THISEN SANG (HIGH BLOOD PRESSURE)

Source : Whatsapp

Khawvela natna tam ber, Sapho leh hnam fing zawkte pawhin an buaipui em em, Mizo zingah pawh natna tam ber pawl, in tin luhchhuahtu, Hringnun suat hnemtu leh ramtuileilova min siam thintu Thisen sang (High blood pressure) hi a chanchin tlangpui leh inenkawlna vai damdawi (Conventional medicine/western medicine/allopathy) hmang lova, Pathian min pek Ramhmul damdawi hmanga tihdam dan (Natural Home remedies)-te hi bih chiang ve reng reng teh ang u. A taka kan tih nghal theih phei chuan Daktawr kan kawl reng tihna a ni thei ang.
Thisen sang hi Lung atanga thisen pechhuaktu thisen dawt hrang hranga thisen luh dan tur anga lut tha thei lo, engemaw daltu avanga thisen kal tha lo thin a ni a; thisen chu tha taka a kal theih nan theihtawp chhuaha hmalak a ngai a ni. Thisen sang hi tehna chihnih (2)-in then a ni a, chungte chu:
1. Systolic leh
2.Diastolic a ni.
Systolic measurement (tehna) chuan Lungin thisen a pe chhuak tha em tih lam a chhui a, hetihlai hian diastolic measurement (tehna) chuan Lungin thisen a pek chhuah that loh chhan a chhui ve thung a ni.

Puitling hrisel pangngai thisen awmdan tur (normal ranges) chu hetiang hi a ni.
1. Systolic blood pressure ………………100 – 140 mm Hg
2. Diastolic blood pressure ……………… 60 – 90 mm Hg.

Thisen awmdan tur chu systolic Blood pressure 120 leh diastolic pressure 80 = 120/80 tiin an sawi thin. Hei hi mihrisel pangngai thisen awmdan tur pangngai (normal) a ni.

Miin a thisen tehna systolic Blood pressure 140 leh a hniam lam diastolic pressure 90 aia sang a pelh chuan Thisen sang a nei kan ti thin.

A ven dan:(Prevention):
Sum tam tak sen ngai lovin, mihringin a finna hmanga tih theih tam tak a nei; chungte:

1. Kan thil chin tha lo leh nunphung tha lo thlak danglam a ngai phawt.

2. Chi al (salt) leh sodium diet lam chi ei tlem, thei thur leh thlai hring lam ei tam a pawimawh,

3. Kan rih zawng awm dan tur dik tak mila kan insiam rem a ngai.

4. Kan phak tawk leh ngeih tawka taksa sawizawi ((physical exercise) a ngai hemi atan hian kea kal tam a tha hle.

5. Chawlh hahdam leh urhsun taka inngaihtuahna neih (Meditation & relaxation – Yoga).

Kea kal tam zawng tehna (measurement for brisk walking) khawl tereuhte kawnghrena pai mai chi a awm a; chu chu hman theih a tha. Nitina kan pen tam zawng inang tlanga tehchhuaktu atan a tha hle. USA-ah hetiang hi an hmang uar hle a, kan hman uar ve a tha hle ang.

Thisen sangin a nghawng theihte:
Thisen sang hian nghawng tha lo tak tak a nei a, engtenge a nghawng thalote chu kan hriat chian a pawimawh hle. Hetiangin:

1. Phungzawl ang maia tluk thuta zen thutna (Stroke) a thlen thei

2. Lungna leh Lungphu chawl (Heart attack or heart failure)-a thihna a thlen thei.

3. Thluaka thisen zam chat leh puakkeh (Rupture & hemorrhage) a thlen thin a, thihna a thlen thin.)

4. Kal tha lo (Kidney failure) a thlen thei.

5. Zunthlum leh thisen thlum (Diabetes or sugar levels) a thlen thei

6. Mit (retina) a tichhiain mitdelna hial a thlen thei

7. Mihring Dam chen tur (life expectancy) a tihniam thei.

Thisen sang lo awm theih chhante (Causes of High Blood Pressure):
Thisen sang awm theihna chhan chihrang hrang a awm a, a langsar zual deuhte tarlang ila:

1. Taksa rih tur aia rit hleihluak khawpa thauna (obesity)

2. Sodium lam chi ei tam luattukna (High sodium intake)

3. Zu (alcohol) in tam lutuk

4. Mei zuk emaw ruih theih thil leh hmuam

5. Mawm leh thau lam ei tam lutuk

6. Sa rep leh thil rep ei tam lutuk

7. Thil uih lam chi leh hmarcha thak ei uar lutuk

8, Hmeh han (Ajinomoto) ei tam lutuk leh a dang tam tak a awm thei.

A enkawl dan:
Thisen sang nei tawh chu a inenkawl uluk a ngai hle. Insumtheihna hi damdawi tha ber a tling. A ngeih loh zawng leh a awmtir theitu tarlan takte khi a hriat reng a pawimawh hle.

Heng bakah hian Pathian thilsiam man tlawmte te hmangin inenkawl dam theih a ni a, chungte chu:

1. Ser (Lemon): Ser thur Nimbu, Hatkora etc. ei char char hian thisen a siam tha a, thisen khang tur thlengin a veng thei. Thisen sang a tihniam thei a, lung chakna a pe a, lungphu tha lo leh dik lote a siam tha thei. Nitin Sertui sawr in hian thisen sang a thunun thei a, Tin, Zing thawh veleh tuilum no khata Nimbu pakhat sawr tela in thin hi a tha hle bawk.

2. Sunhlu (Amla) : Tuktin zingkar, tukthuan ei hmaa sunhlu pum khat ei thin hian Thisen sang a tihniam thei a, tin, thisen a tithianghlim thei bawk. Sunhlu hring hmuh reng a harsa a nih pawhin a um emaw, a rep leh phoro pawh a tha tho.

3. Balhla (Banana) : Balhlaah hian Potassium a tam hle laiin sodium a tlem hle thung. Heng thil chihnihte hi Thisen sang veng tur leh thununtu atan an pawimawh hle. Tin, cholesterol a awm ve loh avangin Balhla hian thau (fat) a siam ve lo bawk. Chuvangin, nitin Balhla pum khat tal ei thin hi thisen sang neite tan a tha a ni.

4. Tomatos : Tomato haua ei hian thisen sang a tihniam thei a; Thin (liver) a tihchak bakah thau lutuk tur a veng thei bawk. Chuvangin, Nitin Tomato pum khat tal ei thin hi a pawimawh a, hmarcha leh bekang umte nena sawngbawl erawh a tha chuang lo.

5 . Carrot leh Spinach : Nitin Carrot tui (carrot juice) 300 ml-a spinach juice 125 ml telh, in hian thisen sang leh hniam bakah thisen kal tha lo tinreng a siam tha a; lungna leh lunga hnai awm, zun kawng tha lo leh Cancer, Pile tha lo, glaucoma, leh coryza thlenga siam thatu damdawi chhenfakawm tak a tling.

6. Fanghma (Cucumber): Fanghmaah hian potassium a tam avangin Fanghma tui (Cucumber juice) hi Thisen sang leh hniam atan damdawi tha tak a ni. Nitin fanghma ei hi thisen sang vengtu tha tak a ni.

8. Alu (Potato): Ntitin Alu ei hi thisen sang damdawi tha tak a tling. Aluah hian magnesium a awm avangin thisen sang a tihniam thei thin. Alu hi a kawr nen pum chhumin chi tlem al a tha a, a kawr leh a tak inkarah chi chu a chambang thin. Nitin Alu a kawr nena pumchhum pum khat tal ei hi thisen sang tan a tha hle. Alu kheh mawm taka kan ei erawh a tha lo.

9. Purun var (Garlic): Tui thianghlim Thirfiante 4-a Purun var tui far 6 pawlha nitin vawi hnih in thin hi thisen sang tihhniam nan a tangkai hle. Tin, Nitin Purun var mal li emaw mal nga emaw ei thin hi a tha a, bawnghnute nena tengkhang pawh a tha bawk. Hei hian thisen a silfai a. Lungphu chawl, lung tha lo a veng a, kawchhunga boruak chhia (gas) a paih chhuak a, thisen dal tur a veng bawk. Purun var hi a kawr nena ei hi a thalehzual a. a kawr hian gas a paih chhuak tha bik a ni.

9. Colocasia : Colocasia vegetable nitin 25 grams ei ziah thin hian lungna a veng a; thisensang a tihniam thei bawk.

10. Buttermilk : Regular taka Buttermilk ei hian thisen sang leh hniam a siam tha ve ve thei. Tin, taksaa tur awmte a paihfai thei bawk a; Bawnghnute atanga siam ni thei se a tha bik bawk.

11. Khawizu (Honey): Thisen sang vei chuan nitin khuaizu thirfiante 1-2 ei thin se a tha a, hei hian thisen sang tur a ven bakah thisen bawm a vengin a vawnghim thei bawk.

12. Nim hnah (Neem Leaves): Tuktin Nim hnah tui sawr 25 grams in thin hi thisen sang vei tan a tha hle. Hei bakah hian vun natna a veng a, rila rulhlut awm thlengin a tihlum thei vek bawk.

13. Olive Hnah (Leaves of Olive) : Olive hnah 5-6 vel tui rialno khat leihin minute 5 vel chhum so la nitin chutiang zat zel chu vawi 3 in thin tur hei hian thisen kal a siam tha hle.

14. Sap Saum thei (Avocado): Sap Saum thei kan tih mai, a thenin Butter fruit kan tih bawk hian potassium a keng hnem hle a, chuvangin, nitin chaw ei apianga hmeh tel emaw, a hauva ei thin hian thisen kal a siam tha a; thisen sang tur vengtu tha tak a nh bakah tluk thut (stroke) awm thei lakah mi a venghim tha hle.

14. Thingfanghma (Papaya): Nitin zingkara thingfanghma hmin hlai thlak khat tal ei ziah hian thisen a tithianghhlim a; thisen kal vel (Blood circulation) a siam tha a, Thisen sang tur a veng tha hle.

15. Theihai tui (Mango juice): Nitin zingkarah theihai tui rial no 1 in thin a tha. Hei hian thisen sang tur leh taksa sa huam huam turte a veng a; thisen sang vengtu tha tak a tling.

16. Dawnfawh (Watermelon): Dawnfawh mu (seeds)-ah hian cucurbocitrin a tam avangin thisen dawt a tizau thei a, chubakah kal (Kidney) tan a tha em em bawk. Chuvangin, Dawnfawh leh a mu ei tel hi thisen sang leh hniam tan a tha hle. Dawnfawh mu thirfiante 2 daihlima dah ro chu rawt dipin tui chhuanso no khatah telh tur a ni a, chu chu darkar khat vel dah hnuah puan thianghlima sawrin in mai tur a ni a, ni khatah vawi li vel tal in thin tur a ni.

17. Serthlum (Orange): Tuktin zingkar serthlum hmin pum 1 ei a, a mu thialsawma e tel nghal zel hi thisen tifaitu leh thisen kal siam thatu tha tak a nih avangin thisen sang tan a tha hle.

18. Sertawk : Sertawk hi nitin zung khat tal ei a tha a; a mu phoro nitin zingkarh leh zan mut dawn apiangin mu 3 kheha ei thin a tha. A tak sertawka erawh vawi 1-ah ei tam vak a tha lem lo. A mu hi a tintlak zawk avangin nitin ei theih tura a mu khawl khawm a tha ber.

19. Tawkte : Tawkte hi a hela tuktin mum 7 vel ei ziah a tha a; a chhumna tui rial no khat in ziah a tha bawk. Tam lutka ei/in erawh a tha chuang lo.

20. Phuihnam: Phui hnam hian thisen a heh avangin vawi khata ei tawk ching an awm a; hei hian taksaa vitamin dangte a suasam thin avangin taksa a tichau a; damdawi tha dang ei tel chuan loh chuan a tui hawp chiam chiam ai chuan zingtin damdawi ei phung pangngaia rial no khat in hi a tawk viaua ngaih a ni. A nihna takah chuan nachhawkna ang deuh a ni ber.

21. Zairum : Zokhaw lamin awlsam taka an hmuh theih Zairum thing hi a hnah zik no chhum tui nitin zingkara rial no 1 in thin hi thisen sang vengtu tha tak a ni.

22. Thuamriat pil/zung : Thuam 8 pil emaw a zung chhum tui zingtin rial no 1 in thin hi thiosensang vengtu tha tak a ni a, phuihnam ang bawkin Multivitamin ei tell oh chuan taksa chhiatna thlen theitu a ni a; chuvangin, fimkhur a tha hle.

CHAWHPAWLHA EI TUR CHITE (OTHER COMBINATIONS)
Theihai tui rial no khat in hnu darker ½-ah tuilum no 1-ah cardamom powder sawh khat chawhpawlha in thin a tha.

Zingtin sunhlutui rial no 1-ah khawisawi thirfiante khat chawhpawlha in thin a tha.

1. Theite tui (peach juice) rial no 1-ah coriander leh cardamom powder sawh 1 ve ve chawhpawlh nitin vawi 3 in thin a tha.

2. Serthlum tui hmun rial no 1-ah coconut tui 25ml chawhpawlha nitin vawi 3 in thin a tha.

3. Nitin zingkarah purunvar mum 3 thial sawma tui rial no 1 in zui nghal thin a tha a, hei hi thisen sang tur vengtu tha tak a tling.

4. Nitin Apple um thur tui far 5-8 leh khawzu thirfiante 1 chawhpawlh in thin hi a tha hle.

Heng kan han tarlan bakah pawh hian hmanraw tangkai tak tak a la awm thei a; vawikhatah tarlan vek sen a ni lo. Engpawhnise, he natna la vei lo leh vei mekte pawhin thu awih taka hengte hi kan zawm a, Nitin khel lova kan tih theih chuan Vai damdawi (conventional medicines) to tak tak leh side effect tha lo tak tak neite ei ngai lovin kan dam theiin k thei a ni tih hriain kan hriselna lam ngaihven theuh ang u.

Dr C. Lalrampana