BERMUDA TRIANGLE - 3

(SOURCE--THLENGTHLAWKTHEI LEH ARSI DANG MITE BY P.C BIAKSIAMA)

            Kum 1945 atanga 1965, kum 20 chhung khan, helai hmunah hian passenger phur chi thlawhna lian chi bakah, sipai leh civil thlawhna 15 ngawt a bo hman a ni.

         Hmeichhe pakhat, Carolyn Cascio-i bo dan chu a dangdai hle. Passenger pakhat phurin, June 7, 1964 Nassau atanga Grand Turk Island, Bahama-a an thlawk lai chu an ral daih mai. Grand Turk awmna lai zawn an lo thlen chuan radio atangin a kalna tur a hriat theih loh thu a rawn sawi a, a hriat ngai loh thliarkar pahnih a hel kual bakah, "Hnuai lamah engmah a awm lo" a ti bawk..Chumi hnua a mangang rawl an han hriat leh chu--"He dinhmun atanga tlanchhuah theih dan kawng a awm hram lo maw?" tih chu a ni. Mak angreng takin, Grand Turk a mite chuan thlawhna te chiin an awmna thliarkar chu an lo hmu reng a, chumi hnuah a lang leh lo mai a ni tih pawh an lo hre bawk. Lei lama mite'n chiang takin an hmu si a, pilot in hnuai lam a hmu thei reng reng ta lo chu eng nge a awmzia ni ang le??

    LAWNGTE PAWH AN BORAL VE THO
===========================

       Bermuda Triangle ah hian thlawhtheihna chauh ni lovin lawngte pawh an bo teuh tawh a ni..Lawng bona hmun ralti lai ber chu Sargasso Tuipui vel hi a ni..He tuipui hi Atlantic Ocean hmar khaw thlang deuh a awm a ni a, tuipui hnim (Satgassum) avangin a hming hi lo pu a ni. Tuipui hnuaiah hian tlang sang pui pui, Sea Mount an tih lawng ang chu a tam mai bawk a. Sagasso Tuipui hian a lo dawlh hnem tawh avangin, "Lawng bote thlan" emaw, "Tuipui tihbaiawm" tiin mi thenkhat chuan an sawi thin.
        
            Atlantic tupuia lawng bo tam ber chu America sawrkar ta a ni a, chhui thama thil bo lian awm hmasa ber chu, August 1800 kuma USS Insurgent lawng leh a chhunga mi 340 chuang te, chinchang hriat tur awmlo a an  bo atang khan a ni. May 1968 khan tuihnuai lawng Scorpion chu mi 99- te nen, Tuipui Thlanmual hian a lem pil hmak tawh a. August 20,1800 vek khan USS Pickering lawng lian mi 90 chuanna chu a khuangcher bo hmiah bawk...