GAS

I hriat loh Insurance Policy tha tak i lo nei reng a nia.

Gas cylinder puak avanga bungraw chhia, in leh lo chhia leh harsatna tawk hi India ram pumah kumtin tam tak an awm thin a, Mizoram ngeiah pawh kan awm ta fo mai. Amaherawhchu heng harsatna tawk te hian Gas Cylinder puak emaw, Gas leak emaw avanga chhiatna leh harsatna kan tawh te hi Court a kal emaw Insurance Company-a zangnadawm na dil nachang kan hre thin lova, a thlawnin kan tuar a, a thlawnin bungraw man tam tak tak kan sengral thin LPG Gas Consumer te hian  Insurance Policy hi tumkhat tawhsual tawhah Rs nuai 50 thleng kan claim thei ani tih hria erawh hi chu tlem te an ni!

LPG Gas Consumer te hi sawrkar hian Insurance  Policy tha tak mai min lo siamsak reng mai a, he policy atan hian Gas Company lam hian Insurance Company hnenah kumtin Policy Premium pawisa tam tak tak a chawi thin a. Mahse mipui lamah hriattirna(awareness) a that tawkloh avangin Gas puak avanga harsatna a thlen tam ang huin Insurance Company a zangna dawmna claim an awm mumal thin lo. Hei hi mipui ten kan hriat a kan dikna chanvo kan dinchhuahpui thin a tul hle a ni. Gas Connection kan neih anih chuan keimahnin a hranpaa Insurance Company dawr kher ngai lovin Insurance Policy tha tak kan nei tel sa reng tih kan hriat a tha khawp mai. PSU Oil Marketing Company hrang hrang HPCL, BPCL, IOCL (Mizoram a Mizofed tena kan hman hi IOCL a ni) te hian an Customer te hnenah Insurance Policy hrang hrang an duansak a heng insurance policy hrang hrang te hi a tlangpui hetiang hi a ni –

1)      LPG avanga mimal thihna a thlenin mi pakhatah Rs nuai 6 zel zangna dawmna pek theih a ni.
2)      LPG avanga mimalin tawhsual an tawh a, damdawi ina a inenkawl ngai emaw, damdawi hmanga inenkawl ngai anih chuan mi pakhat zelah Rs nuai 2 thleng pek theih a ni.
3)      LPG chhiatna avanga bungraw tihchhiatah zangna dawmna Rs nuai 2 thleng pek theih a ni.
4)      Chawhrualin kum khat chhungin LPG avanga chhiatna hrang hrangah a vaiin Rs vaibelchhe 10 thleng pek theih a ni.

           Heng policy tha tak tak te hi mipui lamah puanzarna mumal a awm lova, mipui ten kan hrelo a chuvang chuan kan harsatna te kan lo tuar liam mai mai thin.
          
Engtin nge kan Claim ang? LPG avanga chhiatna emaw thihna emaw tawk kan awm anih chuan hetiang hian hmalak tur a ni ang.
1)      LPG avanga chhiatna tawk emaw thihna thleng a awm anih chuan Gas connection neihna Distributor hnenah a rang thei ang bera report tur a ni. (Mizofed ah emaw mimal agency connection kan neihna hmunah).
2)      Distributor te chuan Area Office lamah an report ang a, annin chhiatna thlen dan te zirchiangin Insurance Company lamah report an thehlut ang.
3)      Mimalin direct in Insurance Company dawr a ngai lova, agency kaltlanga tih tur a ni.
4)      Thihna a thleng a nih chuan death certificate leh post mortem result thehluh tur a ni. Thihna thleng lova inhliam emaw an awm anih chuan doctor lehkha leh damdawiin bill, damdawi leina receipt zawng zawng thehluh bawk tur.
5)      Tichuan Insurance company lam ten hma lo lain a tul angin zangnadawmna an rawn pe tawh mai dawn a ni.

Amaherawhchu: Insurance claim hi thil awlsam taka a lan lai hian mipui lam hian dan zawm tur kan nei ve tih erawh kan hriat a ngai. Gas Cylinder te a dan dik taka kan hman a, kan Gas pipe, lighter,stove etc ang te sawrkar pawmpui ISI mark chuang ngei kan hman erawh a ngai ve thung tih kan hriat tel a tha.