Footballer M. Gandhi

Gandhi Birthday pualin Footballer Mahatma Gandhi

Vawiin hi India Hnam Pa Mahatma Gandhi Birthday a ni a, Gandhi hi India tana zalenna a sual atang chiah khan a chanchin hi kan hre chiang chho a ni maithei. Mahse Ram leh hnam tana nasa taka a zawng zawnga a inpek hma khan chanchin ngaihnawm deuh deuh a lo nei nual mai.

Thil mak deuh chu Gandhi hi a naupan lai atangin Indian naupang dangte ang lo takin Cricket a ngaina lo teh tlat mai. Rajkot-a Rajkumar College-ah khan Cricket chu a khel ve thin tih chu a chiang a. Mahse a bak hi chu Cricket nena sawi zawmna sawi tur a vang khawp mai.

Rawlthar a nih chhoh chuan Gandhi hian Football erawh a ngaina khawp tih a chanchin ziakna atangin a hmuh theih. Africa rama a awm laiin Football lamah nasa takin a inhmang a, mahse Football player lar tak emaw, Professional Footballer kan tih ang chi erawh a ni ta lova.

Africa-a hun a hman chhoh tirh atangin Gandhi hian ram zalenna sual a tum zia pawh a chetzia leh a thu kenah a lang thei a. Hetah hian Football chu heng a zirtirna vawrh lar nan hian a hmang chho ta a ni. Chi inthliarna, in enhranna leh tharum thawhna tel lo chu Football hmangin a theh darh a, India-in zalenna a sual chhoh tak tak hnuah pawh khan he a thu ken hi a zirtirna pui ber a ni chho zel ta a ni.

1893 atanga 1915 khan Africa-ah hun a hmang a. Hetih chhung hian Johannesburg leh Pretoria (Tshwane)-ah club pahnih a din hman a. Heng khaw pahniha a team din hi Passive Resisters (Che chang lova dodal ngawt ngawt) tih a phuah ve ve a. Passive Resisters tih a hmana chhan hi Henry Thoreau leh Leo Tolstoy te thuziak a chhiarin a hneh em em vang niin a lang. Tichuan Football hmang chuan Racial discrimination leh intluk tlanlohna chu South Africa-ah chuan a do ta a ni.

Mahatma Gandhi, Football coach
A team te an khelh chuan a tel ve ziah a, mahse mual chhunga khel ve tak tak chu a ni ta lova, Club neitu a ni a, promoter a ni bawk a. A chang chuan Half time lai ten ground chhungah lutin, a team te chu tactic leh stategy te a hrilh thin.
Hetih lai hian kan hriat mai mai tur chu, Kumpinu khan khawvel hmun zau tak kha a awp a. South Africa pawh Kumpinu awpna hnuaia a awm lai kha a ni a. Indian tan pawh South Africa-a pem kha a awlsam khawp mai.

South Africa-ah khan Indian tam tak an awm tawh a. South Africa-a Indian awmte zingah khan Cricket aiin Football a lar zawk tlat mai.
Tichuan Gandhi leh mi thahnemngaite chuan Indian khuaah chuan Football league tha tak an din ta rup mai a.Transvaal Indian Football Association leh Klip River District Indian Football Association te din a ni a, hei hi Gauteng khuaah ve ve niin; hemi khuaa Football Stadium hi Gandhi thuhrilna hmunpui a ni chho ta bawk a ni. A mah leh a thawhpui L.W Ritch chuan an club te inkhelh tumin, halftime chhung leh inkhel zawhahte Non violent leh Racial Discrimation chungchang an sawi thin a ni.

Gandhi chuan a team te chu thianghlim taka khel turin a fuih nasa thin em em a, team spirit tha neih a, tanrualna nung tak neiha, moral value tha tak tuh a tum tlat reng bawk a. Tin, Swami Vivekananda hi kan hre vek awm e, ani pawh hi Football fan a ni chiang kher mai. Swami Vivekananda hian a sawi thin chu, "Nitin darkar khat tal Football khelh hi Meditation aiin a tha zawk," tih hi a ni.

Hetia Football tui taka a chenchil lai hian Gandhi chu India ram chuan a ko ta si a, loh theih lohvin Zalenna sual tur chuan India ramah a haw chho ta.

Hetia Africa a chhuahsan hnu lawk 1936 khan a team dinte chu an ral ve zui ta mai a. Mahse Gandhi hian Football a hmangaihna chu a thi lo tih a chiang khawp mai. India ram atang chuan South Africa-a Football 1st Division team pakhat Christopher’s Contingent (Albert Christopher-a din leh sum lama a puih a ni. Tin, Christopher leh Gandhi hi 1913 khan Labour strike khan inthurual takin an thawk hova) chu duhsakna a la hlan hram hram a ni.