THUNDERBOLD-9

MULTIPLE REQUIEM

Plan Omega chu Blofeld-a ruahman ang chiahin phase-I atanga phase-III thleng chuan ala kaldik thlap zel a.

SPECTRE chuan Giuseppe Petacchi hi kum 18 anih chuan Adriatic anti-submarine a thlawk vel thin German Fighter Bomber chhuanvawr Focke-Wily 200 Co-Pilot a dah a ni tawh a. Hetiang thlawhna khalh tur hian Germany chuan pilot a duhtui hle a, Italian Air force mi leh sa phei chu an khawihtir meuhlo meuhlo a ni ber a. Khawihthei chin a an ruat tlemte zingah Petacchi hi a tel a ni.

A telna fighter bomber squadron chu tuipuia bomb sutpuah chi thehdarhtu ber an ni a. Bomb chi thar Hexogen an thehdarh tan vel tihin Allied ho chu Italy ram velah chuan an chetha ve tan tlat mai a. Petacchi chuan ngun taka thil awmdan a han thlirin at rei chi niin a hre ta lo va. An thlawhchhuah hnuhnun ber tum chuan pilot leh navigator chu an tukkhum lam atangin .38 hmangin a kaphlum a. Thlawhna chu tuipui hrul deuhthaw ah a thlawhhniam tir a, Bari lawngchawlhna ah a tum tir ta a. Thlawhna tukverhah chuan a inpe tih entir nan a kawr a zar a, RAF ho lawng lothlen chu a nghak ta a.

A thiltih avang hian American leh English ho chuan chawimawina an hlan bakah Hexogen bomb chi thar a rawn thlen avangin lawmman ah pound 10,000/- lai Special Fund atangin an sihchhuah bawk a ni.

Petacchi chuan Allied ho hnenah chuan Italian Air force a zawmtirh atanga theihtawpa Allied ho chu tanpui ru thin anih thu a sawi uar hle bawk a. Indo a han tawp chuan Italian mi German beilet ru tu 'Resistance Fighter' huaisen leh lar ber alo ni chho ta a ni.

Heta chin hi chu a nunkawng pawh a nuamchho hle a. Alitalia ah pilot in a awm nghal a, a hnuah Captain ah kaisangin, Italian Air force ah Colonel anga dah a ni leh a. A hnu lawkah NATO a tel tura tih a ni a, heta tanga reilo te ah Italian mi Advance Striking Force a tel tur thlan, mi 6 zingah a tel veleh ta a ni.

Hetihlai hian kum 34 mi a ni tawh a. Thlawhna khalha eizawn chu a ning rum rum tawh mai a. NATO invenna hmahruai tu bera tan lek phei chu a chaklo lehzual a ni. Huaisen taka hmelma su tur chuan a aia naupangte an chet a hun ve tawhin a hre tlat a ni. Air force leh NATO chhuahsan a hmingthar nena khawvel fankual chu a chak ber a. Ram hrang hrang zingah Rio de Janeiro chu inbenbel nan a it ber a. Mahse chumi chu tihlawhtling tur chuan pawisa tam tawk tak bakah 'ruahmanna' tha tak mai a ngai tih a hria.

Chu ruahmanna chu a rinloh tak maiin a rawn inhawng ta thut mai le. Chubakah sum leh passport te nen lam a keng tel vek mai lehnghal. Chu thilpek rawn sawihmuhtu chu Italian ve tho, Fonda a ni a, mahse a nihna tak chu Spectre no4 a ni. Petacchi ang mihring duh hian Versailles leh Paris kaltlangin NATO mi leh sa tam tak a lo dawrkual tawh a ni.

An thangchah an han thehchhuah chuan an awhtum ber lo phur lutuk dan chuan No.4  ngaih pawh a ti thalo lek lek zawk a. Inbumna leh phatsanna thil a awm thei em tiin SPECTRE chuan uluk takin a chhui khawmuang leh ta zawk a. Mahse a tawpah chuan an lungawi tlang ta a, an thil duh ang pawh engkim an sawiho thei ta zawk a.

Petacchi chu Vindicator Bomber Training-na a kal a, thlawhna chu hijack tura tih a ni a. Atom bomb chu sawirik chhin pawh ala ni lo. SPECTRE chuan Cuban helpawl, khawvel hriata intih lar duh angin  an insawi a. Helam pang chu ani Petacchi chuan a bengkhawnlo hle. Thlawhna chu tupawhin duh se, a duhtawk pawisa hlawhna anih dawn chuan pawi tihna a nei hauh lo.

Thlawhna a hijack fel thei chuan dollar maktaduai 1 leh passport, a duh ang thlap chu pek an tiam bakah pawisa leh thildang an hlanna hmun atanga Rio de Janeiro pan thei nghal tura tanpui te chu an intiamna a ni.

Petacchi chu inngaihtuah nasa hle mah se a thil tumah chuan a ruh bakah a hlawhtlin ngei pawh a inring nghet tlat a. Training an nih avangin pilot thutna pindan Cockpit hnunglamah chuan thutna engemaw zat kilh belh a ni a. Chung zinga pakhatah chuan thuin, a thawhpui mi 5 te buai taka chevel chu a thlir reng a.

Petacchi chuan a rolex sana chu a han bih a, a thutna bula Oxygen bawm leh hmaikawr chu a han enfiah leh a.  A iptea bur sen vir ver chu a phawrh a, a chhin chu vawi engzat chiah nge herh tur tih chu a hrechiang hle. A ak tha leh a, cockpit lamah a lut phei ve ta a.

Pilot chuan, "Seppy, hrehawm i ti lo maw?" a lo ti vat a. Pilot hian chu Italian pa chu a ngaina ru riau mai a, Bournemouth ah vawihnih lai chu an lo rui dun tawh nghe nghe a ni.

"Hrehawm lo ve,"

Eng engemaw a han zawt kual mai mai a, an thlawh chak dan leh cockpit sana chu a han en bawk a. Cockpit a awmte chu inthlahdul tak hian an awm hlawm a, an mut a chhuak deuh ni berin a lang.

Petacchi chu a dingchhuak a, lehkha leh map vel dahna chhuar hnungchhawn zawng chuan a ding a. A ipte chu zenin, a bur ah lai chu a phawrh ta zal zal a. Chutah a chhin chu vawithum chiah herhin, lehkhabu karah chuan a thlak ta a.

Petacchi chu zikmar pahin a han ham bai bai a; "Chhin hlek ka duh a ni," a ti a. Navigator chuan nui chung hian, "Chu chu Italian tawngin engnge ni?" a lo ti bauh a.

Petacchi chu a then sawk a, chhangzui ta lo chuan thlawhna hnung lamah chuan a phei leh a, a thutfel hnu chuan oxygen hmaikawr chu a vuah ta nghal a. Thil lo thleng chu a nghak ta a.

A hmanraw petu te khan minute 2 vela thawk tan mai tur ang khan an sawi ná a, mahse rin aiin a thawk chak ta zawk. Chhuar hnaih bera navigator chuan a hrawk a dawm a, thaw ri bawrh bawrh chung chuan a tlu ta a. Radio operator chuan a ngaihthlakna chu dahin han enfiah a tum a. Penhnih a pen chauh va, ani pawh chu a tlusawp zui veleh ta mai a. Midang 3 te pawh chu an thawk a buai ta der mai bawk a. Co-Pilot leh Flight engineer pawh chu an thutna atangin an letthla tawp a, chezui tur an awm ta lo. Pilot chuan harsa ti takin a chunga microphone chu a han ban a, fiahlo tak hian engemaw chu a han dawi hman hram a. A ding uaih a, inher pahin Petacchi awmna lam chu a han en a, mitmu pawngpur chuan a tlu ve ta a.

Petacchi chuan a sana a han bih a. Tur a herh hawn atang khan minute 4 chiah ala ral a. Minute 1 a han nghak leh a, chumi hnu chuan thelret kutkawr bunin, a hmaikawr chu nghet takin a dawm a. Cockpit ah chuan kalin, a damdawi bur te kha a va chhar leh a, a herhphui leh ta nghal a. Thlawhna chu automatic a a dah zet hnuin, cockpit chhunga tir chu a reh thuai theihnan boruak lo lut chu a herhmil nghal a, chutah a thutna lama kir lehin, minute 15 chhung chu a nghak leh ta a.

Tur hnathawh hun chhung kha minute 15 vel a ni ang tiin an hrilh na a, fimkhur thu hlaah minute 10 vel a han nghak leh a. Chumi hnu chuan hmaikawr la vuah reng chungin cockpit ah chuan ava lut leh ta a. A thawhpuite ruang chu thutna pindan lamah chuan a hnukphei ta hlawm a. Cockpit a thenfai hnu chuan a ipte atangin darthlalang bur, a chhunga chini ang tak tak awmna chu a phawrh a, chu chu chhuatah chuan a bun ta a. Ngun deuh hian a han en a, a thil bunchhuah chu a var dan ngai a ala var reng avangin a hmaikawr chu a phelh ta a.

Thilrim hriat tur engmah alo awm tawh loh avangin a lungmuang ta hle mai. Thlawhna chu feet 32000 ah a thlawh hniamtir a, thlawhna dang ho kawng zawh chinah chuan hmarthlang lam hawiin a thlawhtir ta a.

Vindicator thlawhna chu zan boruak sang takah chuan a thlawk liam vut vut zel a. Petacchi chuan Gyroscope te chu a han endik a, thlawhna tui pai chu a kal dik leh dikloh te a rnfiah vek bawk a. A duhtawka thlawhna khawl hnathawh dan a enfiah hnu chuan pilot thutna ah chuan a thu a, a hmalam hun tur chu rilru nuam deuh hian a suangtuah zui ta a.

Cockpit chhuata headphone pakhat chu a rawn chiau ta vawr vawr mai a. Petacchi chuan a sana chu a han en a, Badcombe Air Traffic Controller ten rawn biakpawh an tum a ni tih a hriattheih mai a. Darkar chanve tin a biak tur tih kha alo mangnghilh der tawh a ni. Air controller a hnathawkte chu an ngaih a thatloh avangin Bomber Command leh Air Ministry an hriattir mai angem? Nge, an lo nghak hlek zawk ang le? A hmasain Southern Rescue Centre chu an bepawp phawt anga, chu chuan darkar chanve vel hun a awh ngei anga. Chumi chhung chuan anin Atlantic chungah hlate khua a lo thleng hman turah a inngai a ni.

Headphone ri chu a reh ta a. A thutna atanga thovin radar chu a han en a, radar hmaia thil phe zeuh zeuh chu a hnuaia thlawhna a lehpelh ho an ni tih a hre mai a. Chung thlawhna te chuan amah chu an radar atang chuan an rawn hmu ve thei angem le? Amaherawhchu sumdawng thlawhna te hi chuan hmalam leh chunglam hi an hmuthui thei tehchiam lo tlat mai a. DEW hawlphak chin a thlen hma chuan hmuh anih a rinawm lo va. DEW lamin an hmuhpalh hlauh pawhin sumdawng thlawhna, a kawng zawh sual deuhvah an lo ngai mai awm bawk si a. Lungmuang takin a thu ta siai siai a.

Vindicator chu darkar 4 lai a thlawk ta. Darkar 1-a mel 600 a chak a thlawk tan chuan thui tak thlawhna hun a awm a ni.

America khawmual vaukam chu radar hnuaiah chuan alan a hun tawh. Petacchi chu a tho va, radar chu a han en a. Mel 500-a hla vaukam chin chu alo lang thei tawh a. Radara lolang chu Boston leh Hudson River vel a ni tih a hrethei a. Reilote chu khawchhak-thlang lam hawia thlawhna chu thlawhtir a hun tan ta a ni tih pawh a hria a ni.

A thutnaah chuan a kir leh a, a chart chu a va bih a. Thlawhna khalhna chu dawmin a hma a sana de sep sep mai en chung chuan thlawhna chu a herkual a, reilo te ngil taka a thlawh hnu chuan auto-pilot ah a dah a, chhimlam hawiin a thlawk ta a. Darkar thum vel chauh thlawh a ngai tawh a, tum dan tur lam ngaihtuah a ngai tawh tih hriain a lehkhabu te chu a keu ta niap niap a.

Dinglamah Grand Bahamas eng a awm anga, veilamah Palm Beach a awm ang. No1 yatch atangin thlawh dan tur hriattirna dawng turin inpeih rawh. Signal chu Dot-Dot-Dash, Dot-Dot-Dash a ni ang. I thlawhna tuipai la bang zawng chu thlauh la, minute15 vel ila neihah feet 1000 vela hniamah thlawk ang che. I thlawhdan tihmuan lehzual nan air breaks hmang rawh. Eng sen i hmuh veleh i thleng dawn tih hria la, i tum dawn hian thlawhna chu 140knots bakin a chak tur a ni lo. Tui thuk lam chu feet 40 vel chauh a ni. Thlawhna atanga chhuahna hun i ngah ang. No1 lawngah hruai i ni ang a, a tuk dar 8 ah Miami pan turin Bahamas Airway emaw Real Airlines emaw i hmang thei bawk. No1 chuan  pawisa chu dollar 1000 hlirin emaw, Travellers Cheque in emaw a pe ang che. Hei bakah hian passport thar, Enrico Valli Company, Director chu a pe bawk ang che.

Petacchi chuan thlawhna sana ah chuan a awmna lai, pan lam leh thlawhchak dan chu a han en leh a, darkar1 chauh thlawh a ngai ta. Thla bial zan anih avangin a hnuailam feet 10000 vel a chhum var chuai mai pawh chu chiang takin a hmuhtheih a ni.

Petacchi chuan thlawhna pawnlam a eng chu a tihlum vek a. Thlawhna tuipai chu a han en a, thlawhna chuan gallon 2000 lai mai chu a lo la pai a. Mel 400 vel thlawhnan chuan gallon 500 emaw chauh a mamawh tawh avangin thlawhna tui reserved pai release na chu a han herh a, reserve bawm chu a tui gallon 1000 zet nen chuan chhum karah a pilbo ta. Tunah chuan minute 20 chauh thlawh a ngai ta a, thlawhhniam a hun tan ta a ni.

Thlawhna chuan chhum chhah tak chu a tawn tlang a, a thim mup mai. Hnuailam hla takah chuan North leh South Bimini chu a langthei ta a. Tuipui inchhawk var erawh hmuh tur a awm lo. America vaukam a Vero Beach a khaw awmdan puangtuin a puandan ang chiah chuan khua a thiangin thli thaw pawh a nep hle mai a, tuipui pawh chu thirphek ang mai hian a lang mampurh mai.

Petacchi chuan No1 in signal a rawn thawnna tur channel 64 chu a herhnung nghal a. Mahse atira engmah a man nghal mailoh avangin a mangang hman deuh va, mahse reilo teah fiahlo takin Dot-Dot-Dash chu a man thei ta.

Thlawhhniam a hun ta tih pawh a hria a. Thlawhna chu a thlawhmuantir a, a bir zawngin a thlawk thla ta a. Chutah altimeter ah chuan feet 2000 vela sang a thlawk angin a lan takah chuan a ngilin a thlawk leh ta a.

No1 lawng atanga signal pawh chu a ring tawh hle a, reilote ah a hma mel5 vel ni ngei tura hla a eng sen chu a hmu ta a. Petacchi chuan thlawhna chu tuipui lam hawi chuan a tihniam leh tial tial a. Dim leh uluk takin a khalh zel a. An tlahniam tial tial a, feet 500...400...300...200...100...

Fiahlo takin tuipuia yatch ding pawh chu a lang thei tawh a. Eng chu thlawhna hmazawn chiah a awmnnia alan avangin va sut mai pawh a hlauhawm hle. Mahse Petacchi chuan thlawhna chu a tihniam tial tial zel a.

Thlawhna hnuai chu a ri dawt a, Petacchi chuan a hmawr lam chu a tisang leh vat a. Thlawhna chu a kang dawrh a, a tla leh a, a tlan ta zur zur a.

Petacchi chuan thlawhna khalhna a dawmlai chu a thlah a, a bul tukverh atang chuan pawnlam a tuipui chu a thlir vel a. Tuiah a tumfel der tawh a ni tih a hriat chuan a thawhuai a. Tunah chuan fakna leh lawmman lak chiah a hmabak ta.

Thlawhna hnuailam chu a ri sur sur a, thlawhna meilam chu a insawhna lama a auh avangin a ri ruak ruak bawk a. Thlawhna hnung lamah chuan a lut phei leh vat a, tui lolut chu feet khat a sang a lo ni der tawh mai. A thawhpuite ruang pawh chu tui chuan a chim tawh a, tuiah chuan an lang tan ta. Petacchi chuan thlawhna chunglam pang sira emergency exit chu a hawng a, thlawhna thla atang chuan a penchhuak ta a.

Motorboat hian a awmna chu alo thleng phei tep tawh a. A chhungah chuan mi 6 an chuang a. Petacchi chuan phur deuhva a ban lo vai pah chuan a han en a. Lawnga mi pakhat chuan a ban a rawn vailet a. An vai chuan nui hmelpu an awm lo va, an tak run hlawm a. Pa fimkhur leh puithu ve tak nia a inhriat avangin Petacchi pawh chuan thu tak hmel put timin a inhmuam up ve nghal a.

Lawng chuan thlawhna sir chu a rawn thleng phei der tawh a. An zinga pakhat chu thlawhna thlaah chuan a rawn lawn a, Petacchi chu a rawn pan phei ta a. Chupa chu pa tawi, sa nghet nelh nawlh tak mai, mitmeng fiah zet mai hi a ni a. Fimkhur tak hian a rawn phei a, a kut lehlam chuan a lawnghren a dawm a.

Petacchi chuan hlim leh phur tak mai hian, "Chibai, hei, thlawhna tha tak ka rawn hawnsak che u a nih hi," a han ti a. "Hetah hian in lo dawng tih hriatnan lo ziak rawh le," tih pahin a kut lehlam chu a han lekchhuak a.

Chupa chuan a ban chu nghet takin a lo man a, a phih ta thut mai a. Petacchi chu a dak awrh mai a. Thla eng lam a hawilai chuan a khabe ah chuan stiletto hriam tak mai chuan a thluak pawh zawk hian a rawn thil chho ta zawk mai a. Petacchi hriat hnuhnun ber chu maktihna leh eng deuh chuai a ni a, tuipuia a tlakthlak lai pawh hre tur a awm tawh lo.

Tualthattupa chuan Petacchi ruang atanga a chemte phawi pah chuan a'n hrufai leh nghal a, a paiah a khung leh ta a.

Lawngleng lamah chuan a phei a, a kut zungpui a han tipir ta vah mai a. Motorboat a chuang dangte chuan tuichhunga hman chi oxygen bur chu an pai mawlh mawlh a, an inpeih hnu chuan an zuangthla ta nghal a. Chutia an zuanthlak hnu chuan an mechanic chuan tuichhunga hman chi eng lian tak hi a thlakthla zui nghal a. A han on chhin a, thlawhna pil fel tawh chu tuipui chhungah chuan a lang eng ruai mai a. Chutah motorboat chu hnungtawlh tir hlekin, eng pekchhuahna wire chu a thlakbelh nghal zel bawk a.

Thlawhna pil mekin a hip phakloh chin, yard20 vela hlaah lawng chu a tiding ta a. A khalhtu chuan a ipte atangin camel cigarette bawm a phawrh a. A laiah bungin, a lehlam chu a bengah a zep a, a bung lehlam chu a tankai ta a.