VANRAM Vol. I

VANRAM. Vol-I
(Prince Nick Gemini Țkp)

Hebrai 11:16 Nimahsela, tunah zawng ram țha lehzual chak an lo ni a, chu chu vana mi a ni; chutichuan Pathianin an Pathian tiha awm chu a zak lo ve; an tan khua lam a lo buatsaihsak tawh si.

VANRAM ENGE A NIH?

Vanram chu  PATHIAN CHENNA KHAWPUI, Mi thianghlimte tual lênna hmun a ni.

Ringtute'n kan Khualzinna ram kan cham chhûng hian harsatna tam tak kan tâwk țhin a, mittui tla chungin Buh chi feh chhuahpui a ngai fova, Khualzinna ram mai maiah pawh mite hlim leh lâwm a nuam tin chênin an awm a, Mi ropui te leh Mi hausa te, Mi lian te'n Lei hlimna pâr an tlân a, a chang chuan Zu zuar mai mai pawh kan tluk lo emaw tih mai tur khawpa awm  châng a awm a, Kan LALPA ISUA KRISTA lam thlir loh palh châng hi chuan he Lei hi țahna ram ava ni tehlul em!

Khualzinna ramah hian a chang chuan kan Hmangaihte țapin kan țhen a, hlimna te, lâwmna te'n mual min liamsan a, Vanduaina leh lungngaihna te chu kan ta tur bik emaw tih mai turin min chên chilhtu an ni a, A châng chuan kan Hringnun hi a rûmin a rûm ngawih ngawih țhin a, kan khualzinna ram a nih tlat avangin țhianțha leh laina hnai ho zawng zawng pawhin kan dinhmun avanga min hlat cháng a awm fo țhin a ni.

Ka țhian, mi liante leh mi ropui te'n Lei hlimna pâr an tlanna  hmunah hian I RAM ila thleng ve lo tih hi hre reng țhin ang che. Ni tinin Kan Chatuan Pa lênna Rûn, Kan hmangaih kalta te lênna hmun chu kan pan mék zel a ni tih hre reng ila, Ni tina kan ram hlun tur kan panna kawngah hian THLARAU THIANGHLIM hruaitu kan mamawh a, Chumi hruai theih tur chuan kan awm em? kan in enfiah fo a ngai țhin a ni.

Khualzinna ram ata Kan chatuan hmun tur kan panna kawng hi harsa in hrehawmna te chuan min bâwm țhin mahse la, I zâm lovang u aw, i dingnghet zel ang u, I hringnun chu I hun tawn tawh vangin alo chau zo ta pawh a ni thei e, ka țhian, inthing harh la, tho la, ding leh rawh, Keini zawng Ram țha lehzual VAN ami kan beisei si a,  Chu hmun chu kan hmangaihte tual lênna, Kan Chatuan Pa lenna rûn nuam kha a ni e.

Mi liante leh mi ropui te'n Lei hlimna pâr an tlanna hmun Ringtute'n kan khual zinna ram pel a, kan thawhrim hna kan zawh hunah chuan Lei ropuina pâr tlân te'n an ropuina an hloh ang a, ISUA KRISTA vanga Hrehawm tam tak lo tuar hram hram te chuan ROPUINA LAL LUKHUM chu kan khum ve tawh ang a, ropuina an chang ve tawh ang. Kan chatuan Pa lênna rûnah chuan kan hmangaih kal hmasa te nen kan intâwk leh ang a, Tah chuan Ințhen a awm leh tawh ngai lo ang a, mittui tlâk a awm leh tawh lovang, Chu hmunah ngei chuan kan phur rit zawng zawng te chu Lâwmna ah a chang tawh ang a, Hmangaihte leh hmangaihtu chu tual khatah kan leng za tawh ang a, Thihna meuh pawhin hmun a chang leh tawh lo ang.

LALPA ROPUI NAN.
Amen