Mahatma Gandhi (for his birth)

Vawiin hi eng ni nge kan la hre hlawm em? Indian Civil Rights Leader, Khawchhak Remna arsi lian, India zalenna pa, hmelmate beih nana tharum aia remna (ahimsa) kawng zawhtu, India miten a hming pawha ko phal lova Babuji an tih ngat Mohandas Karamchand Gandhi (Mahatma Gandhi) pian ni a ni.

October 2, 1869 kum khan a lo piang a, mifing leh zaidam, mi nunnêm leh hmangaih phu hliah hliah a ni a, 'Gandhi-a tel lo chuan India hi a India zo dawn em ni?' an tih ngat a ni. Dân lam mithiam a ni a, South Africa lamah India khua leh tuite thubuai buaipuia a feh chhuahnaah vun rawng inan loh avanga India mite thliarthlak an nih nasat zia a hmuhin a lai a na ngawih ngawih a, politics-ah a zuan luh phah ta a ni.

Cogress party-a Gandhi-a a rawn luh ve takah chuan party kalphung pawh a phuisui sawt hle a. Amah ngeiin hma hruaiin British, a hun laia khawvel sawrkar chak bera ngaih awpna nghawngkawl taltliah tumin nawrh a huaihawt ta a. 'British-ho kan beihnaah hian ball pen aia rit ralthuam kan chelek tur a ni lo' a ti țhin.

Tlâng chunga Isua thusawi (Chanchin țha Matthaia ziak bung 5-7) hi a duh êm êm a, sakhaw lehkhabu zawng zawng chhiar chhuak vektu a ni. 'Kristian-a ka luh lohna chhan chu Kristian-te vang a ni a ti e' an ti țhin. Roman Catholic Kohhran hian 'Anonymous Christian an awm e' an ti a, chutiang an lo awm ngat a nih chuan Gandhiji hi a ni ngei ang.

August 15, 1947-a a kaihhruaina avanga India-in zalenna a lo hmuh khan British-ho hêm thlâkna avangin India chu- India leh Pakistan tiin- phel hnihah a phel ta phawk mai a. An zalenna hi Hindu-Muslim intualvuaknain a zui nghal ta a. Zalenna an hmuh zânah pawh a hlim ve thei lo va, Calcutta vêng kil khata a inah a tawm tlat a, BBC palaiin 'India zalenna niah hian India hnam pa ber dinhmun ațangin eng emaw tal chu i sawi ve dawn lawm ni?' a tih pawhin, British-ho huain puak keh lek lek mahse 'English țawng ka thiam ve tih hi lo theihnghilh mai ta che' a ti duh țawk a ni.

Himalaya tlâng bul țhut hmun lai vela Sikh-ho pawh thinrim engphiara Gandhi-a chhuahchhal turin an rawn kal a, a hmel an han hmu a, a thawh rim zia, rethei nia an inhriat lêt tam taka Gandhi-a a retheih zawk zia an hmuhin an lainat lutuka an thinur leh vuina thu pakhat mah an sawi chhuak thei tawh lova 'Babuji, i hah lutuk a ni, Himalaya lamah rawn chawl hahdam ve rih ta che' an ti ta zawk hial a.

Ka pa hi Assam Regiment-a țang ve tawh a ni a, Gandhiji hian an Battalion a rawn tlawh a, 'Chaw puar khawp in ei em?' tiin a zawt ta a. Sipaiho chaw kaw puar lo pawhin a hmela lainatna an hmuhin an chaw kham loh thu an sawi phal ta reng reng lova amah bawkin 'Chaw in puar lo tih ka hria. A pawi ka ti. India hi nimin lawka piang a ni a, a la naupang êm a ni. In la puar khawp ang, ka tiam a che u. Ka awm a lawm' tia a âwm pan tê a'n chûm dat dat chu Sipai hruanghrau pui pui pawh insum zo lovin an mittui a tla zawih zawih mai niin min hrilh a ni.

He mi ngilnei chungchang hi sawi zawh sên pawh a ni lo. Sawi zâwng pawhin a nun hian mi a hneh êm êm ringawt mai a ni. India hnam hnuaihnungho (Dalit?) a sawi dan te hian mi a hneh `the children of God (Pathian fate)´ a ti daih mai a ni.

He ti khawpa nunnêm, ngilnei leh zaidam hi Tharum Thawh duhtu Nathuram-a chuan January 30, 1948 khan Birla House tualah nawr chilh deuhthawin a âwmah vawi thum a kap a, a that ta a ni. Thil pakhat kan tih zawh chuan hna pakhat zo ang kan ni a, kan thawveng huai a ni țhin ngai a. Nathuram-a erawh chutiang a ni awzawng lo. Gandhiji a kah zawh chiah hian Gandhiji chuan 'Aw, Pathian' tih chiah a sawi a, a thi ta a. A hmêla lo lang ngilneihna, lainatna, ngaihdamna te a hmuh chuan 'thil ka tisual chhiava a ni' tih a inhre nghal a, a țhingțhi hnawk a, 'Babuji, Babuji, Babuji' tiin lungchhe vânkaiin a țap ta hawm hawm zawk a ni.

He mi nunnêm, ngilnei leh zaidam Mohandas Karamchand Gandhi-a hi kum 148 kalta vawiin angah khan a lo piang a ni.

Happy Birthday, Gandhiji!

Source : Whatsapp