TAM POLICY

L.r. Ralte > ‎ZOLINKS ( Article & Story )

PRESS STATEMENT OF LALDUHOMA PRESIDENT, ZNP DT. 8.9.2017 @ ZNP OFFICE.

TAM POLICY : (POPULATION POLICY OF ZNP)

"Kan Sorkar hunah fa 3 leh a aia tam neite, Hamthatna kan Siamsak Dawn."

1. INDIA RAMAH :- Khawvela Family Planning Policy nei hmasa ber chu India hi a ni a, 1952 atangin a ti tan a ni. 1911-1920 inkarah khan India ramah mihring 1000 zelah naupiang 48.1 an awm a, chu chu 25- a tihhniam an tum a. 2011 khan 25.8 ah a tlahniam tawh a ni. National Population Policy, 2000 hmangin fa 2 aia tam neih loh tumin sorkar chuan hma a la a. Nu leh pa an thihin an faten an ai an rawn awh zel ang a, 2046 ah chuan piang leh thi an inzat tawh ang a, mihring kan pung tawh lovang an ti a ni. Fa 2 chin neite chu Maternity leave te, Child Care leave te pein, fanu mal nei tan Scholarship te pein, kawng hrang hrangin tan an la a ni. 1950 chho velah kha chuan Indiaah mihring maktaduai 360 vel lek kan la awm a. Ei leh barah kan intodelh loh avangin America tanpuina PL 480 hnuaiah buhfai kan chaw lut reng thin. Tunah chuan mihring maktaduai 1200 lai, a let thum dawn laia tam kan lo awm ta a, kut rual chuan an lo thawk chhuak hnem nge nge a, buhfai ei sen loh tharin ram dangah kan thawn chhuak hum hum ta mai. India ramah hian khawvel mihring 17.5% ngawt mai kan cheng a, mi pakhatin kum khata a dehchhuah chu chawhrualin US $ 3290 a ni a, kan tam poh leh hma kan sawn chak ta mai zawk a ni.

2. RAM DANGAH  :- Khawvel ram tam takin Birth Control hi an kalpui ve a, tunah chuan an inchhir tawh a ni. European Union rama chengte chu an dam rei hlawm hle tawh a, tar an ngah lutuk tawh a, thalai (work force) an nei tlem ta thung a, an economy leh ram venhimna thlengin a tuar mek a ni. France ram phei chuan Official takin “Pun Policy” hi an kalpui leh tawh a, mahse an lo inzirtir nasat tawh avangin a sawt mawh hle. China-ah hian khawvel mihring 19.4% lai an awm a. Tam thatzia an hriat tak avangin, ni 15.10.2015 atang khan fa 2 neih an phal ta a. An Policy “Production by the Masses” hnuaiah an thang chak ta em em mai a, mi 1-in kum 1-ah US $ 7518 an thawk chhuak thei der tawh a ni. USA ah khuan khawvel mihring 4.5% lai an awm a, mi 1 in kum 1 a a thawhchhuah chu US $ 47,123 a ni tawh a, an tam khu an hlawkpui hle a ni. Japan chu ram zimte a ni a, mahse khawvel mihring 1.9% lai awmin an bit hle, mi 1 in kum 1 a a lakluh chu US $ 33,828 lai a ni. South Korea pawh khi khawvela mihring bitna ber zinga mi a ni, mahse mi 1 in kum 1 ah US $ 27,791 an lalut thei tlat. Singapore khi 648.Sq.Km a zau a ni a, Aizawl let 6 vel lek a nih chu. Lo neih tur ram an nei lo va. Km 1 bialah mihring 7000 vel lai an cheng. Mahse an hausa em em a, fa neih tam an la inzir reng a ni. Hongkong khi 1070 Sq.Km a zau a ni a, Mizoram hmun 20 a thena hmun 1 ang tiat vel lek a nih chu. Km 1 bialah mihring 6500 vel an cheng a. An hausa hle a, an khawlai a thawl nuamin Traffic Jam pawh an nei ve chuang lo zu nia. 3. MIZORAM:- Mizoram zau zawng hi 21,087 Sq.Km a ni a, 2011 ah mihring 1,091,014 kan awm a. Chawhrualin India ramah Km 1 bial zelah mihring 382 an awm laiin, Mizoramah chuan mihring 52 chauh kan la awm a. Arunachal Pradesh tih lohah chuan India rama mihring thawlna ber kan ni. Family Planning kan lo inzirtir ve vak mai hi chu tihsual (blunder) lian tak a tling.

Kum 2001-2011 inkar, kum 10 chhunga kan punna rate chu 22.78% a ni a. Tunlaia thalai thihna tam dan leh hmeithai kan ngah sawtzia ngaihtuahin, kan punna rate hi a tlahniam ngei ang. Hetiang punna rate ang chiah hian lo pung zel pawh ni ila, kum za lo awm leh tur (2012-2112) ah pawh mihring 86,51,479 vel lek kan la ni tho dawn a ni. America rama Red Indian-te chu an tlem avangin an ral tawh a. Fiji, Tibet leh Palestinian-ah te pawh ram neitute chu chimral an ni mek a. Kan chhehvelah Burmaa Karen ho te, Assam-a Mikir ho leh Bodo ho te, Tripura-a Deb-Burman leh Riang te pawh chimral mekin an awm a. Keini pawhin kan ram kan luah sen loh avangin, ramri hrula ram awl chuan Foreigner-te a hip lut mek a, kan buaipui ta hle a nih hi. India ram State dangte chuan tlem an inzirtir a nih pawhin, keini tan chuan a tul ve lo. Thufingte 14:28 ah chuan, “Mipui tamnaah chuan Lal ropuina a awm a, mi tlemnaah erawh chuan Lal fapa boralna a awm” tih kan hmu. Mihring tamna apiangah eitur pawh a tam mai a lo ni. Khawvel sorkar chak leh changkangte hi mihring tamna an ni zel.

Mizoramah hian leileta siam theih ram 50,000 ha vela zau kan nei a. Tuna India rama an thar zat, hectare 1-ah 3 Ton ang hi thar ve ta ila, mi maktaduaikhat ei khawp kan thar thei a ni. (Mi 1 hian kum khatah buhfai 150 kg tla tawka ngaih a ni). Egypt chuan Hectare 1 ah 9 Ton an thar thei a. Chutiang chu kan thar ve phei chuan mi maktaduai 3 ei khawp buhfai kan thar thei tihna a nih chu. MP neih theih zat hi mihring tam lam atanga teh a ni a. Tuna kan neih lai hi 1971 Census hisapa siam a ni a, kum 2001 thleng tura tih kha 2026 ah pawh sei a lo ni ta a. 2026 ah pawh MP 1 aia tam kan neih theih a rinawm loh a ni. Zirna In hrang hranga seat kan neih zat pawh mihring zata chhut te an nih ve thin avangin Seat kan chang tam thei lo va, kumina MBBS seat pawh min tihtlemsak a nih kha. ZNP chuan kan din tirh atangin ‘Tam Policy’ hi neiin, Manifesto-ah pawh kan telh ziah thin. Kan lo pun theih nan Medical Allowance te, Education Allowance te, Residential Allowance te leh Family Maintenance Allowance te fa 3 chin leh a chung lam neite hnenah pein, “Tam Policy” hi uar takin kan kalpui dawn a ni. Tam tur chuan hrisel a ngai a. Ram changkangah chuan chawhrualin kum 70-80 vel an dam tlangpui tawh a, India ramah kum 64.7 a ni a, Mizoramah chuan kum 45-52 vel chauh nia hriat a ni. Kan lo pun a, kan lo dam rei bawk theih nan, Health Policy nen kalkawptir a ni ang.

4. PATHIAN LEH KOHHRAN DUH DAN A NI :- Pathian chuan Adama chu chi tam tak thlaha leilung luah khat turin a hrilh (Gen. 1:28). Tuilet hnuah Nova hnenah chu thu bawk chu a sawi leh (Gen. 8:7). Fanaute hi Lalpa laka kan rochan, a lawmman min pek a ni (Sam 127:3). Onan-an a u nupui a pawlin a chi leia a tih tlak thin avangin Pathianin a tihlum (Gen. 38:8). Mi lo insual sela, hmeichhe naupai lai vaw palhin a naupai lai chu tla ta se, a pasalin a ngen zat zat pek tur a ni (Ex 21:22). Mi insual sela, a nupuiin lo chhanin a sual puipa zahmawh pawhsak sela, chu nu kut chu tan tur a ni (Deut 25:1) Pian leh pian loh thu hi mihringte lo inrawlh vena chi a ni lo. Pathian thu a ni. Abimelekan Pathian pawi a khawih avangin a nupui leh a bawih nute chu tihchin an nih kha (Gen. 20:17-18). Tlem hi Pathian hremna chi khat a ni. Lal Isuan khawvel tawp dawna thil lo thleng tur a sawite zingah khan mihring tam lutuk avanga harsatna lo thlen thu a sawi tel lo. Mihringte min suattu chu hri te, indona te, tam te, thlipui leh tuilian te, lirnghing te an ni zawk. Tam lutuk avanga hnam boral tumah an la awm ngai lo. Population Theory hmuchhuaktu Malthus-an tam lutuk avanga chhiatna lo thleng tur a sawi lawk te chu engmah a lo thleng ta si lo va. Lo tho leh ta se chuan a Essay kha a ziak tha leh ngei ang. Kum zabi 20-na tan tirh lama Birth Control rawn tlangaupuitu Margaret Sanger-a kha Krista Dodaltu (Anti-Christ) a ni. Family planning hian Bible leh kan Kohhranhote duh dan a kalh avangin, ringtu zawng zawngte hi chuan ZNP Population Policy hi i support vek ang u.