MIZO NAUAWIH HLA, LO HAW THUAI THUAI TOBUL

Source : Khawluah Lala @ Mizo thawnthu

Hmanlai hian Chawngthu hnam te awmkhawmna Chawngthu khuaan tihah chuan Darchhawna leh Tintlingi te nupa an awm a. Fa pathum, Rolengi, Chhingmiti leh Romeia te an nei a. Chhungkaw hlim thei tak an ni.Chu'ng hunlai chuan Kawlho nen an indo țhin a, an ralți hle țhin. Chutiang chu ni mahse an eizawnna, Loneih chu bansan theih a nih loh avangin nu leh pa te chuan kawla ni chhuak chhiarin an thawk a, an fate awm tur pawhin In lamah an awm thei țhin lova, In lam chuan fa naupang te te te kutah an dah maițhin a ni.He mite chhungkuaah pawh hian an fa u ber Rolengi, kum 6 mi lek chuan a naute pahnih, Chhingmiti, kum 4 mi leh a tê ber Romeia,kum 2 mi, hnute hne laite chu nitin a awm a, țhenawm pitar, Pi Țiali chuan lo țanpui țhin lo phei se chuan Rolengi tan hian a naute pahnih hi nilenga han awm theih rual a ni lo. A naute pahnih rilțam leh mutchhuak te chu a tan buaipui a harsain a buaithlak em em dawn a ni tih chu hriatsa a ni.

Chutiangin an fa u ber pawh kum 6 mi lek ni mahse Darchhawna te nupa chu nikhat pawh awl phal lovin a kutah chuan In lam chu an dah tawp a, lo lamah an fehsan nitin a, hah pawh sawilovin an fate eitur thawk chhuak turin theihtawpin an bei țhin a ni.Tuk khat an feh leh tur chu an fate pathum chuan nidang ang lo takin an ngen a, an țap nasa em em mai a. Nu ber Tintlingi phei chuan feh chhuahsanloh mai a duh hial a. Mahse chu chu an tan thil theih a nih loh avangin a tawpah chuan an fate chu țap chungin an kalsan leh ta nge nge a.Lo an va thlen chuan Kawl râl, mipa sawm rual zet mai, Fei leh awmphaw tenena inthuamte chu an Thlâmah chuan ngawi rengin an lo tawm a, anni nupain Thlam an han luh rual rual chuan an lo man a, an tihlum ta nghal a. In lama an fate chuan nghakhlel takin an nu leh pate lo hawn hun chu an thlir a, nimahsela chumi ni ațang chuan haw tur an awm tawh lo!Tlai a lo ni a, nidanga an lo thlen hun angah chuan an lo thleng ta lo va, khua a thim a, zan tlai tak thleng pawhin nu leh pa hmel hmuh tur an nei thei ta lo va. Zanriah eitur pawh an la chhum thiam loh avangin rilțam leh mutchhuak tak chungin an nu leh pate chu an nghak a, mahse lo haw tur nu leh pa an nei tawh lo!

Rolengi chuan a naute pahnih rilțam, lungleng leh mutchhuak chu a thiam ang angin a buaipui a, țhenawm leh pawn lama thawm lo awm țhinte chu beisei takin a nu leh pa thawm a nih ringin a mit leh beng te chu a chhi reng a, nimahsela a beisei thil reng reng a thleng thei ta lo va!! Țap țeuh chungin anaute pahnih chu a buaipui a, an unauza chuan rilțam, mutchhuak, thlabar leh lungngai takin an nu leh pate chu an nghak ta a ni!

Nakinah chuan an țap thawm hriain țhenawm khawvengte an lo lut a, Darchhawna te nupa chu engvanga chuti fakaua haw har nge an nih an inzawt hlawm a. Mahse tumah an chin hria an awm loh avangin zawng tura an lo lama kal tur an inruat a. Chung miten an Lo an va thlen chuan Darchhawna tenupa chu Kâwlrâlin an lo that a ni tih an va hre ta, beidawngin In lamah chuan an lo haw leh ta a ni. An nu leh pa te râlin an thah sak tak avang chuan Rolengi chuan mittui tla zawih zawih chungin he hla hi a chhamchhuak ta a...

Ka nu ka pa lo haw thuai thuai,
Tlangah ruahpui a sur e,
Sakhi lampeng rawn zawh la,Rawn zangphar der der ang che.
Chhingmiti a tap e,
Romeia a țap e,
Ka mumang mang chu ni sela,
Tlangah ka zuk au na ral ral tur a...tiin.

Chu hla sa chung chuan a naute chu a awi mu ve ta țhin a ni. Rolengi chuan a nu leh pate ngaih hla dang...

Ka nu i dam laia ka pa i dam lai a, Kim chhingchhenga kan lenna i kar emaw... tiin a lunglen hla dang pawh a phuah bawk.

He Kawl ral thawm avang hian Chawngthuho chu chutih laia Zofate khawpui, Seipuiah an tlan lut ta diak a, an khua chu an rauhsan ta a ni!!