TUIKHUR DANGDAI

~WRITER : Danny Zodinsanga @Naupang Thawnthu

Hmanlai hian pitar leh putar hi an awm a, rimtakin lo ah hna an thawk thin a. An thawhrim em avang chuan an zang te pawh a kul deuh khen tawh a. Ni khatchu putar chu tlangah thing la in a han kal a, chutah chuan sava mawi tak pakhat hi a hmu ta a. A piantirh ata ala hmuh ngai reng reng loh sava mawi em em mai chu mak ti tak hian a thlir vawng vawng a. “Va-a, i va han mawi tak em, nang aia mawi hi ka la hmu ngai reng reng lo. Kan nu chuan mawi a va tidawn tehreng che em. Inah hawn che ila a tha ang” a ti a, Sava chu man ngei tumin a um ta tiang tiang mai a.

Putar chuan sava chu a thlawhna lam apiangah a zui ta zel a, tlang sang tak chhip an han thleng ta a. Tlang chhip an thlen chuan putar chu a hah em em tawh a, a tui a hal hle bawk a. Sava chu a thlawk zel a, tlang kar khawi amaw laiah chuan a thlawk lut ta zeuh a. Putar chuan a va umzui ta zel a, chutah chuan tuikhur pakhat hi a lo awm reng mai a. Mahse chu tuikhur tui chu mak tak mai hian a so berh berh a, a khu vung vung e ti lo chuan a vawt leh em em lawi si. Putar chu a tuihal em avangin eng dang a ngaihtuah thei tawh lo va, tui chu a in ta khawlh khawlh a. Chu tui chu a vawtin a lo tui em em mai a. Thei tui ang maia tui niin a hre ta hial a ni. Putar chu a chauh tawh em avang chuan a mut a lo chhuak a, a muhil ta mai a.

Rei fe hnuah chuan putar chu alo harh a, tlai alo ni der tawh a. “E khai ka rin aiin ka lo mu rei. Khua pawh a thim tep tawh anih hi. Kan nu pawhin min ngaihtuah tawh lutuk ang. Haw vat teh ang” a ti a. Hmanhmawh takin a haw ta a.
Nidangah chuan a thing fawmte chu a tamin rit a ti hle thin a. Mahse, vawin chu nidang ang lo tak hian a zang ta riau hian a hre tlat a. “E heu, ka thing fawm chu a van zang ta em! chak sawtin ka inhre hial mai” a ti rilru a, mak a ti hle a. A nihna takah chuan a tui in kha naupan na tui alo ni a. A tlangval tha leh tawh a ni tih a la inhre lo mai zawk a ni.. Chuvang chuan hah miah lo leh chau miah lovin an in chu a thleng ta a.

Pitar chuan a pasal chu a lo thlen har em avangin a ngaihtuah hle a, pawnah chuan a lo nghak reng a. Putar, tlangval ta chuan a nupiin a lo hmuak tih a han hmuh chuan phur tak hian, “Nu i, ka rawn thleng e” a han ti a. Mahse pitar chuan a lo hre ta awzawng lo mai a. Chu tlangval chu “Tunge i nih?” tiin a lo zawt hehaw a. Tlangval chuan, “ I pasal maw le. Ka thingfawm ka rawn haw chiah a nih hi. Min hre tawh lo vemni?” tiin mak ti fe hian a han zawt let a.

Pitar chuan tlangval chu a han en chiang a, a pasal thawmhnaw ngei kha a ha si. Mak a ti kher mai. Chiang taka han en tak hnu chuan a pasal tlangval lai hmel chiah kha a ni tih a hre ta a. Pitar chuan, “I tlangval leh ta daih a nih hi”  a han ti ngawt a. A makti chu a ka hau reng mai a. A ni tlangvala lah chuan an nu thusawi chu a ngaihna a hre lo em em a. “Nu-i, eng thu nge i sawi i sawi le?” a ti leh thin a.

Chutah pitar chu pindanah a va lut a, darthlalang a rawn la chhuak a, “Kha i hmel han en ta che” tiin a inentir ta a. Putar chuan darthlalanga a hmel a han hmu chu a hlau lek lek zawk a. Hmai zur tip tep aiah khan tlangval hmel nung ser sawr a lo lang a, a sam tuak var phuar tawhte chu a lo dum hlap maia. “A lo nih hi le. Tuichhunchhuaha ka tui in kha tui pangngai ni lovin, tui thil ti thei tak a lo nih kha” tiin chhun lama a thil tawn zawng zawngte chu a hrilh ta vek a.Tlangval’n thil awmdan a han sawi zawh hnu chuan pitar chu a inngaihtuah vang vang a, “Anih chuan kei pawhin chu tui chu ka in ve duh tho alawm. keipawh nang anga vanglai hman leh ka duh a ni. Chutih anih chuan nang i tlangval tha leh tawh si a, mi duh lo mai ang. Chu tuikhur kalkawng chu chiang takin min han hrilh ve la, ka han kal ve vet teh an” a ti ta chung mai a.Tlangval pawh chuan nupui, nula han neih te chu a chak zawng tak a lo ni a. Tichuan tuikhur kalkawng chu chian takin a hrilh ve ta a.

A tukah chuan pitar chu zing takah a tho va, an pa kawng kawhhmuh lam chu zawhin nulat that leh ngei tumin a kal ta a. Tlangvala chuan in lamah tih tur pawimawh a neih avangin an nu chu a zui ve hman lo va. An Nu nula tha leha a rawn haw hun tur chu nghakhlel takin a lo thlir a lo thlir a. Amah pawh chu a lo tlangval that leh takah chuan a hlim hle a. A nupui a lo haw hunah chuan nula a rawn ni leh tawh ang a, annupa chuan hlim takin hringnun an chen leh dawna ni tihte chu a lo ngaihtuah a. An nu rawn haw hun mawlh chu a nghakhlel tawh a ni.

Tlai a lo ni dawn ta mai a. A nupui chu a rawn hawn theih tak reng reng lovah chuan tlangvala ngaih chu a tha lo tan ta a. Tuikhur mak tak mai awmna kha kawng harsa tak zawh ngai, hmun hla tak leh bo palh mai pawh awlsam tak a ni a, chubakah tawhsual tawh theihna tam tak a awm tih a hria a, an nu chu lam a va tum ta a. Tichuan, hmanhmawh takin tuikhur awmna lam pan chuan a chhuak ta a. Kalkawngah a tluk sual palh hlauh takin tiin a nupui chu a au lauh lauh reng a. Mahse kawng lakah chuan a nupui emaw, chetsualna hnuhma awm reng reng a hmu ta chuang lo.

Tichuan hmanhmawh takin a kal zel a, tuikhur awmna chu ni tlak hmain a va thleng ta a. Tuikhur awmna a va thlen chuan tlangvala chuan a nupui hmuh tumin a han hawi vel ruai a. Mahse pitar emaw nula emaw reng reng a hmuh zawh tak lovah chuan a ngaih a tha lo tak zet tawh a. An nu chuan engemaw vangin kawng a bo ta ni ngein a ring a, a beidawng chu tuikhur bulah chuan a thu ta hnawk a.

Chutia a indawm kun tlawk tlawk lai chuan nausen tap ri hi a hre ta a. A thawm hriatna lam a han en chuan a piah lawk hnim buk kara a nupui thawmhnaw chhunga nausen pakhat lotap ngak ngak chu a hmu ta a. Tlangval chuan a ngaihna a hre lo kher mai. A nupui chuan a hriat lohvin fa a lo nei a ni thei ang em? Nge midang fa a thawmhnaw in a lo tuam zawk? Mahse amah ber chu hmuh tur a awm bawk si lo. Khawiah nge an nu chu a awm tak ang le?Tlangvala chuan ngun takin a han ngaihtuah a, a hre chhuak ta.! Nausen chu a han pawm a, a hmel chu a han enchiang a, chu nausen chu a nupui ngei a ni tih a hre chiang ngam ta a ni.“Aw, a va pawi tak em. A tawk chauhva in lovin i lo in teuh a ni maw. Chuvangin i duh aiin i naupang ta anih hi. Nulat that leh i tum luatah nausen ah i chang ta a ni maw. Uhm.. Eng pawh nise, kan haw leh phawt aniang chu” a ti a. Tichuan, Pitar-nausen chu pawmin lungchhe tak chungin a haw leh ta hnak hnak a. A TAWP TA.