INDIA HNAM PUANZÂR CHANCHIN

INDIA HNAM PUANZÂR CHANCHIN
.
Ziaktu: Pi Jacinta Vânlalêngzâmi, Headmistress, A&M Grandchild School, North Vânlaiphai.
.
Indian National Flag design hmasak ber chu a chung berah rawng
hring, chu mîah chuan Lotus pâr vâr
pariat, a laiah rawng eng, Devanagari hawrawp ‘Vande Mataram' rawng pâwl duka ziak a ni a, a hnuai berah sêrthlum rawng he mîah hian a vei lamah Nî (Sun) lem chuangin a ding lamah Thla de tîr a chuang bawk a ni. Hei hi August 7, 1906 khân Parsee Bagan Square, Calcutta-ah pawh pharh a ni.
.
Tûna National Flag kan hman
mêk hi July 22, 1947 khan All India
Congress Committee, Karachi (tuna
Pakistan ram ni ta)-a țhukhâwmin a
lo rêl thlûk a ni a. Kan ramin zalênna a neih lawm nân August 16, 1947 khân Prime Minister hmasa ber, Pandit Jawahar Lal Nehru-a’n Delhi-ah a lo pawt parh ta a ni. August 15, 1947 zanlai hnaih tawh taka India-in zalênna a hmuh avângin a tûkah an pawt parh ta a ni.
.
A siam dan leh hmanruate:

1. Indian National Flag siam nân
hian India lâ thar chhuah (Indian cotton), India sahmul, beram hmul (Indian wool) leh maimaw puan (Indian silk) chauh hman phal a ni.

2. A rawng hi India rama rawng siam chhuah chauh hman tûr a ni. Sêrthlum rawng (Indian Kesari) leh deep green (rawng hring tak/India green) a ni tûr a ni.

3. Hmûi hman phal a ni a, he flag
siam tûr hian weaver (puantahtu) thlan bik 20 aia tlem an ni tûr a ni. Mizoramah KVI ațangin a lei theih.

4. Sq. centimetre khatah lazai 150 a
intah tûr a ni a, feet 1 biala a lâ rih
lam hi 250 grams a ni tûr a ni.
.
Hnam puanzâra hriat tûr pawimawhte:

1. Hnam puanzâr hi pawh parh a nih
hian țha takin a parh ngei tûr a ni. A
parh țha lo chu chibai bûk loh tûr a ni.

2. Hall-a zâr a nihin mipui
hmachhawntute ding lamah zâr tûr a ni.

3. Sûk fai a nihin a dungzâwnga a
kâng ngeia zâr tûr a ni a; lei a dek tur a ni lo.

4. Eng pâwl flag nen pawh zâr dun a
nihin eng flag mah Indian National
Flag aiin a sâng tûr a ni lo.

5. India rama khawvêl huap ram
dang nena intawh khâwmna a awmin leh flag hrang hrang zâr ho a nihin India flag a hmasa ber ang a, alphabetical order-in ram dang flag-in a vei lamah a zui ang; hei hian UN flag a huam lo thung.

6. Aircraft-a President, Prime Minister, Chief Justice of India, Vice President, Lok Sabha Speaker a zinin 225x150 size chu ding lamah târ tûr a ni a, a tlawh tur ram flag chu vei lamah târ thung tûr a ni.

7. Zâr tlâk loh khawpa chhia chu
paih mai lovin hâl râla a vâp chu
thlai châwm nân hman tûr a ni.

8. Chhiatna nasa tak ram chhûngah
emaw, state khawi berah emaw a lo
thlenin, hriattîrna zûlzuiin National
Flag chu a letlingzâwnga zâr tûr a ni.

9. Hêng mi bik, President of India,
Vice President, Chief Justice of India, Speaker Lok Sabha, Chief Minister, Governor, Chief Justice of High Court-te an thihin National Flag chu ngûl chanve-ah zâr tûr a ni. (Zah takin flag ngûlah a chanve a thlen thlengin zâwi zâwia pawh thlâk tur a ni.)

10. Flag pawh parha National Anthem sa lova rimâwia rem a nihin Indian classical music chauh hman tûr a ni. He music rem nân hian flute, Mri dangam, sitar, tabla, triple drum etc.-te hi classical musical instrument-te an ni.

11. Ni tlâk rualin lâk thlâk tûr a ni a,
zâwi muanga la thla riai riaiin koki
ding lamah baha fel taka thleh tûr a
ni.

12. January 26, 2002 khân National
Flag hman dân Dânin a zam chu dân rorelna hnuaiah tihdanglam a ni a, mimal inah te, zirna in leh office leh thil siam chhuahna hmunah te eng nîah pawh, eng hunah pawh pawh parh theih a ni ta a. Amaherawhchu, chhuang tak, zah tak leh urhsûn taka tih tûr a ni, dân zâwm chung zêlin.
.
National Flag chungchânga tih loh
tûrte:
.
Prevention of Insults to National
Honour Act. 1971 leh Flag Code of
India 2002 zûlzuiin–

1. Thawmhnaw atân leh inchei nâna
hman phal a ni lo.

2. Dawhkân leh thil dang khuh nân
hman phal a ni lo.

3. Sumdâwn nâna hman phal a ni lo.

4. Zâr a nihin a bulah emaw, a dekin
a chungah emaw chhinchhiahna,
pangpâr tiamin a awm tûr a ni lo.

5. Cheh nâwia thil chei mâwi nân
hman phal a ni lo.

6. Chhuar chunga dah a nihin thil
dang eng mahin a delh bet tûr a ni lo. A chungnung bera dah tûr.

7. Hnam puanzâr zah lo taka sawisak, hâl, thawmhnawa țhui leh a chunga tih loh tûr tia hmusit taka tih chu kum thum thleng lung in tân
emaw, pawisa châwi emaw, a pahnih emaw a hrem theih a ni.