DON WILLIAMS

DON WILLIAMS
(27.05.1939 - 08.09.2017)

Ni 8th.Sept.17 (zirtawpni) chu nidang ang bawkin kan chuang kai a, Mahse, khawvel fa hming koh, zai leh rimawi thiam zinga hlu leh ropui ber pawl chu khawvel in kan chan ta..!

Hun hmasa lam:
He zaithiam leh hlaphuah thiam thawm na zet hi Ni 27, May, 1939 khan *Donald Ray Williams* tih hming pu in, Floydada khua Texas, America ah alo piang a, a seilenna leh panlai nun a hman na tam zawk chu Portland khua Texas lamah a ni thung. A pa hi mechanics leh furniture lam thiam tak niin, chhungkaw chawm nana dawr te pawh a siam thin a, a nu erawh zai leh rimawi lama tui tak a ni thung.

He American Tlangval hian, rimawi leh zai lamah chhun tur NU aneih that vangin hetiang sulhnu a nei hi thil mak tak niin a lang lemlo a, a inchei dan leh khawsak phung hian mizote lung a ti leng a, hmanlai a tanga kan Mizo nula te ngaihsan leh tlangval te nih chak cow boy thuam famkim nena sakawr chung chuang paha lukhum parh phe vawk vawk khawpa Texas tual han fan vel kha Don William nun phung te pawh a ni ta ve ang. Williams hi Mipa lian tha thelh thawlh tak, 6.1ft zeta sang niin, A nu enkawlna hnuaia nun uluk tha taka seilian a nihna hi a puitlin thlengin a chhawm tih hairual a nilo. A nu hi zaithiam ve tawk tak a ni a, rimawi tum leh hla thu han siam mai pawh a ti ve thin niin sawi a ni a, Don William rimawi tum dan (style) tam tak pawh hi, A nu hnen a tanga a zir chhuah tam tak a awm a ni. Kum 1960, April ni 10 khan rei tak alo kawp tawh, a bialnu *Joy B Bucher* a nei a, Fapa pahnih _Gary_ leh _Timmy_  an nei a. Nupa inkawp rem leh in hmangaih tak niin, midang laka rinawm loh emaw, hming chhiat pawh an neilo tiin an sawi thin.

Rimawi lamah:
Ti chuan, kum 1964 khan an thian ho, _Susan Taylor_  leh  _Lofton Cline_  te ten inkawp chho in, _folk-pop trio_ angin Nashville lamah an in din chho a, an band hming a tan *Pozo-Seco Singers*  tih chu hmangin, he band hian a hnu kum 2-na (1966) maiah an hla pahnih, _"I Can Make It With You"_   tih leh  _"Look What You've Done,"_   tih hmangin Top 40  tunes ah an lang ve nghe nghe a ni, Hei hi mipui hriat an hlawhna hmasaber a ni kan ti thei awm e. Hlawhtlinna thlum tak tem chunga hmasawn a, mi ropui leh mite hriat ni turin ruahmanna leh hmachhawp pawimawh tak tak nen chona thar  hmachhawn chu an phur tlang ngei mai, Mahse chuti ngawtin an ruahmanna chu a kal ta tlat lo mai, hlawhtlinna tem nual siin, an band chu chhan hrang hrang vangin an duh angin a kal thei talo a, beiseina sang tak nena an din, mite hriat hlawh ve uk tawh an band chu ti tawp a lo tul ta a ni. He mi hnu hian Williams hi Texas lama a pa furniture dawr te a han nghak leh lawp lawp a, hun harsa leh khirh tam tak hmachhawn chungin, rimawi leh zai a ngainatna chu a zual zel lawi a, zai leh rimawi lama khawvel hriata mi hlawhtling nih a tum tlatna rilru chuan kawng dang a zawng ta zel a, hlawhchham na a tanga bultan chu a hnu zela ruahmanna tha zawk petu leh, a nun khalh ngiltu a lo ni ta a ni.

Tichuan, mi tumruh leh huaisen chuan solo artist angin kum 1971 vel a tang chuan chona thar a hmachhawn ta a, a theihna te leh a suangtuahna te chu thu leh hla in khawvel hriat tham mai bakah, engtik ah mah a hming dai leh tawh ngailo turin Kum 1972 khan lei rem rap turin a country single hmasa ber *Don't you Believe* tih chu a ti chhuk a, Hemi hnu kum 1973 khan, a vawikhat nan, solo artist angin, _"The shelter of your eyes"_ tih chu a release thei ta a ni. Hemi hnu kum chiah kum 1974 khan _"I wouldnt want to live if you didnt love me"_  tih chuan chart ah top a luah ta vang mai le. Hlawhchhamna a tanga bul tan, harsatna leh hrehawmna in a ngam loh a rilru huaisen tak chuan, a lo suangtuah thin leh a duhthusam lam ram ah a tak ngeiin a her pui ta luai luai mai le.

A hlawhtlinna t chuan khawvel a deng chhuak a, A hit single hmasaber chu "I wouldnt want to live if you didnt love me" (1973) tih phei kha chu a hun laia American mipuite duh rawn kha a ni a, hla tamtak a sak zingah khawvel huap anga A hla hlawhtling leh hit bera ngaih chu *"I believe in you* tih kha a ni awm e.

Don William hian he khawvel khualzin kawng a zawh chhung hian, hla eng emawzat a phuah in a sa a, chung zinga mipui te duh leh a lar zual deuh deuh te chu:
Tulsa Time.
Lord, I hope this day is good.
It must be love.
She never knew me.
Youre my best friend.
We've got a good fire going.
Amanda.
Some broken hearts never mend.
She never knew me.
Lay down beside me.
love is on a roll.
I recall a gypsy woman.
Etc.

He zaithiam thawm na zet mai hian, Kristian te hla ropui leh tha tak tak te pawh min hlui tam hle a, Pa inngaitlawm leh nun nghet tak nei mi a ni. Ti chuan, rim taka thawk in, a suangtuahna leh mitthla te chu thu leh hla chantirin, a rimawi zun ngaihnawm tak nena inrem thlap in, a aw thum dam dap leh ngaihnobei tak chuan khawvel chu a zunah an uai zo ta, Album tha tak tak buatsaih chho zel in, Kum 1974 atanga 1991 thleng khan, kum tin American Billboard Country charts ah a hla release hi Top 40 an hmun an luah ta fo reng a ni. Don Williams a music leh a hla thluk te, a zai dan leh che zia hrim hrim hi a zaidamin a ngaihawm hle a, heng vang hian mi tam takin an ngaina a, *"Gentle giant"* ti a koh leh hriat a ni bawk. A hla kalphung tam ber hi Mihring nun khawharna lunglenna lam hawi bakah, Hmangaihna phuar vel hringnun hi a tih theih awm e. Rimawi ngainatawm tak nena hla thu tluangtlam leh lungrun tak maia an sa chhuak hlerh hlerh mai thin hian he hrungnun lairil hi a fan chhuak thin a nih hi.

He khawvel a zinkawng zawh chhung hian thu leh hla tha tak tak bakah music mawi tak nena inchawih siin, A aw thum dam dap leh fiahfai tak ngaihnobei em em si lo kur pui Album 35 zet chu țhangthar te min hnutchhiah a, a hlutna hi kanla hmuhchhuak dawn chauh a ni. A hlawhtlinna hi ziak dawn ila, tam tak sawi tur a awm ang,tlem tarlang ila:

1978- Male vocalist of the year.
Tulsa time - Single of the year.

1980 - Artist of the decade
100 Greatest Artist of all time

2010 - Country music/singer Hall of fame. etc.

A hlawhtlinna te leh a zai rimawi zun chuan vawin thlengin min fan a, he a talent ropui tak a vang hian, a hming dai leh ngai tawhlo turin, Zai leh rimawi lama khawvel mi ropui te huanga chawimawia ropui leh zahawm ber,  Country Music Hall of Fame ah kum 2010 khan phu tak chungin seng luh a lo ni ta a ni.

Ti hian kan thlah ve ang che.

"Be shine at a beautiful shore..!
Goodbye are not the end forever
Be not burdened with time of sorrow
Still your the sunshine of strings,
Love, words and voices.
In my hearts you
Will always with be, Mr. Country Boy."

Zamtea Chongthu.
Dated: Aizawl.
On the 9th, Sept, 2017.