Billy Graham kan chan ta

“Krista pawmtu leh lo dawng sawngtute inchhir ka la hre ngailo”-Billy Graham Rev. Dr Billy Graham, kum 99 mi thih thu hi an chhungkaw aiawha thupuangtu Mark DeMosses chuan puangin, Feb. 21 zing (India ah zan 8pm vel) khan a chenna Montreat, North Carolina state ah a thi tih a ni. Billy Graham thih thu hian khawvel a deng chhuak rangin, uitu leh suntu a ngah tak meuh a ni. US President Donald Trump leh Vice President Mike Pence te chuan an uizia an sawi nghal a, khawvela thuhriltu milar tak tak Joel Osteen, Kenneth Copeland, Joyce Meyer leh Melania Trump, Rev. Jerry Falwell, House Speaker Paul Ryan, Russel Moore, Mitt Romney, Chief Judge Stephan Dillard, Barack Obama, Bill Clinton, George H.W Bush leh George W Bush Jr., Jesse Jackson, Jimmy Carter, etc ten an uizia an sawi chhuak hlawm a ni. Billy Graham thih chhan hi prostate cancer, pneumonia leh Parkinson natna vang niin an sawi a, kum 1992 atangin Parkinson natna hi a vei niin an sawi. President Trump chuan, “MI ROPUI Billy Graham a thi ta. Amah ang reng an awm lo! Kristiante leh sakhaw tin rengin an ngai ngei ang. Mi danglam bik, mi bik tak a ni” a ti. Vice President Mike Pence pawhin a uizia sawiin, “I ti tha e, rinawm leh taima taka rawngbawltu. Mi maktaduai telte nun tidanglamtu i ni” a ti. Rev. Jesse Jackson, Civil Rights activist leh US President hialchuhtu chuan, “The Pope of evangelical movement” tiin a fak. President hlui Jimmy Carter chuan, “Mi maktaduai telte nun thlak lam tirtu, rilru zau, inngaitlawm taka midang entu leh chhiahhlawh rinawm, Krista nunzia entirtu a ni” a ti. Church of England Archibishop of Canterbury Justin Welby chuan, “Tehchhin rual loh leh sawichhuah thiam loh min hnu chhiah a ni” tiin, Billy Graham a uithu a sawi bawk. President Barack Obama chuan kum 2009 khan Billy Grahamtar chak tawhlo, kum 91 mi chu a chenna Montreat, North Carolina state ah a lo tlawh tawh a ni. Kum 1955 khan Gallup Poll chuan, “American hote ngaihsan ber chu Billy Graham a ni”, a ti. Kum 2017 thlengin mi ngaihsan zingah awmin, kum 61 chhung zet mi ngaihsan zingah a tel pha a ni! President hlui Jimmy Carter chuan, “Mi maktaduai tel zinga Billy Graham thuchah sawi vanga nun danglam nei ka ni” a ti bawk. Russel Moore chuan, “Tirhkoh Paula tih lohva Krista chanchintha puang nasa ber leh puang tam ber a ni” a ti. George W Bush chuan, “Billy Graham thuchah vanga nun danglam nei ka ni” a ti. Kum 2000 ah President tura a in candidate tumin Billy chuan, “Naupang ang chauhvin ka hria” a ti ve thung. Billy hian a nupui Ruth Graham Bell chu June 2007 khan a lo sun tawh a ni. Billy Graham chu kum Zabi 20 chhunga Krista ke bula midangte-thlaraubo hruai hnem ber tih a ni a, khawvel chuan “America’s Pastor” tiin an hre mai a, koh nan pawh an hmang zauh zauh thin. A naupan laiin Baseball Player nih a tum ruh hle a, mahse, kum 15 a lo tlin chuan a nun chu rinloh a lamah kaih beha awmin, Krista tan a hlan a ni. Bob Jones University ah a lut a, Florida Bible Insitute ah lut lehin, Wheaton College ah a zir tawh bawk. Indopui 2na hun laia American sipai rammu lo kir leh ta chu Pathian Thu a lo hrilh thin a, July 1945 ah Youth for Christ International ah Speaker a ni chho a ni. 1949 ah Los Angeles ah kar 8 tehmeuh Crusade neiin, miten an lo hmel tan chho a ni. Billy Graham hian lehkhabu 30 chuang ziakin, miten an hlut hle. indona hmuna US sipaite tlawhin Pathian Thu a hrilh thin a, Washington pawhin chu Evangelist chu an lo hriat phah a ni. President Harry Truman atanga President Barack Obama thlengin US President thian tha, an thlarau nun kaihhruaitu ah an hmang a, National Breakfast ah pawh thuchah sawi fotu a ni bawk. 1952 ah Capitol Hill-ah Pathian thuchah a keng lut tan a, Washington ah kar 5 teh meuh Crusade a neih hnu chuan, official tam takin an hmelhriat phah ta a ni. 1957 ah New York City a Madison Square ah kar 16 zet a inzawm zatin Crusade a nei a, chutah chuan mi 100,000 chuang an tel a, mi tam takin Kristaah nun thar an neih phah a ni. Kum 1947 khan North Korea Dictator thin Kim Il-sung pawhinPyongyang khawpuiah thuchah sawi turin a lo sawm ve tawh bawk. Kum 15 a nihin a lak tlak hle tawh a! 1918 ah a lo pianthar a; 1939 ah Southern Baptist Convention rawngbawltu (clergy) tan nemngheh a ni. Mahse, 2005 ah a pension a ni. Thihna chungchangah chuan, “Thih chu ka hlau ang maw? Hlau lo ve. Pathian chu hmaichhana ka hmuh hun tur a ni asin” a ti mai thin. Billy chuan, “Bible hi thudik tak (universal truth) a ni a, Krista chuan chhandamna kawng a siam a, chu chu kan duhthlanna hmangin thlan fel tur a ni. “Aw,” “Ni lo” tih leh “Lo nghak lawk rawh” tiin kan chhang liam satliah ngawt tur a ni lo. Tun aia hun remchang i hmu tawh ngai lo vang” tiin, a tawngtai sak hlawm thin a ni Author : CT Lalrinawma