AINAK KHUA HI LO HMELHRIAT VE TEH

AINAK KHUA HI HAN HMELHRIAT VE TEH
( Story ka ziah ve apianga a ziaktupa, ka hming bula ka dah ve ziah Khua kha a ni. )
.
.
Chhim lam Khawpui, Siaha atanga Sumo-a tlanin darkar 3-4 vel thâng a ni a, fur a nih erawhin darkar 7 - 9 thleng tlan te a ni thung !
.
He khua, AINAK tih hming lo chhuah dan hi sawi dan hrang hrang a awm a. Pakhat chu, tuna kan khaw hmun kan pi leh pu ten an luah hma hian Chhuarlung leh Lungbun khaw inkarah an lo in bengbel / khawsa thin a. Chu kan pi leh pu te chenna hmun (Lui) ah chuan Chakai (Aidum) a tam thei em em a, chu CHAKAI hming chawi chuan an awmna hmun/khua chu Ainak (LAI tawng) tiin hming an phuah ta a. Tin, tunhma kha chuan indo vang emaw, ram tha zawk beisei avang te'n an pem an pem thin a ni a. Ainak LAL paw'n tuna kan chen mekna hmun lamah hian a mi leh sa a lo pempui ta a, a khaw hmasa hming AINAK hming pawh chu a chhawm ta zel a ni awm e. Sawi pakhat leh ah chuan Fanai Lalin kan Khua hi a lo run a, tuna kan chenna lamah hian kan khaw Lal chuan a mite a lo tlanchhiat pui tih te a awm.  Tun thleng hian khaw thenawm pahnih Chhuarlung leh Lungbun inkar, kan khawhlui hmunah chuan AINAK LUI tih a la awm nghe nghe a ni. Hmanlai ngang kha a ni a, thil reng reng ziah(k) a dah an lo nei lova, historian kan nei bawk loh avangin a ni e tia chiang taka sawi tur erawh a tlem hle. Kan tawng (Vawngtu/Zophei ) chuan ENAH kan ti a, Mara tawng chuan IANA a ni leh a. Mizoin AINAK.
.
Ainak ah hian Vuangtu Ṭawng/Zophei Ṭawng hman a ni. He Ṭawng hi India ram zauah hian kan khua, AINAK leh Siata chauhin kan hmang. Mizo Tawng (Duhlian Ṭawng ti zawk ang) erawh a mi cheng ten kan hre vek.
.
Ainak khaw thenawm te chu, Siata, Chhuarlung te an ni. Tunhma kha chuan Phusa a awm ve thin a, kum tam lo kalta khan ruahsanin Chhuarlung lamah an pem tawh a. An khaw hming hmasa paihin Chhuarlung-2 tih an ni tawh.
.
Ainak atanga nichhuak / khawchhak lam pana chhuk kal ngar ngarin, darkar 1 velah Chhimtuipui, India leh Burma inrinna kan thleng.
.
Ainak ah hian In 140 vel a ding a. ( Ka chiang chiah lo). Zirna lamah Primary atangin Middle thleng a awm. Primary hi 1 & 2 a then a ni.
Kohhran pathum, UPC, ECM, SEVENTH DAY te an awm.
.
He khua hian Mizoram puma tilar a, ti hmingthang theitu tur khawpa Milar a la hring lova, mahse India ram Khaw tam tak nei veloh, TLAWMNGAIHNA, INLUNGRUALNA, DIKNA te chu he khuaa cheng lar zualte an ni thung !
.
In lian ve deuh lang khi ECM Biakin a ni a. A hnuaia zawl tlem lang khi zingtin, tlaitin a thalaiten kan Ronaldo a kan Neymar ve na thin, kan neih chhun Seven side, kan Santiago Bernabeau khelmual a ni. He kan khelmual ah na na na hi chuan kan khaw Best 7 vs Real Madrid 7 pawh inkhel dawn se kan khaw Team lamah ka bet sang ngam viau ang. Kan hmang thiam ve tlat !
.
Biakin piah daih a Tlang pawl ruih mai lang khi Burma ram tlang a ni. Lung a tileng a sin !
.
Ka seilenna Khua Ainak, Kawlvalenchham atang hian i mi ten kan ngai thin che.
Dikna, Lungrualna, Tlawmngaihna te kha lo chhawmnung zel ang che.