ESCAPE from TUIRIAL JAIL

ESCAPE FROM TUIRIAL JAIL
********************
Khawvel jail tang tlanchhuahna ropui 10 zinga a lang phak ngat, Tuirial Jail atanga tlanchhuahna chu...

THUHMA: Tuirial Jail atanga tlanchhuahna hi khawvel a leiverh hmanga jail atanga tlanchhuahna ropui 10 zingah a lang ve phak hial thin a ni a. He Tuirial Jail atanga tlanchhuahna chanchin hi request a awm fo thin a, a bu pawh in ka chhiar tawh a, mahse han ziak chhuak tur chuan an hming leh a ni vel hi ka hre chiang lutuk tawh tlat lo mai a, tichuan post loh phah nan ka hmang ta a. Hman deuh khan kan member pakhatin a rawn post a, ‘chhunzawm tur’ tih in a tawp san a, a chhunzawm leh ta lem hlei lova, hetiang vang pakhat hi a nia chhunzawm tur tih ang chi a thil post hi kan remtih lohna chhan, a chhiartute tan a buaithlak duh thin. Tichuan he post hi ‘lushai-er’ tih in ‘mi(sual).com’ lama a post ka hai chhuak ta hlauh mai a, ani hian ‘Escape’ tih bu Pu C.Zama ziah atanga a kaihtawi a post a ni a. Kan en vela a tawi kim tha in a phuah khawm nalh viau mai a, tichuan amah pawh dil chuang lo in tihian tlem tlem siam remin,  in lo chhiar ve ah ka duh bawk si a, a source te ka tarlang bawk a, a post tupa pawh hian ngaih loh lamah a ngai em lo ang chu tih ring chungin ka rawn post chhawng ve leh a ni e. Ka kutchhuak tak a ni lo a mahse a ngaihnawmna erawh a bo hauh lo ang...

TUIRIAL JAIL CHU: Tuirial Jail hi Aizawl Jail-ah (Millenium Centre awmna hi)tang an tam thin em avangin temporary deuh va sak a ni a. A hmun hi NH 54 atanga peng in khawchhak hawiin kan tlan a, Airfield panna kawng hmar lam a a her kualna laiah ding lamah a awm a ni. Tuirial Jail hi thirhlingnei (barbed wire) 15 ft a sanga hung a ni a, A zau zawng hi a vang 50m leh a dung 100m vel a ni. Thirhlingnei hungna hrulah chuan ralveng awmna duty post(watch tower) 15 ft a sang ah 100ft dan vel zelah a awm a, watch tower 4 dan zelah LMG (Light Machine Gun) an bun bawk a, duty hi chhun zan zawmin (24×7) an duty reng thin. Jail chhungah hian tang-ho dahna in (ward) 3, choka 1, tuizem pakhat a awm a. Jail pawnah hian CRPF Barrack leh Jail Office chu Gate sirah chuan a awm bawk a ni. Ward No. 3 hi pindan 3 ah thensawmin a hmar lam ber chu Non Criminal Lunatic (NCL), Mi a dahna tura tih a ni a, mahse mi a an awm loh avangin a ruak a. Pindan laita pawh a ruak a ( Biak inah an hmang), A chhim dep ber chu tang riahna a ni.

Tuirial Jailah hian mi 60-70 vel an tang a, an zinga 20-25 te chu Political Prisioner (MNF) an ni a, a dang zawng chu criminal case leh Foreigner case-a tang an ni hlawm. Tang te hian an zing atangin Board of Controller (Jail manual-ah a awm lo, tangten an siam chawp a ni) an thlang chhuak thin a. He board hian Jail tangte displine an kenkawh ve bakah administration-ah an pawimawh em em a ni. Kum 1979-a Tuirial Jail tangte’n Board of Controller hotu atan a an thlan chu Pu Ngaihchhinga a ni.

TLANCHHUAH AN REL: Tuirial Jail-a tang zingah hian tlanchhuah tum tlat pawl an awm a, tul ti lem lo an awm bawk a. Tlanchhuah tum ho chu Pu Lalhmingthanga’n a ho va, chungte chu Lalhmachhuana, Lalrawngbawla, Vanlalvena, Lalbiaksanga, Lalrengliana, Lalfima, Hmingtea leh Tanpuia te an ni. Board of Controller hian tlanchhuah a rem ti lo va, tum 2/3 lai an sawi ho hnu chuan tlanchhuah tum chu a rem tih pui thei ta a. An tlanchhuah dan tur an sawi ho leh a, reife an chai hnuah a remchang leh tha ber nia beisei chung leh a chhe ber thleng palh pawh ni se tuar huam chungin lei verh an ti tlu ta a.

An thil tum hriatchhuah a nih lohna turin ruahmanna fel tak an siam a. Board of Controller kaihhruaina hnuaiah Security Cell an din a, member te chu Lalauva, Sangthanga, Lalfima leh Lalhmachhuana te an ni. Security Cell te hian tang dangten warder-te an kawm fal em, pawn lamah lehkha an thawn chhuak ru em, rinhlelhawm an awm em tih an enthla reng dawn a ni. Lung in tang tupawhin pawn lama lehkha thawnchhuah a duh chuan, a lehkha ziak chu Board of Controller a entir hmasa tur a ni. Entir hmasa lova thawn chhuak an awm chuan an chungah action na taka lak a ni ang tiin an vaukhan lawk a. Jail chhunga infiamna chi hrang hrang awm te pawh Jail tangte tan anih angin warder-te khelh ve pawh a rem ti lo va.

LEI VERH TURIN AN INPUAHCHAH TA: Lei verh tan nan chuan ward no. 3 NCL pindan ruak kha remchang berin an hria a, Jailor hnenah Martial Arts zir nan dil an rilruk ta a. An han dil chuan Jailor chuan a thlirpui thuak thuak a, a rem ti ta mai a. An zir laia an tluk nat loh nan leivung pawn a mi lakluh a phalsak bakah buara chhungah lei an hnawh puar a, 3 lai an khai a. Hetih lai hian Pu Rochhunga, Laipuitlang-in Jail chhungah in, contract-in a sa a, in satu mistiri hnenah chuan thingphel 6ft a sei 4 an dil a. Mistiri chuan phal takin a pe a. Thing phek 4 chu a tlangah savunin kaihthleh theihin an kilh zawm a, mistiri hnenah suahdur leh bawngtuthlawh an dil leh a, phal takin a lo pe leh mai a, tuboh leh zel han dil chu an hreh ta deuh va, a rukin an ruk sak ta a. Hmanrua an duh ang an neih kim hma hian kar 3 lai martial arts hi an zir hman a ni.

LEI VERH TAN A NI TA: Leiverh tan ni atan chuan ni 14 August 1979 an ruat a. Ni danga an tih thin ang bawkin an tlan kual zawh hnuah chuan pindanah chuan an lut khawm a, chhung lamah kawngka an kalh a, zawite, mahse khunkhan taka Pathian kaihhruaina ngenin an tawngtai rual a. Kawngkhar awng atanga in chhung a lan loh nan kawmawl an zar a. Thenkhat ring takin an au a, buara khai in pet ri thuai thuai a, chutih lai chuan thenkhatin lei an lo lai thung a. A bul tan ni chuan 3ft a zau, 6ft a thukin an lai a, a vung chu bang leh a lining na inkarah an dah a. An laih khuar zawnah chuan thingphel savuna an kilhkhawm kha an dah a, lei an vur hnan a, an tin san ta a. Chutiang chuan ngawrh takin an beih chhunzawm zel a. Security Cell te hian warder, Jail thuneitu dangte, lei verh lai tibahlah theite chu an thlithlai reng a, buaina a awm dawn chuan martial arts zirlaite an hrilh vat a, annin lei hnuaia hnathawkte an hrilh chhawng leh a. Warder-te a chhunga an luh meuh chuan hnuhma lang lovin an thup fel hman vek thin.

AN MANCHHHUAK TEP: Nikhat chu security cell duty inthiar lai takin warder-te chuan lei verhna lam chu an pan a. Kawngka a inkalh avangin an kik dawt dawt a. Martial Art zir pakhat chuan “Stop” a han ti vak mai a, leihnuai lama thawkte chuan an hrethiam a, an chawl nghal a. A thenin kawngka an hawn laiin thenkhatin thingphel chungah leivung an lo dah mawlh mawlh bawk a. Leihnuai lam ten boruak an tlachham ta a. Warder-te chu awm rei lovin an chhuak leh thuai a, awm rei deuh se chuan leihnuaia hnathawkte chu an ngaihtuahawm viau ang.

IDEA AN NEI THA THEI RIAU: Boruak tlakchham vanga an thih teuh em avang hian pipe neih dan tur an zawng a, vanneihthlak takin ceiling chungah rubber pipe, electrict wiring-tute theihnghilh sei ang reng tak an nei thei hlauh mai a. Pipe hmawr chu leiverhnaah an dah a, a lehlam chu bang leh a lining-na inkarah an dah a. 20ft vel an verh atang hian rawng bawl loh laiin choka pum chu an la phei a, mautlawn a chang chhun pawh chu pipe in an zawm a, pipe chu pum hmawrah an zawm leh a, mautlawn chu leiverhna hmunah an dah a, pum chu an her a, boruak duhtawk an pe thin. Mahse pum hi a hman reng theih lova, a remchan dan ang angin an hmang thin.

An leiverhna hmun hi a thim em avangin torchlight an hmang thin a, battery a hek riau mai si a, an leiverh khuhna kha tlem an hawng a, darthlalang an dah a. Tukverh bulah darthlalang dahin leiverh chhinna darthlalang kal tlangin leiverhna khura darthlalang chu an zuk chhun leh a. Khua a that chuan chumi eng hmang chuan chawhma chhung an thawk thei a, chawhnu lamah erawh niin a persan tawh a, an hmang thei tawh lo.

HARSATNA AN TAWK TACTICS DANG DANG APPLY A NGAI TLAT: Ft 20 vel a thui an verh hnu chuan harsatna an tawk leh ta, an verhna zawnah chuan lung a awm tlat mai. Thirtiang, chheni, tuboh nen an han bei a, thawm a ring hmain inchhung (verh tanna) atang chuan a ri dup dup mai a. A ri thup nan tuboh chu pawnchhiain an tuam a, rei a daih si lo, savunin an tuam a, rubberin an tuam a, rei a daih thei lo. Tih dan dang dapin an han chawl lailawk leh rih a.

Lei an verh tantirh atangin Lalfima, Phulpui chu a tanna ward no.3 kawtah tingtang tar lam nen a duty thin a. Warder leh CRPF duty te rilru lapeng turin tingtang tar lam nen chuan a zai thin a. A zai nin hnuah Radio chu a on thung a, lunglen vak loh tum leh thawh fuh vak loh tum paw’n a zai a ngai tho thin si a, tum deuh to chunga a zai liam mai mai ni pawh a tam mai. “A tul chuan hmui vung bur paw’n kan zai anga a ni mai a lawm………!” a ti thei reng a ni.

Hetia an leiverh laiah lung a awm avang hian an chawlhsan rih a, leiverh chhunzawm dan tur tactic hran an ngaihtuah a. Fima chu Radio leh tingtang bakah tin chhia nen a inchhawp tel ang a, Biaksanga hmeichhe thuam inbelin hmeichhe lemah a chang ang a, Fima zai remin a lam thin ang. An tactic thar chu zanah an practice hmasa te te a. A tukah chuan Fima chuan lam sawh tawk tawkna lam hla, “…Tleitir lukir fen chhingi...Tleitir kekawr zuih lubuk..”, “Kei ni zawngin Rock N Roll kan chhai e..” tih hlate chu hot tak maiin a han sa a, Biaksanga kha hmeichhe lemah changin lam uar angaih lai khan zuanga tumin tin chhia kha a vaw ri ta thin a. CRPF leh warder-te chuan thil dang tih zai rel lo lekin an thlir a. Hetih lai hian lei verhtute pawhin thawm dim miah lovin lung chu chheni leh tuboh nen an chhu awrh awrh ngam ta a, an lungpui hmachhawn pawh chu an chhu bal thei ta a. Nidangah an leiverh laia lung chang deuh a lo awm chang chuan Fima te thian dun chu an zaiin an lam mai thin a, awlsam takin hna an thawh theih phah thin. Jail chhung infiamna te chu warden-te an khelh ve an phalsak lo kan tih tawh kha, mahse leiverh an tan hnu hian warden-te chu khelh ve an phalsak ta a. Warden-te tan hun khawhralna tha tak a lo ni nen, an infiam peih lo chung pawh tang te hian an sawm lui ta thin a ni.

Lei verh hna a kaltluan chuan leivung a tam ve thung a, bang leh bang lining-na kar te chu a khat tawh a, dahna dang an zawng a, ceiling-ah te chuan an dah ta zel a. Nikhat chu ceiling-in a dawl lo va, a chim dawn ta mai, an inpunkhawm vat a, ceiling chu kutin an dawm far mai a. Chutih lai tak chuan warder pakhat chu chu in lam pan chuan a kal phei a, Fima’n a lo be peng a. A vaihlo zial ah chu an phawrh a, “Han zu ve chhin teh, a tui teh a nia ! Ka bialnu min zial sak anih hi,” tiin tih khawtlai dan a lo zawng a. Warder chu a bulah thuin, “A tui hle mai, I bialnu chuan a va han dusak che em ve le,” a ti a. Hetih lai hian ceiling chim tur chu Biaka’n thirzaiin a tawn tha thuai thuai a, Lalhmingthanga volley ball kengin a lo chhuak a, ceiling siam tha tute thawm thup turin ball chu a beng sawt a, “Tunge mal a inkhelh min cho, min cho in awm chuan lo chhuak teh u,” tiin a au vel a. Renga a rawn chhuak a, an pahnihin an khel dun ta a. Ceiling an thawm that hnu chuan an inkhel chu an tawpsan ve ta a.

Lei verhna hmanraw bil te chu C.Thanglura kutah an dah a, ani chuan choka-ah eirawngbawltute kiangah thuin, thing ehna tuboh lian chu dolungah hmangin a chher tha mai thin a ni. Leivung a tam duh em avangin Board of Controller memberte chuan Jailor hnenah infiamna sir zawl te chu pangpar huan atan an dil a, Jailor chuan rem a lo ti a. Warder-te hmuh loh laiin leivung chu an chhung ru thin a, tualzawl vela lei chuan an thup leh nghal zel thin a. Mahse leivung a tam tham em avangin an buai zui leh thuai tho a.

Tuk khat chu leiverh hna chhunzawm tuma an thut thup lai chuan Jailor leh warden-te chu an rawn kal thut mai a. Nidang aia awrawl chhuah nasain an martial arts nunchan chu an han zir ta a, Jailor leh a hote chuan hmuhnawm ti takin an thlir thup mai a, minute 6 vel an thlir hnu chuan thilsual tikrukna lam hawi ni awma an lan loh avangin an kalsan leh ta a. An thawhrim em avangin an taksain a lo tuar tan ta a, an in dam loh chhawk ta zut mai a, zanah pawh an thawk thin a. Mahse lung an sut chuan tuboh leh chheni hman angai thin si a, chhun lamah an chhunzawm ta thin a. Lung thenkhat chu hel te pawh an nei a, 42 ft vel verh tawhin an in chhut a, leivung a tam si a, an verh tawh sa ah te chuan an chhap cham a, an bawhvah luh theih chuan an duh tawk em em a ni.

AN VERH PAWP TA LE...MAHSE:October, ni4, tlai dar 3 vel chuan an hma lamah eng de re re an hmu ta a, an verh tlang dawn niin an in hria a, an hlim hle mai a. Zan lama chhunzawmah an ti ta a. Hemi zan hian tlanchhuah tum zawng zawng chu ward no. 3 ah an riak khawm vek a. Warder-in a kalhkhum zawh chuan Laltawngtaina an sawi a, an zauthau hlawm hle a. An chhuah huna an kalna tur leh an thiante hmuh huna an thusawi tur thlengin an suangtuah a. Zan dar 10 velah chuan pawp de re re hmun chu fiah turin leiverhah chuan an in zui lut ta a.

Lalhmingthanga a hmasa ber a, de re re chu verh zauvin a lu a han rawlh chhuak a, a han hawi vel chuan an verh pawhna chu CRPF duty-na atanga hlam khat vel awrh a lo ni a, an verhpawhna chu hnimin a khuh bo a, an mutna lamah an kir leh ta a. An hisap a sual chiang ve hle mai, uluk tak a teh theih ni hek lo le. Chu bakah lung hel tur a lo awm bawk thin nen, an hisap dik thei lo a ni.  Lalhmingthanga a lo tawng chhuak a, ” Tumah i lungngai lovang u, kan verh pawhna lai saw naktukah kan thup tha anga, hung pawn chhuak ngei turin kan verh tha dawn nia,” a han ti a. A tuka verh chhunzawm tur chuan an mu ta a!! Fiamthu an duh tlan teh lul nen hemi tum hian chuan an ngui nghuai mai a ni awm e. An rilru a na in an mu tlem hlawm hle a ni.

THA THARIN AW: October ni 5 chu a rawn inher chhuak a, nidanga an tih ang thovin tualzawlah an tlan kual a, martial art zirna pindanah an lut khawm a, an tawngtai rual phawt a. Nidang zawng aia ringa au khekin nunchan an han zir leh ta a. Zana an mut tlem leh an rilru hahna lang hauh lovin phur takin an zuang kual a. Pawn lamah Fima’n, “Ka zuam lo kumtluang jail run thim nghah reng chu, sual leh thim lal nunrawngte an leng si…” tih hla thiam fahran lem lo hian a han sa a, Renga’n pangpar phun tur kengin an verh pawhna lai thawm that tumin a lo bei ve mek bawk a. Nidang zawng aiin leiverhna hmunah chuan hnathawh a nuam a, a chhan chu a hma ni a an verh pawhna atang khan boruak a rawn lut thei a, mita hisapa ko bung chin hnuai hreta chhuak turin an han verh tha leh ta a.

Ni 6 October a rawn thleng a, leiverh hna chu an chhunzawm zel a, hemi zan hi chuan chhuah ngei an tum ruh hle a, tlai a lo nih chuan an hmabak lei verh loh chhah tak awm theiin an hre lo va, chhuah paha nawr pawh theih tur awm vela an rin chin chu an zuah a, an tinsan ta rih a. Zanah chuan tlanchhuah tum mi 18 te chu ward no.1 ah an riak khawm vek a. Warderin pawn lama a kalh hnan hnu chuan tawngtai rualna an nei a, an thil tih tumah Pathian tanpuina leh hruaina an dil ber a, tuten emaw an hre ru ang tih hlauvin chham pawh an chham ring ngam lo va. An amen hnu chuan hla pawh sa tawh lovin tlanchhuah dan tur an rel zui ta nghal a.

AN TLANCHHUAK TA: Tlanchhuah dan tur an rel chu an hlim hle a, mahse an lawm a kim hlel deuh va, a chhan chu an thian pakhat Tana, tlanchhuah ve ngei tum leh lei verh lai pawh a taima taka thawk leh thahnem ngai em em chuan perek a rap palh hlauh mai a, a pun a, hnai a la a, kal pawh a kal tha hlei thei lo va. Ni 6 ni chuan a thiante’n, “Tana, kal ve mai rawh, a tul chuan kan paw mai ang che an ti a. Tana chuan, “A chak chu ka chak khawp mai, mahse ka ti buai lutuk ang che u ang a, min man phah reu reu ang e…” tiin a tum ve loh thu a sawi a. Ni 6 zan pawh hian ward no. 3 ah hian a riak ve ta lo a ni.

Zan dar 12:00 hnu hretah chhuah tan ni se tiin an rel a, mutna an siam ta sang sang a, thosilen an zar theuh va, thosilen hnuaiah chuan an puanthuah chu mihring mu niawm takin an siam a, zanlai dar 12:00 chu an nghak ta thap a. Dar 12:00 a rik hnu hretah chuan an tho sang sang a, Vanlalauva’n “Chawnmawiin hnu ka’n dal ang e,” a ti a. Lalhmachhuana’n, “Hmaitlang thain hma ka’n hruai an e,” tiin hma a hruai a, leiverh tanna pindan panin an in zui phei ta tham tham a.

Leiverh chhung an han vak lut chu hmaa mite keartui khawih pha theuhin an bawk vak lut a, Lalhmachhuana(Steve McQueen…mitthlaah a lang ) chuan leiverh bak la awm kha a verh tlang nghal a, dim takin a chhuak tham tham a, an verh chhuahna chu CRPF duty-na atanga lang lo chiah ko bung hnuai hnim zingah a ni a. An han chhuak chu hmasa lam chuan thawm an dim hle a, mi 6 vel an chhuah hnu chuan thawm dim sen a ni ta lo va, an ri thla ta sun sun mai a. Watch Tower-a duty ten Torchlight-in thawm awmna lam chu an en a, mau hnah che lawih lawih chu an hmu thei a, ko bung deuh anih avangin hnuai lam chu an hmu thei lo va. Ruah a tla fep fep a, chhum a zing chiai bawk a, CRPF duty te chu huaisen deuh chu ni se thawm awmna lamah chuan an zuk nangching mai tur a ni na a….mahse an kal ngam lo nge, an peih lo hriat ni suh, tlanchhuakte chuan ri sun sun chungin Tuirial an thleng thla ta a. Tuirial chu kanin ral lehlam tiauphoah an innghak khawm a.

Ni 54 chhung rim tak leh rilru hah reng renga leiverh hna an thawhna Tuirial Jail ngaihawm lo tak, kawng lehlam zawnga kawng lehlam zawnga chhuta ngaihawm angreng tak la ni tur bawk si chu thimtham zing atang chuan an thlir a, bula mite theuh an chibai a, an kalkiang ta a. Leiverh zau zawng hi ft 3 bial vel a ni a, an verh thui zawng hi ft 46.7 a ni.

Tuirial Jail escape-a kan sawi hmaih hauh loh tur chu an tlan chhuah zan hian zanlai pelh hret atangin electric current a awm lo va, zing lam dar 4 thleng a awm lo a ni. October ni 4 zana an chhuah tum hmasak tum pawh khan zanlai pelh hret atangin electric current a awm lo a nih kha ( mak ve mai mai ). Zingah warder-ten kawngkhar an hawn ve leh Haukhama leh Zirliana chu leiverh-ah an tlanchhuak ve vat a, a hmain mi 18 an tlanchhuak tawh kha a ni a, Jail atanga tlanchhuak zawng zawng chu mi 20 an ni ta a ni. ( A hnu lam zela an awmdan hi chu ka hre tawh bik hauh lo mai).

Source: lushai_er,  mi(sual).com { mi(sual).com ah hian BigDaddy Hmahmatea tih tho in thu ka post ve thin }
Image: Google Image- Tuirial Jail layout (A jail thlalak hman ka duh tehreng nen ka hmuzo der lo mai...)

C/P