THIM THUAH HNIH LEH CHINA RAL LIAN HLAUA TLANCHHIA TE BURMA SORKARIN THAWN LET..?

MSR : Sakhuana thil avanga Mizoram chhuahsan a Myanmar ram lut Champhai Tlangsam Venga chhungkaw 4 atanga chhuak mi 19 zinga 18-te chu Myanmar sorkar in Mizoramah rawn hlan let lehin tukin zing khan heng mite hi Indo-Myanmar Border Trade Point Zokhawtharah Champhai DC Pu H. Lalengmawia'n a lo dawng sawng.

DC Pu H. Lalengmawia chuan Myanmar sorkar kut atanga mi 18 te lo kir leh theihna tura Myanmar ram chhunga awm Mizo-te hmalakna chu fakawm a tih thu tarlangin, ramri kar danah cheng mah ila kan pian ken ziarang tlawmngaihna hian min phuar khawm tlat avangin hun harsa leh buaina karah pawh unau kan nihna hi a lo lang chhuak thin a ni, a ti a. Hun lo kal zel turah tanpui leh tawiawm ngaia kan awm chuan inpui tlang zel turin Zo hnahthlakte a sawm nghal bawk.

Myanmar sorkar in a rawn thawnlet heng chhungkaw 4 atanga mi 19 Mizoram chhuahsan a Myanmar ram lutte zinga upa ber Pu Zonghinglova chu Tamu hmuna an awm lai hian kawchhung thisen put vangin a boral a, an zingah hian naupang 4 an tel a ni. March 15 khan Tlangsam atangin ke in (Khawzim kaiah) Myanmar ramlutin, kumin March 24 khan (Indo-Myanmar Border Trade Point Moreh bul Tamu (Myanmar) kiangah Myanmar sorkar-in a man a. Tamu a Mizo Thalai Pawl leh Pu D. Thangliana (L) (Tamu Bialtu MLA Myanmar) ten an hriat veleh theih tawp an chhuah a Mizoram an kir leh theihna turin hma an la zui nghal a.

Thudawn danin heng mite hi Thim thuah hnihna' hlau leh China ral alo lian dawn ni a an hriat vanga China rama tlanchhiat tum an ni a, Champhai Tlangsama an awm lai pawha Ration Card leh Voters ID te pawh neih duh ngailo niin, Chhiarpui-ah pawh inziaklut duh ngailo an ni, Champhai Tlangsama inkhuar Lalzawna Pawl a tel an nilo a, an vai hian tun hma atanga Mizorama awmnghet leh Mizo dik tak vek an ni tih thudawnna chuan a sawi.

Nimin chawhnu khan Tamu Mizo Thalai Pawl President Pu Lalchatuana leh Secretary Pu Lalrosanga ten heng mite hi Tamu atangin Tahan thleng an hruai a. Tahan Mizo Thalai Pawl (TMTP) Central  President Pu Lalrosanga,  General Secretary Pu Zohmangaiha, Exe. Comtt. member Pu Vanlalneia leh Exe. Comtt. member Pu K. Lallawmzuala) ten nizan khan Tahan atanga ramri (Tiau) thleng an rawn hruai a ni.

Heng mite lo dawnsawnna hun Land Custom Station-a neih hi Sub-Hqrs. YMA Champhai President Pu VL Chama'n kaihruaiin, Tamu leh Tahan MTP te tanpuina Sub-Hqrs. YMA Champhai leh Champhai DC ten an hlan a. Tahan MTP hruaitute atangin heng miten Mizoram a an kir leh theihna tura hmalak dan tlangpui ngaihthlak a ni bawk.