LAMKHUANG

SOURCE : Ramhmul Damdawi
                  Whatsapp Group

Lamkhuang hi chhim lamah chuan laui tih a ni ve bawk a. Vawiin chu Luangmual, MAP lamah ka duty a. An compound a fai ţha hle a, lamkhuang kûng a tamin a lo rah nasa mai bawk a. Pum hnih chu ka hâwn ve nghe nghe a. Damlo pakhat ka en chu, "Hei, in compound-ah lamkhuang a tam sia, lei a ngai si lo va, ei uar r'u" ka ti chu pâwn aţangin an lo hria a, "Lamkhuang hrisel loh loh nen..." an lo ti hmanhmawh a. A hrisel leh hrisel loh an hre tawp si lo va.

Kan in bulah hian lamkhuang kung pali a awm ţhin a. Kan naupan laiin vawi khat chu ka ţhianpa nen kan lo alawm le. Kei a kûngah ka lâwn a, a kûnga hmin dûp sa lian ţha tak mai chu, "Kha, lo dawng rawh aw" tiin ka thlak a. Ka ţhianpa chuan a lo dawn ţhelh a, a chhipah tak mai tlâkin a keh darh chuai mai nia!

Lamkhuang hel hi vaiho hian chawhmeh atan hmangin an kang fo ţhin. Hostel-a kan awm ve lai pawhin lamkhuang hel bâkah balhla hel leh thingfanghma hel, alu nena kàn pawlh kan hmeh fo mai. An sawi dân chuan lamkhuang hel hi arsa leh bawngsa nen te hian kàn pawlh ila, a sa sa kha ei ila a tui lutuk an ti. Hehe

Lamkhuang hi balhla nen hian a thil pai a inang riau va. Lamkhuang hian chakna (energy) leh dietary fiber a pai tam hle a. Taksa mamawh vitamin leh minerals a pai nual a. Lamkhuang hian thau ţha lo, saturated fats leh cholesterol a pai lo va. Sodium a pai tlem hle bawk a.

Lamkhuang hian simple sugar - fructose leh sucrose a pai tam a. Hei hian chakna min pe nghal thei a.

Lamkhuang hian dietary fiber a pai tam hle a. Hei hian êk khal tur a vêng a, rilpui a tihrisel a. Rilpui aţangin taksa mamawh loh tûr paihchhuah a pui bawk a.

Lamkhuang hian tlem a zawng vitamin A leh flavonoids pigments, beta - carotene, xanthin leh lutein leh beta- cryptoxanthin a pai a. Hei hian mit leh vun a tihrisel thei a.

Lamkhuang hian vitamin C a pai tam a. Hritlang leh natna dang lakah taksa a vêng thei a. Taksaa natna do lêttu khawl a tichak thei bawk a.

Lamkhuang hian B Complex vitamins - pyridoxine, niacin, riboflavin leh folic acid a pai tam bawk a. Heng vitamins a paite hi taksa mamawh leh taksa venghimtu ţha tak tak vek a ni. Heng bakah hian calcium, phosphorus, zinc, pantothenic acid leh thiamine tlem a pai bawk a.

Lamkhuang tharlâm hian potassium, magnesium, manganese leh iron a pai a. Potassium leh magnesium hi lung hrisel nan a pawimawh a, blood pressure a vawng dik a. Iron hian thisen tlakchhamna a vêng thei a.

Lamkhuang hi a tak mai bâkah a mu hian protein, starch leh taksa tana ţangkai minerals a pai bawk a. A duh tan chuan chhum emaw kan emaw a ei  mai theih a ni.

Ţhenkhatin lamkhuang hian nu naupaiah nauchhiatna a thlen thei niin an sawi a. Hei hi a dik lo va. Lamkhuang hi nu naupai tan a ţha êm êm zâwk a. Lamkhuang hian nu leh naute mamawh tam tak a pai a ni. Zunthlum nei tan erawh ei tam loh tur a ni.

Lamkhuang hi huat (allergic) theih a ni ve a. A haw tan chuan ei loh mai tur a ni a.
Lamkhuang hian thisen a tikhang hma thei a.
Lamkhuang hi vawi khata ei ţeuh chuan pum nuam lo a thlen thei a.
Lamkhuang hmin hi zunthlum natna nei tan chuan ei tam loh tur a ni a. Lamkhuang hel hi chu zunthlum tan a pawi lo va, a ţha zâwk hial a ni.

~ Lk. Sanga ~
GILEAD THING HNÂI