Khawizu Thatna te

Source : Ramhmul damdawi

Kum zabi 16-naa chini siamchhuah a nih hma pawh khan khuaizu hi hman a lo ni tawh a, ei tur tihthlum nan chauh ni lovin damdawi atan vun tihthat nan leh hrisel lohna eng eng emaw enkawl nan hman a ni.
Buhfai, be leh thlai chi hrang hrangte chin a nih hmain mihringte hian khawizu hi an lo hmang tangkai hle tawh a; Aigupta-ho chuan an thlanah te an lo hmang nasa hle a,Sumerian-ho damdawi zawng zawng hmun li-a then hmunkhatah chuan khawizu a tel nia sawi a ni.

Vaiho damdawi thiamna Ayurveda-ah pawh khawizu hi damdawi ang chiah a ngaih a ni a; kum sang dah pawha chhe chuang lo a ni bawk.
Mahse, tunhnaiah mithiamte chuan naupang tan leh hriselna pan deuh tan chuan a him vak lo niin an sawi.

Tunhmaa nau piang hlim pawh an pek mai thin khawizu kha tun lai doctor-te chuan kum khat an tlin hma chu pek loh ni se an ti a; a chhan pawh botulinum bacteria a awm duh a, chu chuan naupangah botulism (nerve tha lo, taksa chak loh bakah khaw hmuh pawh fiah lo leh thihpui theih) a thlen thei a ni. Mahse, naupangah pawh a hram deuh chin leh puitlingah chuan chu chu a hlauhawm loh.
Hemi avang hian khawizu hlauh tur tihna erawh chu a ni chuang lo a, a thatnate hi a bo chuang lo a ni.
Thirfiante khat khawizuah hian calory 64 dawn a awm niasawi a ni a, mahse, thau lam chi pai lo, cholesterol tisang lo, sodium pawh pai lo niin National Honey Board chuan asawi.

Khawizuah hian 80% bawr chu carbohydrates niin 18% chu tui a ni a, 2% vel vitamin, minerals leh amino acida ni bawk.
Chiniah hian calory 48 a awm a, khawizu chu hriselna atana tha zawk anga sawi a ni reng thin. Hei hi a chhan pakhat chu chini-ah hian 50% chu glucose a nia, 50% dang fructose chu awlsam taka glucose-a insiam thei a ni bawk. Khawizuah chuan calory awmte hian minerals – zinc, selenium leh vitamin chi hrang hrang an pai tel hlawm a, chiniah erawh chuan chutiang chu a awm ve lo a ni. Tin, a vawn that nana thil dang a ngai lo pawh hian a tihlu bawk.Tui lum pep leh sertui nena pawlhin khawizu hi pum tan a tha a, taksaa tui awm a paihchhuak tha niin sawi a ni.

Heng atan hian hman lar a ni hle bawk:

* Mut theih lohin tui emaw bawng hnutetui lum pep nena in.

* Pemah hnawih ila a pun lo a, a dam hma bawk thin.

* Khuh leh hrawknaah hian sertui leh sawhthing nena pawlhin in ila a tha viau.

* Hman lai chuan pangtilum nei lo lutuk leh taksa chak lo lutuk an pe thin.

* Ayurvedic mithiamte chuan khawizu hi pumpui hriselna atan a tangkai hle niah an ngai nghet viau.

* Ka chhung natna chi hrang hrang enkawl nan khawizu hi hman lar tak a ni.

* Jam leh jelly aiah thenkhat chuan chhangthawp nen an ei thin a, chemical thil a tel loh avangin a hrisel zawk feah ngaih a ni.

Salad-ah pawh hian thenkhat chuan chini lam chi hi hmang loin khawizu hi an hmang thin a, a hrisel zawk vangin an duh a ni.