NU-I, NU NI RAWH..

HMEICHHIA IN TI TAN CHHIAR NGEI NGEI TUR

A fa sên hnute hnêktir kak kak lai chuan, naute û chu a rawn tap lut bâi bâi a. A bân lehlamin a lo kuah a, a lo thlêm bâng thuai a. A fa upa ber nula uaih tawh school bâng a rawn haw leh a. Lehkhapuan lei a ngaih thu a rawn sawi a. Tha takin a lo pe leh mai a.

A nâute a muthilh hnu chuan, naute u chu puak mut pahin insúk zar a seng leh mawlh mawlh a. A zâi rât rât reng a. A hmel chu chiang taka han en chuan, hlimnain a kâp êng phêt phêt a ni ber mai.

.

A pasal hna thawk a lo hawng a, thingpui tuihnâi tak a lo pe leh thlap a. An inchhunga nu ber a ni thei chu a hlim em em a. Phûr takin a hmaa tih tur awm apiang chu a thawk mial mial thin.

.

An thenawma nu pakhat, âng peih em em mai chu a rawn lêng lût a. Mittui dir zung zung chung chuan,"Nu azawnga nu rethei ber hi chu ka va'n ni tak em!! Ka pasal lah hmân hmân ata tawh mi hriat thiamna nei thei thlawt lo. Ka fate lâktlak awm bawk si lo. An rui suau suau ringawt mai si a." a ti mial mial a.

.

A lainatawm ngei alawm! Mahse! A chanchin chu in neitunu chuan a nau puak ãwi deuh hlah hlah paha ei rawng bâwl chung chuan a zawt ta zel a.

.

"Kohhran leh khawtlangah mite duhsakna dawngin, ka phu loh tak tak nihna leh chanvo ka chang reng reng a, tûnhma ata tawh. Ka fate nisê an nawm loh hlauvin an duh leh châk zawng ka theih ang ang ka hlah lo va, anmahni enkawltu tur awmpui ni sê, pahnih thum ka la reng a. Lawm ahnêkin min diriam nan an la hmang lêt thlazen a." a ti ta bawrh bawrh a.

.

A duh tawk a sawi hnu chuan, in neitunu chuan a ngaihdan leh tum dan chu a sawi ve ta a. Inlêngnu tân a ngaihnawm leh nawm loh a dâwn hek lo.

.

"I kal tawh danah, a that leh that loh sawi ka tum lo. In chhungkaw nu ber i ni a, engti ang takin nge i hah ka hre lo. Kei chuan, fa naupang tê tê chauh ka la nei a. Ka la tan ve dawn êk êk chauh a ni a. Midangte nuna inrawlh tlak ka la ni hauh lo.

.

Mahse, hei hi ka tum leh duh dan a ni. Ka pasal fanaute tan hian, Pathian lo vêkah chuan an thian tha ber nih vek ka tum. Chuvang chuan, anni hi kei pawhin midang zawng aiin ka nunah ka dah lal ber a, ka thian tha ber atan ka kâwm vek a ni.

.

Naupang te taktê pawhin thian a mamawh a, puitling pawh kan ni tho. Nute aia hmangaihtu hi mihring zingah tumah dang kan nei lo tih ka hria.

.

Kei chuan, pasal ka neih dawn khan, khawtlang leh Kohhrana inhmang turin ka nei lo va. Ka pasal leh a chhungkaw rawngbawlsak turin ka nei a ni.

.

Ka pasal hi thunun tumin ka nei lo va, puih a ngaihna leh min mamawhna zawna hmangaih taka tanpuitu nih tumin ka nei a. Kei aia mâwl pasal neih ka tum loh avangin, amaha theihna awmte phawrh chhuak thei tur khawpin amahah ka innghat hmiah a. Pasal nêp leh zahawm lo taka ka lantir loh nan, a kawng zawhte ngun takin ka zirpui a, a zahawmna phet chhe zawnga nun ka tum hek lo.

.

Ka fate hi an len hnua kawm ngeih chauh tur ni lo vin, an naupan lai atanga kawm ngeih ka duh a, min mamawha min koh hun apianga 'eih' thei tura an bula awm hnaih hram hram reng ka tum a ni.

.

"I fa chu vaw rawh, a thi lo ang" tih changchawia vuak hi an thatna atana lek lam ngawt ka tum lo va, hauh hrep hrep ringawt ai chuan, thiante hnena tha taka fuihna thu sawi ang thlap a inngai chung a, midangte hmuh loha uluk taka thu tha hrilh thiam nu nih ka duh a, chuti ang tur chuan ka inzir char char a ni.

.

Fate hian, khawvel pumpui zirtirna aia an zir hmasak ber tur chu Nu nun kawng a ni a. Ka fate hian mi dang zawng zawng aia an star rawn ka ni ngei tur a ni. Ka nunah Pathian a lal ber a, a dawtah anmahni an ni tih an hriat theih nan, ze thup lova nun ka tum a ni. Tin, ka fate kal rualpui tur leh ningkhawng hre thiam tur a, khawvel kalphung mila inher rem ka zir ve ngar ngar thin.

.

Tunah pawh a châng chuan, JCB lem ka khalh a, a chang chuan ka inhrui zuan lawp lawp a, thirsakawr leh computer games thleng paw'n thiam zel ka tum a.

.

Pheikhawk hnúk ri hret hret mi taima an awm ngai lo an ti a, ka hnûk ri lai an hmu tur a ni lo tawp. Ka dam phawt chuan.

.

Ka tih theih chin a tawp huna ka theih loh titheitu Pathian ka auh dan thlengin an hmu tur a ni.

.

Ka thil tih eng pawh âng chung leh phun chunga ka tih apiang chu, hrehawm ti takin an rawn hmachhawn dawn a, awmpui leh chhiahhlawh kuta ka dah apiang hna hniam emaw an rawn ti dawn bawk a, a neitu hna anih angin keimah ngei hian ka theih tawpa thawh ka duh a ni.

.

Tichuan, an thawh theih tawk an thawh theih nana ring lui thei tura taimâk ka zir bawk ang.

.

Chu ka thil tum chu ka puitlin a, a lan chhuahna ka fate an lo puitlin hunah, pawn lama chhawrtlaka min ngai an awm chuan, ka pha lo mai thei.

.

Nu hringnun hi khawvel mihringte innghahna a ni a. Tar kun khûp bih thleng pawhin Nu kan mamawh reng thin. Ka laka innghat hmasa ber chu ka pasal fanaute an ni a. Min mamawh ber bawk.

.

Ka zahawmna leh mihring zinga ka innghahna tur ka pasal zahawmna ka zahsak chuan, an la rawn zah ngei ang a. An puitlin hunah pawh ka tana invenhimna kulhpui a ni nghal bawk dawn tih ka ring tlat a ni." a ti ta a.

Inlengnu chuan mak ti deuh tak chung chuan, "I la naupan tehlul nen, engtin nge chuti ang ngaihtuahna chu neih nachang i hriat zawk le!? Kei chu, i thil sawi zawng zawngah chuan ka fail a ni. Ka fail hlâwm tawp a ni. Pasal ka neih hma khan lo hre tawh ila tha tur." a ti dat dat a.

.

In neitunu chuan, "Kei pawhin keimah mai chuan ka hre bik hleinem! Ka nuin kan naupan lai atanga min hrilh thin a ni a. 'Hmeichhiain pasal a neih chuan, NU a ni tur a ni a. Nu nun chu nun ropui tak, khawvela dinhmun pawimawh leh duhawm ber a ni a, zahawm taka nunpui tur a ni' a ti thin.

.

Nu ni tura ka inpeih hma chuan pasal ka nei ngam lo va, ka tlin vek kher lo a ni thei. Mahse, tlin vek turin ka inring a ni. Ka pasal thawh chhuah ang anga chhungkaw enkawl thiam zir chho zel turin ka nulat chhunga ka hna pawh ka bansan ta a ni." a ti leh ta dap dap a.

.

Inlengnu chuan, "Tunah chuan engkim ka tlai tawh si! A va'n pawi tak em! Engtin nge bul ka tan that leh theih tâk ang le! Ka hun tha zawng zawng ka lo hmang ral tawh si..!" a ti vawng vawng a.

.

In neitunu chuan, "Englai pawhin bul i tan tha thei. I fate chuan an tar thlengin, nang, an nu hi an mamawh dawn che asin! Ram leh khawtlang tana i thawh theih ropui tak chu, kan ram enkawl thei khawpa fa tha nei thei turin, i pasal fanaute tân, NU ni ang che. NU-I, NU NI RAWH" tiin a nui ta var var a.