columbus-an helama Atlantic a rawn dai tanna hmasa ber a ni tih in hriat ve tho ka ring. Ragged Island atanga Crooked Island thleng deuhthaw sawn rohlu hmuh tur a awm thu sawi a ni thin a, mahse kei ngei pawhin saw lawng sawn chhimlam a pan thawm ka hre tlat a ni. Chhimchhak lam apan ni berin a lang a. An lawng hman leh an sum leh pai sendan ngaihtuahin rohlu tam tham tak awmna an hria a ni ngei ang; a tlanchhuah apiang hian pound 500 vel an seng ral ziah anga sawi a ni," a lo ti ve a.

Bond chuan, "An chhuah hnuhnun ber zan chu engtik nge ni?" alo ti a.

"Zanhnih kalta khan dar ruk velah an chhuak a ni,"

Lawng dumpawl chu an hnaihphei tial tial a, lawng sipai pakhat, lawngbang lo hrufai mek chuan a rawn hmuh veleh inbiakna ah chuan enge maw ni hi a han sawi a.  Lawng bathlarah chuan palian tak, thawmhnaw var inbel hi alo chhuak a, entlang hmang hian a rawn thlir vang vang a.

Lawnglian zawk bul an thlen phei chuan paliana chuan a kuta hmui khuap chung hian, "Enge duh in nei em ni? Appointment te in nei em?" a rawn ti a.

Bond chuan ring deuh hian, "Mr. James Bond ka ni e. New York atanga lokal ka ni. Hei, ka ukil ka rawn hruai bawk e. Mr. Largo chenna Palmyra chungchang rawn hriatchian kan duh a ni," a lo ti a.

Anmahni lo betu tur chu tunge anih Bond chuan a hrethei nghal mai a. "Min lo nghak lawk rawh u," a rawn ti a. Lawng sipai ho chu lo pui turin a hrilh a, "Lo lenglut rawh u," hawihhawm deuh hian a rawn ti a, Bond a te pahnih  pawh chu lawng sira hruizen leilawn ah chuan an chho ta a.

Thawmhnaw var ha Larbo chuan a kut pharchhuah pah chuan, "Ka hming chu Emilio Largo a ni a, Mr Bond? Anih...?

"Ani hi chu Mr. Larkin a ni a, New York a ka ukil a ni. Kei hi chu English ka ni a, mahse America ah pawh hnun chu la nei ve nual a," tiin an han in chibai a. "Ka rawn tibuai che a, a pawi ngawt mai, Mr. Largo. Mahse Palmyra chungchangah ka be duh che a ni. Nang pawhin Mr. Bryce hnen atanga i hman chhawn  niin ka lo hria a..?" a han tih zawm leh a.

Nui chung hian Largo chuan, "Ahh, a ni tak maw? Khai!! Pindan lamah i inzui lut zawk teh ang u. Gentlemen, ka lo beisei lawk lemloh che u avangin ka lo inthuamlo deuh va, min hrethiam dawn nia," a han ti luam a. Chutah amah vek chuan, "Min tlawhtu te hi chuan an lokal hma hian annrawn inhriattir hmasa deuh zel a..." a han tihzawm a, pindan lian panna alluminium kailawn ah chuan an inzui thla ta a.

An luhna pindan chu lian ve tawk tak, Mahogany thinga nalh taka thuam, a chhuata carpet senduk manto hmel tak inphah hi a ni a. Savun dumpawla chei chair a inhung thluah a, tukverh bial deuh kar atang chuan ni eng a rawn inkap lut sût mai bawk a. Pindan chu mawl hle mah se hmeichhe hnuhma a lang tlem hle thung.

Largo chuan dawhkana lehkha vel hnawlkian pah chuan, "Thu rawh u, gentlemen. Cigarette te in duh em?" a ti a, dawhkanah chuan silver a siam bawm a rawn hungchhuak nghal bawk a. "Inturte in duh tel em?" tihpah chuan kilkhata zu um inrem tlar lam chu a pan ta nghal a.

Bond te pahnih chuan Tonic láwng ringawt chu an lam a. Hawihhawm takin Bond chuan, "Hetia kan rawn chimbuai ringawt che hi pawi ka ti ngawt mai. Mr. Largo, phone in i biak theih ang tihngaihna reng reng ka lo hrelo a ni. Tukin ah ka rawn thleng chauh va. Ka cham rei hman dawn si lo va, ka hmanhmawh deuh atin a ni. Kan rawn thawn thut chhan che chu helai velah hian hmun leitur kan zawng a ni," a han ti duam duam a.

Largo chuan dawhkanah Tonic chu a rawnchhawp a, rawn kil hnaih pah chuan, "Ohh, a ni maw? Rem i hre hle mai. Hmun nuam tak mai ania sin. Thlaruk chauh ka la awm a, damchhunga awm pawh ka duh rum rum mai. Mahse thilman an chhiar to lutuk hi... Bay Street vela chengte phei chuan thilman an chhiarsang teh a nia. Millionaire ho lah an nasa. Mahse mi kian tawh lama i rawn kal hi chu a finthlak viauvin ka hria. Hmun hralh tur nei chu an awm ngei ang," a lo ti a.

"Keipawh chu chu ka ngaihdan chiah a ni; ka ukil Mr. Larkina ngaihdan pawh a ni chiah bawk."

Leiter chuan thupui fun leh inla thutak deuh hian alu a lo thing nu nu a. Bond a lam chu hawi pahin, "Thil awmdan alo zawt kual nual tawh a, thilman a to thu hlir min hrilh a, ni lawm ni?" a han ti a.

"An ti lutuk a ni. Âtkhat a che a ni ber mai. Mr. Largo, Florida aiin thilman a to zawk nia maw le. Min ruaitu tumah helaia sum peipung tur hian thurawn ka pe ngai hauh lovang,"

Largo chuan a lu a bu nghut a, chutiang lam sawithui lutuk duh vaklo niawm tak hian, "Palmyra chanchin kha in sawi a, khalam thilah khan tanpui theihna che u ka nei em?" a lo ti thung a.

"Saw hmun saw i hawh ve tho niin ka lo hria a, thuthanga ka lo hriatdan chuan reilote ah i chhuahsan tawh mai dawn ni ka hre nghe nghe. Hetiang thliarkar tereuh te a thu a darh chakdan chu i hria ang chu. I in benbelna saw an sawi danin ka duhzawng tak mai a ni a, a neitu English mi Boyce pawh a manah biak lungawi anih chuan a hralh duh maithei ni te'n ka lo hre leh zel a. Hun remchang a awm chuan va en ila ka ti deuh va, mahse i thu thu ni se la,"

Largo chu a nuisak a, a kut pharchhuah pah chuan, "Ekhai, tehlul mai. Thian duhtak, in remchan hun hunah ni zawk rawh se. Ka vahnu leh  chhiahhlawh tlem chauh an cheng a, ani lah chu a vakchhuak deuh reng bawk si. Phone ah va bia la, in va biak tur thu pawh ka lo hrilh sa ange. Hmun nuam tak chu a ni alawm. Mi hausa zawng zawngin sawtiang sawn rem hria sela a tha tur a nia," a ti ta suam suam a.

Bond chu a dingchhuak hluai a, Leiter pawh chu a tho ve vat a. "I chungah kan lawm hle mai, Mr. Largo. Tunah chuan kan kalsan tawh ang che. Khua ah te pawh kan inhmu leh mial maithei asin. Chawhluite la kildun ila a tha tur a nia," tiin Bond chuan ngaihdan hmel fe hian, "Mahse hetiang lawng tha leh nalh neih chuan vaukam lam chu i rawn kai duh zen zen pawh ka ringlo. Atlantic helamah chuan a dang a awm ve pawh ka ringlo hial mai. Venice leh Trieste inkarah tunhma khan a awm thin lo maw? Chutiang chu chanchin-bu ah chhiar tawhin ka inhre tlat a ni," a han tihzawm leh a.

Lawm tih hriat deuh hian Largo chu a han nui a. "I hredik anih chu. Italian dil velah passenger phur an awm bawk. South America ah an lei nual a, vaukam hrul vela hmanah chuan duhthusam a ni. A tlanchak tak tak lai chuan a taksa bung hrang țhenkhat in tui khu feet4 vel chauh a zu khawih thin a ni," a ti leh suam suam a.

"Chuanna lamah indaihlohna a awm em?"

"A tlangpuiin mipa te hian an thil ngaihsan zawngte hi an atchilh hlur thin a. Minute5 hun in neih chuan hruaikual che u ka va duh ve. Tunah tak hi chuan kan khat viau va. Rohlu kan zawng tihte pawh kha in lo hre ve ngei ang maw?" tiin Largo chuan Bond chu ngun deuh hian a han en a, a thusawi chu a lo nuihzat leh zatloh hriat a tum hle niin a lang. Amah vek chuan, "Mahse chu lam chu sawikai lo ila. Chutiang lam phei chu nang chuan i ring velo mai thei a, mahse hemi chungchanga ka thurualpui te chu lawngah hian an awm kim vek tawh a, hnathawktute nen phei chuan mi 40 lai kan ni. Chuti chung chuan kan tawt lutuklo tih i hmu thei ang chu," tih pahin,  a hnunglam a pindan kawng-khar lam chu kawkin a han zaizir a.

Felix Leiter chuan hreh hmel zet hian, "Ngawi teh, Mr. Bond, dar 5:00 ah Mr. Harold Christie hmu tur ini tih kha ila inhria ang tiraw?" alo ti ban chat a.

Kut vai pahin Bond chuan, "Mr. Christie chu pa fing leh fel a ni a, minute tlemte a tlai chu a hrethiam em em ang. Hun i neih chuan i lawng chu han thlir vel ka duh khawp mai, Mr. Largo," a han ti liam puat a.

Largo chuan, "Chuti chu a tha a ni mai alawm. Mr. Christie chu ka thian ve tho a ni a,  a hrethiam lutuk ang," a ti a, kawngkhar chu hawngin hma a hruai ta nghal a.

Hotelah chuan Government House atanga lokal, Dispatch Ridemn chuan Bond chu a lo nghak reng tawh a. A lehkha rawn pek chu OHMS (On Her Majesty Service) lehkhaip a ni a, colonial office atanga Governor tatur a lokal a ni nghe nghe a. Lehkha tlangah chuan 'PROBOND' tih hi a inziak a, a chhung thu inziah dan chu hetiang hi a ni.

'DAR 11:07 A I THU RAWN THAWN KHA CHHUITUR A AWM LO. KA SAWINAWN LEH ANG. HENG HMINGTE HI CHHUIZUI TUR A AWM LO. STATION ZAWNG ZAWNGIN THUNDERBOLD CHUNG-CHANGA AN REPORT CHU NEGATIVE VEK A NI. ENG NGE HRIATCHHUAH TAWH I NEIH,'

Thirhrui lehkha tawpah chuan 'Prism' tih hi a inziak a, chu chu M duhdan thlapa ziah a ni tihna a ni.

Bond chuan thirhrui chu Leiter a chu a han chhiartir ve a, ani pawh chuan, "Ka ngaihdan dikzia chu i hre tawh em? Kan chhuizui dan hi a dik zan lo a ni maithei. Nakinah Pineapple Bar-ah kan inhmu dawn nia. Kei pawhin Washington lamah lehkha ka thawn nghal ange," a lo ti a.