LALPAN A MITE A KHING

LALPAN A MITE A KHING.(Jer.2:9)
                           - Rev VL Nithanga

Puithiam Hilkia fapa Jeremiah hnenah Jerusalem hnena puan chhuah tūr Pathian thu a lo thleng a. Lalpa chuan Jeremia chu, hnamte leh Lalram chungah te, pawt chhuak tûr te, thiat tûr te, tichhe tûr te, paih thla tûr te, siam tha tûr leh din turin a kaah chuan thu a dah a. Tichuan, Jeremia chuan Juda Lal Josia Lal hun tawp lam atanga, Josia fapa Jehoiakima lal lai te, Zedekia lal kum khatna, Jerusalem sala an hruai thlengin Jeremia hian rawng a bawl a ni. Israel hnam chu Pathianin ram tha takah, khawizu leh hnutetui luanna ramah, a rah leh thatna ei turin a hruai lût a ni a. Nimahsela, chu ramah chuan Lalpa duh zawngin an awm hlei thei lo va. Ram chu an tibawlhhlawh a, Lalpa rochan chu thil tenawmah an siam ta zawk a (Jer.2:7). Thil pahnih lian tak tak tihsual an neih chu, Lalpa, nunna tuikhur chu an kalsan a, tuikhua an inker chawp a, tuikhuah khi, tuitling thei lo chu (Jer.2:13). An mahni hruaitu leh enkawltu Pathian nei lo ang maiin mi hnehchhiahin an awm a. An chheh vel hnam ten an rûm khum a, an chan a lo che ta tulh tulh mai a. Chu chu Lalpan a hmuhin a rilru a na em em a, a hmangaih, fa duat taka a lo duat a mite chuan amah an kalsan avang leh, thil dang nun khawchhuah nâna tuikhur an inker chawp, engmah an hlawhtlinna tûr ni si lo a hmuhin, Lalpa lung a awi lo va. An hnena tlangau turin Jeremia chu a tîr ta a ni. Lalpa chuan Jeremiah hmangin, "Chi dik tak hmangin grep tha tak ka phun che a, engtiziaa inleta ka tan grep suaka lo chang ta nge i nih ?" a ti a. A mite chu Lalpa tan chuan grep suak ang chauh an lo ni tawh a ni. Chuvangin, Lalpa chuan a mite chu, "Ka khing ang che u a, in fate fa lehte pawh ka la khing fo vang," a ti a ni. Tichuan, an mahni hnama dintu leh siamtu, an mahni hmangaiha lo hruai thintu, ram tha taka hruai luttu ngei chu an mahni leh an fate fa lehte thlenga khingtu chu a ni ta si a. Jerusalem chan chu a va chhe ta em! Jeremia la dam lai ngei chuan Babylon Sawrkar chuan Jerusalem chu BC 587 ah chuan a rawn rūn a, mi tha pangngai chin zawng zawng chu salah a hruai haw ta vek mai a. Babulon luikamahte chuan khawhar takin an thu a, Zion an ngaihtuahin an tap zawih zawih thin a ni (Sam.137:1). Kan ram pawh hi ngaihtuah chiang ila, khawchhak lam atangin Lalpan min hruai thla a, tuna kan luah ramah hian min hruai lût a. He ram hi eng sawrkar ta mah a lo ni lo va, kan tana Ramtiam a ni ve mai a. Hetah hian AD 1700 velah khan min hruai lût a. Kan luah zau zel a, tunah chuan luah chin ram fel takin kan nei tawh a. He ram hi Lalpa min pek liau liau a ni a. He ramah hian, a rah leh thatna ei turin min hruai lût a, mahse, tunah zet zawng a ram chu kan tibawlhhlawh a, Lalpa rochan chu thil tenawmah kan siam ta zawk a. Hnam dang hmuhsitin kan insiam ta a nih hi. Chu dik tak hmangin grep tha mi min phun a, nimahsela, kan inlet a, Lalpa tan grep suak mai kan va ni ta âwm ve. Rinawmna te, dikna te, taimâkna te a bo tial tial a, hmangaihna a lo dai zo ta a, Lalpa lakah pawh kan rinawm zo ta lo, hlemhle tak leh dik mang lova thil tihna ram a lo ni ta zawk si a. Hleprûk tûr zawngin kan phe suau suau a ni ber mai. Min dintu leh ram min petu Lalpa kalsanin, tuikhuah kan inker chawp a, tuikhuah khi, tui tling thei hlei lo, piantharna da vek khawpin dåwt hmangin ei kan zawng ta a nih ber hi. Hnama min din chhuaktu, ram min petu, chanchintha malsawmna min pe a, hmangaih taka min enkawl semi liantu ngei hi kan kalsan a, tuikhuah dang kan inker chawp si chuan, keimahni leh kan fate, fa lehte thlengin min khing ve dawn a sin. Tunah pawh hian min khing tan tawh a nih hi, sual avangin thalai kan thih tåk zung zung hi, min khing a, min suat a ni ta ber a lawm. Min la khing na tulh tulh dawn a, kan tuar zo lo vang. Hawh u, sim ila, Lalpa hnenah i kir leh ang u, a nin min lo tidam leh dawn nia.