SANGHA MANTU RICHARD HALE

WRITER : Danny Zodinsanga @Naupang Thawnthu

October ni 17, 1969 zirtawpni chuan Kenedy Bay tuipui chu sangha mantute ram chhuah nana itawm fahran hian a hring pawl nghulh mai a. Tuipui chu thlifimin a han chhem zawng te chuan vaukam lamah a fawn phei delh delh a. Khua lah chu a thiang nuamin ruahsur tur leh thlipui lo thleng mai thei awm hmel pawh a pu lo va.He mi Ni hian sangha man tu Richard Hale-a chu a lawng ngainat tak ‘Janice Maree’ ah chuang in sangha man turin tuipuiah chuan a inkhalh lut mek a. Nidang ang bawkin a sangha mante chu bawmah a khung khawm a, zan thum lai tuipui chunga a ram chhuah hnu chuan inlam pana haw zai a rel ta a. Richard-a hi a nu nen nen tuipui kam, Coromandel an tih hmunah an cheng a. A nu hian a ngaiin a ngaihtuah thei em em thin a, chuvangin rei tak a thang bosan ngai lova ni. Richard-a chuan a lawng thlunna thirchakai chu a han pawt chho va, in lam pana hawn tuma lawng khawl engine tih nun a han tum lai chuan a khawl chhunga thil engemawni tliak ri niawm tak hi a han hria a, a khawl chu a han herh nawn leh pawh chuan a nung thei ta chuang lo va. A lawng chu a han endik thuai a, a khawl tih nunna zawmtu thir chu a lo tliak a ni tih a zu hmu thuai a. A chhe laichu perek elhkawmin a han thlun zawma, a lawng chu a nung thei ta mai a.

Tichuan minute sawm emaw chauh a kal hman ang tihah chuan a lawng khawl chhung chu a ri leh ta thawt mai a. A lawng khawl pawh chu a thi leh ta hmiah mai a. Rang takin Richard-a lawng thlun behna thirchakai chu tuiah chuan a vawr chhuak thuai a, a lawng chu a han endik leh a, lawng khawl a zu hawn nak chuan a khawl pawimawh tak mai a shaft a chhia a ni tih a zu hmu ta a. A khawl chhia chu siama siam rual loh a ni tih a hre nghal mai a, a rilru a mangang ta em em mai a.

A tuk khua chu a lo var dawn ta a, kawl a lo eng riai riai tih chuan thlifim vawt tak a rawn tleh a. A hnu darkar rei lote ah, kawlkil hla taka chhum dum lo lang nal nal chuan Richard-a te ang tuipui tihbaiawm tak a ei zawng thin tan chuan thlipui tihbaiawm tak a lo thleng dawn a ni tih hai rual a ni lo va, chu thlipui lo thleng tur chu a rei lo berah pawh chawlhkar khat tal chu a awh ngei ang tih a rinawm si a. Richard-a tan chuan a mangangthlak tak zet ta mai.

Thlipui leh tuifawn rapthlak takin a paihbo hun lo nghah ngawt mai loh chu tih theih dang a nei ta lo. Darkar tinin thli chu a rawn thawk na tulh tulh a, tuifawn pawh a rawn sang tan tulh tulh a. Richard-a lawng chu thirchakai chuan a pawt ding thei ta lova.Rei lote hnuah chuan thlipui chu a rawn thleng ta ngei mai le. Tuifawn chu sangtak takah a rawn fawk phei nghulh nghulh a, a fawn nasat avangin tui chu a rawn so var bulh bulh ta mai a. Richard-a chuan a lawng chu engti kawng zawng mahin a control thei ta lo. Thlipui leh tuifawn rapthlak zet chuan tuipui so but butna hmun mel 2000 laia hla Sicily Island lam pan chuan a len ta vawn vawn mai a nih chu. Richard-a chuan tui a hak nasat em avangin a thi thaw thang a ni ta mai a, thei leh thei lovin a lawng chu a vuan tlat a, tuiah chuan a la pil lo chauh chu a ni. Hetih lai hian Richard-a ngaihtuahna chu a kal thui ngei mai. Beiseina dang reng reng a nei tawh lo. Engtik niah emaw a ruhro te chu Tahihi vaukam velah tuten emaw an la rawn chhar mahna, tih chauh chu a inhnemna awmchhun a ni.

A nu, amah hmangaih leh ngai em em tu a hre chhuak hmasa ber a, a lo thih si chuan engtin nge a lo awm tak ang, amah a ngaihtuah vangin a dam zo chuang bik dawn em ni le, ti te in a ngaihtuah a. A hma lawka tuipui mam tha tak kha tunah chuan thihna thlan thim tuipui thihna rapthlak takin a ka a anna lam panin a duh lo chung chu tuipui fawn nasa tak chuan a len vawn vawn mai si a.

Tuifawn chu a nasa zel a, a lawng Janice Maree chu a rawn khuh hlup hlup a, metres 18 laia sangah te tuifawn chuan a sep chhukin a sep chho chhen mai a. Richard-a bungrua chu tuiah chuan an pil bo zo ta a. A thil neih pawimawh ve tak mai transistor te takte pawh chu tuiah a pil ta daih a. A lawng chhuata bungrua tlem la awmchhun chu a theih ang angin hum a tum hram hram a, a tui intur paina bawm lah chu a keh chhe vek tawh mai si a, ei tur a la neih chhun chu a lawng chhuata sangha man pahnih lek la awm chu a ni mai a. Mahse tui in tur awm bawk si lovin engtin nge sangha pahnih nen chuan a dam zawh tak ang le.

Ni engemawzat hnua zing khua a lo var dawn lai chuan Richard-a chu a vanneih a siamin tuifawn chuan thliarkar pakhat, in pakhat lek sak theihna tur hmunah chuan a vawrh ding ta hlauh mai a.Tui intur leh chaw ei tur a nei tawh si lo a chau lutuk chu a bawk nghal thlawp mai a. Hemi ni thleng hian tuifawn chuan Richard-a chu South Pacific tuipuiah ni 9 zet a vawrh vel tawh a ni. A ni 10 na zingah chuan Richard-a chu a rawn tho chhuak hlawl mai a, a chau lutuk kha a muhil a lo ni a. Hei hi ni 10 chhunga a mut vawikhatna a ni. A bungraw neih tuifawnin a len bo bangte lah chu ketli pakhat thelret ip, tin te reuhte pakhat leh tui suahna te chu a ni mai a. Riltam leh tuihal a thih mai loh chu hmabak a awm hian a hre lo va. Tanpuitu hmel a hmuh mial emaw, chung lam van atangtanpuina maktak a dawng mialte a nih si loh chuan a thi ngei dawn a ni tih a inhre chiang hle a ni.

Richard an thil pakhat a hriat miah loh chu Royal Air Force ten amah an zawng a, mahse ni rei tak hnuaah an hmuh zawh loh avangin beidawngin an kir ta ani tih hi. Richard-a hi a la dam ngei a ni tih ring tlat tu pakhat chiah a awm a, chu chu a nu Riria Hale-i a ni. Riria Hale-i hi sakhaw mi tak mai Pathian ring leh Pathian a innghat tlat mi a ni. A fapa Richard-a sangha mana tuipuia kal a lo haw lo tih a hriat veleh bang lovin a tawngtai a, a nunna zuah turin a ngen a, a tawp berah erawh chuan engpawh lo ni se, a fapa nunna chu a kuta awm turin a hlan tawp mai a ni. Tichuan Rira Hale-i chu a fapa tan chuan a tawngtai ta char char a.

Vawikhat chu lungchhe taka a tawngtai laiin a fapa chu dam takin a la awm a, ama hnenah hlim takin a lo thleng leh ngei dawn a ni tih hrilhtu awm ni awm tak hian a hria a. A rilru lungaihna thuk tak pawh a kiang deuh huai ni hian a hria a. Mahse hun a lo kal zel a, a fapa hmuh ni reng a awm tak si lovah chuan a beidawng leh tan ta a. Mahse beidawng lovin Pathian hnenah a tawngtai zel a.

Pacific tuipui zau tak chungah chuan Richard-a chuan riltam leh chau takin a hmabak thih leh dam inkar chu hmachhawna, intih pachan leh paukhauh a tum a. Thliarkar reh tak maia chaw leh tui pawh awm lohna hmuna thih pil bo ringawt ai chuan vanneih thil thu ah lawng kal vel pawhin min hmuh mial mahna tiin a lawng Janice Maree   chu tuiah han namthlak a, tuifinriat thli in a tlehna lamlamah len kual turin a han bei a. Mahse a lawng chu a lo pawp nasa em em tawh mai a, rei lote chhung pawhin tui chuan lawng chu a ti pil dawn zel ta mai a. Tichuan lawng chhuata tui chu darkar tina paih chhuak zel chungin tui ah chuan a lang thei ta hram a. Tuipui zau tak leh thuk takah chuan khawi lam nge a pan dawn tih pawh hre lo chuan a nunna chu a dahkham ta tawp mai a.

Richard-a chuan a rem hriatna chu a tha thei ang berin hman a tum tlat a. A ketli te chu mei chhemna stove ang reng deuh hian a khawr a, tui no pakhat chu a elh kul a, bel atan a duang bawk a. A lawng engine chhunga thirbial pakhat chu a thlawn a, engtin tin amaw tuithlitfimna(filter) atan a siam bawk a. A lawng petrol bawmah chuan petrol tlemte tui nena inpawlh chu a la awm a. lung chang pahnih chu a nawt a nawt a, a tek atang chuan petrol pahnih chu a hal alh ta hluah mai a. A lawng a thil alh thei tur thil zawng zawng chu a lakhawm a, a taksa vawt lutuk tur pawh chu a ti lum thei ta deuh a, tuipui al em em mai chu engtin tin emaw a thlifim a, chutiang chuan nikhatah tui in tur no chanve velte chu a siam chhuak thei ta hram a.

Thlipui leh tuifawn khan Richard-a sana bun lai kha a lo laksak lo hlauh mai a. A sana calender chu a han en a Oct 29 ni tak a ni tih chu a hre thei a. Mutmu tuahlo leh chaw leh tui ngheiin tuipui ah chuan ni 12 zet alo vakvai tawh a ni tih a han chhut nghal a. Thlipui leh tuifawn chuan Richard-a chu hmartawp lamah a len phei ta vawn vawn mai a, chumi lamah chuan kal se lang chuan dama han awm chi na rual a ni tawh lo vang.

Vanneihthlak takin thli tlehna lam chu a inthlak ta hlauh mai a. Janice Maree lawng chu New Zealand lam panin tuifawn chuan a lo hruai zel a ni tih Richard-a chuan a han hriat chuan a nunna atan beiseina tlem a han neih phah a, chu chuan amahah chakna leh phurna a rawn pe thar leh sauh a. Mahse dama chhuak tur leh vaukam hnai ber thleng tur pawhin a tlem berah km1000 a kal a ngai dawn tlat a ni. Engtin nge lawnga tuipaih chhuah ngai reng bawk si nen, chutiang chen chen a kal theih ang le.

Chhun lamah chuan Richard-a chu lawng ah a bawk thin a, mi veivak a hmu mial na tiin a thlir thin a. Zanah chuan mei a ti eng de de thin a, lawng dang lo kal an awm hlauh a an rawn hmuh theih nan a ti a ni. Sangha lian chi Whale leh Shark te chu Janice Maree bul lawk lawkah te chuan an rawn awm thin a, hun remchang rawn hmu se la, Richard-a chu chaw atan an ei zo tawh ngei ang.

Chaw ei lova a awmna hi nikhua a rei ta bawk a, tunah chuan Richard-a chu a chau takzet tawh mai. A remhriatna dang a han hmang leh hram hram a, lawng perek pakhat chu a la a, nghakuai atan a siam ta a. Rei ngial sangha pakhat man tuma a beih hnu chuan sangha pakhat Blue pointer an tih chu a man ta hlauh mai a. Hei hi chawlkar hnih chhunga a chaw vawi khat eina a ni. A sana calender a han enchuan Nov ni 8 ni a hmang mek a ni tih a hria a, tunah chuan tuipui chungah ni 19 zet a lo vakvai ta a ni.

Richard-a chuanna lawng Janice Maree  chu tuifawn chuan zawi zawiin arawn len zel a. New Zealand vaukam lam chu a ni telin a rawn hnaih hret hreta. Mahse tuna a kal dan minute 2 chhunga metres 10 zel thui a kal chuanthla 3 leh a chanve hnuah vaukam chu a thleng dawn a ni chauh si a. Richard-a tan chuan a rei lutuk a ni. Harsatna dangte chuan Richard-a chu a belhchhah zel bawk si nen. A taksa tihlumna tur mei a nei lo tep tawh a, tui intur, nikhata no chanve chu a thih leh dam hril tu ber a ni mai a. Zanah te chuan khawthim tak hnuaiah Arsi te chu a chhiar a chhiar mai thin a, amah tanpui thei awm hmel reng reng a hmu bawk si lo.

Nov ni 12 nilaini tlailam dar 5.00 rik dawn tep hian Mariposa Kido lawng captain Charles Loright-a biak hlatna radio chu a rawn ri ta ral ral a. Captain chuan a han dawm vat a. A hnuaia thawk James Earrar-an a rawn bia a lo ni a. James Earrar-a chuan “Lawng te takte lo kal pakhat ka hmu a, mahse tumah an awm lo niin a lang. Enthlatute lawng a ni lo maithei na a, lo chho la lo en ve thuai teh” a rawn ti a. Captain Charles Loright chu lawng chungah chuan a chho thuai a. Lawng hnathawktute chu inring turin a hrilh nghal a. Lawng captain pawh chuan mihring an awm lo niin a hria a, mahse ralkhel dar chu ring zet hian a han hmet ri ta ruai ruai mai a.

An lawng te hmuh chu Richard-a chuanna Janice Maree ngei mai kha a lo ni a. Lawng chhunga Richard-a chau leh nikhaw hre tawh manglo chu chung thil ri rapthlak zet mai chuan a ti harh zawk a. Gabrida tawtawrawt ri ang maiin a tiphu nasain a tikhur thei hial a ni.

Thei leh thei lovin fiah lo ruai hian a bul lawka Mariposa Lawng lian lo ding ruau chu a va hmu ta phut mai a. Captain Charles-a leh a hote chuan rang takin Richard-a lawng chu an va pan thuai a. A chhunga Richard-a nikhaw hre tawh lo lo let reng chu an va hmu a. Tichuan Captain Charles chuan biakhlatna hmangin Auckland chu a va be ta nghal a.
“Richard Hale of Coromondell chu a lawng Janice Maree1A 421 atangin tunah chiah hian chhanchhuah a ni. Ni 24 chhung tuifawnin a lak bo hnua ah Doctor examtir nghal a ni a, dam chhuak leh tura beiseiawm a ni e, Pi Riria Hale-i Richard Hale-a nu a rang thei ang berinhriattir ang che u”
tiin. Chu thu pi Riria-in a hriat veleh ah chuan ”Pathian ngilnei tak leh tawngtaina chhang thintu chu fakin awm rawh se” a rawn tichhuak nghal a. Rinawm taka a lo belh thin Pathian chuan a hun takah a tawngtaina chu a hlawhtlin tir ta a ni.

Captain Charles Loright chuan dam takin Richard Hale-a chu anmahni In ngeiah a thlen ta a ni. A nu nen an han inhmu chu lawm avangin biangah mittui tla pur chungin an inkuah vang vang a ni.Richard-a lo hmu hmasa ber tu Captain James Earrar chuan “Kum 20 zet tuipuiah hian ka mit ka lo len tawh thin a, tuna Richard Hale-a tanpui ngai tak ka lo hmu hlauh hi ka lawmman ropui ber niin ka hria” a ti ve hial a ni. Captain Charles Loright-a pawhin “Tun ai hian minute 2 emaw pawhin tlai ila, Richard-a hmu lo zawng hian tui ah kan her liam ngei ang. Chhun pachang lai tak a lo ni hlauh nen a vanneihthlak ngawt mai” a ti a. Richard-a chuan “ka nunna chhanchhuaha a awm hi van lam thiltihtheihna liau liau a ni e. Tun chinah chuan tuipuite hi chatuan atan malsawmin awm tawh rawh se” a ti a.

A TAWP TA