THUNDERBOLT-8

Big Fleas Have Little Fleas 

Bond chuan, "Ka pu, chhuizui theihna awm thil engnge awm reng reng?" a han ti a. 

"Chutiang lam chu engmah kan neilo ang a ni. Tumahin heta rawn inziak SPECTRE ho hi kan lo hre ngailo va, hetiang lam pawh deuh hi Europe ah chuan an awm ngeitih kan hria a, an hnen atanga thil lei pawh kan lo nei tawh a. Hemi chungchangah hian American ho pawh an fihlim bik chuanglo. French Heavy Water Scientist, nikuma an ram tlansantu pawh kha an that niawm a sawi a ni a, hemi chungchangah hian a titu tu hmingmah sawilan a ni rih lo. RAdio kaltlang veka thiltih a ni a, lehkhaa an rawn ziah 16megacycle kha anmahni biakpawhna awmchhun a ni. An hna hi an thawktha hle a, France Intelligence Deuxime chuan an rawihman pawisa thingrem khat zet chu Nl Michelin Rd ah an hnutchhiah a, mahse chungho chu SPECTRE an nih leh nihloh hriat a ni lo. American nena kan indawr pawhin an che felfai thei hle a, mahse kan mirawihte aiin an hnathawh that leh thatloh kan ngiahtuah zawk thin a, chuvangin kan va dawrte hi chiang takin kan hre ngailo a ni. Pawisa kan seng hnem thin hle a, mahse a na kan ti ngailo a ni. Tun thilah pawh hian kan lo dawr thinte kha an lo nih reng phei chuan holam taka lakzam mai chi chu an ni hauh lovang. Hei hi Prime Minister pawh ka hrilh tawh a, lehkhaa an rawn ziah ang khan thlawhna leh bomb pahnih chu a bo ngei a, an rawn ziah kha a dik vek a ni. Thlawhna bota Vindicator kha Atlantic chung Ireland chhim lama NATO Training thlawklai a ni a..." tiin M chuan a hma dawhkan a file chhah tak chu a keu va, a duhlai a keufuh hnu chuan tihian a sawi chhunzawm leh ta a. 

"Aw, darkar 6 thlawk tur an nih hi. Bascombe chu dar 8:00 ah an chhuahsan a, thlawhna a thawk mi panga te chu RAF (Royal Air Force) mi leh sa an ni a, NATO observer chu Italian mi Giuseppi Petacchi a ni. Ani hi airforce a Squadron Leader a ni. Tunah hian a chanchin ngun lehzualin an chhui mek bawk. NATO-a pilot thate chu Vindicator khalhdan zir tura rawn tirh reng reng an ni a. Hetiang thlawhna hi NATO chuan hmunhla beih nan hman an tum ni ngei tur a ni. Thlawhna chu radar a chhuizui reng a ni a, feet 40000 a sang thlawkin Ireland thlanglam tuipui a thleng a, chutah chuan feet 30000 ah tlathlain Trans-Atlantic a thlawhna dang thlawkte zingah a bo ta daih mai a. Bomber Command chuan biakpawh an han tum ngial a, mahse an rawn chhang theilo nge, an chhang duhlo zawk;an reh ta hmiah mai si. A tirah chuan Vindicators chuan thlawhna dang a su emaw an ti a, rilru pawh a buai hman hle. Mahse thlawhna neitu eng company mahin buaina an neih thu an sawi bawk si lo. Thlawhna chu a bo hlen hmak mai a, a tawpna a ni ta der mai a ni," 

Bond chuan, "American ho chuan an DEWs (Distant Early Warning System) ah an man lo vem ni?" a lo ti ve bauh va. 

"Ni e, chulam pawh chu kan zawt ngei mai a, an DEWs in a lo man thawi dan chuan Boston chhaklam mel 500 velah thlawhna pakhat chu chhimlam hawiin a thlawk niawm tak a ni. Mahse chulai pawh chu Montreal atanga Gander leh Bermuda bakah Bahamas leh South America lam panna kawng ber anih avangin thil hriatfiah tak tak a har a. Dews enkawltute pawhin BOAC emaw Trans-Canada thlawhna ah an lo ngai deuh a ni." 

"A landan maiah chuan thil an ruahman fel hle a nih chu. Thlawhna chuan Atlantic tuifinriat a thlawk kawiin Russia lam a pan thei angem?" 

"Thei e, chhimlam pawh a pan daih thei. Khawmual pahnih (USA&Britain)-te radar-in a man phakloh chin chin mel 500 vel laia zau a awm a. Thlawhna chu rawn thlawk kawiin rawn thlawhna kawng ngai zawhin Europe ah a rawn kir daih thei bawk. Hemi titur hian thlawhna kawngbik pathum lai zawhtheih an nei a. Chutiang chuan lo tita se, hriat an harsa viau ang. A nihna takah chuan he thlawhna hi khawvel khawi hmunah pawh tunah hian a awm thei reng a ni, chu chu kan buaina ber pawh a ni ta," 

"Mahse thlawhna lian tak a ni a, a tumna tur pawh special deuh tak a ngai dawn a. Chutiang tiat tiat thlawhna chu thuptheih a ni dawn em ni?" 

"A ni ngawt mai. Chu chu thil chiangsa a ni. Chuvangin RAF te chuan nizan zanlai vel khan khawvela an thlawhna bo tum theihna awm ram hrang hranga mite an finfiah kim vek tawh a, an hlawhchham chiang hle. Mahse CAF chuan thlawhna chu thlalerah pawh a tum thei a ni an rawn ti ve leh bawk. Tui pawnlang deuh leh hmun zawl deuhvah te a tumlui a ni maithei bawk." 

"Chutiang hmuna insawh dawt khawpa a tum chuan a thilphurh chu a tipuak mai lovang maw?" 

"Puak lovang; Puak thei tura siam an nih hma chuan a hlauhawm lo a ni. Amah lawng ringawta thlak pawh in a hlawhawm hek lo. Kum 1958-a North Carolina, US a B-47 in a thlakpalh pawh kha a Atom Bomd puak lovin a kep, TNT chauh a piak a ni. Plutonium chu chutiang mai a puak chi a ni lo a ni," 

"Chuti chu SPECTRE ho chuan engtinnge an tihpuah tak ang?" 

M chuan a kut pahnih chu a pharh a, muangcharh hian, "Chu chu War Cabinet Meeting ah an sawi nghal a, kei chuan tun thlengin ka la hrethiam meuh lo. Mahse Atom bomb hian bomb dang an deuhna a nei. A hmawr lamah TNT a awm a, a mawng lamah Plutonium a awm thung. An pahniha inkar kawrawngah chuan a tipuaktu tur an dah a, bomb in lei a han den khan chumi chu a puak a, chumi chuan TNT a tipuak leh a, tichuan Plutonium chu a puak ta thin a niawm e," a ti ta a. 

"Chuti chu bomb tipuak tur chuan a rutu te chuan an thlak a ngai kher tihna a ni maw?" 

"Ni chiahlo. Tipuak tur chuan physicist thiam tak an awm a ngai. Bomb hmawrlam chu verhthlawnin TNT tipuaktu turah chuan hun bi tiama puak mai thei turin an siam ang a, tichuan bomb chu thlak kher ngai lovin an tipuak thei mai dawn a ni. Bomb lah chu a lianlo riau mai lehnghal a, Golf bag lethnih vel chauhva lian a ni. Mahse a rit reuh hle thung. Car hnungah dahin, car chu khuaah dah ta la, bomb chu tinung la. Darkar engemawzat inthiarfihlimna hun i nei thei a ni. Mahse a tlem berah 100metres tal i thlen hman a ngai ngei ang," 

Bond chuan cigarrete dang a phawrh leh a. An thiltawn chu anmahni chauh ni lovin khawvel pum a intelligence hovin a thlen an rin leh hlauhthawn ruk a ni a. Thiamna sang zelah chutiang bomb chu khawilaiah pawh tupawhin an la kam mai mai thei dawn a ni; han beihlet dan tur avang hle mai bawk si. Chinchang hreho an dik anih si chuan ram tereuhte pawhin awlsam tak takin atom bomb chu an la siam thei dawn a, tunah phei chuan a siamdan lah chu thuruk a ni tawh bawk si lo. Tun hi hetiang ralthuam hmanga Blackmail an tawhna hmasa ber a ni a. SPECTRE te hi dan an nihloh chuan scientist tam tak rilru sual hrim hrim leh misual pawl lian deuh chuan entawn an tum mai ang tih hlauhawm tak a ni. Huntiam ral hmaa dan an nihloh chuan an phut ang pawisa an pek a ngai ngei ang."

Bond pawh chuan a ngaihdan a han sawi zung zung a. 

"I thil sawi chu engtizawng pawh a han thlirin a dik a ni. Mahse engemaw thil diklo a awm hlek chuan President leh PM te chuan an hna chu minute 5 pawh an thawkzui hauh lovang. Engpawhnise pawisa chu kan pe emaw, pelo emaw a tawpna chu duhawmlo tak a ni dawn hrim hrim mai. Chuvangin he thil titu te hi zawnchhuah a, an thiltum hi hlawhchhamtir ngei ngei an ngai a nih chu. Hemi kawngah hian PM leh President te ngaihdan a inang chiah. He operation hi THUNDERBALL vuah a ni a. Khawvel puma kan intelligence pawl hrang hrangte chu chechhuak tura hrilh nghal an ni. A tul angin thlawhna, lawng leh tuihnuailawng thlengin a tul ang ang a hman tur a ni a, pawisa pawh tam lua awm lovin hman theih a ni bawk. He thil buaipui tur hian War Cabinet chuan War-ROOM leh Staff thlanbik a nei fel vek tawh a, anni hnenah hian kan thil hriat zawng zawng chhunkhawm tur a ni. Chutiang tho chuan American ho pawhin hma an la a, thu a putru palh tur a ni bawk hek lo. Tin, thlawhna leh a bomb phurh bo ta chu politics a buaina a thlen vanga hma la ve ang chauhva thu thehdarh a ni bawk. Lehkhathawn lolut hi thup tlat a ni a, thil chhui ngai zawng zawng chu Scotland Yard, FBI, INTERPOL leh NATO intelligence pawl hrang hrang ten a theih anga ulukin an chian dawn a ni. Hengho hnathawh hi thlawhna zawn nen chuan a inpersan daih dawn a, a inkungkaih tih an hre tur a ni lo. M15 chuan thlawhna a hnathawk leh Italian Pilot chungchang chu an chhui ang a, keini hian CIA nena tangkawpin khawvel pum kan dap dawn a ni ringawt mai. CIA hotu Allen Dules chuan a mite a tam thei ang ber a rawn tir a, kei pawhin chu chu ka tum a ni. Tunah hian kohna ka thawnchhuak zo tawh a, an lo thlen hun nghah chu kan tihtheih awmchhun a ni ta rih e." Bond chuan cigarrete tlawn thumna chu a han tan leh a, engto awm lo deuh hian, "Kei enge ka lo tel ve na tur, ka pu?" a han ti a. 

M chuan Bond chu hmu ta thut niawm tak hian a rawn en a. A chair chu a tivir a, pawnlam a thlir leh ta a. 

"He thil hi ka hrilh vek mai ang che. PM hnena ka thutiam bawhchhiatna erawh chu a ni e, 007. Tumah hrilh lo turin ka intiam vek lehnghal a, mahse engemaw rindan ka neih avangin tha ka tih angin ka kal ta mai a ni e. Ka ngaihdan bawhzui tur chuan mi rintlak tak ka thehchhuah a ngai dawn. Kan buaina a thil han chhuizui tur thil awmchhun nia ka hriat chu DEW tgil hmuh kha a ni. A innghahna tlak lemlo tih chu ka hre na a, mahse thildang engmah kan nei miau si lo. Thlawhna chu Bernuda leh Bahamas lama kalah ka han ngai chin a, chumi hnu chuan Western Atlantic Map ka han en ngial a. SPECTRE ho rilru tur te ka han dawn a. An zingah pawh hian a hotu ber chu an awm ngei dawn a, ka rindan chuan loh theih lohva Bomb hman an tum anih chuan Europe aiin America an hman ka ring zawk a. A chhan pakhat chu European ho aiin American te hian Bomb an hlau zawk a, vau pawh an nuam zawk ngei ang tih a chiang a ni."

"Bomb hmanna tur pound 100000000 chu Europe aiin America ah atam daih zawk a, chubakah SPECTRE ho hi an lehkha rawn ziah danah khan European an nih ngei a rinawm a, an lehkha hman kha Dutch ho siam a nih kha. Chutiang zawnga thil han chhut chuan Europe aiin America an target a rinawm zwk a ni. Chutiang zela thil han chhut chuan America vaukam vela Radar network a that em avangin thlawhna chu America emaw, an vaukam emaw ah chuan an tum a rinawmlo a ni. Chutianga thlawhna tum theihna tur hmun hnaivai ka han thlirkual leh a, Bahamas thliarkar lai bawr khu ka ringhlel ta tlat a ni. Heng thliarkar tam takte zinga engemawzat hi ram ruak, luahtu neilo an ni a, henglai tuipuite hi thliarkar an inhnaih hlawm em avangin a pawnlang hlawm hle mai a, radar awmchhun pawh hlui tak tak leh hna thawk zim tak tak te an ni nghe nghe. Chhimlam han thlir ila, Cuba, Jamaica leh Carribean te lah chu target atana tihtlak an awm bawk si lo. America vaukam atangin a hla lutuk reng reng a, mahse Bahamas erawh chu America khawmual vaukam atanga lawng chak taka darker 6 vel kal chauh a ni," 

"I ngaihdan chu a dik anih chuan ka pu, SPECTRE chuan engah nge kan PM ni lovin US President hnenah lehkha an thawn zawk loh?" tiin Bond chuan a rawn pawtchat a. 

"Fimkhur thu hla a niang chu, min bum an tumna ki vek a ni e. Chubakah a theih anga nasa a an thil buaipui hian nghawng neihtir an tum a ni. Thlawhna bo hlima lehkha kan dawn zui zat chuan min nghawng hle ang tih pawh an hai lo a ni. Pawisa pawh kan sihchhuah nghal mai an ring te pawh a nit a ve ang. A tul ta thut a, target no1 chu beih a ngai anih pawhin an tan chuan fimkhur hle angai ngei dawn a, an awmna pawh thui tak chu a chhuichhuah theih ngei ang. Pawisa dawn vat a, theprelh thuai chu an duh dan a ni dawn a. Bomb hmang duh deuhthaw a tun ni6 chhunga kan nawr tawm theih chuan an awmna pawh kan hrechhuak hman thuak mai thei. Ka beiseina leh rinna chu I chungah ka nghat a ni," M chuan a ti ta hlawl mai a. 

Chutah Bond chu en vang vang chung hian amah vek chuan, "Sawiduh I nei em? I neihloh chuan che chhuak nghal mai la a tha ang. Tuna tang hian zanlai a BOAC thlawhna, New York lam pan turah chuan I chuang thei vek tawh. RAF Canberra Bomber in kal mai la ka han duh deuh va, mahse mi mit la lo thei ang bera chet a tha zawkin ka hria. Tlangval hausa tal, Bermuda thliarkara ram leitur zawng angin I khawsa anga, I duh ang angin I che thei dawn a ni. Sawi duh I nei em?" a han tihzawm leh a.

Dinchhuah pahin Bond chuan,

"Awle, ka pu. Russia ram lamah tea wm daih ila te ka ti rum rum mai. He thil hi pawl tenau deuh ho buaipui chi a niin ka ring lo. Russia ho chetdan a ang riauvin ka hria. Thlawhna leh bomb an enchain duh avangin min bum nan SPECTRE tih vel hi an rawn phuahchawp mai mai pawh a ni thei. SMERSH ho kha la ding sela chuan an inrawlh ngei ka ring nghal sak ang. He thil hi an chetdan nen a dang vak tlatlo. Nassau-ah chuan tunge ka zuk kawppui ang, ka pu?" a ti a. 

"An sawrkar chuan I kal tur hi an hre tawh a, polive pawh an nei tha ve viau. CIA ho pawhin mifel tak tak an tirh ve tho ka ring a. Keini aia inbiakpawhna hmanrua an neihthat zawk avangin an ta ring mai ila, mahse Cipher Triple X khawl hi chu ken gang che. In thil zu hriat zawng zawng hriat ka duh a ni," 

Bond chu pawnah a chhuak ta a, tun tuma a hna thawh tura an lo ruat hi a thawh tawh a zawnga hna lianber niin a hre nghe nghe a ni. Main Building atang chuan Cipher Machine bag leh movie camera man to zet mai chu a khaichhuak ta a.

Kawng sira Volkswagon car chhunga lo thu chuan a zakhnuai kang, dam hlim a hiahlai chu a bansan a, a zakhnuaia .45 silai ngul sei chi a vawi sawm na atan a han sawithawl leh a. Car chu a tinung a, a gear a han thlak a. A awmna chu Bond-a Bentley car hnunglam yard 20 vela hla a ni. Bond-a lo chhuahna chu eng in nge tih pawh a hre lem lova, Shrubland-a receiptionist hnen atang khan Bond-a chenna address chu harsalo takin a la thei mai a. Brighton hospital a chhuahsan veleh Bond chu ngun takin a chhuizui nghal a ni. Chuvanga a car hmanlai pawh chu hming lem hmanga hawh a ni. A hmabak a hlen zawh a London Airport panding nghal a Europe lama kal a rilruk a ni. 

Count Lippe hi pa danglam ve deuh a ni hrim hrim mai a. A phuba lak tur chuan a rilru a kap hle bawk a ni. Amah hi pa rothap leh ngaihdamna neilo chi a ni a, tunhma pawhin atana mi hnawksak tam tak te hi a lo dahtha tawh thin a ni. A thiltih chu SPECTRE lam pawhin an hrechhuak anih pawhin an sawisel vak a ring heklo. Shrubland-a an inbiakna a a hriatthawi atang khan a nihna an hrechhuak deuhthaw tih pawh a hrenghal mai a. Red Lightning Tong mi leh sa a nihna kaltlangin a nihna ryk tak pawh an hrethawi tawh a ni tih a hria. Chuta tanga SPECTRE chhui thlen chu thil awlai tak ni lo mah se, Count Lippe, Sub-operator G chuan nihna laihlan a nih laklawh tawh chuan thil a inkahpup chaw duh hle a ni tih a hrechiang vet lat. Chu mai bakah tun hi chu a mimal thil, phuba a ni a, ani hian thungrulh ngei a tum tlat a ni. Bond chu a car ah chuan a lut a, a tlantir ta a. Count Lippe pawh chuan a car chu a tlawhlir ve ta nghal a. 

Kawng lehlam, Volkswagon hnunglam yard100 vela hlaah chuan SPECTRE no 6 chuan a tarmit chhah tak chu a bun tha a, a Triumph 500cc chu a tlawhnung a, a rawn tlantir ve lehnghal a. Tunhma a DKW Test Rider s lo nih tawhna avangin zei leh hnehsawh takin car dang tlan ve ho chu a rawn pel ta puat puat a. Volkswagon hnung lehlam, driver rear mirror atanga kangthei lo lam yard10 vel ah chuan a tlan phei ta a. Sub-operator G-in Bentley car a um chhan chu a hre lova, Bentley ah chuan tunge chuang tih a hre nahek lo. A hna chu volkswagon khalhtu thah chu a ni ringawt mai. Grenade lianzet hi a han phawrh a, he grenade hi sipai ho hman thin let a lian a ni lehnghal a. A hma a traffic tlandan chu ngun taka en in a tana tlanchhiat na tur hun remchang chu a thlir ran bawk a. Sub-operator G pawh chuan chutiang tho chuan hun remchang a thlir ve ran mai. 

A hmalama car tlan chu an khat deuh ta tih ah chuan a car chu a tlanchak tir ta thut a. A kut dinglamin a silai ngul sei chi chu a phawi a, reilote ah Bentley car hrul chiahah chuan a tlantir ve ta a. A mi kahtum pawh chiang takin a hmu thei ta. Hmalam chu a thlir leh zawk a, a silai chu a lekkang ta a. 

Bond chuan Volkswagon rawn tlan ri a hriat chuan a melh phei vat a, chu chuan a nunna a chhanhim ta a ni. Silaimu hmasa zawk chuan a khabe awmna tur tak chu a rawn tawntlang a, a car chu tlanchak tir sauh phei se chu a muhnihna chuan a rawn fuh ngei ang. Car brake chu a rap zawk a, a kun zui nghal avangin a car steering horn-ah chuan thidang thelh khawpin a zu intauh va. Silai vawithumna puah hun awm vel chiahah chuan silai nilo, thildang a rawn puak ta dur mai. Bond-a car darthlalang, silaimu den khik hrup tawh chu a tlakeh huk mai a. Bentley car chu a ding tawh a, car dang ho pawh an ding ri ruak ruak hlawm a, au ri leh te riin a zui nghal bawk a. Bond chuan a lu han thing a, muangchangin a dakchhuak ta a. 

Volkswagon chu a car piah lawkah chuan a saisir hian a lo hut mai a, a ke pakhat pawh a lola vir char char mai tih chu a va hmu a. A chung zawng zawng a bo vek tawh a, car kawngkhar chhunglam leh pawnlam deuhvah chuan mihring niawm tak hi pherh zet mai hian a lo thi nuai mai bawk a, car engine chu a kang hluah hluah mai bawk a. 

Mi an rawn pungkhawm nghal luai luai mai a, Bond pawh chu a car atang chuan a chhuak ve ta a. "Tawlhkir rawh u, petrol tankey kha a puak tep ang" tiin a han au tuar tuar a. A sawi zo chauh tih chuan a puak ta dur mai a, a khu pawh a dum nghal nuk nguk mai. Car chu a kang nasa zual sauh va, Bond pawh chuan hmanhmawh takin an HQ lam chu a pan ta nghal a, a ngaihtuahna chu a vak kual nasa hle mai. 

Chu thilthleng avang chuan a New York lam oan tur pawh chu a khawtlai phah ta hle a. Police ho chuan motor leh mihring ruang la bang chu an lakhawm a, mahse a darh hneh em avangin cara chuang chu tunge a nih hriat ngaihna reng reng a awm lo. A pheikhawk, silai, kawr them leh sam tlemte bak lakkhawm tur a awm meuh lo a ni. 

Car neitu company lam chuan chu car rawn hire tu chu tarmit dum bun, a driving license-a Johnson tih inziak bakah pound 15 tlang hlir rawn hmang a ni tih bak engmah sawitheih an nei hek lo. Car chu ni3 kalta khan karkhat atana hire a ni a. Kawtthlera mi veivakte chuan motor cycle-a mi pakhat, chak taka tlan chu an hmu a, mahse a cycle hnunglamah chuan number plate a intar lo va; Baker Street lam panin chak takin a tlan tih erawh an hre fur a. Tarmit chhah tak bun, pa valai tak a ni tih chauh an sawi thei a ni. 

Bond pawh chuan Volkswagon khawlhtupa hmel chu a hmuh tlatloh avangin police te chu puih ngaihna a hrelo hle mai a. Car tukverh a kut leh silai rawn lawrchhuak chauh kha a hmuhtheih chhun chu a ni. Secret Service ho chuan an thil chhuina report chu peve turin an hriattir nghal a, chu report chu THUNDERBALL War Room-a pelut turin M chuan thu a pe a. 

M chuan Bond chu a hmu leh zawk a, a tunhma thiltawn engemaw avanga chu thil chu rawn irhchhuak a nih a rin thu sawiin, Bond chu theihnghilh nghal turin a hrilh a. Operation Thunderball chu a pawimawh ber a nih avangin Bond chu liam vat turin a hrilh a. 

An office building, Bond-an a chhuahsan chuan ruah a sur hlek a, in hnunglam motor dahna a mechanic ho chuan a Bentley chu an lo buaipui mawlh mawlh bawk a. a darthlalangte chu an thlak a, insurance company pawh an phone ta nghal a. Truck, thirtlawn phur a hnaihpalh lutuk avanga vanduaina tawk ta angin a insawi a. A haw a, a inbual zawhin a thuam ken tur te chu uluk taka suitcase-a a dah hnu chuan choka ah a lut phei ta a. 

May chuan engemaw sawi leh mai tum hmel a put avangin Bond chuan a kut a phar vat a, "Ngawiteh, May. I lo sawidik zawk daih mai. Carrot tui tihvel ngawt nen chuan hna hi thawh theih a ni lo. Darkar khat velah ka thlawkchhuak dawn a, eitur mumal deuh ka mamawh a ni. Khawngaihin artui leh vawksa min han siam teh. Coffee pawh I nei anih chuan ka duh ang; in tur min han chhawp tel la," a han ti a. 

May chuan makti leh hriatthiam harsa tih hmel deuh hian, "Eng thil nge maw iva tawn leh tak le, Mr. James?" a lo ti ha a. "Eng tawng lo ve, May. Mahse damchhung hi a rei lo va, van thlen hunah ei leh in chu fimkhurna hun a tam deuhvin ka hre tlat a ni,"

May chuan a hnat a tum dat a; a ralthuam endik tur chuan Bond pawh chuan choka chu a chhuahsan leh ta a.