RALTE CHANCHIN
Mizo Chanchin Ka Khawn Khawmte Leh Ka Vei Zawngte
Saturday, 10 March 2012
Ralte Chanchin
Ralteho hmunpui ber chu Saihmun a ni. A kiang velah a chi chiin an awm hrang bawk. Suai tlang hnuaia awm an nih avangin ‘Suaihnuai khua’ an ti thin a. Suai chu khaw hmun a ni lo va, Saihmun khaw lu tlang a ni a: Raltehovin khawtlang sakhua atan an bia.
Ralte chu: ‘Kawlni; Siakeng, Khelte, Lelchhun’ tiin hnam siper paliah an inthen a. Kawlphai atangin Thangtlangah, Thanghemah, Dimpuiah, Dimlovah, Runah, Sukluiah; chuta tangin Saihmun an pan ta niin a rinawm; Nau thawina chi khat ‘Luilam’ an tih thiam hlaah a chuanga hmun leh khuate hi a indawt thliahin an chham thin, He luilam thawina hi Seifaten Ralte hnen atangin an la chhuak a ni an ti.
Ralte zinga an lal hming kan hriatte chu: Siakeng zingah Haizanga leh Chawngtuala an ni. Khelte zingah Lutmanga, Kawlni zingah Chalbawka te an ni. Lutmanga chu Lersia hlain ‘Lutmuala’ a tih nen thuhmun a nih a rinawm.
Kawlni leh Siakeng chu sachhiah inpek duh loh thu-ah an buai a, buaina a so sang zel a, indo an rawt ta a ni. An pasaltha ve ve inbei turin an rawt thlu a. Siakeng pasaltha chu Suangsapuia (Sawsapuia) a ni a, Kawlni pasaltha Darbunga a ni. Darbunga chuan Suangsapuia a hneh a, a that ta a. Kawlniin hnehna an chang a, Siakeng an tlawm ta a ni. Siakengho chuan an tlawmla hla a, Kawlni do leh an tum a; an pasaltha chhuantawlawl a thih tawh avangin hneh theih an inring lo va, Thlanrawn lal Chawnglula(Pawi) chu tanpuitu atan an sawm a. chawnglula leh a mite chuan Saihmun khua Kawlniho run turin an thawk a, Kawlniho chuan an lo hriat lawk avangin an lo chang a; Thlanrawnho chu an that nghek mai a, Chawnglula pawh an man a, meipek silai pakhat an lak sak bawk. Chawnglula chu kawl bunin kum rei tak a tanga, phiang (behliang) kum, kum thum a hmu an ti thin. Kum khu chhung a tang tihna a ni ang. Kawlniho chuan hla an phuah a:
1. Pawiho cha cha hawng tawk e, Kawlni runin;
Ka suaipui leh ka Langmual a nuam o ve.
2. Ka Suaipui leh ka Langmual a nuam o ve.
Hnahsing hnuaiah sakruang pal sing ang ka tian.
3. Hnahsing hnuaiah sakruang pal sing ang ka tian,
An thlung lu leh Kawrsilai tui ang kan lak.
Hla thu chu: ‘Kawl ni run turin Pawihlo an lo thawk a, kan biak Suaipui leh Langmualin an lo awih ta lo a ni. An ruang chu pal thing angin thing hnuaiah kan tiangkhawm a, an lu leh silai kan lak sak’ tihna a ni. Siakeng lal Chawngtuala runthlak tihzawng turin hla an phuah leh a:
‘Hawn ngai ve hawn ngai ve aw, Chawngtual pa’n,
Chawnglul chawnbanah ka kaih; hawn ngai ve aw,
Thlanrawnho chuan Chawnglula tlan turin thi leh dar an keng a, Kawlniho chuan tlan an lo phal lo va, An tlan theih loh turin tlanna atan: Chaite ngho chhuak pakhat, Lianger(ainawn) sutpui ban tiat pakhat, Saihrem hlam thuma sei pakhata tlan tuin an lo ngiat a. Lianger leh saihrem chu an hmu thei a, chaite ngochhuak chu an hmuh theih loh avangin, an tlan thei ta lo a ni. Ni khat chu Chawnglula sal Hrangtovan a pu a han kan a, Chu mi ni chuan Kawlni lal chhungkua chu chawng zu chhimin an kal bo vek a. An awm loh lai denchenin Hrangtovan a pu a paw chhuak a, daiah kawl chu a chek chhe ta a ni. Chawnglula chu a kawl bunna a rei tawh lutuk avangin a kal hlei thei lo va, Hualngo khua Chawngtui an pan ta a ni. Hetih lai hian Hriangngai (Heilei)-ah Chawngmura (Lalvunga pa) a lal a, Chawngtuiah a fapa Mangpuma a lal. Chawngtui chu tunah khua a ding tawh lo va, Hriangngai leh Suangphei inkarah a awm.
Chawnglula chu a dam deuh hnuin Hriangngai leh Chawngtui tlangvalin an thlah a; ram palailengah kawng an zawng chawp a, ‘Lensawm’ an tih Lentlang tui awmnaah an riak a, chu tui chu tun thlengin ‘Chawnglul tui’ an vuah hlen ta a ni. Chawnglula chu a lawm em em a, a thlahtu zinga an hotu Mangpuma fapa Chawngbura chu Mangkhengah veng a pe a, a thlahte tun thlengin an awm hlen nghe nghe a ni an ti.
Chawnglula an lo tanpui avangin Kawlniho chu Hualngo chungah an lawm lo va, an inhmu thiam lo sawt hle a, Siakengin Hualngo an sawm a, Kawlni an rwak ta a ni. Kawlnihovin Chawngtula darbu an lo kal sak tawh chu an la chhuak a, Hualngovin an nei ta a, ‘Chawngtual dar’ tiin hming an vuah hlen. He darbu hi Seipui lal hnenah a la awm. Darlianpuia fanu Sampuiin a pasal Zahuata hnena a chhawm a ni. Darlianpuia chu Chawngtui lal Mangpuma fa a ni.
Chawnglula chuan phuba la tuin a hote nen Kawlni an run leh a. Kawlni chuan an hneh tawh hnu a nih avangin an Nuthur zuam a. “Kulh chhungah lut tam hrih rawh se, thah tur kan inchan lo palh ang e,” tiin an zuah reng lawk a. Pawi ho chu kulh chhungah an lut teuh mai a; hriamhrei tha an lo nei tawh bawk a. An inbeih meuh chuan Pawihovin an that ta teuh mai a. Kawlni pasaltha pawh an hliam a, Kawlni an tlawm ta a ni.
Chutichuan, Kawlniho chuan Saihmun an tlansan a, Khawzimah khua an va din ta a. Ralte dang pawh Lenchau (Inbuk)-ah an insawn bawk. Khawzima an awm hnuin an ropui leh hle a ni. Chawhte khua an rawk a, darbu an lak sak. Tin, hnam dang kuta darbu hming thang- Siallam dar, Selbung dar, Tuaichawng leh Liando dar chenin Khawzim Ralte kutah a lut niin an sawi. Heng darbu hi indo hneh avanga lak ni lovin, sum leh paia an lei niin an sawi. An hausain, chawnlam leh sa leh ralah pawh an tha a; hla pawh an phuah teuh a ni. An lal chu Zathawnga a ni a, ‘Luathanga’ ti an awm bawk. An hla thenkhatte chu:
1. Ka hlau o, ka hlau o ve, ka hlau ngai o.
Chawte dai sung lut ta hnu ka hlau ngai o.
2. Zim khawpui phek banga pha Van lai enruai,
A lai taka zua thawng aw, mual bang tungnung,
3. Luiah limngha nawh ni’n e, Zim khawpui laiah,
Hnampui than nan zuksialin ai han zawng hen!
4. Hmar tlang ar ang that leng e, Zim khaw laiah;
Dimno puan bang kawi leng e, tual len bang na.
Hla No.2-na hi Tiau luia sangha rua an vuaknaah sazuk tlaw(sa seh) an chhar a, an lalin a phuah a ni an ti. Ralteho thlang tlak hun chu AD.1770-80 vel a ni ang. Khawzim khuaa an awm lai hian Hualngo lal Lalvunga chu, Khawzim atanga hla vak lo - Farzawlah ropui tain a lal a, Lalvunga an huphurh avangin Ralteho chuan Champhaia Lawitlang Hrangchalho run darhin Tiau ral an kai a ni. An hla phuah chu:
1. Ka han sat ka hang sat a, Champhai a lang,
Cherthlang chit le Laimi thah tual len pui leng.
2. Zimkhaw kamkei phat laiah i ka ngai o,
Leido thlunglu awnsingah kawlngo leng bang.
Champhai an thlen hnua an hla phuah chu:
3. Kiautui kuam le Inbukin mang ni nei o,
Phung in sawt dil del tang e; kitehna ding.
Champhaia an awm hnuin Zopui khuaa awm Lallula (Sailo) chuan Tiau chhak Lenchauva Ralte ho a run darh zo va, Lallula leh Zadengho tangrualin Champhai Ralteho an bei leh a, a chunga sawi tak darbut leh thil tha dang chu Lallula kutah a thleng leh vek niin an sawi.
Tiau chhaka Ralte lal hnuhnung ber chu Singkiauva a ni. Darkhai khuah a lal a; an khua In 20 an tlin loh chuan a lalna ban turin Sorkarin thu a pe a, In 20 an tlin theih tak loh avangin Falam D.C, Lt. Col.Burne-an ni 10.1.1909-ah lal banna thu a pe. A khuaah chuan Chawngthangvunga (Hualngo) a lal zui ta a ni.
Comments