Ka Thianpa Motor Thar

   “Hallo”
    “Hallo, zanah eng nge i tih dawn?”
    “Ka hre lo, zanin chu ka awl zante a ni ve a, ka mu hma ang te ka lo tia. Tinge a?”
    “Chhuak ila, motor ka lei thar a...”

    “OK2, min rawn sawm la..” tih pahin, “Khawiah nge kan len ang?” ka’n tih chhunzawm a, ani chuan, “Nulate chu an tam alawm, lungngai suh” a rawn ti ham ham a. Tichuan, a motor lei thar nena zan lama lenchhuah tum chuan zanriah ka ei kham veleh hmanhmawh takin ka insiam sawk sawk a, ka insiam zo hman tawk tihah chuan ani pawh chu a rawn lang zui ve nghal mai a.

    MOTOR THAR LEI vs MOTOR LEI THAR

    “Khawnge motor chu i dah a?” tia ka’n zawh chuan, “Khitah...” tih leh kal a rual a, keipawh chuan engmah zawt chhunzawm tawh lem lo chuan phur takin ka zui ve nghal vat a. A motor dahna hmun kan han thlen chuan parking zau ang reng takah hian motor pathum hi a lo ding a. A lo hnai ta ber chu car var nalh tak mai, tle zar mai hi a ni a, ka rilru te te chuan, “Saw saw a ni maw...a to hmel hle mai a!’ ka ti a. Mahse, ka beisei loh deuh maiin chu car var chu ngawi rengin a kal pel daih a, a piah bera mi car sen uk deuh khak chu a pan ta zel a. “Kha kha miii...?” tiin tui vak lo hmel deuhin ka zawt a, “Aw ni e, lo kal rawh” tih pahin kawngkhar a hawng a, driver seat lamah chuan a thu lut nghal a. A tira ka phurna kha a reh deuh duak hian ka hria, ka thianpa car chu ka’n en thin, a rawng te reng reng chu a uk ang khurh a, a number ka’n en leh a, motor chhuak hmasa apiang hi lal tur chu nise traffic jamah kan tlang par par ngei ang, motor kan tlanpelh apiangin chibai min buk sup sup ngei ang tih mai tur a ni.

    Lut mai lova pawna ka din deuh ul reng lai chuan ka thianpa chuan, “Lo lut rawh, i va muang ve” a rawn ti a, tui lo deuh chung chuan ka thu lut ve ta. “Motor ka lei thar i ti ve emaw ka tia, hetiang te han lei!” ka ti bui bui a, ani lah chuan ka thusawi haw hauh lovin, “Nia, motor ka lei thar reng alawm, motor thar ka lei ka ti lova, motor ka lei thar ka ti mai alawm” a ti nui huk huk a. Chutih rual chuan motor chu start a han tum a, engmah ri tur reng reng a awm lo, chahbi chu a aia nain a han herh leh a, mahse, motor chu lungtum lian pui ang maiin a ngawi tlat! “Zingah kha chuan a la tha a sin le! Engine a vawt lutuk vang a niang” tih pahin min rawn melh a, min melh dan atang chuan a sawi tum chu ka lo hrethiam nghal vek. Motor atanga chhuka, nawr turin min duh tih chu sawi lang kher lo mahse ka man nghal a, lungawi lo ru zetin ka chhuk a, dim vak lo hian kawngkhar chu ka khar deuh thuai bawk a. Motor a lei thar a, zan lenchhuah puiah min rawn sawm ve bawk a, kan chhuah hma hmain nawr nun a ngai nghal ringawt chu ka lungawi lo ru ve em a ni!

    BUAINA PAKHATNA
    Tichuan, ka thianpa motor lei thar chu hnung zawngte hmazawngten ka nawr chhen a, a chak lai taka tih nun a tum pawhin a ri dut a, a nung hlei thei lo. Minute 20 vel zet kan innawr tawn chhen hnuah pawh chuan a nung thei silova, ka chau hman tawh khawp mai a. Tun kum chhungin hetiang ang reng reng hian exer ka la la ngai miah lo, thlasik rim a nam tawh avangin khua a vawt ru hle nangin ka thlan a rawn sa bat bat thei hial a ni. Kan awmna laiah chuan puibawm han sawm mai tur vei vak an vang phian lehnghal a. “Ti tawh lo mai ang, ka peih tawh lo” ka ti tawl a, ani chuan, “Vawi khat chiah ti leh ila, a nun theih loh chuan kan dah mai dawn nia” a ti a, “Anih leh, tuna a nun theih tawh loh chuan ka peih tawh lo tak tak a nia” ti chungin ka’n nawr phei leh ta a. Ka’n tang fan fan a, “Chak deuh hlekin..” a rawn ti, keia chau thinrim tawh si chuan, “Lo ngawi mai mai rawh” ka ti vin hlur a, rinloh deuh maiin a rawn nung ta vut vut mai a, kan lawm dun kher mai. Rang takin motor chhungah chuan ka lut a, ka chauh deuh hman em avang chuan duhdah deuh hian ka thu hnawk a.

    Ani chu a inher a, tlanchhuah mai inpeih atin kan inher rem tawh tihah chuan a rawn thi leh ta hmuk mai chu kan inmelh ran a, a hmelah chuan inthiam lohna lian tak nei hmel hi a rawn lang chhuak hian ka hria a, ka hmelah chuan, ‘Ka nawr tawh dawn chuang lo’ tih chu a chhiar thiam ve a ni ngei ang, “Hmmm..saw laiah sawn nawr phei ila, kawngchhuk char char a ni tawh tho a, keimahin ka running mai ang, nawr pawh a ngai tawh lo ang” a tih rual chuan kawngkhar a hawng a, steering veng chung chuan a nawr ta ngat ngat a. A nawr kal tha hlei thei lo tih ka hmuh avang chuan ka inthiam ta bik lova, ka chhuk a, ka nawr pui leh ta a. Hetih lai hian ka mood chu off tak a ni tawh, car thar nen nula rim tura inngaih tawh laia exer tha mi min laktir zek chu lawm a har em a ni!

    Kawngchhuk kan va nawrchhuah phei chuan ani chu rang zetin a zuang lut a, a tlan thla ta vung vung a, kawngkawia a lan tawp thlengin keiin ka lo thlir liam a. ‘Heti reng rengte chuan len chhuah chi pawh a nih loh hi a... ti rilru chungin sikret ka tan kai a, nghakhlel vak lo takin ka lo nghak ran a. Sikret tlawn khat ka zuk zawh hnu pawh chuan a lo la lang ta lova, ‘A rei em mai, a zuk talbuai a ni ngei ngei ang, min tihah tawh bawk a, hawsan daih teh ang’ ka ti rilru a, hawsan mai ka duh tawh, mahse, ngawirenga han inhaw san daih ringawt chu ni theiin ka hre bawk si lo. Rilru khingbai taka ka nghah reng lai chuan a rawn lang ta hlawl a, a rawn tlan eng chho pap pap a, ka zawn a rawn thlen chuan nui sang chung hian, “Ka’rawh le..” a ti a, “A thi leh mai ang e..” hlauthawng hmel tak hian ka ti a. Ani lah chuan, “Teuh lo mai, a tha tawh lutuk” a ti a, “Ka nawr peih tawh miah lo a nia aw” ti chungin ka lut ta a. “Nawr a ngai dawn tawh lo hrim hrim, a hlui nangin a engine hi a la tha teh ania” tih pahin motor chu a han tichak lui deuh vak vak kher a, chhan pawh ka chhang peih lo, a thusawi chu hre lo ang maiin ka ngawi lui ve tlat a.

    BUAINA PAHNIHNA

    Kalkawnga kan tlan laklawh lai chuan, “Eee... sikret ka nei tawh miah lo, helai dawrah hian lei lawk ang, ding rawh” ka ti a, ani chuan, “Ngawi rawh, nakinah kan lei dawn nia” a ti mai a, a tlan tlang ta zel a, “Tinge i dih loh a?” tia ka’n zawh lah chuan, “Saw lai kha chu a zawl em mai, chhuk emaw chhoah emaw kan ding dawn nia” a tih takah chuan motor nawr ngaiah ka chuang a ni tih ka hrechhuak zawk. Tichuan, ka tlan zel a, Bawngkawn lam pana Chaltlang chhuk thlaah kan tlan thlak lai chuan motor chu a tiding chut a, ‘Helai chu dawr pawh a awm si lova, ka thianpa chu tinge a din le?’ tia ka rilrua ka lo inngaihtuah lai chuan, “Tihian, neutral-ah ka dah ang a, a brake hi lo rap rawh aw, mechanic te inah ka zuk kal lawk ang e” a ti a, “Awle” ka ti a. Kawngchhuk a nih avangin, fimkhur takin one two three kan chhiar rual a, three-ah chiah ani’n a ke a la sawn a, a ke a laksawn rual rual chuan ka zuk rap ve chat bawk a. Ka thutna lam atang chuan rah a rem vak lo nen ka zuk rap pial thelh thelh a, a tawlh hrut hman a, mahse, rem takin ka rap bet zui ve thei mai bawk a. A kal liam tur chu, “Rei suh aw.. a rem lo teh mai a nia, a rei chi loh ang” tiin ka au zui a.

    Reivklo hnuah chuan a rawn let ve leh mai a, kawngkhar a rawn hawng a, a rawn thu lut fel hman tawk tihah chuan engmah pawh ngaihtuah lovin (ka ke a kham hman deuh bawk a) ka thlah ringawt a, a ni lah chuan a la rawn rap fel hman bawk si lo, ka thlah rual chuan steering ka lo vawn pah chu ka lo kuai her tel hman chu niin, a tawlh hrut a, a ri nghal deuh bur a, kan hniam nghal sut zui bawk a. Rang zet hian kan dak chhuak nghal dun a, ka side lam kawngchhak luikawrah chuan a ke hma hi a lo tla der tawh mai a, a va han buaithlak thin em! A hma ang khan one two three lo chhiar rual hle hle ila tha tur a nia aw!

    Inthiam loh hmel tak hian, “I back chhuak thei ang em?” kan ti ringawt a, ani chu a nuih a za khawp mai a, “Start thei ila chuan back chhuak thei mai ang” a ti a, a nun thei loh avanga mechanic ina a kal chhung zawng motor ti thi lova a brake ka lo rah ngar ngar dan chu ka lo theihnghilh hman a ni. Kan chhuk dun a, ka mobile phone torch light chhawm ngei mai chuan ka han en kual vei pap pap a, luikawr chu a lo thuk phian lehnghal a, motor chu nung thei mahse, back chhuah theih a ni kher lo mai thei a ni. “Chawi chhuak mai ang” a ti a, kan sek dun lo ve ang reng si a, ka huphurh ru khawp mai a. Kan han chawi chhin a, a kang det det a, kan thlah palh leh hlauh a, a ai thuk zawkin a tla thla leh ta nghal a.

    One two three tiin kan han chawi leh dawn a, kan chawi kang leh ta det det, kan chawi chhuak thei tep tawh tihah chuan ka thianpa chu a rawn tang vawih pawp a, a vawih ring ang reng bawk si nen, kan nuih za lutuk chu kan thlah tawp a, a aia thukah chuan a tawlh lut thla leh ta! A awmna a thuk sawt em avang chuan kan pahnih chauh tan chuan chawi chhuah rual a ni ta lo. Ka hah tawh thinrim bawk si, nuihza bawk si chuan, “I vawih kher kher a nih kha, vawih hi i thlahdah ve hrim hrim” te ka’n tia, ani lah a nuih a la za ngang mai si a. A hnu deuhah chuan ka thianpa chu a inher vut a, “Hmmm... tih dan ka hria e” tih leh mechanic te in lama tlan thlak a rual a. Reilote hnuah rawn let lehin vai pathum hian an rawn zui chho diah diah a. Tichuan, vai pathumin min rawn puih takah chuan engtin tin emaw kan chawi chhuak thei ta hram a. Mizoram chhunga vai chunga ka lawm ber tum a la ni hial awm e.

    BUAINA PATHUMNA
    Tichuan, Bawngkawn chhuk thlaah chuan tluang takin motor pawh kan tinung thla thei a, Ramhlun lamah kan kual let a, kawngsira dawr lo inhawngah chuan coffee han in mai kan tum a, dawr awmna chu a zawl that em avangin motor a thih palh kan hlau a, kan in ngam ta lova. Muangchanga kan tlan lai chuan buaina pakhat kan nei leh tlat! Nula rim ve ngei kan duh a ni, nula rim tur kan hre lo pawh a ni chiah lo, hria pawh kan ni em em chuang lo. An hmel tha em tih lamah kan buai lo, a fel em tih lamah pawh kan buai chuang lo, kan buaina ber chu, ‘An in awmna a zawl nge a chhuk/chho ? Motor dahna tur running theihna a ni em?’ tih lamah daih a ni kan buai ni. Hetih lai hian kan thiannu leimin tuar tawhin, “Pasal neih dawn chuan a fel em tih leh hnathawh a nei em tih hmain an in hmun a awih em tih leh fur ruahtui tam laiin an in min mai thei chi a ni em tih en hmasak phawt tur” a tih te kha min hriatchhuah tir rum rum.

    “College Venga mi kha zuk rim ila..?” ka’n ti a, “Immmhhhpp... an in awmna a dik lo” tih pahin a phone contact list chu a hmet kal thla zut zut a, “Tuikhuahtlanga mi hi ka’n bia ang e” a ti a, mahse, a tlang thei lo tlat! A hmel hriat hmeichhe zinga len theihna tura a tihte list zinga pali zet chu a be tawh a, mahse, len a lo rem lo zel a, “Hei, damlo kan turin kan chhuak dawn chiah”, “Chumi kha mi chu kan ti dawn a, zan dangah lo leng mai ru” tih vel chhuanlam chi hrang hrang an lo siam zel takah chuan a beidawng ta a. A list a zawh hnu chuan ka phone ka phawr ve a, nula han lenna mai tur awm ang biak tur ka neih ve loh avangin ka contact list-a ka Ex te number ka la neih chu a indawtin ka hmetchhuak ta kauh kauh a. “Hmmm...Catherine number ka la nei e...” “A tlang thei miah lo, a number a thlak tawh a niang. Feli hi kan ti leh chhin ang e...mmmm... a ring e...trit trit..tirit...a pick up thei miah lo ka ti! Ka’n ti leh ang e...tirit...tirit...tirit....aaaaahh... Rosy hi ti leh chhin ang...” Tiang chuan Alphabetical order-in ka hmet thla zel a, ka ex hming a lo lan apiangin ka dial nghal zel bawk a. Amaherawh chu, vanduaithlak takin kan ti dawn nge vanneihthlak takin kan ti dawn zawk, tumah ka be tlang thei hauh lo mai! A then a tlang thei lova, a thenin an pick up thei lo thung a.

    “Aaaa... ka thianpa, zanin chu a bul kan tan fu lo em mai a, engmah a fuh thei lo zui a nih hi, i haw mai ang” ka ti a, ani chuan ka thusawi min pawmpui takin, “Ni e tiraw... tonight hi a tonight lo tlat” a tih lai chuan ka phone a rawn ri tang tang a, ka’en en chian chuan Rosy a lo ni a, “Hei Rosy ni tlats, lo tawng miah suh aw” tih pahin “Hallo” ka’n ti puam tawlh a. Ani nen chuan tha takin kan inbia a, “Kan rawn leng dawn” ka tih pawh chuan, “In duh phawt chuan lo leng ru, se, a nu leh a pa an awm a...” a rawn tih chuan engmah pawh ngaihtuah chiang lovin, “Ho lutuk, kan rawn kal nghal, min 10 hnu velah kan rawn thleng a ni mai, phawts bye..”

    Hemi zana kan nula rim tluka zahthlak leh hrehawm kan tawng dawn tih hre lawk ngat ila chuan a number ka dial hauh lo ang a, a nu leh a pain kan motor a nun theih loh avangin min nawr pui ngat ngat dawn a ni tih hre lawk bawk ila chuan pawisa chawi pawhin an in len loh ka thlang ngei ang le! Mahse, mihringte hian kan hmalam hun second khat pawh kan hre lawk si lo ale...

ROSY TE IN LAM PANIN
Chutia Rosy berin len phalna min pek takah chuan an in lam pan chuan Aizawl veng mawng lam chu kan pan ta a. An in panna kawng chu a zim deuh avangin motor kan tawk ang tih kan hlau hle mai a, mahse, vanneih thlak takin two wheeler pahnih bak kan tawk lo hlauh mai. Kalkawngah chuan ka thianpa hnenah Rosy nena kan intawn dante sawiin ka titi barh barh a, restaurant pakhata ka chetchhiat thu pawh zep hlek lovin tihian ka hrilh a.

Hemi tum hian Rosy nena kan nih tirh lai, inlak fel lai leh inlak zaidam vel lai stage a ni a. “I duh duh lam rawh, ka treat ang che” tiin restaurant changkang ve ang reng takah hian ka hruai lut ve ngei a. Menu ka pe a, ani chuan a en kual dan dan a, “Aaaa... duh bik pawh ka nei love, i duh duh ni mai” a tih takah chuan a man to ber pawl chu kan pahnih tan ka order ta a. “Awi ha, i inseng hnem lutuk ang e, a nuam lo” tih pahin min rawn melh no chu kei chuan tifuh inti takin, “A ho lutuk, sum lamah buaina tur a awm hlei nem, chubakah i tante chuan van sanga Chawngmawii leh Hrangchhuana pawh ka lawh sak hreh hlei nem che” ka’n ti vel a, a nui har har a, nuam kha ka va ti em! Eitur a rawn thlen chuan tui ti tak leh thlamuang takin kan ei dun a, kan titi dun siam siam a. Ka mitthlaah chuan romantic movie-a a changtunu leh a changtupaah ka lo inchan hman a, hero dik tak ni hian ka inhre ngawih ngawih mai a ni.

Kan ei zawh hnu chuan lassi no hnih ka’n lam belh leh a, minute 5 hnuah eng nge lo thleng dawn tih reng ka hre si lo. Bill a rawn thleng, Rosy chuan a lo en vat a, hawihhawm tak hian, “Khawi ka lo chawi then ve ang, i chawi hnem dawn em mai!” a ti a, “A ngai lo, ho lutuk, hei chu ka chan” tih pahin bill chu ka laksak a, Rs 480 chiah a lo ni a, ka rin ai chuan a lo sang deuh a. “Tikhan lo thu lawk rawh aw” tih pahin ka tho a, bill pekna counter lam chu ka pan phei ta a.

Inti tlangnel vel fahran hian counter lo nghaktu pa thau pui mai hnenah chuan, “In nei tui hle mai, rawn chawlh ziah tur a nih hi” ka’n ti phei lang lang a. Chutih rual chuan ka wallet zuk phawrh tumin ka kekawr hnung ipte chu ka zuk zen a, engmah a lo awm ta reng reng lo mai a.Ka’n indap tha leh a, wallet reng reng ka lo ak hauh lo mai! Ka ipte zawng zawng, ka kekawr ip hmalam pahnih, ka kawrhma, a vaiin ka indap kim hnu pawh chuan engmah ka hmu zo lo. ‘Ka thlauh nge maw ni le’ tiin ka thutna lam en turin ka va phei leh, ka thutna hnuai leh dawhkan hnuaiahte chuan ka va kun ta vak vak mai a. “Eng nge a? Thil i tibo ami?” Rosy chuan a lo ti vat vat a, eng nge ka zawn tih pawh hre ve chuang lovin a thutna atang chuan a tho a, a thutna hnuaite chu a bih kual ve thuak thuak a. Ka sawi hreh tawh bawk si, “Eng lo a nia” ka’n ti ringawt, ka mangang deuh aniang, ka thlan hi a sa phat phat mai a, a lum duh khawp mai. Chutia kan pahniha kan phe ta sung sung mai chu Restaurant-a chawl ve midangho chuan min lo en hrek hrek a, a zahthlakin a hrehawm duh kher mai!

A tawpah a sawi loh theih ta si lova, “Ka wallet ka tibo a...” zak ang reng takin ka ti chuai raih a, “A va pawi ve aw...” tih pahin min rawn melh a, “Khawi maw..” tih leh ka bill ken lai chu min laksak lawk a, counter nghaktu pathaua chu a pan phei a, ka lo en reng lai chuan kan pahnih ei man chu a pe ta vek a. Ka zak lutuk chu restaurant chhungah chuan bomb puak thut se, pul puk vek mai ila ka duh hial a ni! Movie-a a changtupa ka inchan ngawt mai kha tunah chuan misual pa pawh ni pha tawh lo hian ka inhria a, misual pa kid thi hmasa ber ka nih duh hmel ta zawk hle in ka hria, hero atangin zero-ah ka tla thla chiang ngei mai.

ROAD BLOCK
Chutiang ka sawi lai tak chuan ka thianpa chuan motor a tiding chut a, kan thleng tawh emaw ka lo ti hman a, “A va buaithlak e aw....” a tih takah chuan ka’n hawichhuak a, motor engah chuan kan hma chiahah hian vawk lian deuh deuh pathum lai mai hi an lo thlung a, pahnih chu kawng sirah hian an lo bawk a, pakhat ve thung chu kawng kham zawng tak mai hian a lo bawk thlur a, kan chil lui te a nih ngawt loh chuan kal ngaihna reng a awm lo.

Motor atang chuan ka chhuak a, kawngsira hnuh sawn tumin a bengah chuan ka’n pawt ngawt mai a, a lo lian nasa mai sia, ka tha tawpa ka pawh chiam hnu pawh chuan a nguk hruih hruih ringawt a, chetsawn zai reng a rel lo. Ka thianpa chu ka va pun a, ani chuan, “Engtin nge motor hi..??” a lo ti a, “Pawi lo, kan nawr leh mai dawn nia, pakhat tan chuan a ngaihna awm lo, a rit lutuk” ka ti a. Tichuan, motor chu a ti thi a, light engah chuan vawk chu kan pan phei dun leh ta a.

Vawk chu hnuhsawn tumin a beng vei lamah ka vuan a, ani’n a beng ding lamah, tichuan, kan hlapui ngei mai, ‘one two three’ sawi rual tumin kan insangphek dun ta a. Kan han inring dun phan phan a, chhak lam kawngsirah hnuh chhoh lawp tumin, ‘Oneeeeeee.... twoooooo... kan tih lai tak chuan vawk chu a rawn tho thut a, a hawk dawt dawt a, kan phu nasa dun bawk a, kan pahnih chuan duh loh paih ang maiin leh inthurual hmel takin kan per dun nawlh a, kan han tlanchhe leh rih a. Reiloteah vawk pawh chu a ngawi a, a ngaite bawkin kawngkham zawng chuan a bawk leh ta thlur mai a.

Chutih lai tak chuan ka phone a rawn ri a, ka’n en chuan Rosy a lo ni a, “Hallo, in va rawn thleng har tawh ve a...” lungawi lo aw tih hriat tak hian a rawn ti a, “Hei, in veng kan rawn thleng tawh, mahse, vawkin min dang a, kan buai raps!” ka tih chuan, “Pu Zonuna te vawk a nih dawn chu, inrinni zinga talh tur an thlung khawm thin tak alawm, rawn hmanhmawh ruuuu...” a ti zui a. “Hmanhmawh ringawt theih pawh a ni lo, vawk hi pawh sawn kan tum a, a rit lutuk a” kan tih chuan, “A bul lawka mi kha an in ania, ko chhuak ula ni mai lawm” a rawn tih chuan, “Awle.. awle” ka ti a, phone kan dah a. Vawk neitute in lam chu ka pan a, kawngka ka kik zui nghal a.

Kawngka an rawn hawn rual chuan vawk chu a ngek ta vak vak mai a, ka han lehhawi chho vat a, ka thianpa chuan thingfak hian vawk chu a lo hlap nghek nghek chu niin. Chutih lai tak chuan kawngka a rawn inhawng tawh tih leh a neitupa a rawn dak chhuak reng tawh tih pawh ka lo hre chang tawh lo va. “Khaih khaih khaih, tinge khatia i tiiiiiiiiihhhhhhhhhhh” tia rawn au deuh that that pahin pa lian zet hi in atang chuan a rawn tlan chhuak a. Inthiamlo hmel zet hian ka thianpa chu vawk bulah chuan a lo ding ngawi reng a, a thingfak ken chu hnunglamah a lo thukru tut tut a. Chu paliana chuan ka thianpa thingfak ken chu a chhuhsak lawk ang a, kan thianpa chu a hlap ve nek ang tih ka hlauh avangin ka han din hnaih ve thuai a. “Ka pu, min hrethiam teh, hei i vawk hi kawngpuiah a mu tlat a, kan motor a kal thei si lova, hnuh sawn kan tum a, kan hnuksawn zo bawk si lova, ka rawn pun tawp che a nih kha” ka’n ti vei zung zung a. “Motor dang chu an kal thei mai zel asin” a ti nuah nuah a, chhan let ka chak khawp mai a, ka ngam si lova. Vawk bengah chuan a vuan lawk a, awlsam takin kawngchhak sirah chuan a pawt chho lawp a. Chutih lai chuan ka rilruin, “Khawiah tu motor mah a kal hlek lovang, i vawk mawl zet hian a neitupa a chhun che nih hi” ka ti a, sawi ri chhuak ngam si lovin chupa chu ka rilruin a lo kawk ve sawk sawk a.

Vawk neitupa a luh hnu chuan motor lam chu kan pan dun a, a ngaite bawkin ka nawr leh ta a, mahse, vanneihthlak takin a engine a lo lum tawh bawk a, vawi khatnaah chuan a nung ve mai a, hmanhmawh takin ka zuang lut a, Rosy te in lam pan chuan kan tlan leh ta a.

COMEDIAN SEARCH VS DISCOVERY CHANNEL
An in kan thlen chuan an kawt zawl zau lai deuhah chuan motor chu kan han park tha ve thlap a, an inah chuan kan thian dun chuan kan inzui lut dun ta a. Sitting room lama a nu TV ena lo thu lam chu en pahin, “Khawnge i pa hi?” tia ka’n zawh chuan, kawmthlang dam lo kan tura a chhuah hman chiah thu a sawi a, zalen ta sawt hian ka inhria a. “Hei, ka thianpa hian motor a lei thar a, kan rawn lawm a nih hi” ka’n tih chuan ka thianpa chu a lo ner deuh nang nang a. A hnuah chuan motor kan nawr nun dan tel lovin vawkin min dan dan vel chu report kan pe a, kan nui ho dar dar a, kan hlim tlang ta phian a.

Chutia hlim taka kan titi ho dar dar lai chuan ka thianpa chuan sana a en vut vut a, haw a rawt dawn emaw ka tia, “E he... an tan daih tawh nih hi” a rawn tichhuak phawng a. “Eng maw...Comedian Search maw?” ka lo ti a. Rosy chuan, “In en duh em?” tih pahin sitting room lama a nu TV en lai chu , “Ka nu, LPS 1 kha han ti lawk teh” a va ti a. A nu chuan a hmetchhuak ve mai bawk a, “Saw pa saw lawm nuihzatthlak chuuu...” tih pahin ka thianpa chu a tho vut a, TV lam chu a pan phei ta nulh a. “Kan phei ve dawn em?” Rosy chuan a ti a, “Helai atang pawh hian a hmuh theih vek tho alawm” ka ti a, a fala titi pui ka duh avangin ka thianpa phei pawh chu ka lo lawm ru hle a.

Chutia kan pahnih chauha kan awm dun takah chuan intizei fahran hian a kut hum ka’n tum a, a lo duh hauh lo mai a. Vawn luih ka tum a, a duh si lo, min ti tlawmngai laklawh a, mipa tha nen ka tan meuh chuan ka vuan lui thei ta a. Ka hum tan chauh tihah chuan kawngkhar a rawn ri rak a, kan phu dun zuk a, a kut ka vawn lai chu ka thlah rang kher mai! A pa chu a rawn lut dan dan a, ka thu ngil nghal at a, ka tawlh hla hret bawk a. Sitting room-ah a phei tlang nghal a, ka thaw veng huai mai.

“I pa hi chu deadly ve ngawt mai” ka tih chuan, ani chuan, “An ti ve ziah, a tak takah chuan a nelawm lutuk, a tawngtam vak lo ve hrim hrim ringawt alawm” a ti a. Reilote hnuah chuan ka thianpa nui uarh uarh pawh chu a reh ta daih a, ‘Tinge mawn le...!’ tia ka va hawi phei nak chuan Comedian Search an lo en tawh awzawng lo mai, ramsa hlir a lo lang tawh a, a pa lo haw khan Discovery Channel a en sak daih a ni ngei ang. Ka thianpa hmelah chuan a tui lo hle a ni tih ka va hmu thiam mai, ka khawngaih ru khawp mai a, mahse, pa berin Comedian Search aiin zawng ban kual lai a hmuh chak zawk miau si chuan Discovery Channel an en mai loh nakah!

Ka thianpa chuan nuam a ti ta mang lo a niang, kan awmna lamah chuan a rawn phei a, haw a rawt nghal ta chuk chuk a. Kei chuan thingpui in phawt ka duh a, a pain channel a rawn thlak sak avang khan a lawm lo ve deuh a niang, haw a rawt lui tlat bawk si a, Rosy chu la kawm ka duh teh lul nen, ka ngei ang reng khawp mai a. Ka rilru chuan, ‘A pa vang vet... mi TV en tui lai laia... polite loh reuh hle mai’ a ti a, ka thianpa chu ka vui pui ru khawp mai a, kan la haw hma phah zui dawn lehnghal, a pa chungah chuan ka lawm lo ru tak zet a ni.

THLAH KAN NGAI LO
Kan haw tur chu kawngka thleng min rawn thlah a, a lut ve leh nghal mai dawn emaw ka tih lai chuan ka hlauh ang ngei ngeiin kawngkhar bulah chuan a ding ta reng a. “Lut rawh, hei kan kal nghal a ni mai” ka’n tih pawh chuan Ka lo en liam ang che u” a ti tlat mai si a. Ka rilru tete chuan, ‘Chu chu alawm ka hlauh ber’ ka ti a, mahse, a hriatah chuan, “A ngai hlei nem, lut rawh, i pa ngaihdan a ni lo ang te” ka’n ti kual kawi vel a. zan dang chu ni se, kan kal liam hma chu min thlir reng se ka ti ngawt ang, mahse zanin chu motor lei thar ka nawr lai min hmuh ka hlau em a ni. Tichuan, keiin lut turin ka nawr ngat ngat a, ani’n “Ka en liam dawn che u” tiin a tang ve tlat bawk si, ka thianpa lah motorah a thu kuk tawh a, ka mang a ang ru tawh kher mai. A tawp a tawpah chuan thlem ti tih, vau ti tih, ngen ti tih, hau ti tih, tap ti tih leh hnek ti tih deuhin ka nawr lut lui thei ta hram a ni.

A lut fel ta maw tihah chuan rang fahranin ka thianpa lo thut kur tawhna motor lam chu ka pan a, nawrh rawh tia hrilh chawp ka ngai tawh lo. Min lo hmu reng ang tih hlau taka an kawngkhar lam melh zak zak chung chuan ka nawr leh ta tang tang a. Engine a lo vawh rei tawh avangin a nung thei mai si lova, Rosy te kawt pheiah chuan hma zawngte hnung zawngten ka nawr tawn chhen a, a nun teuh berah pawh a ri dut a, a thi leh zel a. Ka hah tawh ang reng sia, driver seat-a inthutchhawk mai hi ka duh hman tawh a. Rosy te kawt zawn taka a chak thei ang bera ka nawr lai chuan an kawngkhar chu a rawn ri rak a, ka motor nawr lai chu ka thlah vat a, ka lai deuh nge ni, ka ding ve ringawt a. ‘Va hit lo eee... Rosy chuuuuhh...’ tiin ka lo ngaihtuah hman a, mahse, vanneihthlak lutuk tak maiin a pa a lo ni hlauh.

MISUAL PA KHA MIFEL PA
A pa chuan min rawn hmu chu, “E khai, in chhia elo, puih in ngai mi/ tih leh min rawn pan a rual a. “Aih ngai lo ve...” ka ti hman tawk, “Hengte chu ka Jeep neih laiin kan ti fo alawm, karawh, ka nawr pui ang che u, a nung vat mai ang” a ti a, motor lam a pan phei a, keiin ngawi rengin ka um zui vat a. Zah sawina hman pawh a ni lo, kan pahnih chuan motor chu kan nawr dun ta a, zia lo ti hle mahila, a ziain a daih seng tawh lo a ni e. Ani a rawn tel takah chuan thawm kan dim lo sawt khawp mai a, ‘Tunah heti zawng hian nawr leh ang aw... hma lam atang ve thung aw... tunah hnung lam atangin le...’ tiin a au ta leng leng mai si a. Chutia Rosy pa nena kan nawr kual tawn sek hnuah chuan engtin tin emaw a nung ve ta hluah mai a, ka lawm lutuk chuan engmah pawh ngaihtuah lovin Rosy pa chu ka’n kuah ringawt a, ka thlah leh rang teh asin. Mahse, kei aiin a a lawm tawh zawkin ka hria, a cho ang ngawt kha chu a ni lo deuh a niang, a hah chu a thaw ve hlai hlaiin ka hria.

Motora ka lut tur chiah chu an kawngkhar verandah-ah chuan Rosy leh a nu hian min lo thlir reng chu niin, engtik atang khan nge min lo thlir tawh ang aw..., a pa au ri velah khan an rawn chhuak a ni ngei ngei ang...a pa nena motor kan nawr chiam lai khan ngawi rengin min lo thlir reng tawh a ni ngei ang. Nui za hmel deuh hian, “Mangtha u awww...” Rosy chuan a rawn ti a, “Mangtha u le..” tih pahin ban kan vai a, ka zak lo lui der ve tawh a, anni chhungkua pawh chuan ban an rawn vai ve sap sap a. Kawngkawi kan tlan liam chiah chu ka zak lutuk hi ka ip vak vak hian ka inhria, hmeichhia ang maiin ka thianpa nen chuan kan insik nawk nawk a. “Rosy chuan min thlah liam lo tura ka duh zia kha a hrethiam tawh ngei ang” ka ti a, kan nui dun nghek nghek a.

Che chhe dun viau e ti lo chuan kan haw kawngah chuan kan hlim dun ta phian a, TV channel a rawn thlak laia kan ngei zia leh motor min rawn nawr pui hrep hnua a chunga kan lawm leh si zia te kan sawi dun bawrh bawrh lai chuan tluang takin in kan thleng ta a. In kan thlen hnu chuan ka rilru tete in, “Chet chhiat viau pawh hi a hnuah a hlimawm ve tho mai, zahthlak viau mahse, lu a chhum em nem maw... tluang takin in kan thleng leh thei a, a lawmawm tho e. Sapho pawhin ‘All is well, that ends well’ an tih kha maw...” ka ti a, tui takin ka muhil zui ta a.

(A ngaihnawm nuihzatthlak lutuk a, fb a mi paste leh tawp a nih hi)