MEIZIAL AH HIAN ENG NGE AWM?

Meizial pakhatah hian chemical (bawlhlo) chi hrang hrang 600 bawr vel a awm niin American Lung Association chuan an sawi a. Meizial hi zuk dawna han hal chiah hian chung bawlhlo 600 te chu bawlhlo 7000 dawnah a insiam leh thin ani tih an sawi bawk.

Bawlhlo tam zawk hi tur hlauhawm tak tak te an nih mai bakah, 7000 zinga 69 dawn te chuan Cancer chi hrang hrang an siam bawk a. Heng chemical (bawlhlo) hlauhawm tak tak te hi thilsiam nan hman ani thin a; mahse, chungah te chuan chiang takin chemical (bawlhlo) te chu an tel thu leh an hlauhawm zia chiang takin an ziak fo a. Mahse meizial ah ve thung chuan chiang takin ziah ani ve lem lo. Chung chemical (bawlhlo), meizial a awm te chu chiang zawkin han thlir ho dawn ila:

1. Acetone – tin hnawih sen tihrehna siam nan an hmang.
2. Acetic Acid – sam dumna ah an hmang.
3. Ammonia – inchhung bungraw tihfainan an hmang.
4. Arsenic – sazu tur atan an hmang.
5. Benzene – dendrite ang a thil char na siam nan an hmang.
6. Butane – cigarette lighter tui siam nan an hmang.
7. Cadmium – battery acid siam nan an hmang.
8. Carbon Monoxide – motor khu.
9. Formaldehyde – mihring/ran thi tawih lo tura siam nan an hmang.
10. Hexamine – gas lighter tui siam nan an hmang.
11. Lead – battery siam nan an hmang.
12. Naphthalene – Kapoor siamnan an hmang.
13. Methanol – rocket petrol siamnan an hmang.
14. Nicotine – rannung tur atan an hmang.
15. Tar – alkatra, kawng siam nan an hmang.
16. Toluene – rawng siam nan an hmang.

Heng ang bawlhlo chi hrang hrang hi mithiamten research an tih atanga an hriat chin a ni a, an hriat bakah pawh meizial ah hian taksa tana tha lem lo dang tam tak a awm thei bawk awm e. Chutihrualin Mizoram ah mai pawh ni lo khawvel hmun khawi laiah mai pawh hian meizial in thalai tam tak a ti buai mek a. Damdawi ngawlvei ang em hi chuan pawi kan ti lo chungin, kan ramah hian damdawi ngawlvei aiin meizial ngawlvei an tam zawk a ang. National Family Health Survey-3 chuan Mizoram chhunga Mizo mipa te zingah 100 zela 73.6 chu meizial zu thin an ni a ti a, hei hi India ram pum lakkhawm (32.1%) ai pawhin a sang fal hle ani. Hmeichhe lamah 100 zela 16.1 ten meizial an zu thin ang in an report bawk.

Chutiang bawkin khawvel pum huap a vaihlo hman nasat dan zirchianna GATS (global adult tobacco survey) hnunhnung berah khan India ramah Mizoram chu vaihlo hmang nasa ber state kan ni tih an hmuchhuak a. Zirchianna ah chuan Mizo te zingah 100 zela 70 dawn chuan vaihlo kan hmang thin a lo ni a. Chungte chu – a zuk ang chi te, a hmuam leh ei chi ang zawng ten a then theih ang. Heng vaihlo chi hrang hrang hmang mek te hi Mipa zingah 100 zelah 72, hmeichhia zingah 100 zelah 62 an ni.

Mizo te, a bikin thalai zingah meizial zu kan tam zia chu research leh survey chi hrang hrang te hian a rawn tichiang thawkhawt awm e. Meizial zuk avanga natna lo awm thei te kan lo hriat nawn leh atan:

1. Cancer – Meizial zuk hian chuap cancer, hrawk cancer, ka chhung cancer, chawkawng cancer, pumpui cancer, pancreas cancer, kal cancer leh phing cancer te hi a thlen thei ani tih mithiamte chuan an hmuchhuak tawh a. Hei hi kan ngaih pawimawh a tha hle mai. Mizoram hi India ramah vaihlo hman uar berna state a ni a, cancer vei tam berna state ani bawk. Tin, Mizorama kan cancer vei tam ber hi chuap cancer, hrawk cancer, chawkawng cancer, ka chhung cancer leh pumpui cancer a ni a.

2. Cardiovascular diseases (lung leh thisen zam natna) – Heart attack 100 zela 30 dawn hi meizial zuk vang a ni a. Chubakah chuan stroke te, aortic aneurysm te (kaw chhunga thisen zam lian aorta’ puar), peripheral vascular diseases (thisen zam te ho natna. Ke leh kut tan ngai hial pawhin a awm thei) te a thlen thei bawk.

3. Chronic Obstructive Pulmonary Disease (chuap lam natna) – Miin mei a zuk hian chuapah inflammation’ a lo awm a. Chu chuan chuap chu elastic rul ang deuhin a siam a, chuap chu kan thawk chhuah zawnga thep tha thei tawh lovin a lo awm a. Chutichuan kan taksa tana gas tha lo (eg:carbon dioxide) te chu paih chhuah theih lovin a awm tir ta thin a. A chunga `inflammation’ kan tih khi miin regular a mei a zuk tan hnu kum 2 atangin a awm tan tlangpui a. Atirah chuan khuh leh khak tlem tlem an nei a, chuan a lo rei a, a zuk chhoh zel chuan thawhah (breathlessness) a nei a, a nasat viau hnu-ah phei chuan heart failure te a nei ta thin a ni. Mizo zingah pawh COPD hi thihpui kan tam hle a ni.

4. Nu, naupaiin mei a zuk thin chuan thisen put te, nau hlam awmna fuh lo te a awm duh a. Tin, nau chhiat a awlsam bik bawk. Chu bakah chuan thla kim lova nau piang a awm duh bawk.

Tin, vaihlo hman hian mihring min tilang tar hmain thisen a heh a, ti a nung thei lo a, taksa a tirim chhia a, tin leh ha a ti bal duh bawk. A chunga kan sawi natna te khi miin mei zu lo mah se mei zu bula a awm reng chuan a neih ve theih tho avangin kan fimkhur a tha hle. Naupangah phei chuan inchhung khura meizu bula an chen chuan respiratory infections (hritlang awmna) te leh asthma te a awm duh bik a. Chuvangin mei zuk hi a zu a te tan chauh ni lo, a bula awm tan pawh a hlauhawm ani tih kan hriat renga, ti lo tura tan kan lak a pawimawh hle awm e.

Bible-ah ringtute tan chuan kan taksa hi Thlarau Thianghlim in a nih thu chiang takin kan hmu a (1 Korinth 6:19-20). Mana lei kan nih tawh avang leh mahni ta kan nih tawh loh avangin, kan taksa pawh a ti chhe lam zawnga kan hman a rem hmel loh. Damdawi ngawlvei nih kan duh loh ang bawk hian meizial ngawlvei nih te hi duh lo ngam ila. Kristian thalaite heng lamah hian I tang thar leh ta ila. Rilru, taksa leh thlarau hrisel kan lo neih mai bakah, a Mizoram pum ang paw'n hriselna kawngah hma kan sawn ngei ang.

Dr.Lalchhanhima Ralte MPH