INBAWLNA ROPUI

Cp

IN BAWLNA ROPUI 

After 10 years

“Hello’ Thianpa, I dam maw”

 “ Aw dam a lawm tunge aw”

“ I Thianpa Rza( Rza ti mai ang,a tul dan a zirin a hming tak pawh ka sawi  hreh lo)ka nia, hei kan inneih kum 10na champhaphak a nia, I va ngaihawm ve..i la thinrim reng a mi..he he..”

“ A ni maw, va ngaihawm ve, thinrim lo e, in va lawmpuiawmin nikhua a lo va rei ta ve aw”

Hetiang hian April ni 18th khan kan in be lumlam nual a,he ka thianpa Rza Lawngtlai District khaw pakhat ( a hming chu  sawi rih lo ang…ka inziah thinrim viau chuan ka sawi tho  mai thei) a piang a, sei lian a, tun theng a la khawsa zui tan en nen hian  kum 10 liamta a an inneih hmang a an khua ka kal zo telephone a kan inbiak bak kha a chanchin thiante ka atang a ka hriat bak chu kan in be leh ta miah lo a. Engvang a inbe ta lo vang vang nge kan nih tih a chinchhuakin sawi i han tum teh ang.

Hostel Awmtu

Kum 2001- 2003 chhung khan Aizawlah lehkha kan zir ho a, Kan thutna class erawh a in ang chiah lo nachungin hostel khatah kan khawsa ho vek a, Zing leh tlaiah chaw kan kil ho a, zanah kan inkawm a, class lak lai tihloh chu kan inzui chawt hi a ni ber e. Kan hostel hi mipa hlang thiau awmna hostel a ni a, mipa hlang awm tih takah han rik deuh hluai chang te hi kan nei a,kan ti ti te hi a phawk phaw hraw viau zel thin. Hostel tamtakah chuan hmeichhia leh mipa te hi an khawsak ho vek avangin inngaizawng kher mah suh se an inhlim chhuah a,tudang mah awt lutuk lo hian an khawsa ho dial dial a, keini hostel kha zawng mipa hlang chauh awm tih takah mit rawpte kha a na thin a niang, Sunday zing sahmeh zawh hlim te kha chuan thenawmte bualin bathlar a fenhnuai pho te kha en ngawih ngawih tawk te kha kan awm a,Post graduate zirlai ,engkim hre vek nite khan kan in hria a, MCS ai a IAS thlan nahawm zawk zia te,Kan Politician te kan duhkhawp tawk loh zia te kha kan sep raw tui thin teh a sin.

Kan Hostel hi chaltlangah a awm a, Girl Hostel Laipuitlangah a awm thung. Building khatah khawsa ho lo mah I la, kan inlen pawh tawn reng a. He Girl hostelah hian kan thianpa Rza hian hmel duh ve deuh mai chhimlam mi tho a nei a.Rza hi an khaw retailer, VCP nibawk fapa sa tha sang, sek lam deuh a ni a,Mahse a hmel hi chu chu hmeichhe  duhzawng chi a ni tlat lo nge ni a chawlhni kawr nen a an len ve pawh hian hmasawnna a awm tlat thin lo . Zanah hian engtia hmalak tur nge tih kan sawi khawm thin. A ni lahin tih vak ngaihna hre bik si lo , a mangang hian a chang chuan “ inngaizawng enin min en char char u la, mihring hi a indem ngaihzawn theih a nia” te a han ti leh ngawt thin a. Girl hostel lam a kan thiante zawng zawng chu, chu thu chu kan hrilh pawh chuan hmasawnna hmuh tur a awm thei lo.Kan Thianpa Thara ruahmanna kha a puitling ta lo! A ruahman dan chuan Libraryah a lehkha bu hawh i chang ang a, lehkhabu a pawm bawr luk lai ti palh ang deuh a nek tlak darh sak tur,chuan rang takin char pui a, lehkhabu darh chharkhawm pek lai tak a nula mitah tak en tur a ni. Mahse hei pawh hi tihhlawhtlin a ni ta chuang lo.

Ar talh dan Chi dang

Tum khat chu Girls hosteler leh Boys Hosteler te kham rangah picnic kan nei dawn a, chumi kan picnic hma zan chuan ruahmanna hautak lutuk mai kan nei ta..Chu kan ruahmanna chu Drama a ang thei ang ber leh confidential thei ang ber a buatsaih a ni. Kan ruahman dan chuan Kan Thianpa Rza chhailai nula chu hmunfal  deuh hlekah pakhatin kal fal pui tur a ni. A kal falpui turin tlem a kutram hmel deuh palian deuh ni se, chumi a tan chuan Thianpa Thara a that ber kan ring a,chuan a sual der ang a, chu  a sual lai der hmeichhe thlabar laitak chu kan thianpa Rza’n a rawn chhanchhuak ang.chu chu ruahmanna kan siam dan chu a ni. Hetiang a ruahmanna a kaltluan chuan tlaiah chaw kan ei ho tlan kha a rem dawn chiah lo a, zanah Hercules rum um khat ka chawi ang tiin ka intiam a. A tukah chuan picnic tur chuan kan chhuak ta a.

Zing dar kua a chhuak e ti lo chuan kan motor hman Tlawng lui bul ah chhia a, dar kar hnih zet kan siam hnuah kan Picnic na hmun chu kan thleng ta a,Kan nula rim mek pawh chu a hlim har har khawp mai. Ruahman ang chuan thianpa Thara chuan eng tin tin emaw Camera nen an kal fal pui thei ta a, Rza’n an hmuh phak loh deuhah Air gun nen sava pel pahin a zui ru a, a tawizawngin drama chu a fuh ta…Rza chuan a va chhanchhuak ngei a, mahse pa sa tha tih takah a kutthlak a na deuh a niang, Thara a rawn duk chur a,, mahse nula lakah ngaih dam dil leh keini pawhin dilpui a ngai tlat. Dressing room phenah Rza Bialnu( a hming Lindai ti mai ang) chu a thiannu nen, Rza nen chuan an thu a , a tap feih feih leh nghal a,Rza a darah a bei a,..aw.. ngaih a tha tawh e…eng tin tin emaw ni zanriah pawh chu kan tling tla a, khua a thim deuh chhilhchhelh tihah Bus chuan Hostel lam pan chuan kan haw a, Bus-ah pawh chuan an thu dun a, Rza a chuan a kuah a, Light an off a,  Rza’n a sawileh danin “kha mi bus chhung kha a lu sa ka tem hmasakna ber a ni” a ti.

Thianpa Thara erawh duh aiin Rzan a lo khawih sil deuh a niang, Hostel kan thlen pawh chuan a lakal bai sawih sawih a, Lindai leh a thian ta zawng zawng ngei rawn a hlawh a,a mit a vung bur bawk a,kawng lehlamah chuan kan thianpa Rza tan a inpekna hi thiante tan chuan inpekna vawrtawp niin ka hria. Zanah hmangaihna vang a tuar nasa ber tiin Hercules bur ka  phawrh chu ka han thlit a, “ Kha le,, huai no i dawm hmasak ber angai” tiin chhah zetin ka han thlit a… a hnu darkar chanve a liam meuh meuh chuan rilru hah,hmeichhe huat tih vel mai mai kan pawisa tawh lo. Kan ruahhmanna a hlawh tling a, khatiang ruahmanna  rorum, bumro leh hautak a hlawhtlin a vang khan kan lawm em em a,..khai aw a lawm nan cheers….,

Inneih dar ri

 Hmangaihna lo pian dan hi a mak ngawt mai..Thenkhat chu vawi khat inmelh avangte, kumpui linglet nipui nisensa leh fur ruahsur hnuai a sadai ek hampherh a hlothawh ho avangte, inneihna hmun a kal ho avangte, Pathian rawngbawl ho avangte leh thildang tam tak avangin hmangaihna a lo piangin a kuh mum a,  chung hmangaihna zawng zawng te chuan par an chhuah vek lem lo, thenkhat chuan par a chhuah hmain a kuh mumah a vuai leh mai thin. Mahse he Drama chan a vang a hmangaihna lo piang hi a ropui dangdai riau, April ni 19, 2003 khan Biak In dar khawng riin nupa pumkhatah a loin siamtir phah ta nghe nghe a ni

He an inneihna hi Kan zirlai kan zir chhuahhnu a ni tawh a,  Hosteler ho pawh ‘nang i hmunah, kei ka hmunah’ tiin kan inthen darh vek tawh a, Hostel a awm lai a, MCS, IAS,IPS etc chungchang sawi thin kha mahni khua ah Private school zirtirtuah kan tang ta deuh vek a… a thei fal deuhin engmah thawk loin an pa te neih chenin awm hmunah an phaihnah hriam ve em em a, chung chu kan hostel chhuahhnu a awm dan chu a ni. Thianpa Rza a te inneihnaah hian thian te ho chu tumah an kal thei lo a, kei chiah ka va lang thei a.. Thlen zan chuan chuan Thianpa Rza a pawhin min lo lawm khawp mai, ka Bag a han thing a, a lo ri rak rak mai a,, chutah warning min pe ta.  “Hetiang i rawn ken chuan nang  hi  i tawng a kal laklawh ang a, sawi loh tur I sawi palh a nge aw, i sawi vaih chuan…. a ni mai”  …chutia vaukhanna thu ka han dawng chu ka rilruah  hmangaihna mak tak lo pianchhuah a , lo puitlin dan chu sawi ka chak ta et et  ta mai a..mahse, chumi zan chu eng em sawi loin kan tling tla. A tuk chu inneihni a ni a, felfai takin Sunday school hallah kan tling tla a, chawhnu lamah Rza te In lamah mo lawmna  kan nei a,programme pawh kan hmang zang khai ta a, han nuih deuh dar dar pawh a a zing ta deuh. Thiante leh zirpui aiawhin Present hlanna leh thusawina hun ka hmang a, thu ka sawi chu ka tawt up up mai a, eng emaw min hnawh tu chhakchhuah chakdeuh  nei hian ka awm a, picnic lai a Drama kha tumahin an hre ve mang si lo a, midang hrilh hi ka chak em em a, ka thusawi lai lah moneituin min melh reng ngam si lo…ka sawi chhuak nge sawichhuak lo a bengkhawn tih ka hre reng mai a,   hmeichhe nau vei  ka in chan ber mai, Moneitu duhthusam ang ngeiin a pawi/pawilo  ber lai ka sawi ta lo.

Zanah inneih thilpek hawnna programme kan hmang a, chutah zet chuan ka insum zo ta lo. Kan Hostel awmlai a tangin a bul ret a tangin ka han sawi ta a.. kan hostel awm lai  sa  leh sakawchhung thleng a kan rawp huam huam thin zia atangin bul ka tan a,Mipui lam an nui dar dar, picnic drama chu ka sawi thleng ta.. moneitu tan inkhapna hun awm tawh hek lo, tlem ka phuah belh bawk a, Mo pawh in mak a ti ngang mai..Ka zan mut dawnah Moneitu Rza chu a rawn phei a, nui kur kur pahin “I va han sual mai mai.., Thianpa naktuk chu i haw thei lo,nikhat tal min champui a ngai a nia aw” a ti a..Muturin an in siam a, Zanah ka tawngtui bawk a, thawm engmah hre loin ka mu a, zingah mothar Lindai pawh a tho hma, zingah ka la thawh chhuah hmain ka mutna bulah a rawn kal a, “I thil sawi kha tak tak a mi..Thara chu ka khawngaih em mai, ka biak duh lo thinna zawng zawng kha ngaihdam min lo dil sak dawn nia, kei pawhin Telephone a biak ka lo tum dawn nia” a ti a, Moneitu Rza pawh rawn thoin thinrim hmel engmah a ti lang lo, that takin min bia a, “ Thianpa naktukah Ka pute Jeep Aizawl tlangtur a awm a, Serchhip thleng chu i  chuang ve mai dawn nia, Lawngtlai atang a kaltur chuan zingah Maxi Cap Service i nang hman dawn si lo a, Tlaiah LNS vel a kal chu i tan pawh a ninawm lutuk ang” a ti  a,. kei chuan a remchan hlauh chu tiin a tuk a haw tur chuan rilru ka siam fel  ta a.

In Bawlna Rapthlak:

A tuk zing a lo nih chuan Rza pute Jeep recondition ah chuan kan han in hnawh lut a, kan tawt lutuk lonain a khat tan kan chuang a, a hmaah Rza pu leh an nau, nula Aizawl a college admission ti tur te an chuang a, kei a hnungah  kalkawng a khu thei em maitiin kekawr bul leh T.Shirt bal lam pang tawh ka ha sa a, An vaihlo min pek ka zial tir hman si lo a, sarangah lehkha nen ka dah a, chungte chu motor kal hma chuan pahnih pathum vel ka zial lawk a, “zuk chawpin zial mai ang, dum bur kan pai a lawm le” ka ti a. Tichuan kan chhuak ta a. Zing dar ruk ah chhuak kan ni a,Kal kawng a khu khawp mai a, kal kawngah chuan ti ti phungleng kan sawi a, Kum tawp lam a MLA election lo awm tur te, MIP project thatna leh that lohna te,Mau tam lo thleng tur chanchinte leh Faktea rawngbawlna chungchang thlengin kan sawi a, Kei Aizawl awm thang thin ber ka ni bawk a, ka ti ti an ngaichangin ka tawngtui phei hle. 

Lawngtlai pawh tukthuan ei hun velah kan thleng a, Lawngtlaiah chuan tukthuan ei loin kan tlang a,mahse ngaiteh, Lawngtlai kan pelh dawn in Kan motor an lo ti ding a, Theitui te an lo siam a, Ka rindan chuan eng pawl emaw niin sum an tuak a nih dawn hi ka ti mai a. Mahse mak deuh mai chu “He motorah hian Pu Lungduhsanga a chuang em” tih ri ka hre ta! kei chuan rang fahranin “chuang e, keimah hi ka nia, enge thil dik lo a awm em ni?” ka ti a,An ni chuan “ Awm lah lo e,I rawn kal tih kan hria a, hei Ii tan theituite kan lo siam chu!”an ti a,Min chibai a, an sawidan chuan Ruling party Unit hruaitute an nih thu leh CM lehkha tur min pe a,” he lehkha hi  chu mi kha mi dilna a ni a,hmu ngei turin min lo sawipui dawn nia” an ti a, keilah  a ngaihna ka hre lo nasa, sipai bang ka bo map mai…Min hre sual a niang ka tih chuan an zah ka hlau bawk si, inthlahrung angreng takin theituite chu ka chuanpuite nen chuan kan in a, kan inmangtha a, kan kal leh ta a. Tuibur hmuam da kan  kal chauh tihin Thingkah kan thleng phei a… Tah pawh chuan Ngaiteh… Sikul naupang sawmthum rual vel  Private H/S zirlai ho an loin tlar a. A hmaberah chuan kan Hostel awmpui thin tho hi a lo tei vut vut mai a..zirtirtu niawm tak tak te chuan kan motor chu an lo tidingin ka hming chu an rawn lam leh ta! Ka thianpa Hostel awmpui thin chu ka han nuih a, a ni nui duh miah lo.. “Hei hi Kan school hi deficit a nih theih nan theih patawp min lo chhuah pui rawh…sir” tiin lehkha min rawn pe mai chu(h)..aw.. ka man chhuak ta. Thianpa Rza, Lalrozuata mi chimawm ruahmanna a ni tih ka hre chhuak ta… mahse nuih hun a ni lo, ka thin a rim, mahse thin rim a hun tlat lo. Kan thianpa chuan  “ Hei naupangten an chibai duh che a” a han ti chuh… mihring hi a lo va inbawl theih teh reng em. Ka chuanpuite maktih a tling,keilah, ka T shirt hak takngial pawh chu hlipin tawnzau nen ka awm teu mai a,Kekawr bul, leh chapal ka bun bawk si, pahnih khat ka  chibai a, tukthuan ka la ei loh thu leh kan hmanhmawh thu ka hrilh luam a,eng tin tin emaw kan chhuak leh thei ta, chutiang a khaw hnih ngawt a mi pawimawh leh sawipui thei mi pawimawh tak a min lo dawnsawn avang chuan ka chuan puite chu an in be ru ta sar sar a, a hma a chuang nula pawh chu a inthlahrung ta,, a thutnaah  min kian a tum a, kei lah engmah sawi ngam tawh si lo… ka tang ve, Driver bul seat chu kan inhnawn ta zak zak mai a.Ka chuanpui te chuan enge ka nihna an hre chak khawp mai a…engmah nihna ka neih loh thu ka sawi lahin an awih lo nasa mai.Lawngtlai thlen hma a MNF thattawk lohna ka sawi zut zut te kha chu tiang lam min han zawh leh pawhin sawt ngam chi ka ni tawh lo. 

Tawipui South kan thleng a, tukthuan kan fak a, engmah min tibuaitu an awm lo hlauh..mahse kan chhuah dawnin kan khaw mi thlasik lai a meihawl rawh a hlawhfa a kan chhawr thin in kan kal tur min rawn au..Bye Bye a kal mai tumlaiin kan motor a rawn hawi ding a, Hna ka hmuh tawh leh tawh loh mi zawt luamin   kan meihawl rawh lai a rawn sawi thawi hram…ngeiawm duh tak a ni. Tawipui North I leh II ah tibuaitu awm loin kan tlang, thaw a veng sawt , mahse maw Thualthuah Lawngtlai a miang bawk khan min lo phar ding leh..CM lehkha tur min lo pe leh..khawlum nen thaw ipik duh tak a ni. Khawchhung luh dawn a piangin a hreawm a,karkawngah lah engmah ka sawi ngam tawh bawk si lo. Hrangchalkawn kan thleng a, a rang a rangin PCO ah ka lut, Serchhip a kan thiante ka phone a,Rza’n a biak leh biak loh ka zawt hlawm a, Ruahmanna an lo siam fel vek tawh thu min lo hrilh a, Sut tur a ka ngen chuan ‘Pawisa kan dawng vek tawh’ an ti mai a,engzahnge a pek che u, Rs.2000/- an dawn thu an sawi a, Kei chuan an thil ruahman Two wheller nen a lo hmuah chu thulh a, Rs. 2500/- ka pawisa neih zawng zawng  a ui lo talh turin ka thlem thei ta hram a, mahse hlauh ka neih chu an thil tih tum thulh si lo in ka hmingin ui pum an lo ba ngawt pek ang tih a ni ka hlauh. Rz..misualpa..

Lunglei leh Serchhip inkarah chuan buaina ka tawk ta lo, Mahse Bungtlangah vawikhat min lo ti ding leh hram, Kan Hostel awmpui thin Tluanga te khua a ni tlat a, Anni chuan “zanriah siam che u kan tum, chawl rawh u” an ti a, mahse ka chuanpuite Aizawl ban tur an nih avangin kan chawlh rei theih loh thu kan sawi a, kan pelfel leh thei ta.. Keitumah Rza thiante, kan thiante an awm em tih ringawt ka ngaihtuah a, mahse eng em tiloin Keitum pawh kan chhunpelh leh thei mai . Ka va lawm tak em.. Mibawl hrat ninawm phiang sen lutuk vangin tlangvala pa lawmna hi a va ho thei ve..

Serchhip ka thleng phei a, Sailiam kawnah thaw dep depin ka awm a, eng mah thawm a awm ta lo. A va lawmawm ve, Mahse Thianpa  Rinsanga tein ka thlen chuan har an lo vil a,  Ui ril an lo chan hauh hauh a.Ka thawmhnaw ka hlang thla a, Politician lawm dan  ang ni lo thian zin haw lawmin Serchhipah chuan min lo lawm a, thaw a veng huai mai. Ka chuanpuite nen kan in mangtha a, ka vai liam a, enge ka nih a , tunge ka nih  tihchungchang rei fe an khel ngei chuan ka ring.

Chaw eikam ah a rang a rangin ka telephone ka tuai a, 

“Hello”

Misual pa, Serchhip ka theng e”

“A va lawmawm ve, I tluang maw i sual fe zawk he he,,kan in rul chiah”

Cheng eng zah nge vawin thilhnaisailo ruahman nan khan I sen reng reng”

“ A sum zawng chuan  Rs.9500/- chiah chiah”