ASSAM IN MIN CHUH RAM HI

A Bulthum Aṭangin (Pu Ch. Chhunga Fapa Kawmna) — Rindika Mizo Ka pu he ram in neih dan leh rambuai a nih chhan hi, a bulthum aṭangin chiang zawkin min hrilh theih em?        Ni e, he thil hi rawn sawi fiah a ṭul ta khawp mai. . .Kan Home Minister-te pawh khan rinthu hi an rawn sawi mai mai a ni ber mai a.        Inner Line Reserve hi 500 sq. km lai a ni a. District Council kan nih khan Assam state hnuaia awm kan nih angin, Assam state Forest Department khan Inner Line Reserve kha a enkawl nghal a; a chhan chu District Council-in Forest Department kan la nei ve theih loh avangin. Chutih lai chuan Mizoram hian, Assam-in min enkawlsakna man kha kum tin kan budget aṭangin 30% Assam sawrkar hnenah a chhung a ni.        Chuti ang dinhmuna kan din lai aṭang daih tawh chuan Assam State hian min rawn nek ṭan tawh a ni. Chu vang chuan kan buai dawn tlat, kan ram hauh nan kutthlak angai e, tiin kan hruaitute’n ngaihtuahna an nei a. Tin, chutih lai chu mau tam ṭam tlak dawn hnaih kha a ni bawk nen, mau tam ṭam do nana leilet siam nan a ṭha ang, tiin Bairabi lam hruaitute khan min rawn kawhhmuh ve mek bawk a.        Ti chuan, hruaitute kha a daidovah an intlar ta a. Tuna kan ram pawh khu, 1956 khan ka pu-in ngawpui a ṭhiah a ni. 1959-ah te chuan leilet buh kan ei fe tawh a, ṭam khan min tibuai ve meuh lo.       David M. Thangliana te khan, “UT hnu-ah khu ram khu an zuk ta chei. . .” te kha a ti mai mai a. District Council Pass nei thlapin a ni khu ram khu kan enkawl ni.        Sap (British)-hovin Inner Line Reserve min pek, Assam min enkawlsak hi, 500 sq. km chuang min rawn nek daih tawh zawk a ni a. Chu vang chuan, kan mit a men chhung chuan he ram hi tu mahin hralh lo ang u, kan ram chhan nan hrim hrim pawh, tiin kan inrawnkhawm nghe nghe a ni. Tin, kum tinin Mizoramah lei man chhiah kan pe ziah a ni, Assam hnenah ni lovin.        Hman zan khan kan Home Minister hian, “Khu lai khu rambuai a ni,” a rawn ti rinawt a! Rambuai a nih kan hre lo a, rambuaiah kan ngai ngai lo. Kan HM khan rambuaiah a rawn puang ringawt ni-ah kan ngai. Tin, Assam lam pawhin rambuai tia an sawi kan hre ngai lo. Ti khuan an ram ang maiin an duh duh danin an rawn khawsa a, police post te siamin sikul te an rawn sa a, mandir thlengin an rawn hung rup a nih khu.        LSC neitu, chhiah petu-in ‘Zofate Chawlhbuk’ sak kan remti a. . . “Mizoramin chhiah a lakna LSC chhung ngei hi eng vangin nge sawrkar hian a hauh ngam lo; sum chauh hi a duh a, ram hi a duh lo em ni?” tih hi kan chhungkaw zawhna pawh a ni.        Khu, kan leilet lai takah khuan kawngpui a kal ruah mai a. Hmanah khan kan leilet buh leh ram an tihchhiatsak man (compensate) Mizoram sawrkarah kan dil a, “Mizoram PWD chuan Bairabi thleng chauh hi a ni kan thawh ni, Assam-ah dil rawh u,” tiin min lo chhang a.       Assam hnenah kan dil chuan min pe ang a, kan ram hi Assam ram a ni daih tawh dawn tihna a ni a. Chu ai chuan, compensate dil lo mai ang u, tiin chhungkua-in thu thlukna kan siam ta ringawt a ni. Assam-ah nuai za chuang hmuh theihnaah khan, siki pawh dawng lovin ti hian kan awm ta a ni, ram hauh nan.        Chu vang chuan, kan sawrkar hian ramri hi a ngaihsak tehchiam lo a ni ber mai. Ka pa CM lai khan thu an delhkilh a, “Sawi fel a nih hma chu Inner Line Reserve huam chhungah hian, heti hian a awm ngaiate hi awm se la, eng mah kutthlak belh ni suh se. Sawi fel a nih hunah erawh chuan, leilet neitute’n a awmna state apiangah chhiah an pe ang,” tih a ni.        Pu Ṭhena khan a rawn chhunzawm leh dawn a; mahse, Pu Denga khan, “He tah hi chuan lo inrawlh suh u,” a ti ta mai a. Ti chuan Pu Denga khan a han sawi ta a, Ch. Chhunga boundary commission te kha a rawn lek chhuak a. Mahse, Central lam khan, “Ramri buai in nei lo. Hei hi commission a tling lo. Commission ding tur chuan, in inbei ang a, silai te pawh a puak hial maithei. Chutih hunah chuan Central min la rawn au tawn ang a, keini chu a laiah dingin in dikna in sawi tawn ve ve ang. Chutah chiah chuan boundary commission a tling chauh ang,” tiin Pu Denga hnenah chuan an lo sawi a ni.         Chuti ang chu a ni daih tawh chung chuan, kan sawrkar hi a ngawi reng a, he lai ramri chingfel tur hian hma a la ngam ve lo a ni ber mai. Assam lam erawh chu an duh duhin an rawn che tawh daih a nih khu. Keini erawh chuan kut kuangkuahin kan lo thlir vel mai mai a ni ber e.        Hman deuh khan Lalthanhawla hnenah hian ka nu a han kal a, “Khu lai khu kan ram pawh a ni chiah em mawni le?” a lo tih khum vel mai mai a. “Assam State CM mai mai be tur hian ka te tawk lo,” te a lo ti vel a ni awm e!        Eng pawh nise, he ram chung changah hian kan chhungkua pawhin PR emaw rawn siam thuai kan tum. Mahse, tun anga chipchiar hi chuan rawn sawi a rem vek tawh lo ang. Chu vang chuan, he kan inkawmna hi i duh chuan post mah la pawi ka ti lo!