HMANGAIHNA CHU

(He article hi, Ni 19th, October, 2015.  Zinglam dar 2-3 inkar vela ka lungleng lutuk in ka han ziah (type) chhuah ve kha a ni.


Source : Zamtea Chongthu


Zingtian baw-ar pau ten ka tawnmang ram a ta min kaitho a, sirva zaiten hlim ten minlo chhawn, mahse lunglawm a kim silo, khuanun hriselna thatak leh boruak nuam tak min pek te hi lawma amah fak mai tur ka nih tehlul nen...!

Hringnun hian hlimna leh lungawina ka tan a dah velo em ni le.? Ti hian ka inzawt fo thin. "Dam leh hrisel takin I awm a, hmangaihtu Nu leh Pa, chhungkua, thenrualte, thian  tha tak2 te, finna leh rem hriatna te nen, LALPAN a hmangaih em2 bawk che a, I vanneihna hi a mal te2 in chhiar teh, Enge i mamawh belh ni.? I vanneih ziah hi ngaihtuah la, lawm tak2 leh hlim taka awm mai2 tur I ni lo em ni? " tiin.

Ni e, a nia sin. Damdawi-In leh hnuchham Inah te ka kal fo thin, chu hmuna awm te ka ngaihtuah Chang pawhin mi vannei tak chu ka van ni em..! Amaherawhchu hmangaihte nena lendun tluk a awm dawn chuang em ni..? Damdawi inah a ni emaw, Khawvela hmun khawhar leh ralti ber pawh nise ka hmangaih berin ka kut a vawn tlat chuan chu tluka khawvel chhuahsan dan duhthusam leh duhthlan tur dang ka tan a awm chuanglo. Chutianga kalo suangtuah ve thin hmeichhia chuan min hnuchhawn a, ka tan rilru leh ngaihtuahna a sen ve miau loh a vang chuan hlim hi harsa ka ti a ni.

Ka sawi ang a, kala sawi leh fo bawk ang che. A ni, nang ka tawn a tang che khan nun hlutzia ka hria a, I tel lova hun hman hrehawm zia nen. I nuihna phena mi pakhat lo hlim em em chu ni thei ila, i țahna phena lo lungngai em em țhin mi chu ni bawk ila. Ka tana ni chhuak hian awmzia a neiin, nitlak hnua vana arsi leh thla te pawh khian ka thinlungah thu an sawi ngei ang.

Nang ka hmangaihna che  vanga tawrh a tul chuan ka taksa leh rilru ka thisen far tawp thak thlengin ka tuar ang a, tah a tul pawhin ka tap mai zel zawng a nih hi. Nang hmangaih hi atna a nih chuan ka fing ve ngai dawn lova, nang hmangaih hi vanduaina ni se, kei chuan vanneih ni reng hi hmuh ka duh heklo. Ka mittui far khat hian khawvel lei thei dawn ila, nang nei tur che in tuifinriat tui zat pawh ni rawh se, ka tan chuan duhthlan tur I chiang e.

Nangmah avanga zan tam tak tlaivar chu huam mah ila; nangmah a vanga zan khat lek muthilh theih hi ka va chak si em..! Riakmaw ianga vai 'ka hmangaihna' hi damte'n riahrun i lo remtir dawn lo em ni.? Mitdel in rul an hlau ngai lova, sazu ten thingzar ah riahbuk an sual ngai heklo. Thim a chhah zual sauh a, eng a lang chiang thin ang hian, Ka hringnun rahbi - bumboh, khawharna, lungngaihna, hlimna leh thlamuanna famkimna hmun ah hian nang ka mamawhna che leh ka thlakhlelhna che hi a va nasa em..!

Nang chauh hi I ni ka thin lairil luahtu chu. He ka taksa leh ka hriatna che hian i hmangaihna dawng lova fam kalo chang a, I nui hmel mawitakte, I nui ri leh tawngri hre thei ngai tawh lovin, I hmel mawi ka damna ni thin leh i pangtilum tawng ngailo tura ruang mai kalo chang ta a nih pawhin, ka hriatrengna a tawpni leh ka thaw a tawpa, ka thisen a khang vek hnu leh a luan tawpa, nunna pai theilo khawpa a khawro ni thlengin ka hmangaih che a ni tih min hriatsak ang che.

I hringnunah lungngaih ni leh khawhar hunte I tawk a nih pawhin, mal ngawih2 in inhre ngai suh ang che aw, ka rauthla chuan I kiang ka bel tlat dawn a sin. Vanlam hawiin I lungngaihna leh khawharna te sawila, dawhthei takin kalo ngaithla dawn nia, thlifim leh rimtui ten an chhêm heuh2 ni che a lo thlen chang pawhin, I tana ka hmangaihna che chuai ngailo chuan ala chenchilh che a, thlifim leh rimtui hmangin ka rawn kan che tih hre chhuak la, "ka van ngai che em.! " tiin biahthu min hlan ang che aw.

Lunglen changte I nei ve ngai a nih chuan maw.. Vanlamah dakchhuak in I khawhar lunglenna te kha ngaihtuah veng2 la, keiin van boruak zau taka arsi te zing  a tangin kalo chhawn ang che, I tel lova awm theilo leh hmangaih ngawih2 tu che hian e ka kalsan mawlh lovang che.

Zing Ni chhuak engmawi tak leh Tlai Ni tla tur mawi tak, darzam karah ka theihtawk itan mawina ka la hlan fan ang che a, I tan ka hmangaihna eng hi a chuai ve dawn silo. Hlim la, nui la, hrisel takin awm ang che aw, ka hmangaih I ni a, I hlimna tluka thlakhlelh ka nei heklo. Second khat lek I hlimna ka thlen thei dawn a nih pawhin ka theihna zawng2 hi itan tiin ka ui ngai dawn silo.

A tawp berah chuan maw.. He thu hi lo hrereng ang che, I dam ni hrui angin sei sela, Mihring te tih theih leh phakchin I thleng a, khawvel chhuahsana fam ilo chan hun pawhin, kei hmangaih em2 tu che hian Pialralah tal lengdun turin rinawm takin ka lo nghak ang che.

"Ka hmangaih che."