Good Governance engtin nge kan neih theih ang

Good Governance engtin nge kan neih theih ang?

R.Lalhmangaiha
Bethlehem veng

Source
Vanglaini, 02.10.2017

'Good Governance' tih hming ringawt hi chu kan lam ri zing malh malh tawh hle a, Politician-te tawngkam lam rik zin ber pakhat pawh a ni. Sorkar tha siam tur chuan thuneitu ber sorkar, kohhran leh mipuiten mawh an lak hmasak ber a tul a. Kohhran chu thurawn (advice) petu ni se, kohhran thu leh hla zawng zawng chu sorkar tha chuan a kawi a ngilin a zawm vek tur tihna erawh a kawk lo.

Good Governance nei thei tur chuan Politician, sorkar hnathawk leh mipuiten kan hnathawh reng reng hi neitu rilru nihna thinlung pua kan thawh erawh a tul a. Politician leh sorkar officer, anmahni lawina kohhran sum him taka an kawl theih piah lama a pung awma kawl thei si; sorkar sum kawl him thei reng reng lote an la kah nuk chhung hi chuan dikna lal tiang hian kan ramah ro a rel thei ngai lovang. Lei thil leh van thil inkar kan dah hla lutukte hi a diklo hrim hrim.

Sorkar tha leh rorelna dik hnuaiah chuan mahni dan siam palzut ngam leh namnul thei khawpa lalna leh thuneihna nei an awm a rem lo a, hlauh tur leh hlauh loh tur ngun taka thlir reng a tul a ni. Tuna Mizoramin kan mamawh lian em em chu hlauh tur dik tak hlaua ram leh hnam rawngbawl thei tur politician, sorkar hnathawk leh NGO lianah hruaitu kan neih a pawimawh takzet a. Kan mi lian leh thil ti thei tak takte pawh an diklohna hailan leh chhuichhuah anih hnu pawha kan man ngam loh a, kan hrem ngam loh emaw, kan la intlawnsiak chhung chuan rorelna fel leh tha a piang thei ngai lovang.

Dan leh hrai zawm that hi mipui huapzo sorkar (inclusive government) siam nana pawimawh ber pakhat a ni. Tuna kan politician leh sorkar hotu liante hi kristian ringtu thaah an inchhal ngam deuh vek a rinawm a, kohhran bel tlattu, Pathian ni a pianga Biakin kawngzawh thin an ni deuh vek awm e. Tichuan, kohhran chuan mawhphurhna lian tak a nei hmasa tihna a ni.

Sorkar tha kan neih theihna turin kan sakhaw hnarkaitute hian mipui zirtirna huapzau leh tha tawk pe thin se la, kohhran tina uar taka zirtirna pek bakah Primary School atanga Class X thleng hian subject pakhata dah thei turin School Education Department leh kohhran tangrual hian hma la se kan hlawkpui ngeiin a rinawm.

Mipui pawh hian kalphung dik kan hriat a tul a. Minister leh MLA te hi sorkar hna, Contract/Supply petu tura kan ngaihna pawh paihbo a hun tawh. Head of Department leh Cheque issue thei chinte chu, "Chu mi kha mi Director, CE, EE, etc.an lo ni ve ringawt a lawm le" kan tih fo thin pawh hi kalphung dikloh vang zawk a ni. Hengte pawh hi kan sim loh chuan sorkar inrelbawlna tha neih chu a har khawp ang.

Kan ramah hian sorkar tha a pian theih nan thuneituten development inkhai rual lo lutuk chungchangah kohhran leh mipui an rawn thiam bawk tur a ni. Mipui rilru a tha zawnga zirtirna pek phawt a tul a, mi tam tak chuan ministry dik leh tha nia kan hriat chu ram tana hmasawnna ruhrel chhawp chhuah leh chhawp chhuah loh lamah kan teh lova, mipui huapzo development kalpui a ni em tih lam kan ngaihtuah hek lo. Chu ai chuan chhung leh khat hnaivaite emaw, party bil thawktute chhawr tangkai theih sorkar chu hahipin kan fak mai thin a, a thalo takzet a ni.

UT kan nih atanga vawin thlenga Central atanga kan sum chawkluh zawng zawngte hi a zat ve chauh pawh dik taka hman chu ni se, Mizoram chu India ram State-ah a mi cheng tam dana chhuta hmasawn berte zingah kan awm thei tawh hial awm e. Mahse, a mi nawlpui tam zawk kan la retheih sizia ngaihtuah hian sum lolutte hi thuneituten an hmang diklo nasa viau tih chu phat rual a ni lo.

Sorkar hian Mizoram tan eng anga project/scheme/plan tha eltiang pawh siamin sum lo luh belh ruih ruih se la, kan budget pawh a let tam takin pun belh mahse; thuneitute leh mipui rilru a dikloh chhung chuan awmzia a nei chuang lo ang. Department-a mawhphurtu lian zawng zawng leh ministry chelhtute a ngai ang zela kan kal chhung chuan eng tihna mah kan ni chuang lo ang a, ngaiawh aiin kan hnungtawlh zel ang. Chuvangin kan vaia Moral Reform a ngai takzet a ni.

A nih dan turah chuan Politician-te hi chu mahni leh chhungkua inkhawrh ruak thak khawpa mipui rawngbawltu tur an ni a. Mahse, tuna a lan dan chuan chhungkua leh Party inlakmukna mai niin a lang. "Kan pary sorkar" tih avanga thawk leh khata hausak thut kan tum thinna pawh paihbo a ngai. "Chu mi kha mi Minister/MLA chu kan laina hnai tih emaw, chu mi Department Head chu kan makpa" tih avanga kan tihsualah pawh hrem kan pumpelh theihna sorkarah chuam 'Good Governance' a awm thei ngai lovang.

"The more you have, the more you want" tih duham chin lem neih lohna thinlung hi a thalo em em a. Politician thenkhatten Politics-a hlawkna kawng nia kan hriat, reiloe a In leh Lo ropui tak tak din tumna rilru te, Motor changkang chhuak thar a piang neih tumna rilrute hi Politics khawvela hlawhtlinnaah kan teh dawn anih chuan 'Good Governance' chu a hla tual tual ang.

Kan hotuten kawngpui siam nan cheng vaibelchhe tam tak an dah lai a, kan kawngpuite a that chuan si loh emaw, sorkar flagship programme kum 9 lai kal pui tawh, NLUP ah cheng tam tak kan sem ral tawh chung pawha mahni kea ding thei, eizawnna ngel nghet neih phah sawi tur an van viau si chuan, sorkar pawh a inenlet a ngai a, kal phung kan thlak loh chuan sorkar tha chu a rim ringwt pawh hriat phak a ni lo ang.

Mahni chhungkua leh mahni Party chauh vulh len tum Politician chuan Party Politics ban san ngam se, Politics aia sum hmuhna hlawk zawk hna dang thawk se, ram pawhin a that pui zawk ngei ang. MLA Candidate ni tura qualification mamawh nia kan hriatte pawh a danglam zo ta. Ram leh hnam vei mi mithiam emaw, hei chu ram siam that duh tak tatu a ni tih ai a; cheng nuai 40/50 emaw, nuai 100 lai pawh campaign nan sen ral tur neite tha zawka kan ngaih chhung chuan sorkar tha kan siam thei ngai dawn lo a ni.