Chanchin Dangdai Lawrkhawm

CHANCHIN DANGDAI LAWRKHAWM Posted on Feb. 2, 2018 by Mizo Archive

AUTHOR : Andy K Zarzoliana

1. Mihringte hian kan lungngaih vangin emaw, kan ­natna avanga kan mittui a tlak hian mit veilam atangin a chhuak hmasa zawk a. Hlimna avanga mittui tla erawhchu mit dinglam atangin a chhuak hmasa zawk thin.

2. Khuai (bee) te hi an inpawl hian a pate’n a vawrtawp (climax) an thlen chiah hian an sazu mu hi a puakkeh ta thin a, hei vang hian khuai pate hi an inpawl apiangin an thi ziah tihna a nih chu. Ka hlauhzawng tak a ni.

3. American flag-a 50- Star hi Ohio High school naupang pakhatin an project a tana a designed a ni a. Chutih laia an zirtirtu chuan B- a lo pe thawr a, mahse; hei tun thleng chuan an la hmang zel chu a nih hi maw!!

4. Coca Cola hian ramtin deuh thawh a fangchhuak a, mahse; Khawvel ram hrang hrang zingah Coca Cola lakluh emaw, zawrhemaw khap tlatna ram pahnih a awm a, chu chu, North Korea leh Cuba te an ni.

5. Kan ke sei zawng hi kan banrek atanga kiu nen hian a inchen chiah a. Tin, kan kutzungpui leh kan hnar hi a inchen chiah bawk a, kan kutzungchal leh hmui pawh hi a inchen leh chiah bawk an tih tlat pek chu!!Han teh ve ta che!!

6. Hmeichhia regular taka lipstick inhnawih thin te hian an damchhungin chawhrualin lipstick kg 3 vel an inhnawih ral thin an ti bawk.

7. Dawnfawh, (watermelon) 92 percent lai tui awmna hi a lo chhuahna tak chu Kalahari Desert a ni teh daih.

8. Pakistan rama khua leh tui te Identity Card ah chuan Sex tih zawna tick turin Male/Female ringawt awm lovin mi laklawhho tick-na tur an dah tel tlat nia mawle. Hmun 3 ah tick tur a awmtihna nih chu.

9. Denmark-rama nupa tuakkhat Anette-i leh Kenneth Lund-a te chuan kum 2008 khan ni khat chhungin vawi li teh tawp mai an innei nawn tluk tluk mai! Tin, kum tina vawikhat tal inneih an tum dawn thu an la sawi zui cheu bawk.

10. Mizo A Aw B lampum fiamthu in an sawi thin. A Aw B = AiAwt Bawm kan tih fiamthu thin hi A B C ah chuan A B C= Always Be Cool an ti ve tlat.

11. Spain-rama ui pakhat chuan a pu boralna damdawiin kawtah kum 7 chhung teh meuh mai a pu a la nghak ta reng. He ui hi a pu mitdel leh diabetes nei chuan amah puitu ber atana a hman thin a ni a, damdawiina hruai thintu pawh a ni. Tuk khat chu damdawiinah lungphu chawlin a pu hi a boral ta hlauh mai a, mahse, he ui hian haw zai reng a rel duh chuang lo. A pu a nghahna thin damdawiin kawtah chuan a awm ta char char mai a ni awm e. A vela chengte hovin he ui rinawm tak hi chaw an lo pe thin a ni.

12. Khawvel ram hrang hrang zingah Philippines ram Flag hi zar dan tih danglam thin awmchhun a ni. He ram flag hi a pawl leh a sen inpawlh a ni a. Ralmuan lai chuan a pawl chu chunglam ah an dah a, indo lai chuan a sen chung lamah a awm ve thung.

13. Romeo Adrales-a, kum 33 mi chuan, a lumehtir chu fiamthu thawh nana a thiante’n an lo hmansak avanga thinurin a lumettupa, Bonifacio Delgado-a chu va panin a kaphlum riap mai! Tanina an kawmnaah chuan heti hian a sawi zui nghe nghe. “Ka lu meh dan hi ka thiante hovin an lo nuihsawh avangin ka thin a rim a, he thil hi ka tih phah ta a ni,” a ti. “Tin, tun hi vawi hnih tawp min meh sualsakna a lo ni ve tawhreng reng bawk,” tiin a sawi zui bawk. (A thu chhuak a rum el awl kher mai)..

14. Thu ziaktu lar tak George Bernard Shaw kha kum 29 anih laiin hmeithai pakhat lakah a chesual ve khauh mai a. A thiltihah a inchhir viau nge ni kum 15 chhung zet chu mipat hmeichhiatna lamah a inhman zui loh phah hial a ni.

15. Buenos Aires-a nu pakhat chuan, a pasal irhfiak reh thei lo chu hmaikawr vuahin, a irhfiak tihrehsak tumin a va barakhaih ve teh ngawt a, a tisual chiang hle mai. An pa, Nestor Lutz, kum 48 mi chuan misual ni turah ngaiin chemte-in a lo vithlum siah mai a ni awm e. Nestor-a hi police hnenah a inpe zui nghal a ni. A pasal irhfiak tihreh a tumna lamah a nunna a chan ta a ni.

16. Waldoboro, Maine-a mipa phir, Gary Nisbet leh Randy Joubert-a, an sen laia lak hrana awm te chu kum 55 hnuah an intawng leh teh nawlh mai. Randy Joubert-a hian a unaupa hnathawhna hmun tak kawr zawrhna dawrah chuan va thawk ve chatin, chutah chuan an inchhar leh ta a ni. Unau an ni tih hi aninhre nghal mai bik lo va, an inhmuh hlim chuan an hmel leh pianzia a inan em avangin an innuih tawn vel mai mai a, mahse,a hnua an chanchin an han chhui chian nak chuan phir an lo ni reng tih an hmuchhuak ta hlawl mai a ni.

17. Puithuna thil leh hmanlai ngaihdan hlui avangin ram țhenkhatah chuan nunna chan phahtu an la awm reng mai. Ivory Coast-a mipa zahmawh (penis) dawi tê thina puh dawithiam pasarihte chu khawtlangin an sawisak rawn hrep hnuah a nung chungin a rualin an hal hlum phiar mai a ni. Uganda te, Kenya te leh Ivory Coast-ahte chuan heng thil hi a la hluar viau mai.

18. Kum 1934-a US-a bank rawk thubuaia an man, John Dillenger-a pistol tê chi, .41 calibre chu kum 2009 khan an lilama, mi pakhatin $95,600 teh meuh maiin a lo khul chhuak. He silai hi Dillinger-a, Tucson, Arizona-a an man tumin a mawzaaha lo pai a ni.

19. An uite-te an morning walk-puina lama inchhar, Harriet-i leh Andrew Hathay-a, Dorset (England)-a chengte chuan an inkutsuihin an uite-te ve ve chu mothianah an hmang teh mauh mai.

20. Japan khawpui Tokyo-a school pakhatah chuan zirtirtu robot an nei mauh mai. He robot a hming Saya tia an sak chu mihring pangngai ang thei ber tura a hmel leh pianzia pawh duan a ni a. Mihring tak ang maiin lungngai hmel te, lawm hmel te, thinur hmel te, hlau hmel etc a pu ve thei thlap bawk. Hei chang ni lovinzirtirtu tak ang maiin zawhna leh chhanate pawh a siam thiam ve vek a, tawng chi hrang eng emaw zat a thiam tel nghe nghe a ni.

21. Antartica-a tlang panga vurtawlh zawng zawng zingah khuan penguin ho zun 3 percent zet a tel ve tlat nia!!

22. Romania police-te saw an remhre riau. Romania, Sibui County-a police-te chuan motor khalh chak lutuk tur ven nan an khawpui motor kawngpui sirah police car lem lehkhakhawnga siam chu an dah thluah thin a. Motor khalhtute’n police motor tak tak turah ngaiin an khalh fimkhur phah thin fo thin a ni.

23. Coventry, England-a nupa pakhat, Paul leh Val Howskin te chuan an thenrual thate engemaw zat sawmin an fridge kum 50 tlinna champha lawmna an buatsaih mauh mai. An fridge kum 50 a hman tawh chu chhe hauh lova kum 50 an hmantlin tak avanga buatsaih a ni ber.

24. Northern Portugal-a jail tang pakhat tlanchhuak chu kum 16 teh meuh mai an zawn hlawhchham hnuah kum 2009 khan an man ve ta hlawl a. Heng hun chhung zawng hian puk pakhatah alo khawsa reng thin chu lo niin, inhnemhnan nan theirah a ei thin a ni. A sam leh hmuihmulte chu a lo sei hman tawh hle a, a kawrte lah chu a hlui chhiat tawh em avangin a lo tet hniang hnuang bawk a. Police-te pawh hian an hmuh hlim chuan an hai hial reng a ni. (A mantute hian thla an lakpui ve chiam kher lo.)

25. Ukraine police-te chuan thawmhnaw dawr rawktu pakhat chu a thil ruk nen an man a. An man hian a thawmhnaw ruk chhuah ho, kekawrte 30, tracksuit 4 leh kekawrtlawn 6 te chu a lohak thuah hlawm hem mai.

26. Kum 2009-a Hillary Clinton-in Kenya a tlawh tum khan Nairobi councillor pawh lo ni ve tawh thin, Godwin Chepkurgor, kum 39 mi chuan a fanu Chelsea-i chu nupui atan neih lo dilin a man atan bawng 20 leh kel 40 a hlan teh mauh mai bawk.

27. Cambodia-a nupa pakhat inthente chu an fair dun hle mai. An nupaa an thil neih hote chu an inzah sem vek mai bakah an chen dunna in pawh a zahve chiah chiahah phel phawkin an insem leh zel a ni. An nu chuan a in chan phel chu a awmna ngaiah a luah chhunzawm a, a pasal chuan hmunram dangah a suan phei ve thung.

28. Rajasthan-a mi, Dhanna Rama chuan kum 1988-a a pa a boral atangin a hmuihmul a la zuah ta reng a, kum 2009 a lo inher chhuah meuh chuan feet 4 1/2 zeta sei a ni der tawh. Dhana Rama hian mi hriat hlawh duh vang leh record break-na tur atana a hmuihmul hi zuah a ni lo va, feet 61/2 zeta sei hmuihmulnei, a pa Karma Ram Bheel-a hriatreng nan a zuah a ni.

29. Myanmar, Pago Div-a naupang pakhat Htetswe leh an venga hmeichhe naupang Mayțin chuan piangnawn niin an insawi a, Japan ral laia thi niin an insawi mauh mai. An phumna thlan thlengin an sawi dik tlat mai a, an nulat tlangval laia inngaizawng nia an insawi avangin an chhungte ve ve remtihnain an innei ta a ni.

30. Switzerland-a thingtlang khaw pakhat, Cheiry-a farm pakhatah chuan bawng hnar kaw pathum nei a awm teh mauh mai a, he bawng hian a khawchhunga mite lawm a hlawh em avangin a neitupa Urs Herrmann-a chuan hralh chhuah tura a bawng dang ho a khungkhawmnaah pawh dah phal lovin a chenna tur in a hran hlakin a siamsak nghe nghe a ni.

31. Kan pumpui chhungah hian thil tuihnang tha tak, kar hnih dana a thar a inthlak reng a awm a, he tuihnang hi chu awm lo se kan taksa a acid hian kan pumpui hi a eichhe vek ang.

32. The Guinness Book of Records hian record lehchhawng a siam a, chu chu, Public Libraries atanga lehkhabu ruk chhuah hnem ber a ni.

33. Bak (bat) kan tih te hi an puk atanga an rawn thlawhchhuah hian vei lamah zel an kawi hmasa an tih tlat chu!!