Zawlnuam News

Zawlnuama sorkar sikul pakhat, Kristian Ramthar High School-a zirlaite chuan an sikulah Mathematics leh Science zirtirtu an neih loh avangin nimin khan lungawi lohna an lantir. He sikul hi Zawlnuam MZP-te chuan zirtirtu pahnih rawihsak an tum.

MZP headquarters, Zawlnuam chuan thuchhuah siamin, Kristian Ramthar H/S zirlaite'n lungawi lohna an lantir avang hian Zawlnuam MZP hruaitute chu sikulah an kal a; H/S headmaster mawhphurhna la mektu Ramdinmawii leh Zawlnuam Vengpui V/C president CT Sanga leh a thawhpuite nen thil awm dan an sawipui tih tarlangin, zirtirtu an neih ngei theih nana hmalakho an rel tih an sawi.

Zirlaite chuan academic session kal laiah Mathematics leh Science subject an la zir loh thu te, July thlaah first term exam mai tawh tur an nih thu sawiin, zirtirtu an neih hma chu class kal an tum loh thute MZP hruaitute a hrilh.

Zirlaite chuan, Board exam-ah Mathematics leh Science exam tel tho a ngai a, zirtirtu an neih si loh avangin an tan sikul kalin awmzia a awm loh thu te, zirtirtu an neih ṭhat loh vanga sikul danga insawn ta an tam thu leh zirlai harsa zawkte tana insawn mai a harsat si avanga la lut hram hram an nih thute an sawi bawk.

Zawlnuam MZP chuan zirlaite chu sikul kal tura ngenin, June 8 aṭang chuan dan pangngaia zirlaite zir turin an ngen a; Mathematics leh Science zirtirtu turin mi pahnih - Zirsangpuii leh Hminghlupuii te rawihsak an tum thu an sawi.

MZP hruaitute chuan, zirtirtu pahnih an rawihsak chhungin zirtirtu nghet an neih theih nan theihtawp chhuaha sorkar dawr an tum thu leh June thla chhung ngeia sorkarin zirtirtu thar a dahsak loh chuan nasa zawka sorkar nawr an tum thu an hrilh a; zirlaite pawhin Ningani aṭanga class kal ṭan an tum thu an sawi a ni.

Kristian Ramthar H/S hi kum 1961-a din niin, HSLC exam center a ni mek a; Arts teacher pathum leh Hindi teacher pakhat an awm mek. Science teacher chu kum 2012-ah a pension a, kum 2013-ah SSA aṭangin an hawh a, mahse, kum 2014-ah SSA-a a thawhna tur lamah a let leh a ni.

Mathematics teacher chu kum 2015 aṭangin an nei lo a, headmaster pawh kum 2016-a a pension hnuah a thar an la nei lo. Mathematics leh Science zirtirtu chu July 2016 aṭanga March 2017 thleng khan bialtu MLA Lalrinmawia Ralte-in a fund hmangin a rawihsak tawh bawk.

- See more at: http://www.vanglaini.org/tualchhung/71402#sthash.kLsI1KcW.dpuf