NAUPANG KHAWMPUI PUAL :

NAUPANG KHAWMPUI PUAL :

"Bawihte hei hi ha leh mairawh aw,
i inhmeh lutuk he kawr i hak hi
chuan Vantirhloh i ang ka ti"

"A nu, a mawi tho a, mahse ka
thiante chuan kawrthar an ha vek
dawn a sin, tinge min leisak ve loh
a? Inkhawmpui na ah chuan
kawrthar an ha vek thin a"

Anu chuan lehlam hawiin a mittui
a hru zauh a, chhanna a pe
thiamlo sawi mai tur a hrelo a ni,
an chhungkaw pawisa neih zawng
zawng pawn kawrthar leina a daih
silo, a fanu hrilhhai hmel chu
hmuh har a van ti em aw, kum
hmasa lama an thenawmte fanu
haktawk tawh loh Krismas kawr
atana an pek bak a fanu chuan
han ha chhuak turin thlan tur
dang a nei chuang silo, kawng dang
a awmlo fai takin a suk sak a, a tet
lai te thui thain a fanu chu a
haktir mawlh mawlh a.

"Ka fanu i van hmeltha tak em,
Naupang zawng zawng zingah i
mawi ber"

"A nu, Khawmpui Kawr thar ka awt
ve ee, Hruaii te unau ta ang saw"

"Mate, nakinah pawisa ka neih
veleh ka leisak em em ang che,
mawi deuh Hruaii te ta aia mawi
kan lei dawn nia aw, kal tawh rawh
le.. i tlai dawn zirtirtute thu awih
tur a nih kha aw"

"Awle...a nu, bye2"

"Bawihte i nalh lutuk a nia,
keipawh ka lo kalve vat ang.... bye2
le" tiin a fanu chu a au zui lauh
lauh a.

A fanu tlan liam nel nel chu mittui
tlaloa thlir liam har a van ti em!!!

A fanu thuawih lutuk chuan a
lungchhiat a tizual ani ber mai, mi
zingah hrehawm ti leh zak takin a
va awm a ngem? Mi kawr mawi it
reng reng in a awm a ngem? A
thiante zingah a in kiltawih phah
bik a ngem? A fanu chu a
khawngaih lutuk mahse tihtheih
dang a nei rih silo, an nufa ei tur a
thawk chhuak tawk tawk chauh
ani si.

"Lalpa ka fanu thinlung thianghlim
tak kha, veng ang che aw..
Kawrthar ka la leisak thei silo,
kawr mawi a awh zia chu min
hmuhpui kha, Lalpa i fanu hi
lungngaiin ka rum a ni, ka naute
ka duatlai khan mi thil a awt ve si
Lalpa a sawi chhuak ngamlo hmel
kha min hmuhpui tiraw... Kan
retheih zia hrethiam taka kawr
mawi lei pawh a ngen lui ngamlote
kha, Lalpa ka thinlung tina zualtu
a ni, khawngaih in Lalpa chakna
min pela Ka fanu hi min enkawl
pui lul rawh"

Sangtei chuan Biakin a va thleng
ve ngei mai phur em em in Biakin
kawtah chuan a tlanphei a, a rin
ang ngeiin a thiante chuan
kawrthar anlo ha vek mai, a zak
hnuhawh em em a.

"Sangte kawrthar i nei velo a law?"

"Aw.. A nu in pawisa a neih hun ah
min leisak ve dawn a, tunah chuan
ala nei remchanglo a"

Engtin mah an chhawnchhaih zui
lemlo, a thiante bulah pawh awm
talo chuan a let leh a, kil khatah
ngawi rengin a thu ta daih a,
Sangtei thinlung ah chuan
kawrthar awhna a nasa ve em em
a, a thiante chu mawi bik riau in a
hria a, a kawr hak chu a in en a, a
chul rap tawh mai si hak tur dang
a nei chuang silo, thiante bula
infiam pawh nuam ati talo kil
khatah ngawi renga thu in a
thiante chetla chu a thlir tlawk
tlawk ringawt a, telve chu a chak
mahse a thawmhnaw chul leh hlui
lutuk tawh vang chuan a zaka a
thiante a pawh ngam silo, a
thinlung chuan a duh, mahse a
thawmhnaw chuan a hnar tlat si,
naupang mai tan chuan thil awmlo
lutuk a ni hranlo.
Hun engemaw chen alo thu hman a
ni

"A nu, tinge kan retheih bik le,
Pathian hian tinge kawr mawi
leina min pekve loh le!!! Ka thiante
chu a pe vek sia!!!! A nu, ka lo haw
daih mai dawn, nuam ka tilo Nu... I
bula awm nuam ka ti zawk daih,
Isua hian min hre velo niang, Isua
chuan naupang zawng zawng a
hmangaih a, mahse A nu kei chu
min hre velo palh aniang kawr thar
pawh min pe ve miah lo ....A nu, ka
thiante chu an mawi lutuk a sin"

Ngawi renga lo thlir tu an zirtirtu
Becky chu a insum thei tawhlo,
Sangtei chu a pawm a, a mittui a
dang zolo, sangtei thu chham melh
melh chuan a thinlung a hneh
lutuk a a rum kawk kawk a, sangtei
bianga mittui luang ngiai ngiai chu
hruk hul sak mawlh mawlh a, a
mah lah mittui tla pur bawk
si,Sangtei lah abul an zirtirtu lo
awmthut a alo pawmthut chu
ahrilhhai khermai..

NAUPANG INKHAWMPUI CHIBAI
VEK ULE

-Mahmuaka Chhakchhuak.