SHERLOCK HOLMES A THI THEILO

Author: Familia Fanai Laltansanga

Sir Arthur Conan Doyle chuan 1893 kum khan Sherlock Holmes chu Switzerland ram Reichenbach kham tuikhawhthla-aha tlakhlumtir ringawt mai a, Sherlockians ho khan an lo pawm thei reng reng lo mai a, titi-a an sawi dan phei chuan Sherlock Holmes thawnthu serial-a an tihchhuahna Strand chanchinbu chu mi 20,000-in an lak loh phah a, London khawlaiah thalai rual thenkhatin silk puan dum them an lukhum leh an kawr ban-a bel chungin Sherlock Holmes thihtir duh loh kawng an zawh hial niin an sawi a. America ramah phei chuan Sherlock Holmes tihnunleh duh leh pawl “Let’s Keep Holmes Alive” club an din hial niin an sawi bawk.

Khatih hun lai khan fans tih tawngkam hi a la chhuak lo va, tun hnaiah fanatics tih atangin fans tih tawngkam hi chherchhuah a lo ni ta a, thuziakmi emaw, zaithiam emaw atchilhtute,ngaisang em em tute sawi nan fans tih hi a rawn piangchhuak ta a, tunlai tawng hmangin han sawi dawn ta ila, Sherlock Holmes fans te khan a ziaktu hi a changtupa a tithi hma lutuk kha an pawmzam thei lo va, a ziaktu chu lemchana misualpa villains angin an ngai ta hlauh zawk a, a ziaktu lah chuan , ka ziaka ka ziak zo tawh a ti then mai bawk si!

Sir Arthur Conan Doyle hian Sherlock Holmes thawnthu phuahchawp a lo ziak kher kher hi a inchhir hle niin an sawi bawk a ni. Thu tak pai novel ziak hi a duh em em laiin thil lawi lo-vah a hun a seng hnem lutuk niin a inhria a ni. A lemziaktu, illustrator Sidney Paget lah khan Sherlock Holmes lem kha a lo ziak fuh lutuk leh zel bawk nen he thawnthu chhiar laklawh tawh hi chuan chhiar zel an chak a, Sherlock Holme hawiher vel leh a han tawng dan tur vel hi a chhiartute mitthla-ah fiah lutuk tak mai, slow mition ang hian a lang chiang tawh thin si a ni.

Sherlock Holmes a tihthih lai hian a ziaktu hi kum 34 val chauh a la ni a, thawnthu phuahchawp mai mai ziak aiin thu leh hla pangngai, ram leh hnam tana hlu, political statement leh idea telna ziak thei Sir Walter Scot te ang thuziakmi nih a tum a, mahse Sherlock Holmes fans te nawrna a nasat tak em avangin 1901 kum khan a la thihtir hma thawnthu The Hound of the Baskervilles a ziak chhunzawm leh a, a hlawhtlin leh em avangin “Anything can happen in cartoons and fictions” an tih ang deuhvin a ziaktu Sir Arthur Conan Doyle chuan 1903 kum khan Sherlock Holmes chu thi emaw an tih kha a lo thi lo ti lam hawi khan The Adventure of the Empty House a rawn ziak leh ta a, Sherlock Holmes fans te chuan, “ Khawvel lawm nan a lo kal a” tih hla kha sak nawn tlut tlut an duh ta hial a, an lawm a kim a ni ber ang chu!

Sherlock Holmes thawnthu hmasa ber A Study in Scarlet kha 1887 kum khan tihchhuah tan a ni a, a tir phat a tangin a hlawhtling nghal var a, a hnu lama Sherlock Holmes short story series tihchhuahna The Strand chhuah ni phei chuan mi hi an intlar thui thei nasa mai a, historian pakhat phei chuan a ziaktu Conan Doyle chu khatih hun lai Kumpinu vanglai, khawvel ni tla seng lova roreltu Lalnu Victoria aiin a lar lo bik lo ve, a ti hial a ni.

Thu leh hla that leh that loh tehkhawng, criteria tha ber leh rintlak ber chu hun ( time) hi a ni an lo timathlawn lovin Sherlock Holmes hi chuan tehna rintlak ber hun tehkhawng pawhin thu leh hla tha a tling chiang hle a ni.

Sherlock Holmes thawnthute hi kum 100 aiin an upa tawh a, khawvel hian a la ngaina em em a, film leh TV serial angin an la siam zel a, Japan tawng te, Chinese tawngte leh Korea tawngte pawhin naupang ngaihnawm tih zawngte pawhin an la siam danglam reng a, Computer game-ah te an siam bawk a, Sherlock Holmes hian fam dai rial a chang thei lo va ,Rih sang mual a liam thei na hek lo.

Mak ve mai mai chu Chinese tawng chuan Sherlock Holmes hi Curly Fu an ti a, Kawl tawng chuan Sungţhauh Sansia an ti! Daih mai a!

Sir Arthur Ignatius Conan Doyle KStJ, DL (22 May 1859 – 7 July 1930) Scottish thuziakmi , damdawi lam thiama kutchhuak leh sulhnute;

Novels

• A Study in Scarlet (published 1887 in Beeton’s Christmas Annual)
• The Sign of the Four (published 1890 in Lippincott’s Monthly Magazine)
• The Hound of the Baskervilles (serialised 1901–1902 in The Strand)
• The Valley of Fear (serialised 1914–1915 in The Strand)

Short story collections
A tira thawnthu tawi anga a ziak magazines-a an tichhuah, a hnu-a lehkhabua an siam tak te; 
• The Adventures of Sherlock Holmes (stories published 1891–1892 in The Strand)
• The Memoirs of Sherlock Holmes (stories published 1892–1893 in The Strand as further episodes of the Adventures)
• The Return of Sherlock Holmes (stories published 1903–1904 in The Strand)
• His Last Bow: Some Later Reminiscences of Sherlock Holmes (stories published 1908–1917)
• The Case-Book of Sherlock Holmes (stories published 1921–1927)