'KA PA' TIH NAN Rs 600

‘KA PA’ TIA KOH NAN NI KHATAH CHENG 600
April 2, 2018
Mambawihi Mizo

‘Ka pa’ tia koh nan ni khatah cheng 600

Veng pakhata Ko Țun leh Ma Kyi Pya-te nupa tuak chuan fa pathum an nei a. Pa ber Ko Țun hi zu bawihah tangin, a nunah ‘Zu’tih loh chu ngaihtuah dang reng a nei lo. A nupui fanaute pawh a ngaihsak tawh lo.

A rilrua awm chhun chu a nupui hnen ațanga zu man atan zingah 200, chhunah 200, tlaiah 200 zel a dawn tur bak a ni tawh lo. Ma Kyi Pya erawh chhungkaw hruaitu ber dinhmuna a din a lo ngai ta, ei leh in tur, fate pathum school fee leh pa ber zu man tur thawh chhuah ngai reng rengin nitin a thawh chhuah a ngai ta a.

Chutiang em em chu Ma Kyi Pya-i chhungte pawhin ni thei an ti seng bik tawh lo. Ti chuan, 'Heti ang êm êm hian i tan mipa an vâng em ni, i pasal hi i hmangaih viau em ni, zahna chhe tê tal pawh i nei ve miah lo em ni, i chhung leh kua tê pawh min timualpho zozai lutuk ta,' tiin an zilh ta hrep a.

“Ani a awm pawhin i thawk tho a,awm lo pawh ni se i thawk dawn tho a, hetiang khawpa tlaktlai lo hi eng vanga a kut thak tuar reng chunga a zu man tur la thawk fan nge maw i nih le? I țhen mai dawn lo vem ni.”

Ma Kyi Pya-i chuan ngawi rengin a ngaithla a, …..Ti chuan, “Ka ni, ka u leh nau, ka nu leh pate u, Ko Tun-a hi ka țhen thei lo a ni. Ka tan mipa dang an vang a, ani hi ka hmangaih êm vanga hreawm tam tak tuara ani bula awm reng hi ka ni lo.

Ka fate pathum hian, mi fate nen inang renga an neih ‘ka pa’ tia koh theihna, mi faten inang khata ‘ka pa’ an tih huna ‘eih’ tia lo chhawn turin, ani hi ka fate tan ‘ka pa’ an tih man ka pe a ni.

Ka la naupang a, pasal dang nei leh thei ka ni tih pawh ka hria e. Mahse, ka faten anmahni hringtu ni lo ‘ka pa’ tia an koh hi ka phal thei lo a ni. Ko Țun-a hi a zu man ka pe a ni lo. Ka faten ‘ka pa’ an tih man ka pe zawk a ni.

A chhungte tan sawi tur a vang ta hle. Ma Kyi Pya hi a tidik nge tidik lo?

(Khawngaihin zalen takin in ngaih dan min han hrilh ve ula.)