KELCHAWNGI

Source : Zotui Thiang

Kelchawngi nu leh pa hi an feh dawn a, a nu chuan, 'Kelchawng, mai lo chhum' a ti a, ani chuan, 'Nau za?' a ti a. A nu chuana hre lo der nia ringin a liamsan ta a. Kelchawngi chuan, 'Nau lo chhum ang che.' a ti emaw a ti a, a nu fehliam hnu chuan a nau chu a tihlum a, a chhum tak tak ta a. Tlaiah chuan a nute feh chu an lo hawng a, in an lo thlen chuan, 'Kelchawng khawiahnge i nau?' an ti a. Ani chuan chhan ngaihna pawh a hre mang lova, 'Thenawmte sial a en,' a han ti ringawt a. Rei deuh hnuah pawh a lo hawng thei ta lova, a nu chuan, 'I nau chu khawnge?' a han ti leh a, Kelchawngi chuan, 'Tui a chawi,' 'Thing a phur,' 'Chumi khami chu a ti,' a ti zel a, losul haw an thlen kim vek hnuah pawh a lo haw thei ta si lova, an mangang ta hle mai a. Nakinah chuan Kelchawngi nu leh pa chuan, 'Anih leh i mai chhum chu han thur teh,' a ti a. Kelchawngi chuan a han thur a, a nau lu te, a ban te a han thur ta mai a. A nute chuan, 'Hei i nau lu a ni lawm ni?' 'Hei pawh i nau ban a ni maw?' an ti a, an hau a. Ani lah chuan, 'Ni suh e, hmana hmana ka pu sa kah lu a ni. Ka pu sa kah ban a ni,' tiin a chhang ve zung zung a. A nute chuan a nau a chhum a ni tih an hriat chuan an thin a rim em em a. Nikhat chu in chungah vaihlo pho turin Kelchawngi chuan hlang chhova, a pho zawh chuan an hlang thla duh ta lova. Kelchawngi chuan tap chungin, 'Ka nu mi hlang, ka pa mi hlang,' a ti thin a, anni lah chuan, 'I nau i chhum ai,' an tihsan a, an hlang thla duh awzawng lova. Nakinah chuan Kelchawngi mangang chuan chunglam a en a, Pu Van, i hrualhruite rawn thlak la, Ka lo uaichho ve ang e. a ti a. Chu veleh Pu Vana chuan a hrualhrui a rawn thlak thla delh delh a, a lo man a, Kelchawngi chu vanah a uai chho ta daih mai a. Pu Vana chuan a thuam tha tinreng - thi te, ngun te, kawr mawite in Kelchawngi chu a thuam a. Chutaing thuam tha tinreng inbel chung chuan vawi khat chu an inchungah bawk chuan a zuk tum thla leh a, a ke bun leh ban bun chu a ri chheng chheng a. A nu leh pate chuan, 'Tunge kan inchunga tum chu,' an lo ti a, a ni chuan, 'In fa duh loh Kelchawngi,' a han ti a. Chuveleh a nu leh a pa chuan, 'E, kan duh lul mai a che, kan han hlang thla leh ang che aw,' an ti a, an lo chhuak a, mahse Kelchawngi chuan a duh lova, van lamah bawk chuan a uaichho leh ta a, vanah bawk chuan nuam takin a awm ta reng a ni an tih chu.