COPD

����������

*Hriselna Huang*

*PUITLING THAWHAH BENVAWN*

Puitling thawhah benvawn hi sap ţawngin COPD tih a ni a. COPD lam pum chu Chronic Obstructive Pulmonary Disease a ni a. He natna hi asthma ang deuh a ni a, nimahsela, asthma nen hian a awm chhan leh a nat dan phung erawh a inang lo va. Asthma hi chu thil huat (allergy) vanga awm a ni a. Thil hmul leh mê, ran hmul, ei leh in, boruak vawt, vaivut etc te hi a huat theih vek a. Miin a thil huat tak a hip luh emaw a ei emaw bakah a thil huat bula a awmin a thâwkna dâwt a tivûng a. A thâwkna dâwt a chîp/ sâwng têa, thâwkna dâwt kua a lo zîma, chuapah boruak a lut ţha thei lo va, a thaw a hah ta ţhin a. Asthma hi puitlingah pawh awm fo mah se, a tam berah chuan naupan lai kum thum hnu lam velah a inţan fo ţhin.

COPD hi thâwkna dâwt lam natna tho a ni a, natna benvawn dam hleithei lo a ni a. Meizial zûk nasat vang leh zûk rei tawh vanga COPD nei an tam ber a. Âwmna benvawn (chronic bronchitis) leh emphysema hun rei tak chhung lo neih tawh vanga COPD nei an tam bawk a. Meizial zu mi bula awm tam vang te, boruak bawlhhlawh (air pollution) vang te leh tûr (chemicals) hip luh nasat vangte pawhin a neih theih a. COPD hi inthlahchhawn theiha ngaih a ni bawk a.

Emphysema-ah chuan chuapa boruak bâwm awmte (lung alveoli) a chhia a. Chuapa boruak bâwmte hi oxygen leh carbondioxide inthlakthlengna a ni a. Chuapa boruak bâwmte a fân lian vak a, chuapa timurahte boruak a inhnawh vak bawk a. Chuap aţangin boruak a chhuak thei lo va, thaw a hah ţhin a. Âwmna benvawnah chuan thâwkna dâwt vûngin a nâ a, khâk a insiam tam bawk a. Hei hian thawhah, khuh leh khâk a siam a.

COPD hi vawi leh khatah a lo awm thut lo va. Zawi muangin a inţan a, zawi muangin chuap a tichhe ţhin a. Kum 40 pelh hnuah a awm tlangpui a. COPD hi a ţantirhah chuan insawizawi leh chho zawnga kala thawhah, khuh kherh kherh leh zing thawha hrawk hnawk thenfai ngai angin a langchhuak tlangpui a. A rei tial tiala, a nasa tial tial a. A tawpah chuan âwma hnawh, thawchham, thaw ri hrâwk hrâwk, khuh zawnga khâk chhuak deuh reng, chauh ngawih ngawihna, ke vûng leh taksa rihna tlakhniamna a awm ţhin a.

COPD neite hian ngai an awh leh thei tawh lo va. A natna a tihziaawm theih a, a zual zel tur a vên theih a. COPD neite hi an taksain natna a do lêt theihna khawl a chak lo va, chuap natna dang an kai awlsam bawk ţhin.

A enkawlna chu thawhah tihziaawm a ni ber a. A hip luh chi thâwkna dâwt tilian thei broncho dilators leh chuap vûng leh nâ tihziaawm thei glucocorticoids hip luh chi a awm a. Oxygen pêk a ţul thei bawk a. Hmunpuiah chuan chuapa boruak leng zât tihtlemna a awm a, zai theih a ni a. Chuap thlak (lung transplant) a tih theih bawk a.

COPD neite hian taksa mamawh chaw ţha an mamawh a. Tuiril in tam a ţha a. Caffeine in tlema chi ei tlem tur a ni a. COPD neite hian TB leh chuap natna dang an kai awlsam a, COPD hian cancer leh lung natna a thlen thei a. An chuap a chak lo va, nasa lo têa insawizawi a pawimawh a. Zâwi muanga kea kal ţhin a tâwk lek âwm e.
_________________________________________
CHUAP TIH FAI 

Tun hnaiah chuap kaihhnawih lam natna kan tarlang a. Chuap tihfai dân lam han tarlang teh ang.

Fakna hla chuan, "Take time to be holy, speak oft with thy Lord" a ti a. Hei hi Mizo Kristian Hla Bua lehlin dan ang lo deuhin, "Thianghlim turin hun (in) pe la, Lalpa pawl fo rawh" tiin let ve hmak teh ang! Kan thupui erawh, "Chuap fai turin hun in pe la, meizial zu suh" tih daih a ni. "Thianghlim" tih êm êm chu a ţul lo ve.

Chuap hi kan taksa peng pawimawh êm êm mai, kan ngaihthah fo a ni a. Kan hmai kan tifaia kan chei peih ang hian kan chuap hi tifaiin kan duat tur a ni a. Mei khu, bawlhhlawh leh natna hrik hrang hrang chuapah kan hip lut a. Meizial zûk ţhatlohzia hre mah ila kan sim thei si lo. Meizial kan zûk hian chuap sen dâng ţha tak mai kha mei khuin kan tidum vek a. Kawng hrang hranga chuap tifai a, chuap aţanga tûr leh bawlhhlawh kan paihchhuah fo a ţul a. Sawi tawh angin chuap leh taksa tihfaina ţha ber chu meizial zûk loh a ni a; a ţha ber dawttute chu:

Green tea:
Zân mut dawnah green tea in ţhin hian chuap leh ril a tifai thei a. Hemi chhung hian intihah lova hahdam taka awm tur a ni.

Nimbu tui:
Zingah thil ei hmain, tui no lian takah tui lum leh nimbu tui thirfiante 4 vel chawhpawlha in ţhin tur a ni a. Lakhuihthei tui emaw cranberry tui emaw pawh a pawi lo.

Carrot tui:
Ţukţhuan ei zawh, chhun râwl fâk hma si-ah carrot tui ml 300 vel in ţhin a ţha a.

Potassium hian taksa leh chuap a tifai thei a. Potassium tamna thei leh thei tui eia in tam tur a ni a. Serthlum, carrot, balhla, spinach, tomato theipui etc te hian potassium a pai tam a.

Sawhthing:
Sawhthing hian thâwkna dâwt leh chuap tifaiin tûr leh bawlhhlawh a paihchhuak thei a. A hlanga ei loh pawhin sawhthing aţanga siam thingpui in ţhin tur a ni.

Mut dawna lakhuihthei tui emaw cranberry tui emaw in ţhin a ţha a.

Tui luma inbual ţhin a ţha a. Eucalyptus oil tui sa a telha a tui hû hip ţhin a ţha bawk a.

Chaw eia pudina hnah ei tel ţhin a ţha a. Zing tin minute 30 vel boruak thianghlim hip luh vang vang ţhin a ţha a. Yoga breathing exercise ang deuh hi a ni mai ang chu; yoga practice kher tur tihna a ni lo a nia.

Bawnghnute leh bawnghnute aţanga siam thil kan thlah theih loh pawhin ei tlem tur a ni a. Bawnghnute aţanga siam thil ei nasat hian inflammation (nâ leh vûng), lunâ leh pumpui chaklohna a thlen thei a, thawhah a tizual thei bawk a.

Miin meizial sim mah se, hun rei tak chhung nicotine hnathawh a la cham bâng thei a, thei leh thlai hnah tharlâm ei tam tur a ni a. Tuisik in tam tur a ni.

- Lk. Sanga