ARNGENG (Pimples)

ARNGENG SIAM THEI LEH ARNGENG TITAM THEI EI LEH IN

Arngeng hi mi tam tak tibuaitu a ni a. Tu pawhin arngeng hi an nei thei a; a bikin tleirawl leh rawltharah a nasa duh a. Hormone inthlak lai leh taksa aţanga mawm (sebum) a chhuah tam hun lai a nih vang a ni pakhat a. Hmai, âwm leh hnungzangah a awm tlangpui a.

Bawnghnute:
Bawnghnute leh bawnghnute aţanga siam thil hian growth hormone leh inflammation siam thei thil a pai tlangpui a; vun a kua awm te hnawhin arngeng a siamin a titam thei a.

Thil thlum:
Thil thlum, a bik takin thlum siamchawp (artificial sugar) te hian inflammation a siam thei a. Chini, rosagulla, jelebi, sweet chi hrang hrang etc te hi artificial sugar a ni a. Thei ei tam tur a ni a, thei tui siamchawp, dawra a bur a an zawrhah hi chuan chini a tel tlangpui tih hriat tur a ni.

Bekang:
Bekang leh bekang aţanga thil siam chhuahah te hian plant estrogen an tih mai, phytoestrogens a tel a. Phytoestrogens hian estrogen anga thawk vein arngeng a titam thei a.

Coffee:
Coffee hian organic cortisol a pai a. Cortisol hi stress hormone pakhat a ni a, androgen angin a thawk thei a. Taksaa mawm siam chhuaktu sebaceous glands-ah te thawhin arngeng a titam thei a.

Wheat:
Wheat aţanga siam chhuah chhang te hian inflammation a siam thei a, arngeng a titam thei a.

Coconut oil:
Coconut hriak, a hnawih chi leh a ei chi te hian arngeng a titam thei bawk a.

Peanut:
Peanut hian androgen a pai a, vun aţanga mawm chhuak a titam a, arngeng a titam thei a. Peanut aiah cashew nut leh almond ei mai a ţha a. Peanut butter ei tam hian arngeng a titam thei bawk a.

Caffeine telna ei leh in chi, sa leh eiphung ţin a pack, meizial, zu, potato chips, thil kan mawm, sa thau, hmuihmer, cheese leh cake te hian arngeng a siamin a titam thei vek a. Taksa a inang vek lo va, huat bik leh huat vak loh erawh thil awm thei a ni. Spinach hi vun tan ţha viau mah se iodine a pai a,ei tam chuan arngeng a titam thei a. Mi pakhata arngeng titam khan mi dangah a titam lêm lo thei a. Mahni huat zawng chu a hriat ve theih a ni.

Arngeng nei tan chuan green tea, dawnfawh, fanghma, khawkherh, spirulina, berries, probiotics te hi ei tam a ţha a. Dawnfawh, fanghma, khawkherh kâwr tih dip leh aieng te hmaia hnawih/ tah a ţha a; tui in tam bawk tur a ni.

Mihring taksa a inang vek lo va. Heng arngeng siama titam thei te hi dam chhunga ei loh tur tihna a ni chuang lo va. Hun enge maw chhung ei lohvin, nakinah chuan taksaa arngeng siama titam chuang lovin a ei ve leh mai theih bawk a. Thil mawm leh thlum ei nasat hi chu taksa tan pawh hian a ţha lo a ni.

~ Lk. Sanga ~