RUAH HMING HRANG HRANG LEH A SUR HUN-TE

RUAH  HMING  HRANG  HRANG  LEH A  SUR  HUN-TE :

      Pi leh pute khan 'Ruah' hi hming an lo vuah ve thliah a, chungte chu a sur hun tlangpui nen:-

1. Pawl delh ruah:
December thla tawp lam leh January thla tir lamah a sur țhin.

2. Țhuang ruah:
January thla chawhnu lamah a sur deuh ber.

3. Chap delh ruah:
Țhâl lai, lo vah hunah a sur țhin.

4. Țo ruah:
March thla-ah a sur deuh ber a, thlipui te pawh a tel țhin.

5. Ruahthimpui:
May thla chawhma lamah a thleng ber a, thlipui na tawk tak pawh a tel țhin.

6. Nikir ruah:
June ni 20 velah a sur deuh ber a, ni 7 chhung lai khua a chêng țhin bawk.

7. Ruah phingphisiau:
July thla velah a sur ber a, tuihawk luang tham lovin a sur tlangpui.

8. Ruah varpui:
August thla velah a sur țhin.

9. Ruah mual liam:
Ruahbing te pawh an ti. August leh September thlaah a sur ber.

10. Mai-hrui-pawt-chat:
September thla chawhnu lamah a sur ber a, fûr ruah hnuhnunga ngaih a ni a, a sur tam țhin hle.

11. Ai ruah:
Ruah hming pu zingah kum khat chhunga surah a hnuhnung bera ngaih a ni a, October thla tawp lamah emaw, November thla bul lamah emaw a sur ber a, ni thum lai a chêng thei.

12. Ruahpui-van-âwn:
Eng hunah pawh, tam tak a sur țhin hi a ni mai a, hunbi nei a ni lem lo.