BEIDAWNNA TIBEIDAWNGTU - MI ROPUITE

Rocker ropui leh hlawhtling, Black Sabbath hotupa ni ṭhin, Ozzy Osbourne hi mi hriat a hlawh hmain sa talhna hmunah a inhlawh ṭhin. King of Rock n Roll an tih hial, Elvis Presley pawh a lar hma chuan truck driver mai a ni ṭhin.

Lemchangtu lar leh hlawhtling, khawvel hmeichhiate star rawn luai luai, Brad Pitt pawh hi a lar hmain nipui laia lungalhthei laihchhuahna khura warning sign petu-ah a tang ṭhin.

The Beatles member leh an hlaphuahtu pakhat, Sir Paul McCartney pawh a lar hma chuan dawr hran hranah kal kualin bungrua a sem ṭhin.

Rapper lar ber pawl ni mek, R. Kelly pawh hi mi hriat a hlawh hmain kawng sirah zaiin a inhlawh ṭhin.

Zaithiam lar, Sir Elton John pawh hian a lar hmain Mills Music tichhuaktute in tur thingpui a semsak ṭhin.

Zaithiam hmingthang, Ronan Keating pawh kha a naupan laiin a zaithiam loh em avangin an sikul choir aṭangin an bàn daih.

Khawvela basketballer ropui bera chhal ngam, Michael Jordan pawh hi High School a kal laiin an basketball team aṭangin an bàn daih.

British Prime Minister hmingthang, Sir Winston Churchill pawh kha khawvela University hmingthang ber ber pahnih, Oxford University leh Cambridge University-te chuan ‘thu thiam lo’ tiin an lo hnawtchhuak tawh.

American lemziak thiam hmingthang, James Whistler pawh Wesat Point-a lehkha a zir lai chuan chemistry-a a fail avangin an hnawtchhuak daih.

Kum 1905 khan physics zirlai, Albert Einstein-a lehkha ziah chu University of Bern chuan, ‘Awihawm loh leh suangtuahna mai mai’ tiin an lo hnawlsak daih tawh.

Sakhaw lama a ngaihdan a danglam em avangin John Bunyan chu Bedfordtaninah an khung a. Tanina a awm laiin Bible tih lohva khawvela kristian lehkhabu hralh hnem ber ‘Kristian Vanram Kawngzawh’ (The Pilgrim’s Progress) chu a ziak chhuak ta a ni.

Novel lar tak, Ironweed pawh hi chhuah a nih hmain vawi 13 lai chhuah ngam lohva hnawl a ni tawh. A ziaktu, William Kennedy chuan a thuziah sa tam tak a khawl hman a, mahse, Ironweed lar hma chuan tuma’n a thuziak an chhuahsak duh lo a ni.

Dr. Seuss-a’n naupang thawnthu a buatsaih, And To Think That I Saw It On Mulberry Street chu press 27 ngawtin an chhuahsak duh lo. A 28-na, Vanguard Press chuan an chhutsak hram a, a chhuah hnu rei lo te-ah copy maktaduai 6 lai an hralhchhuak nghal a ni.

Lehkhabu ziaktu ropui, Dale Carnegie pawh khan kum 12 a nih hmain vawikhatmah car a hmu lo. Mahse, kum 46 mi a nih meuh chuan a hming hre lo an awm tawh lo.

Editor hmingthang, Edward Bok chu Dutch naupang rethei tak, sikul kalna tur pawisa pawh nei zo lova inhlawhfa mai mai a ni ṭhin a, office tirhkahah ṭangin kar khatah cheng 6 a hlawh ṭhin.

Kum 1802 khan Atlantic Monthly chanchinbu-a an poetry editor chuan tlangval kum 28 mi, Robert Frost-a’n a poetry ziah chhuahsak tura a ngenna chu thawnkirin, “Kan chanchinbu phekah hian thu rorum lutuk tan hmun a awm lo ve,” tiin a ziak a ni.

Kum 1889 khan Rudyard Kipling chuan San Francisco Examiner chanchinbu aṭangin, “Ka pu, sapṭawng i thiam hlawl lo niin kan hria a, a pawi kan ti khawp mai,” tih thu a dawng.

German tennis star, Boris Becker pawh hi tennis a khelh tirh chuan a thau avangin a ṭhiante’n fiamthu thawh nan an hmang ṭhin. Mahse, kum 17 mi a rawn nih chuan Wimbledon Tennis-a mipa champion thei naupangber a rawn ni ta.

Khawvel mi hausa hmingthang, Andrew Carnegie pawh khan a tirah chuan darkar khata siki hlawhin hna a thawk ṭhin.

Mitdawivaih thiam hmingthang, Howard Thurston pawh hi a naupan lai chuan sikul a kal mumal ngai lo va, mi bawng chaw dahkhawmnaah a riak vel mai mai ṭhin.

General Motors-a Vice President ni ṭhin, motor amaha intihnun chawpna (self starter) siamchhuaktu, Charles Kettering pawh hi mi rethei tak, mi pawisa pûk chawp reng renga khawsa ṭhin a ni.

NFL-a running back ni ṭhin, Herschel Walker pawh hi Junior High School a kal lai chuan football khelh a duh ṭhin a, mahse, an coach chuan, “I patê lutuk” tiin a lo hnawl ṭhin. Mahse, beidawng lova a inzir ṭang ṭangin kum rei lo te hnuah Heisman Trophy a dawng ta hial mai.

Thu leh hla thiam hmingthang, John Milton pawh kha mitdel a ni. *Concert violinist hmingthang, Itzhak Perlman kha a ngawng achin hnuai lam chu a zeng vek.

Cartoonist leh humorist lar, James Thurber pawh kha mit ṭha lo a ni.

Cambridge University-a lecturer leh theoretical physicist ni bawk, lehkhabu lar tak A Brief History of Time ziaktu, Stephen Hawking kha Lou Gehrigs Disease (zeng chi khat) natna vei a ni.a

Lemchangthiam hmingthang, James Earl Jones kha kum 6-14 mi a nih lain beidawnthlak khawpin a dang a awk ṭhin. Tunah chuan khawvela lemchangthiam hlawhtling berte zinga mi a ni der tawh.

Olympic Games-a decathlon champion lo ni tawh, Rafer Johnson pawh kha kelek saa piang a ni.