Doctor transfer order sût phûtin Kolasib-ah kawngpui an dang
Kolasib Joint Action Committee (JAC) bultumin nimin zing dar 5 aṭang khan tiam chin awm loin Kolasib khaw chhung luhna hmun pahnih, Khuangpuilam leh Rengtekawnah NH-54 kawngpui dan a ni a; kawngpui an dan chhan hi Kolasib District Hospital-a doctor pakhat sawn chhuah an duh loh vang a ni.
Kolasib JAC-te ruahmanna an lo siam tawh angin, Kolasib Hospital-a surgeon Dr Zothansanga Zadeng, thlaktu awm loa Serchhip District Hospital-a awm tura tihna transfer order sût an phut avangin NH-54 kawngpui hi an dang a; nizanah pawh khan kawngpui hi an dang a, vawiinah pawh dan zel an tum.
Thu dawn danin, kawngpui dan a nih avang hian buaina chhuak a awm lo. Buaina chhuak thei veng turin Kolasib-a police awmsate bakah, hmun dang
aṭangin police dah luh belh a ni a, kawngpui dangtute duty-na hmunah awmtir an ni. Kolasib DC leh SP-te pawhin kawng danna hmun hi an tlawh.
Nimin tlai thleng khan Kolasib DC chuan mipui punkhawm khapna thupek a la chhuah lo a, police lam pawhin kawng danga duty-te hi hnawh darh an tum lo.
Kawng danna hmun paltlang luih tum an awm lo a, damlo leh chhiatna thilah kaltlang duhte chu kaltlangtir an ni a, khualzinte erawh an tangkhang thung.
Kawng an dan tur thu hriat lâwk a nih avangin khualzin veivâk an tam lo a, hei vang hian motor tangkhang a tam lo. Nimin tlai thleng khan chhim lamah lirthei 40 vel a táng a, hnam dang lirthei deuh vek a ni. Chhim lamah chuan lirthei 30 vel a táng a, mahni khaw lama haw turte an ni hlawm.
Dr Zothansanga Zadeng hian Kolasib a la chhuahsan lo a, National Health Mission hnuaia thawk surgeon Dr Zochampuia pawh MPSC-a interview a neih zawhah nimin khan Kolasib-ah a thleng leh tawh a, super specialist zir a tum chu a ṭhulh.
Hetih lai hian, doctor transfer order sût leh sût loh turah thu thar a la awm lo a; Health minister Lal Thanzara chuan, doctor pakhat transfer order chu sût leh mai theih a nih loh thu a lo sawi tawh a ni.
- See more at: http://www.vanglaini.org/tualchhung/71391#sthash.kQG9wTQj.dpuf
Comments