LALRUANGA

Hmanlai khaw ropui tak pakhat hi a awm a. Chu khuaah chuan nupa tuak hnih hi an awm a. fa reng reng hi an nei thei lova. Fa hi an awt ve em em thin a..nikhat chu chung nupa tuak hnihte chu lovah an feh a, fa an nei theih loh vanga hrehawm an tihzia te, fa an awh ve zia te an sawi melh melh a. Chutia an ti ti lai chuan ramhuai nulapahnih hian an thusawi chu an lo ngaithla reng a. An khawngaih ta hle mai a. Tichuan nupa tuak te chu an hawng ta a.Zanah chuan ramhuai nula pahnih te chuan chung nupa tuakte chu an tlawha mal an sawm ta a. Mipa in-a an kal chuan tiang hian mal an sawm a.."A hmingah Zalhranga in sa ang a, a lo tlagval hun chuan khawkhat tlangval hmeltha a ni ang a. A huaisen em em ang a, perngo kaihte pawh a thiam em em ang a, sa a kap thei em em ang a,dawite pawh a thiam bawk ang," tiin. Tin a hmeichhe in-a an kal chuan tianghian mal an sawm a,"A hmingah chuanZawltleipuii in sa ang a, alo nulat hun chuan khawkhat nula hmeltha a ni ang a. Tlangval zawng zawng ngaihzawn rawn a la ni ang" tiin.Chumi hnu chuan nupate chuan nau nau an pai ta ve ve a. Tha takin nau chu an nei ta a. An lo leikan deuh chuan an nu leh pa te cuan an inkawm tir thin a. An inkawm ngeih em em a. An nulat tlangval hnu chuan an inngaizawng ta a.. Nikhat chu Zalhranga leh Zawltleipuii chu lui ah an kal a, zawltleipuii chu a inbual a. Chutia a inbual lai chuan Zalhranga cuan a thlangah perngo a kaih a, ral an lo kal thut pawha Zawltleipuii chhanhim nan a ti a ni.Mahse vanduai thlak deuh maiin chutia a perngo kaih chuan Zawltleipuii mitah tak chuan a kap ta pawp mai mai a. Pawi a ti em em a. A tlan chho a, a han pawm ta chawih a."Ava han pawi tak em, ka Zawltleipuii chhanhim nana ka tih asin le," tiin a tapta vawng vawng mai a. Nakinah chuan ramhuai nulate khan a tap chu an lo hmu a. "Egatinge i tah tak chhiam mai?" an ti a. Ka Zawltleipuii chhan nan ka perngo kaihin a mitah a kap alawm le. Khua a hmu leh thei dawn tawh lo a nih hi," a ti a. Ramhuai nulate chuan an tihdam sak leh ta a.Zalhranga chuan sa a kap theiin a kut ahmui em em mai a. Vawikhat chu:sanghal lian em em mai hi a kap a.Amah chauh chuan engtinmah a tih theih si loh avangin khuaah midang pun turin a kal ta a. Khuaa mite chuan chutiang sanghal lian chu an hmu chak a. A chan turin an liam zo ta vek a,a hmun an zuk thlen chuan sanghal tlukna-ah khan sanghal tereuhte, vawkzel tia lek hi a lo tlu ngat a. “Hei himaw i nghalchang kah chu?” an ti a, annuihzabur hle a. Zalhranga chuan 'Ka kap ngei alawm, en ula in duh leh, a chunga chuang chunga ka vaibel dawn sahna pawh a la awm reng ang chu,” a ti a. An han en a, vau a rawzik Zalhranga sahna chu a lo awm ngei a. Mak an ti em em a.Zalhranga chu a lungawi thei ta lo va. A sanghal kah zawng chuan a thawk chhuak leh ta a. Nakinah chuan puk pakhat hi a va thleg a. Tah chuan lasi nula ho hian a sanghal kah ngei mai kha an lo hiat hiar hiar a. "Engatinge kasa kah in lo thleng mai?" thinrim takin a ti a. Lasi te chuan, “Engatinge kan vawk pa lian ber ilo kah?” an ti ve thung a. Zalhranga chuan "Kan lovah achhuak a. Kan thlai leh buhte a pal chhe zo vek alawm, engahge ka kah loh vang?" a ti a. Lasi te chuan “E khai, isual anih chu, i thihna ngaiah va thi lehrawh,” an ti a. Zalhranga chuan khuaa mite chu a han pun leh a. A sa chu an chan ta dur dur a.Nakinah chuan Zalhranga leh Zawltleipui chuan fapa an nei ta a. A hmingah Lalruanga an sa a. Lalruanga chu a lo tlangval a. A hmeltha em em a. Nula zawng zawng ngaihzawn rawn a rawn ni ta a. Mahse ni khat chu a dam lo va, a na ta hle mai a; a pa chuana ui em em a. A man bet tlat a. Lalruanga chuan “Ka pa min thlah rawh mithi khuaah ka kal dawn,” a ti a. A pa chuan a thlah duh lo va. “Kei chu mithi khuaah ka kal ang a, keimah aia hmeltha leh dawithiam zawk i nei leh dawn alawm” a tih pawh chuan a thlah duh chuang lo va. Lalruanga chu kel pa ah a chang a, a si ta hrep a. Mahse athlah duh chuang lo va. Nakinah chuankhawimuah a chang a, a pa chu a zuk ta hrep a. Ui em em chungin a thlah ta nge nge a, a tap a tap ta mai a.Nakinah chuan Zawltleipuii chuan nau a pai leh ta a. Ni khat chu a feh dawn a, ni a sa tha hle a. A naupai hram tawh tak chu a lo tawng ta a. “Ka nu, vawiin chu khua a chhe dawn, siksil keng rawh,” a ti a. A nu chuan, “nang naute, pian pawh la piang lo khan egmah i hre lo ang e,” a ti a, a dul chu a beng ta kawrh a. A va feh ta a. Lo a thlen atang chuan ruah a sur ta char char a, nilengin ruah do chung chuan a bung ta a. A tukah chuan zing atangin ruah asur buan buan a. Zawltleipuii chuan siksil ken a tum ta a. A puma naute chuan, “Ka nu siksil keng suh. Khua a tha dawn, i ning ngawt ang,” alo ti leh ta a. “Khawiah nang nau piang lo khan i hre hlei lawng e,” a ti a. A keng lui ta a. Ni a sa tha leh ta em em si a. Siksil chu a ning a, a paih a paih ta mai a.Zawltleipuii tlaia a hawng chu, kaiten-ah nau chu a thlauh(nei) ta mai a. Naute chu inhnuaiah a tla tlang a. "Hei sazu kua ka hmu e; ka lai nghal dawn, ka nu tuthlawh kha rawn thlak teh," a ti a. A nu chuan tuthlawh cu a thlak ve mai a. Sazu chu a man ta teuh mai a. A hmingah Lalruanga bawk an sa leh ta a, a pa chuan a tawngthei lutuk dawn, alei hmawr hi tan ila a tha ang, a ti a. A lei chu a tan sak ta a. Di tip ah a zep ta daih a. Chuti chung chuan an khua a naupang twng thei ber a la ni ta fo va.Hun a lokal zel a, Lalruanga pawh a lo tlangval chho ve dawn dawn ta. Ni khatchu an khaw nula hmelthaa an sawi vehat hat thin kha a rim a. Nula puantah lai chu a pawhchah sak chhen mai a. Nula chuan, “Lalruang pawt chat tawh suh, i hetih vang...." a sawi zawm duh lo va. Lalruanga chuan, 'Engnge ka hetih vang?” a ti a, a pawt chat leh tan ta a. Nula chuan, “Pawt chat tawh suh, i hetih vang hi a nih hi i nu leh pa in...” a ti a a sawi zawm leh duh ta lo va. Lalruanga chuan, “Eng maw ka hetih vanga ka nu leh pa in?” a ti a, a pawt chat leh tan ta a. Nula thin chuan a tuarta lo va. “Lalruang, i hetih vang hi a nih hi i nu leh i pa in i lei an tan,” a ti ta a. Chu veleh Lalruanga chu a tlan haw ta nghal a. A nu leh a pa hnenah chuan, “Ka nu, ka pa, khawnge ka lei in dah?” ati a. A pa chuan, “Ditip-ah,” a lo ti a. bangah a tlan lawn zawi zawi a, a lei chu a la a, a vuah leh ta a.Vawi khat chu Lalruanga leh a pa chuan thang an en dawn a, Lalruanga chu hma fe-ah a kal a, dartiang mawi takah a lo va chang a. A pa chuan a hmuh chuan a hawl ta a. An thlen dawn chuan a pa kut atang chuan a per thla ta nalh a. A pa chuan, “Lalruanga te mai mai thin hi a, pate khatin an ti hah ngai lo,” a ti a. An thang kamah chuan sakhi alo awk zar mai a.an thang kamna kiangah chuan zawngtah hi a rah teuh bawk a. Lalruanga chuan, “Ka pa, zawngtah nge to ang sakhi?” a ti a, a pa chuan, “E! Sa te chu to zawk ang chu le,” a lo timai a. Lalruanga chuan, “A nih leh nangin sakhi ak la, keiin zawngtah ka ak ang e,” a ti a. An hawn kawngah chuan a pa chu a kal hmasa ve thung a. Hnahthialah a lo va chang ve thung a. Lalruanga chuan a hmuh chuan, Ehehe, helai hnahthial chu in themthiam nan a va tha em, kan khawh chhin teh ang,” a ti a. A pa chuan a khawh duh tak takin a ring a. “E khaih khaih min khawh tak tak ang e,” a ti a. Mihringah a chang leh ta a. Khua an thlen chuan mite chuan, 'Khu, Lalruanga pain sakhi a awk e, a ak zar mai,” an ti a. An en liam mai a. Lalruanga'n khua a luh ve chuan, “E khai khu Lalruangan zawngtah a ak teuh mai,” an ti a. “Khawnge i zawngtah chu” an ti a, an pawt sup sup a, an pawh zawhsak ta vek a. Lalruanga chuan, “Kha ka pa, sakhi a to zawk ang i ti a, zawngtah a to daih zawk a nih kha.' a ti aLalruanga hian an lo vauah tui a khuap a, thang a kam bawk thin a. A thang awk chu a lo bo ziah mai a, tin a tuikhuah chu a lo nu vek zel mai bawk a. Mak a ti thei hle mai a. Vawikhat chua thang chu ava en leh a, a thang awk chu pakhat mah a lo awm leh ta lo va. A han inbual dawn a, a tuikhuah chu a lo nu leh vek bawk si a. “Tunge maw ka thangawk hi lo la vek zel a, ka tui hi tunge maw lo ti nu vek zel le, sa nge mihring ka hre tur a ni,” a ti a. chan a tum ta a. Hetiang hian tuk li lai chu a awm ta a.Tuk khat chu hma takah a tho va, a chang ta a. A thangkamna kiangah cuan lungpui lian tak hi a awm a,chumiphenah chuan a biru a, a chang ta a. Nakinah chuan van lam atang hian mihring ang tak hi alo thlawk thla nul nul a. A thangawk chu a rawn la leh ta nghauh nghauh a, chutah a tuikhuah ah chuan a inbual leh ta phur phur a. Lalruanga chuan a veh them them a, a man bet ta chawih a. “Nang hi a ni maw ka thang awk lo la a, ka thuikhur lo tinu vek zel hi,” a ti a. Chu pa chuan a hlau ta em em a. “Khawngaihin min that suh, ka hming chu Vanhrika a ni,” a ti a.Mahse, Lalruanga chuan thah a tum ta tho va. “Min that lo la, dawi ka hrilh angche,” a ti a. Lalrunga chuan, “Eng dawi nge min hrilh tur i neih?” a ti a. Vanhrika chuan, “I thangawk zawng zawng i dumbur a dah len dan leh i ralthawla lui tui zawng zawng khunglen vek dan ka hrilh ang che," a tia. Tichuan Lalruanga chuan, "Aw le, min han hrilh ta che,” tiin a chhang a. Vanhrika chuan sa bawp zawng zawngchu a thlawn a, Lalruanga dumburah chuan a khung a, a han chhem a, a phai ta duak duak  mai a. Chutiang zel chuan a ti a, a khung leng ta vek a. Tlanga thing zawng zawng chu a han dawi khawm leh ta vek a, Lalruanga tiang khawp lek alo ni leh ta a. Tlanga hnahthial chu a han dawi leh a, Lalruanga bengbeh khawp lek alo ni leh ta a. Chutah a bula luite tui zawng zawng chu Lalruanga ralthawlah chuan a han thun leh ta vek a. Chumi hnu chuan Lalruanga chuan Vanhrika chu a that ta daih a. Tichuan a haw ta a.Lalruanga pa chu kaitenah alo thu a. Lalruanga chu inchhungah a lut ta a. A sa awh ho chu a han theh thla ta phawk phawk a. A nu chuan, “Zalhrang, hei Lalruanga’n sa a awk teuh mai, lo lut teh khai,” a ti a. Lalruanga pa chuan, “Awihawm loh loh, alo lut lai pawh ka hmu reng alawm,engmah a ah loh tawp kha," a ti a, a lut duh chuang lo va. A koh a koh takah chuan a va lut a, mak a ti hle a. A fapa chu amah aiin dawi a thiam zawk tih a hriat chuan a lawm ta hle a.Sa chu an han chhum dawn a, bel mawng phah tur an nei ta hauh lo mai a, Lalruanga chuan, “Ka bengbeh hi phelh mai rawh u,” a ti a. A nu chuan,"Nanga bengbehin khawiah va daih suh,” a ti a. Lalruanga chuan, “Han phelh phawt ula mawle,” tiin a chhang a. An han phelh chuan hnah hlirin a khat ta mai a. A nu chuan, "E khai, taite zial leh vat rawh," a ti a. Mei an han chhem dawn a, an sa chhumna tur atana thing tuah tur an nei leh ta lo va. Lalruanga chuan, “Ka tiang kha phelh mai rawh u,” a ti a. A nu chuan a awih leh chuang lo va. Mahse an han phelh chuan kawtlai zawng zawng chu thing hlirin a khat leh ta vek mai a. "E khai, taite tel leh vat rawh khai,” a ti a. Tui anhan leih leh dawn a, an lo nei leh ta hauh lo mai. A nu chuan, “Taite,tui kan nei lo,” a ti a. Lalruanga chuan, “Ka ralthawl ami kha bun rawh,” a ti a. A nu chuan a awih leh ta chuang lo, "Nanga ralthawlin va daih suh,” a ti a, a chhungduh ta hauh lo mai a. Lalruanga chuan,"A nih keiman aw, Mahse kha lai pitartekha awm sawn rawh se," a ti a. Mahse pitarte kha engin emaw a mawlh ve tlata, a awm sawn duh lo va. Lalruanga chuan a'n bun ta a, pitarte chu a in chawpin a len bo ta daih mai a ni.Lalruanga chu a lo puitling ta a, nupui neihte pawh alo hun ve ta hial a. An khaw nula hmeltha ber chu nupui atan a nei ta a. Chutih lai chuan ram lamah Keimi a hrang hle mai a. Tumah feh tha ngam pawh an awm mang lo va. Lalruanga chuan, “A ni lo ve, ka va feh ang e, ka hlau lo ve,” a ti a. Feh tur chuan a insiam ta a. Chawfun leh rawchhem, chawhmeh leh hmawlhte tam tawk a keng a, a feh ta a. Thlam a thlen chuan bangah hmawlhte chu a thiat ta teuh a. A rawchhem chu a han tum a.a hmawlhte chu an zai ta tuar tuar mai a. Chutih lai chuan Keimi- an hlauh em em thin chu alo chuak ta a. Lalruanga thlam-a zai thup thup chu a hria a, a hlau ta hle a. "Lalruang, in va tam awm ve? In chawfun min hmuh teh,” a ti a. Lalruanga chuan, "Heipawh,heipawh..." a ti a, a chawfun ngai hlir chu a hmuh a hmuh a. Keimi chuan a hlau ta hle a, “Hawh, Lalruang, inthian ang,” a ti a. Lalruanga chuan, “Lokal ta che,” a ti a. Keimi chuan, “lokal zawk rawh,” a ti ve bawk a. An inpawh mai ngam lo ve ve a. A tawpah chuan lai leh laiah intawk ang, an ti ta a. Lalruanga chuan a thal chu a han khawhbur chat a, an intawk ta a. Lalruanga chuan, "Thiana, nang tunge ihming le?" a ti a. Keichala chuan,"Keichala ka ni,”tiin a chhang a. "Ka thalkhawhbur hi i phawi zo em?” a ti a, phawi a han tum a, Lalruanga chuan a thal hmawrah chuan a hmetbet tlat a, aphawi thei lo va. “Khawnge keiman ka'n phawi ang e," a ti a, awlsam te in aphawi ta mai a. Keichala chuan mak a ti hle a, tichuan an inthian ta a.Keichala chuan, “Ka thian Lalruang,nu leh pa in hmuh ang,” a ti a. Lalruanga chuan, “Nu leh pa hmuh tlak ka nei hleinem, mahse i tih tlatte chuan le,” a ti a. Keichala chuan, “Keipawh nu leh pa hmuh tlak ka nei bik hleinem,” a ti a.Tichuan Lalruanga nu leh pa hmu tur chuan an kal ta a. Lalruanga nu leh pa chuan an lo titha hle a. Keichala pawh chu a cham ve ta reng a. A haw dawn chuan ran lu kimin an thlah ta a. Keichala chu a lawm hle a, “Thian Lalruanga chu nu leh pa hmuh tlak ka nei lo i ti a, hei bak bak,” a ti a.Tichuan Keichala nu leh pa hmu tur chuan Keichala te khaw lam pan chuan an chhuak leh ta a. An khua chu a lo hla hle mai a. Kawngah chuan zan tam tak an riak a. Ni khat chu nghalrualtam zet mai hi an hmu a. Lalruanga chuan, “Nang, thiana, han luhchhuak tache, ka lo chang ang e,” a ti a. Keichala chuan a han luhchhuak ta a. A thiam hle mai a, huk huk a ti a, a um chhuak zung zung mai a. Lalruanga chuan alo kap chat chat a. A thi chhuah hmain mei bu alo bel chat chat a, a thi far khatpawh a chhuak hman miah lo va.

Keichala chu alo chhuak a, “Thiante sakah hmuamhma hre thei rawh,” a lo ti a. Keichala chuan a zawng a zawng a, a hmu ta hauh lo mai a. Mak a ti hle a. “Engtin nge i tih bik?” a ti ta ngawt a. Lalruanga chuan, “Mipa na na na chuan a lo chhuah khan, ‘khi pawh, khi pawh,’ ka lo ti a, ka kut zungtangin ka lo kawk tlu zung zung mai alawm,” a ti a. Keichala chuan mak a ti hle a.

Tichuan an kal zel a, nakinah chuan thlam-ram pakhat hi an va hmu a ,an riah a ngai ta a. Lalruanga chuan, “Keichal, khita mei lak nge i duh khuta tui chawi?” a ti a. Keichala chuan, “Khita mei lak ka duh e,” a ti a, mei la tur chuan a kal ta a. A lo let leh chuan Lalruanga chuan Chaw leh chawhmeh alo chhum so barh barh tawh a. Keichala chuan, “Engtin ge mei i neih theih le?” tiin a zawt a, “Mipa na na na chuan, kan tinhna kan han sik phet a, a alh mai alawm," a ti a.

Keichala chuan mak a ti leh ta em em a.Tichuan a tukah chuan an kal leh ta zela, hmun pakhat hi an va thleng a. Nghal rual hi an lo awm leh noh noh a. Keichala chuan, “Thiana, nang han luhchhuah ve thung rawh le, ka lo chang ve ang e,” a ti a. Lalruanga chuan a han luhchhuak ta a. Keichala chuan Lalruanga tihdan kha a hre reng a, khi pawh khi pawh a lo ti a. Mahse pakhat mah kawhthluk theih a nei ta thuai lo mai a. A beidawng chuan a tawpah pakhat chu alo chum hlum ta ngawt a. a chum hlumna duk chu lei lamah a delh tir a,

Lalruanga lo chhuah chuan, ‘thiante sa thah hnuhma hmu thei rawh le,” a lo ti ve thung a. Lalruanga chuan sanghal chu a han kuai let a, a chumna hnuhma chu a lo duk chur mai si a, “Hei i chum hlum a nih hi,” a ti ta a, Keichala chuan mak a ti leh ta em em a.Keichala te awmna khua chu a hlat em avangin ni hnih leka thlen mai theih a ni lo va. Hmun pakhatah an riah a tul leh ta. Chmi hmun, an riahna tur an thlen chuan Keichala chuan, “Khita mei lak nge i duh khuta tui chawi?” a ti ve ta thung a. Lalruanga chuan mei lak chu a thlang ve ta a. Lalruanga thang bo hlan chuan Keichala chuan mei lo chhem ve hi a tum a, a tinhna chu a lo sik thi phung mai a, mahse mei reng reng chu a chhuak thei ta si lo va. Lalruanga lo thlen chuan a kut chu a thukru vat a. Lalruanga chuan, “E khai, engati nge i tin te pheng phung chu?” ati a. Keichala chuan, “Engtinge maw i tih bik le?” a ti a. Lalruanga chuan, “Keiman kan chhem ang e,” a ti a. a meibu chu a talh zauh a, a tin karah a zep zauh a. Chaw leh sa chu an chhumta a.

Keichala chuan mak hi a ti leh ta em em a. Sa chu hela ei a duh zawk avangin pawnah lungphun phenah chuan a khel bawp bawp a, a khat tawkin lalruanga chaw ei chu a rawn en zauh zauh a. Lalruanga chuan alo en vak zel a, a zak deuh va.An chaw ei kham chuan an kal leh ta a, thui fe an kal hnu chuan ngaw dur zau fe mai hi an thleng a.
Lalruanga chuan a han en vel a, “Thiana helai chu nun chan zir nan a va tha kher em ve aw,” a ti a. Keichala chuan, “Zir ta che, amaherawhchu a tawk ka tih ve leh banah,” a ti a. Keichala chu thingkak lian fe ah hian a thut tir a, nunchan chua han zir ta a, a kawlhnam a pawi a, ‘heih heih heih’ a ti a, ngaw dur pui pui te chu a vai eng pawp pawp mai a. Keichala chuan nasa a ti em em mai a, ‘thiana a tawk tawh e,’ a ti chul a. Lalruanga chuan tawk ti awm lo chunghian Keichala awmna zawn a thlen chuan, “Tawk tawh mai ang hmiang,” ati a, Keichala awmna thing chu a fik ta hmawk mai a. Keichala chu a tla thum ta dawt mai a, “Thian tha chu ni lo la saphuthlik,” a ti a. Lalruanga chuan, “Nang pawh thian tha chu ni lo la thalfang char,” a ti a.Tichuan an kal zel a.

Nakinah chuan pholeng hmun bawn fe hi an va thleng ta a, Keichala chuan,”Helai chu nunchan zir nan a va tha ve aw,” a ti a, zir tak rawh khai, hei a tha hle alawm a ti mai a. Keichala chuan, “Aw le, helai ka thlen veleh hian tawk lo ti ang che,” a ti a. Lalruanga chuan, “Aw le, i thlen hma hmain tawk ka lo ti ang, i hlauhawm em mai,” a ti a.Keichala chuan hlim deuh maiin a han bawh eng ta pawp pawp mai a, a rei deuh hnu chuan a bawh eng tha peih ta mang lo va. Lalruanga hnenah chuan, “Thiana, a tawk tawh ti rawh,” a ti a. Lalruanga lah chuan a haider zel mai si a. Nakinah chuan lung rit lelhlawlh hi ala a, tawk tawh ang hmiang a ti a, Keichala chalah tak mai chuan a han deng thum tawk mai a. Hah nak alaiin chutia a han deng thum tawk mai chu na a ti hle a, “Thian tha chu ni lo la, sa phuthlik,” a ti a. Lalruanga chuan, “Nang pawh thian tha chu ni lo la, thalfang char,” a ti ve leh mai a.A hnu deuhah chuan, Keichala te khua chu an thleng dawn ta a. Keichala chuan khaw luh hma chuan, “Thiana, hetah hian lo awm la, ka khuate lo inbuatsaih turin ka han hrilh ang e,” a tia. Lalruanga chuan a hnungah a zui ru zel a. Keichala chuan a khuate hnen a han thlen chuan, “Tu pa mei sei sei” anti a, an mei sei pui pui chu an lo thlak thla zuar zuar hlawm a. Keichala chuan, “Zia thup aw zia thup aw, hringmi hawng e,” a han ti a, an zia an thup ta thup a. Chu veleh Lalruanga chu a tlan let ta vang vang a, Keichala lo thlen hma chuan, a awmna ngaiah chuan alo va awm leh hman vang tawha.

Nakin deuh ah chuan Keichala chu alo thleng ve ta a, “Lo kal rawh le, i kal tawh ang,” a ti a, an kal ta a. Khua an thlen veleh Lalruanga chuan a fei chu leiah a khawh bur chat a, a chhipah chuan a lam ta va va mai a, khua amite chuan an en tuai mai a, a lam zo seh tur chuan an chang thuap a. Ani lah chu a chhuk duh bawk si lo va. Khua chu a thim dawn ta mai a, Lalruanga chuan a ning ta deuh a, “Thosi, fai thap angin lo tam rawh se,” a ti a, a lo tam ta em em a, a seh ta noh noh a, an awm rei peih ta lo va, an tin zo ta vek a. Lalruanga chu a chhuk a, inchhungah chuan a lut ve ta a. “Thian Keichal, khawnge i nu leh pa chu?” a ti a. Keichala chuan, “Kawmchar papui ah ka khung kha,” tiin a chhang a.

Ava en chuan an lo then thu mai a, an hahni-ah te chuan vangvat saitial lian pui pui alo khap thlur thlur mai a, Lalruanga chuan an huana changelhnah chu pawndumah a dawi a, a han pawtthler kawk kawk a, a hruksak ta pawk pawk a, “Nu leh pa hmuh tlak ka nei lo i tia, an that tehlul nen,” a ti a.Keichala nu leh pate chu an lawm ta em em a, zanriah an han ei a, Lalruanga chu a muhil der a, a kezungpui chu a hnar tir barh barh a.

Keichala nu leh pa te chuan heti hian an ti ta a, “Keichal, he i thian hi thian tha a nih hi, naktukah ar ka talh ang che ti la, ‘arpui tui lai nge i duh ar te’ ti la, ar lian a tih chuan arte talh la, arte a tih chuan ar lian i talh ang a, ‘vawk ka talh ang che’ i ti ang a, ‘vawk lian nge vawkte ka talh ang che’ i ti ang a, vawk lian a tih chuan vawkte i talh ang a, vawkte a tih chuan vawk lian i talh dawn nia,” an ti a. “Zu ka zuk ang che , a bel lian nge i duh a belte?” i ti ang a, bel lian a tih chuan belte i zuk ang a, belte a tih chuan bel lian i zuk dawn nia, Huana thi pawh saw a duh duh lawh sak ang che" an ti a.

Chung an sawi zawng zawng chu Lalruanga chuan a lo hre vek a, zingah chuan Keichala chuan, “Ar ka talh ang che, a thum nge i duh a pui tui lai?” a ti a. Lalruanga chuan, “Keini thian dunte chuan arpui tui lai te chu ka ei seng hlei nang, a thum le,” a ti a. A pui tui lai an talh sak a. “Thiana, vawk ka talh angche, a lian nge a te i duh?” a ti a “Keini thian dunte chuan a liante chu kan ei seng hlei nang, a te le,” a ti a, a lian a talhsak leh ta a. Keichala chuan, “Thiana zu ka zuk ang che, a bel lian nge a belte?” a ti a, Lalruanga chuan, “Keini thian dunin a bel lian kan phu nang, a belte le,” a ti a. Belpui a zuk leh ta a.

Keichala te kawmchhakah chuan pitarte hi a awm a, Lalruanga chuan thu a zawt ru a, “Ka pi ka thianin thi min lawh dawn a, eng lam zar ber nge tha ang?” a ti a. “Hmar lam zar khu a tha ber a, mahse an ui ber ang, mahse hetiang hian sawi ang che, “Thiana ka tla dawn ti la, uai tliak la, tichuan i lo thei ang,” a ti ta a. Nakinah chuan Keichala chuan, “Thiana, thi ka lawh ang che,” a ti a, thi lo tur chuan an kal ta a. A hmun an va thleng a, an han lo ta a. Lalruanga chuan hmar lam zar hlirchu a lo va, nakinah chuan hmarlam zar chu a uai tliak hmawk mai a, “ Ka tihpalh,” a ti a,  Keichala chuan a ui hle mai a. “Thian tha chu ni lo la sa phuthlik,” a ti a. Lalruanga chuan, “Nang pawh thian tha chu ni lo la thalfang char,” a ti ve a.Lalruanga chu Keichala te khua atang chuan a haw dawn ta a.

A khua ten Lalruanga chu seh an tum tih a hriat avangin zing takah a haw tir a, “Keichalthian buanah” an rawn ti sek a, “Zing a tho mek,” tiin a lo chhang a, nakin lawkah chuan, Keichal, thian buanah”an rawn ti leh thin a, Keichala chuan, “Chaw ala ei mek.” tiin a lo chhang leh a, tichuan thli a fun sak a. “Hei hi in i thlen hma chuan hawng suh ang che,” a ti a. Mahse kawnglakah a phelh ta mai a. Thli chuan Keichala bahzar a rawn chhem a, Keichala chuan in a thleng tawhah a ngai a, keimi hovin an rawn zawh leh chuan, “Khai le,” a ti a, a papui chu a nam chhuak tawp a, an bawh ta ruih ruih a. Mahse Lalruanga chuan in a la thleng awzawng si lo va, chutia an rawn um thawm a hriat chuan a kianga saphu khur hluiah chuan a lut ta a, Keichala chuan a ngaihtuah deuh a, midang zingah chuan a um ve ta a.

Chung tlan ho zingah chuan mitdel pakhat hi a tlan ve a, alo va thleng hmasa ber a, Lalruanga khan a ke lehlam a khai lut ve hman lo va, mitdel khan lungtat emaw a ti a. Alo thut bet a, a lo khal hoh hoh a, chu chu Keichala chuan a hmu hlauh a, Lalruanga ke tih a hria a, keima hual asin a ti a, a thut bet ta tlat a.

Nakinah chuan keimi dangho chu an lo thleng khawm ve ta hlawm a, Lalruanga an hmuh tak si lovah chuan an thu khawm a, hlauhawm an sawi khawm ta mai mai a. Mitdel pa chuan, “Kei chu ka hlauh ber chu, aaa... ka sawi ngam lo, min tlansan vek ang a, ka tlan chak ve thei awm si lo,” a ti a. Tlagval ho chuan, “Tlansan lah lo ve, ti hian kan ti che ang a,” an ti a, a zakah an la a, an tlanpui dan tur te chu an han zir chhin vel a. Tichuan a sawi ta a. “Kei chu ka hlauh ber chu, khua hi han dur khup khup se la, bawkbawn tia tia hian ruah mal hi han tla phuar phuar mai se la, chutah Lalruanga khan chang han tum raih mai se la, chu chu ka hlau ber,” a tita a.

Lalruanga chuan a lo hre kar mai si a, a sawi zawh veleh cuan a sawi ag tak chuan a han dawi ta a, ruah mal a tla phuar phuar a, chang a han tum ta raih mai a. Chu veleh keimi ho chu bak lengin an tlan chhe ta hlawm a, mitdel pa cu an tlansan ta vek a.

Lalruanga chu alo chhuak a, mitdelpa chu a vaw nek a. Lei a barh vak a, a kalsan ta daih a. Nakinah chuan mitdelpa chuan khua ava thleng a, “Lalruanga in tih kha saphu khurah khan a lo tawm reng a, ka chem phekin ka hem nek a, lei ka barh nek mai,” a ti ta hleuh va. Mite chuan, “Nangmah zawk hi a hem hrep che a ni lo maw? Khawimaw kan han en teh ang che,” anti a. An han en a, “E nangmah a nih hi a hem che, hei a duk chur alawm,” an ti a.

Lalruanga chu a kal zel a, an khaw tuikhur a va thleng a, rei fe a thangbo tawh avangin a fanu tuichawi tura lokalchu a lo hre tawh lo va, a thlem ta a. A thite chu pek a han tum a, mahse “Ka duh lo, kei pawh ka pa Keichala khuaah a zin a, thi te cu a hawn ve dawn tho,” a ti a.

Lalruanga chu a zak ta em em a, in an han thleng a, a fanu chuan a pa thil tihdan chu a han sawi dawn a, a sawi dawn veleh a thi hawn kha thlangra-ah a bun a, “Hei chemte atha tha,” a lo ti zung zung a, a fanu chuan a sawi hman ta lo va, hlim takin thi chu a thil ta zawk a. Lalruanga thil hawn vel cu a nauvin a lo hmuh chuan, "Lalruanga mah kal thei chu ka thei ve khawp ang," a ti a, kal a tum ta mai a. Lalruanga chuan, “Mai mai a, tihdan i thiam ve awm si lova, i va thi mai ang,” a ti a. Mahse a nau chuan, “Nang pawh thi lovin i chhuak a. Ka kal dawn,” a ti talh a. A u aia thiltithei zawkah a inngai tlat a. Tichuan a thawk chhuak ta a.

Keichala te khua chu a va thleng ta a, Lalruanga nau tih a lo hriat a vang chuan Keichala chuan alo duat hle a. Au a tih ang bawk chuan a nu leh pa alo entir a, a hma ang bawk khan an hahni-ah te cuan vangvat saitial alo khap leh ta thlur thlur a. Ani chuan, “E khai, a va rapthlak em, ka hlauh zawng tak ani,” a ti a, a khuh bo leh ta daih a. Nakinah chuan zanriah an han ei a, chaw ei kham chuan Lalruanga nau chu a muhil ta der a.

A u an tih ang bawk khan Keichala nu leh pa te chuan an fapa chu an zilh leh ta a. A tukah chuan Keichala chuan, “Ar ka talh ang che, a pui tui lai nge i duh a note?" a ti a. Ani chuan, "A note te chu kan kham hleinang, a pui tui lai ngat le," a ti a, ar note a talhsak ta a. "A nih leh vawk ka talh ang che, a te nge a lian kan talh ang?" a ti a. "A te teivet chu kan kham nang le," a ti leh a. Vawkte a talh leh ta hlauh va. Tin chumi zawhah chuan,"Zu ka zuk ang che, belte nge ni ang belpui?" a ti a. "Belpui ngat le" tiin a chhang a. Belte a zuk leh ta a. Lalruanga ang bwk khan thi a lawhsak ve teuh bawk a.

Lalruanga nau chu a haw ve dawn ta a.Lalruanga a tihdan ang thovin Keichalacuan thli a fun sak a. Hma takah a kaltirta a. Mahse ala hma em avang chuan kawtchhuahah zan lama mi meichhemla mit chiah lo a hmu a. Mei chu a tuah lum leh a, a mu leh ta mai a. Keichala thilfun kha chawhmeh emaw a ti a.a han phelh a, "Engmah a nih niau loh hi," a ti a, Meiah a rawh ta daih a. Thli chuan Keichala in a han chhem a, a thleng hla hle tawh a nih hi a ti a, a khuate chuan Lalruanga haw dawn lai ang thova "Thian buanah" an tih sek avangin "Nichinah a kal daih tawh" a ti a. Chu veleh 'huk,huk' tiin meikawhin an um ta nghal a.

Mahse, kawtchhuahah an va hmu ta mai si a, an pawt sawm ta vek a.Lalruanga chuan a nau chu haw har a tiin a ngaihtuah ta em em mai a. Lam turin a thawk chhuak ta a. Ava thlen chuan an lo ei zo vek tawh si a. Keichala chuan a khuate zawng zawng chu a ko khawm vek a, a luak tir ta vek a. Lalruanga chuan a han dawi khawm a, a pum vek hnu pawh chuan a la tho thei ta chuang lo va. An han dap vel a, a zak vun alo la kim lo va. Laiking vun a bel ta a. A lo thawh chuan a u chu"Engah nge ilo kal ve rawk rawk? Haw leh rang rawh,” tiin a hau zawk zawmah a.

Lalruanga chu a thinur hle mai a."I zak kha en thuai rawh," a ti a. A han en a, laiking vun chu a pawtthla a, “hetiang ka vunah a awm thei lo" tiin a paih ta daih a, chu veleh a thi leh ta nghal a.Keichala chuan, "Engtin nge ni ta ang le Thiana?" a ti a. Lalruanga chuan,"Engtia tih theih ni tawh hek lo le, ka nau in lo that si a, kan indo mai a ngai dawn a nih hi le," a ti a. Keichala chuan, "Anih chuan a thi hmasa zawk zawk Hrangsaipuia seki phir a inral ah kan ti a ni ang chu," a ti a. “Ni tuk e,” tiina chhang a, Lalruanga chu an khaw lam pan chuan a haw ta a, an indo chu a ni ta reng mai.

A tukah chuan Lalruanga chuan "Ka nu,vawiin chu Keichala a lo kal a, khawnge a tih chuan chhuah lamah a feh,lo ti ang che u," a ti a. Tlak lamah a feh ta daih a. Keichala chu a lo kal ngeia, nilengin chhuah lamah a zawng a.

A tukah chuan, "Tlak lamah a feh lo ti ang che u," a ti a, chhuah lamah a feh leh ta hlauh a. Keichala chuan a hmu leh ta lo va. A tuk leh ah chuan a nu hnenah, "Vawiin chu chhuah lamah a feh lo ti ang ce u," a ti a. Chhuah lamah a feh ta a. thlam luhka-ah chuan lungtat leh hem hmangin mihring lem a siam a, amah chu thlam chungah a lawn ta a. Nakinah chuan Keichala chua lo kal ta ngei a. A rawn veh phei thamtham a, milim chu a bawh ta rawp mai a. Chutihlai chuan Lalruanga chuan a zak dawhah tak thalin a lo kap ta a. Keichala chuan, "Thiana, kan intiam tawh ang khan Hrangsaipuia seki phir chuan min han ai ngei dwn nia," a ti tawk tawk a,  Lalruanga chuan, "Ni tuk e le," a ti a, Keichala chu a thi ta a. Keichala thih veleh chuan Lalruanga chu rei awm lovin Hrangsaipuia seki phir la tur chuan a kal ta nghal a.

Hrangsaipuia in chu a va thleng ta a,Hrangsaipuia chuan a luhlai chu a hre hauh lova. A fate chuan ka pa lo lut rawh, hei mikhual kan nei a nia an ti a. “Awihawm loh loh, lo luhlai pawh hmu hawt lo chuan,”a ti a. “Kan tapchhak a hi a thu reng a nia,” an ti a. Ani chuan`khual tha nge khual chhia?’ a ti a. Lalruanga chuan, “Khual tha” a ti a.

Hrangsaipuia chu alo lut a, Lalruanga ahmuh chuan a sekiphir a la dawn tih a hre nghal a, an in dawi chu a ni ta nghal mai a. Hrangsaipuia chuan, “Thur bebu tlang atangin ilo kal a, ka tapchhakah ilo thu thur bebu a ni maw?” a ti a. “Pial thinthen tlang atangin ka lo kal a. I tapchhakah ka lo thu pial thin then a nih hi,” alo ti a, “Hreu bem bum tlang atangin i lokal a, ka tapchhakah ilo thu hreu bembum a ni maw?” a ti leh a, “Mam thin then tlang atangin ka lokal a, ka lo thu mam thin then a nih hi,” a ti a.

A tukah chuan chaw an han ei a, Hrangsaipuia chuan Lalruanga chaw-ah chuan dawi a phul ta mai a, a ei duh ta lo va, chutih lai tak chuan Lalruanga chuan a fate zing buhdeng chu a dawi a, a inhauh tir a, an insual ta bur bur mai a. Mahse Lalruanga’n a dawi tih a hria a, Hrangsaipuia chu a tlanchhuak duh hauh lo va. Nakinah chuan a vawkpa lian chu pal awngah a tan tir a, a thi dawn emaw tih khawpin a ngek ta chiam chiam mai a. Chu veleh a tlanchhuak a, a tlanchhuah hlan chuan a hmaa chaw chu a her hmak a, a ei ta mial mial a. Alo luh leh chuan ama dawi phul chu a ei ta zawk a, chaw ei khamah chuan Lalruanga chuan seki phir chu lak a tum ta a, Hrangsaipuia chuan a ui em em mai a. “Arpui, kha i thian a lak dawn kha, lim hrep rawh,” a ti a, Lalruanga chuan, “Mawia, mahni dawisa ei pa kha lim zawk rawh,”  a ti a, Hrangsaipuia chu a lim ta zek a. A kel hnenah chuan, “Kela, kha i thian a lak dawn kha, tauh nghek rawh,” a ti leh a, Lalruanga pawhin, “Mawi, Kela, mahni dawisa ei pa kha tauh zawk rawh,” a ti a, kel chuan a si leh ta hrep a.

Hrangsaipuia chuan Sekiphir chu a ui em vangin chaw fun meuh in a thlah ta a, nakinah chuan lui an zuk thleng ta a, chaw an han fak dawn a, Hrangsaipuia chu lungpui chungah a thu a . Lalruanga chuan sakhi phaw a phah a, chumi chungah chuan a thu a. Lalruanga chuan Hrangsaipuia mawng leh lungpui chu a dawi belhbawm ta tlat a, Hrangsaipuia pawh chuan sakhi phaw leh Lalruanga mawng chu a dawibelhbawm ve a, Hrangsaipuia chuan, “Ti khan le, i mawng leh sakhi phaw kha a inbelhbawm tlat ang a, I tho thei lo vang a, I thi mai dawn a ni,” tiin Lalruanga chu a sawi thaih a.

Lalruanga chuan, “Engah nge ka thawhtheih loh vang, ka hlep ang a, ka kal daih mai dawn a ni. Nang chu tikhan tui alo lian ang a,a rawn hrut che a nga, i tho thei dawn si lo va, i ril alo tam ang a, i kalsawn thei si lo vang a, riltamin i thi mai dawn a ni. Kei chu ka duh duhin ka kalpui thei si,” a ti a. Chutia Lalruanga’n a sawi meuh chuan Hrangsaipuia chuan a hlau leh ta hle sia. “Lalruang, dawi insut ang,” a ti a, awle, min han sut hmasa la” a ti a, a sut zo vek a, Lalruanga chuan a han sut ve a, a sut zawh hma chuan tho rawh le a ti a, a han tho a, a mawng chu a hek ta hlawk mai a, chumi hnu chuan  an inthen ta a. Lalruanga chu Keichala te khua ah chuan a han kal ta vang vang a, Keichala chu ropui takin a han ai ta dur dur a.

Chunglai chuan nula pakhat dawi thiam tak mai, Zangkaki an tih hi a awm a, Lalruanga chuan a chanchin alo hriat chuan rim turin a dawi bur thaber nen a thawk chhuak ta a. Zangkaki chuan alo ti tha-in alo ngaizawng der hle mai a, Amah pawh chu nula hmel tha tak a nih avangin Lalruanga pawh chuan a ngaizawng ve hle tho va. Ticuan nilengin an inkawm ta a.

A tukah chuan a han leng leh a Lalruanga chu chhunlai takah a muhil ta a. Zangkaki chuan a mumangah chhum nasa takin a zin tir a, alo harh chuan, enge a mangah a hmuh alo zawt a, Lalruanga chuan, “Chhumpui nasa tak a lo zing a, ka lo chhem kiang duak duak a,” a ti a. Zangkaki chuan a dawi hneh lo tih a hrethiam nghal mai a. Chumi hnu chuan Lalruanga chu an khuaah a haw ta daih a, Zangkaki chuan zin leh turin a chah a,”I fa ka pai a, nau puak puan kengin lo zin rawh,” tiin.

Tichuan Lalruanga chu a dawi bur chhe zawk kengin a zin leh ta vang vang a. Zangkaki chuan a hma ang bawk khan alo lawm leh a, hlim takin an inkawm leh ta a. Chhun laiah chuan Zangkaki chuan Lalruanga chu a dawi mu leh a, a harh chuan a mumang a zawt leh a, Lalruanga chuan chhum nasa taka lo zing a chhem kian theih miah loh thu a hrilh a.

Chu veleh Zangkaki chu pawnah a tlan chhuak a, “Ka inpui, lungpuiah chang rawh,” a ti ta mai a, Lalruanga chuan lungpui chu a han dawi keh dawn thin a. Mahse a khi tuar tuar a, Zangkaki chuan a khi lai apiang chu khawihnunin a lo char nghal zat zat zel a, a dawi phel thei ta lo va, Lalruanga chu a tang ta reng a.

A ril alo tam a, Zangkaki chuan chawfun a thlak sak thin a. Lalruanga mangang chu a rum a rum a, “Ka thi ngei dawn a nih tak hi,” a ti a. Zangkaki chuan,”Thihchauh lo chu beisei suh, thildang engmah beisei tur i nei lo,” a tihsan hmak mai a.  Nakinah chuan chaichim te hi Lalruanga kiangah chuan alo kal a. “Chima, I pu ka mangang anih hi, kan inah khan va kal ta la, ka nute khum lu-a tungchaw ah khan ka ipte ka banga, tah khan ka dawibur tha zawk a awma,va la tawh,” a ti a.

Chaichim te chu a kal ta nghal vang vang a, dawibur tha zawk chu a va la a, a kir leh ta vang vang a, lui a va thleng a, a kallam kha chuan a kam em a, mahse a va thlen leh chuan alo lian sen khui mai si a, a helna a han zawng chian thin a, mahse a hmu zo hlawl lova. A kianga phaipheng hnah chu a chilh chhum a, a chungah chuan a thu a, a inthai kal ta a. Nakinah chuan lui lai ava thleng a, tui zangkhauh a lo nasa em kher a, a tang ta reng a, chutihnak alai chuan a pu dawibur chu a thlauh ta leh nghal a. Lui mawng lamah a len thla ta vawn vawn mai a. “Ka pu, min chhan rawh, ka pu min chhan rawh tiin a au thla vawn vawn a.

Chumilui mawng lamah chuan vai lal chhiahhlawh ten ngawi an lo dawh a. Chumi te chuan anlo char ta a, an chhu keh a, a keh chuan a per a, dawi an lo thiam phah ve ta a.Lalruanga chu lungpui chhungah chuan hrewm ti takin a a awm a, a dawibur lah alo thleng thei bawk si lo. A tawpah chuan Zangkaki kutah chuan  a boral ve ta a ni.

THULAKNA : B.Lalthangliana