Mizo Damdawi

Mizo Damdawi/Thing leh Hnim Damdawi Thenkhat Lawrkhawm: (ASIC)

_*Asthma :*_
_i) Balhla kung tuai a zung chawpa lak a, a kung chu meiah rawh uai a, sah sawm a, a tui sawr tur. Chu chu Khawizù nen chawhpawlhin no ½ in ni khatah vawi 3 tal ei tur._

_ii) Thingfanghma hnah ro leh Kawldài hnah daihlim a dah rote, Tawtawràwt pàr hnah ro meizial ang a zuk tein *thawhah* a chhawk nan a tha a ni._

_*Thawhah zual laia enkawl dan :*_
_Hnungzang ruh bawk, nghawng bul atanga palina thlenga kutzungpui leh kutzungchalin a bàwk laiah 1-2-3-4-5 thlenga hmeh thlak a, dinglam leh veilamah palina leh pathumna zawn, zàngruh sìr tisaah kutzungpui leh kutzungchalin hmeh bawk tur a ni._

_Chutiang hlir chuan 5 mins chhung tih hnuah 5 mins chawlh a tih leh thin tur a ni._

_*Âwmvèl :*_
_Samtawkte rah rawtsawm emaw *'Awmvel,'* thingkung leh khåm panga bet thin tui sawr hnawih a tha hle a ni._

_*Âr pûl :*_
_Uihlo hnah chhum tui intir a tha hle a ni._

_*BP sàng :*_
_Kawldai hnah, a chim tawk tui leih a, darkar khat vel chhum hnuah 15 ml in ni khatah vawi 3 in tur._

_*BP hniam :*_
_Sunhlu rah densawm a chaw tlem nen pawlh a, *'Dawi'* nena bilh tur a ni a, Ni 3 chhung emaw a thawh hunah no ½ in zing leh tlaiah in/ei tur a ni._

_*Chuap :*_
_Balhla kung densawm tui sawr a, no te deuhin ni khatah vawi 3/4 in tur. Ni 7 chhung ei tur._

_*Chhûl láwng :*_
_Tàtkawng pil densawm a, a chimtawk tuiin darkar 12 vel chiah tur a ni a, chumi hnuah sawr a, thlitfim hnuah 15ml in ni khatah vawi 3 in tur, ni 7 chhung ei tur a ni._

_Tin, Teak thing pil pawh hetiang bawka sawngbawl hian a hman theih tho a ni._

_*Chingchip seh :*_
_A sehtu chingchip chu tih hlum a, a pum chhunga tui awm chu hnawih mai tur a ni._

_*(Ramhmul damdawi chu a ni chiah lo a, ka telh ve tho a ni. PR)*_

_*Ha nâ :*_
_Khuangthli hnah chhum tui in leh a hnah tui sawr seh sawm leh a tui hmuam a, a na lai chiahtir mai tur a ni._

_*Kal :*_
_Perhpawng chaw (hnim chikhat) emaw Hnim thuamthum a kung leh a hnah den sawm a, a chim tawka tuia chiah a sawr a, thlitfim hnuah intur._

_*Dose :* 15ml in ni khatah vawi 3 ei/in tur._

_*Kal/Zunkawng :*_
_Khamhlo hnah a chim tawk tui a darkar 1 vel chhum hnuah thlitfim a, no ½ atanga no 2 thlengin ni khatah vawi 3 in tur a ni.

Khawihli :
Hnahchhah hnah hem uai a bel mai tur a ni.

Kaih :
Hnahchhah hnah emaw Mutih hnah tui sawr in a tha a ni.

Lu nâ :
_Purûn sen ràwt diak bekah leh kutphah chungah bel/dah a mut vang vang mai tur a ni.

Mit thîp/Mit thak :
Ngiau thing hnah thuai emaw densawm sawk sawk a, a chim tawk tuiin darkar 12 chiah a, thlitfìm hnuah mit sil nan hman mai tur a ni.

Nau nei Hnute tui nei har tan :
Thingfanghma hnah hnuai lam thai ràn vak a, hem uaia hnute hmur tello in hnute bu tuam tur a ni.

Tin, Changkha hnah rawtsawm a bel a tha bawk, rei lote chhungin Hnute tui a awm nghal thei a ni. (Mak ve mai mai ka ti a ni. PR)

Pumpui :
i) Ngiau thinghnah den sawm a, a kawi tawka tui leih a, darkar khat vel chiah hnuah sàwr a, thlitfím hnuah a thlum leh kha inpawlh tawkin Khawizù nen pawlh tur!

15ml-in ni khatah vawi 3 chaw ei hma in ei tur. Tin, pumna thut ang chiah chuan glass no ½ in ei a tha bawk a ni.

ii) Chhawntual thing pil sahsawm a, chhum tui in tur, a tam thei ang ber in thin tur a ni.

iii) Thuamriat thing pil chhum tui in pawh a tha a. Mahse, BP hniam tan chuan a tha lo.

Pile :
Hlonuar sen chi hnah rawt sawm no ½ vel a dah a, bawnghnute a tihkhah a chawhpawlh a, a tak nen chuan zing karah ni 7 chhung in thin tur a ni.

Sekhupthur den sawm tui in pawh a tha a, mahse, pumpui ulcer nei tan chuan a tha lem lo!

Ril :
Fartuah hnah den=sawm tuia darkar 1 vel chiah hnuah thlitfim tui in tur.

Dose : Glass no ½ in zing leh tlaiah in thin tur a ni.

Ruh tliak :
Nothak hnah no artui hel pàwnvar (hawng) leh dawidim kutzungpui tiat vel rawt pawlh a, chu chu ruhtliak laiah puan pan deuha tuam hnan mai tur a ni.

Rul chuk :
Rul chuktu tan bun a, tan bunn a, a hmuamhma lamin a chukna laiah chuktuaha hip tir tur.

Dawl kuang tan bun a hiptir pawh a tha a, Vakep kung pil or a hnah tihsawm a, a chuknaah bel tur.

Tin, changel/Balhla kung tuisawr intir a tha. (Kei kha chu rakzu kha ka ngeih in ka hria, a na pawh a chhawk viau mai, mahse min chuk hmaa zu in hmasak erawh a tha lo hle thung a ni. Doctor lamte chuan an ringin an pawm ve lem lo..!)

Ringworm :
Uihlo hnah ràwt sawm tui sawr inchulh mai tur a ni.

Sciatica :
Bawnghnute 1 litre leh tui 4 litres chawhpawlh tur a ni a, chu chuan purùnvàr 150g rawtsawm puan pan deuha fun bawk a, rei tak chhum tur,1.250l thlenga kang hunah purunvar chu sawr a paih mai tur a ni.

Dose: 25ml (chaw ei fian hnih vèl) in ni khatah vawi 5 ei tur.

Serh thak (Hmechhia) :
Sunhlu kung pil densawm a, a chim tawk tuia chhum a, a zatve a kang thlenga chhum hnuah a tui chu thlitfim a, zing leh zàn mut dawnah serh sil nan hman thin tur a ni.

Thin lian/Mítliàm :
i) Mithi sunhlu sahsawm a, a chimtawk tuia chhum a, a zatve kangin chhum tur, thlitfim hnuah 15ml in ni khatah vawi 3 ei tur. He damdawi ei lai hian hriak leh damdawi dang ei loh tur a ni.

ii) Theikelki/Theiheràwt hnah chhum tui chaw ei dawn apiangin no khatin in tur.

iii) Chakai hel leh Tumbu den pawlh tui in emaw a tak ei emaw chhum hmin pawhin a tha tho a ni.

iv) Mutih vàr leh thinghmarcha thial pawlha ei emaw denpawlh hnua ei.

Tonsil/Hrawk nà :
Khuangthli hnah no rawtsawm tui!sawr thirfiante khatin zingah leh tlaiah ei/in tur a ni.

Thisen chhuak danna :
i) Hnahchhah densawm tuisawr hnwih a, tuam hnan tur a ni.

ii) Japanhlo emaw tlangsam tui sawr hnawih a tha.

iii) Balhla/Changel kung tuisawr a tha tho bawk a ni.

Tît/Khawmualkaikuang seh :
Panhnah rawt sawm bel mai tur a ni. Tin, Lèngsèr hnah ei a hnawih pawh a tha.

Thinlian :
Uihlo chhum tui no ½ in, ni khatah vawi 3 ei a, a kung tawi tetea tan bun 100, lazaia ramkhawm belvàl anga suih kual, Lu chhip a khum a, a fan zauh hnua ke lama lak chhuah tur. *(Hei pawh hi a mak a, a dangdai riauin ka hria. PR)

Tha nâ/Nerve thalo :
Hnim chi khat te reuh tete, Thasuih chhum tui emaw densawm tuisawra zùt a tha a.

Tin, Tumthang hnah chhum tuia zut pawh a tha a ni.

Vung/Ulh/Bilh :
Keptuam hnah hem uai emaw nuai zawra a na laia tuam hnan mai a tha. Kàwng nà leh ruh nà tan pawh a tha a ni.

Tin, a bulbawk zai buna liah zeuh zeuh hi rannung tur seh damdawi a ni bawk. (Thenkhat chuan vawi 3 liah hi atawk an ti. Thilmak ve tak chu a ni! PR)

Vun thak :
Tengtere hnah den sawm tui sawr a tha.

Ziaktu :-
R.Vanlalkunga
Phone : 9862384946
Bilkhawthlir

Pu R.Vanlalkunga hi International Institute Church Management (IICM), London chuan 28th March 2009 khan 'Doctor of Divinity' degree an pe a ni.

I call dawn a nih chuan, Mi taima leh buai ve thei tak a ni' tih hre hmasa a hawihhawm taka biak i tum dawn nia.