Jamaican Police te hi an tlan ngailoh avangin chupa pawh chu relkawng sirah chuan hmanhmawh lutuk lovin a kal a. Felix Leiter-a khan morphine a an chiu hmain Doctor hnenah thil awmdan a lo hrilh nual tawh a, ani chuan police lamah alo hlanchhawng leh vek tawh a ni. Leiter khan FBI mi leh sa angin alo insawi a, chuvangin silai a puak thut thei tih hriain police pa pawh chu a fimkhur hle.
Silai puakri hlauva dum sava thlawhdarhna lam chu harsa lo takin a hrethei nghal mai a. A naupanlai atang tawhin heng laiah hian sava vehin alo che tam tawh bawk a, ram awmdan pawh a hrechiang thawkhat hle.
Ngaw chu a reh vawng vawng a, fimkhur takin police-pa pawh chuan hmalam a pan ve zel a. Reilo teah ngaw chhung deuh, fai laia Scaramanga tlu reng pawh chu a va hmu ta a. Thawm ngaithlain a han ngaichang leh hlek a, riva dang hriattur a awm tak mai lovah chuan hmun fai lam chu panin alut phei ta a. Mi pakhat lo let reng chu a han hmu a, an bula silai tlate chu a en hnuin hamrik a phawrh a, ring fe fe hian vawithum lai a ham ta a. Tichuan daihlimah thuin lehkhabu te a phawrh a, a pencil chu liak huhin thil awmdan chu a hmuhdanin a ziak ta zung zung a.
Karkhat hnuah chuan James Bond pawh chu a rawn harhfel ve leh ta a. A harhtirh chuan tuipui mawnga che theilo va phuarbeh tlat ni hian a inhria a, a han tal ngial na a, eng a sawt si lo. Au chhuah a han tum a, a rumchhuak ri chu hriain khum bula nurse thu chu a rawn tho vat a. A chalte dekin a mar a han en a. Bond chuan chianglo ruai hian nurse chu a han melh chho va. "I duhawm hle mai," a ti sap a. Nula chu tuipui nula ni mai hian a hria a, a muhil zui leh ta nghal a.
Nurse chuan thil awmdan chu Ward Sister a hriattir nghal a, a damlo thutchilh lai chu Resident Medical Officer in a vil chawt avangin mi pawimawh tak ni ngeiin a ring a. RMO lokal a hun dawn tawh avangin a sam te chu a han tuai mam puat a.
Doctor chuan chart-ah chuan engemaw hi a han ziak a, pindan atang chuan an inzuichhuak ta hlawm a. Doctor chuan, "A tha chhuak thuai ang. A panglum a nep tawh a, a marphu ala rang deuh. Antibiotics hman tlem deuh tawh tur. Nakinah Dr. Mac Donald-a'n a hliam hi rawn tuam tha rawh se. Intur alam anih chuan theitui in pe dawn nia. Reilo teah chaw nem deuh chu a ei thei mai ang. A vannei takzet a ni. Silaimu khan a kawchhung pawimawh lai a khawih fu lo hlauh mai a. Mahse silaimu a tur awm khan sakawr pawh a tihlum thei hial ang chu. Savannah La Mar-ah rul tur hnathawh dan an hriat hlauh avangin an enkawl rang hlauh zawk a, a vanneihthlak khawp mai. Kar khat chhung vel chu tumahin la tlawh rihlo se a tha ang. Thil awmdan chu police ho leh High Commissioner te chu in hrilh vek dawn nia. Tunge a ni ka hrelo na a, London lam atangin an rawn ngaihven riau mai. Ministry of Defence ho an ni awm e. A chanchin an rawn zawhleh chuan High Commissioner in biakpawhtir tawh mai dawn nia," a ti zung zung a. Chutah amah vek chuan, "Taka, a thian No-12 a mi kha enge a chanchin ve? Ani pawh kha Washington leh American Ambassador chuan an ngaihven riau mai a, Mr. Bond hi hmuh a ngen deuh reng bawk niawmin an sawi a," a han tihzawm leh a.
Reilote ah RMO chu a rawn lang ta. Hepa hi Scotland-a Edinburgh khawpuia inzir chhuak ngat a ni a. King Edward Hospitala nurse pakhat hian a rawn zui bawk a. Bond-a lo enkawltu nurse report chu a han ngaithla a, Bond-a mit te chu keuvin ngun deuh mai hian a han en vel a. Pawnah chuan motor a tlan vat vat reng a.
Nurse chuan, "A keruh a tliak tih mai lovah chuan a tha e. Nurse ho a fiam peih khawp mai. Ni 10 ah chuan tiang nen chuan a vahchhuah theih mai ka ring. Ani chu police ho chuan an hmu tawh a, Green Island Harbour bula lei chim a American tourist thenkhat an thih chungchang velte anih ka ring. Chanchinbu-ah khan a chianglo riau tlat a ni," a ti a.
Commissioner chuan heti hian a han sawi chhunzawm leh a. "Thil awmdan chu hetiang hi a ni : Tunhnai mai khan Westmoreland-a Thunderbird Hotel-ah rampawn misual rual aiawh kan ti mai dawn em ni, an inhmukhawm a, an zingah hian Soviet Secret Service, Mafia leh Cuban Secret Police aiawh te pawh an tel a. An inhmuhkhawm chhan ber chu Jamaican fu hralhchhuahna tihbuai, dan kalha ganja tihpun leh Jamaica-a pawisa khelhna tur hmun din tura mi thiltithei deuh te tham lungawi chungchang relkhawm a ni ber. Hei bakah hian Jamaica-a dan leh hrai dinglai tihbuai an tum a ni. A dik em, Commander?"
Ni 10 hnu ah chuan Bond-a pindan chu a lun ta hle mai. Khum chu an kam awn a, Commissioner of Police, Supreme Court Judge leh Felix Leiter-a'n zahder taka a biak Colonel Bannister, Washington-a mite chuan an thutchilh a. Kawngkhar bulah chuan Station C hotupa Alec Hill chu a ding bawk a, khum bulah chuan an inbiakna lachhawng turin lehkha leh pencil nen MAry Goodnight chu a thu bawk a, kilkhatah chuan Felix Leiter pawh a thu ran bawk.
Police Commissioner chuan aw a han thian phawt a, "Commander Bond, vawiin a helaia kan thukhawm hi thil nihphung sawikhawm satliah ang chauh kan ni a, mahse Prime Minister duhdan zul zuia ti kan ni. Heta kan thusawi tlan hi a lungawithlak kan tih chuan thu a tawp zui nghal mai ang," a han ti charh charh a.
Bond chuan a lu a lo bu nghat a.
Bond chuan, "Dik e," a lo ti ban charh a.
"Tichuan Jamaican CID te nena fimkhur taka thawk hovin Mr. Bond, Mr. Nicholson leh Mr. Leiter te chuan an hna chu zo leh entawn tlak takin an hlenchhuak ta a ni. (Jamaican CID te an tel miah lo va, mahse Commissioner hian hmingthatna hi khum ve a duh si a ni. Hei hi Felix-a lu rawn buk nachhan kha a ni) Chu pawl thiltum chu hailan a ni ta a, hetah hian lohtheih lohvin silaia inbeihna a thleng ta a ni. Heng hmelma agent te hi thah an ni ta a, an hming list pawh hei ka nei reng a. Mr. Bond Leh Mr. Leiter-a te silai kahthiam zawk vanga hetia dinhmun duhawm zawka ding hi kan ni ta a ni. Mr. Leiter-a'n thiam taka Orange River Lei a bomb avangin lei chu a chhe ta a, Green Island Harbour hi tunah chuan tourist ho te tan pawh tlawh theiha siamthat a lo ni leh ta a ni,"
"Chu pawl thiltum leh ruahman chu Jamaica Police-a Criminal Investigation Department te chuan an lo hreru tawh a. Hei hi PM pawh hriattir a ni tawh a, kan fimkhur hle tih chu sawi ngailo a ni. An thiltum chiangkuang taka hre turin kawng dap a ni a. Chu inphiarrukna ah chuan USA leh Britain te pawh an lantel ve tho avangin Britain a Ministry of defence leh CIA te hriattir ve nghal an ni a. Tichuan mithiam, nang, Mr. Nichilson leh Mr. Leiter te hi rawn tirhluh an ni ta a. Jamaica leilunga inphiarrukna haichhuak tur chuan hma an la ta a ni," tiin Commissioner chu a hawikual a, midangte thlawpna a zawng te pawh hi a ang zawk hle. Felix chuan Bond-a lam hawi chuan uar deuh tak hian a lu a rawn bu a, Bond pawh chuan thil kalhmang chu a hriatthiam deuh vek avangin nuichung chuan a lu a lo bu ve nghat a.
Puithu taka chutia thu han sawi vel chu Commissioner chuan nuam a ti hle ni hian a hriattheih a. Chumi nia Judicial Enquiry an neih chu PM thupek ang anih thu sawiin a awm ve te hming chu a han sawi dan dan a.
Nuichung hian, "Tunah chuan Commander Bond of Great Britain Mr. Felix Leiter of United States of America leh Mr. Nick Nicholson te hnena Jamaica ram Police te chawimawina sang, Jamaican Police Medal pek hi kan tihtur pawimawh awmchhun a ni ta," tiin Bond hnenah chuan bawm pakhat, fel taka fun hi a hlan ta nghal a.
Pindana awmte chuan kut an lo beng dar dar a, Mary Goodnight chuan alo benrei deuh bik avanga sen awp awp chung chuan a titawp ve ta nghal a..
A tawp ta...
Comments