Hriselna Ngaihsak Kawngah Bible Thlir Dan Nei Rawh

Hriselna Ngaihsak Kawngah Bible Thlir Dan Nei Rawh

“Lalpa, i Pathian chu . . . i rilru zawng zawng, i chakna zawng zawngin i hmangaih tûr a ni.”​—⁠MK. 12:⁠30.

1. Mihringte tâna atîra Pathian thiltum chu eng nge ni?

ATIRA mihringte tâna Pathian Jehova thiltumah chuan natna leh thihna a tel lo va. Adama leh Evi-te chu Eden huan, a nih loh leh paradis nuam takah kum 70 emaw, kum 80 emaw lek ni lovin, chatuan atân “a enkawl leh a vêng tûrin” a dah a ni. (Gen. 2:​8, 15, Sâm 90:10) Mihring tuak hmasa berte chu Jehova lakah rinawm rengin a lal chungnunna hnuaiah intulût sela chuan, hrisêl lohna te, bawrhsâwmna te, leh thihna te chu an tawng ngai hauh lo tûr.

2, 3. (a) Tarna chu Thuhriltu bu-ah eng anga tar lan nge a nih? (b) Adama avânga thihna chu tu awmtîr nge ni a, chu chu eng anga tihboral nge a nih ang?

² Thuhriltu bung 12 chuan mihring ṭha famkim lote tâna ‘ni ṭha lovin’ a zui tarna chu chiang takin a târ lang a. (Thuhriltu 12:​1-7 chhiar rawh.) Lu ṭuak chu “vai umkhal thing” pâr nêna tehkhin a ni a. “Mi chakte” nêna khaikhin kête chu tûnah chuan a zawiin, a pai nawk nawk tawh a ni. Tukverha êng zawnga dâk nute thimna chu khaw hmuh fiah tawh lo sawina tehkhin thu inâwm tak a ni a. Tar avânga ha kim tawh lo chu “an tlêm avânga râwtsawmtu nute an bâna” tia sawi a ni.

³ Ke tha khurhna te, khaw hmuh fiah lohna te, leh ha neih lohna te chu mihringte tâna atîra Pathian thiltum a ni lo ngei mai a. Chu bâkah, Adama hnên aṭanga kan rochun thihna chu Pathian Fapain Messia Lalram hmanga a tihboral tûr “Diabola hnathawhte” zînga mi a ni. Tirhkoh Johana chuan: “Pathian Fapa lo lan chhan ber chu diabola hnathawhte a tihboral theih nân a ni,” tiin a ziak si a.​—⁠1 Joh. 3:⁠8.

Hrisêlna A Awm Tâwka Ngaihsak Chu Thil Pângngai Tak

4. Engvângin nge Jehova chhiahhlawhte chuan an hrisêlna chu a âwm tâwka an ngaihsak a; mahse, eng nge an hriat?

⁴ Tûn hunah hian, Jehova chhiahhlawh ṭhenkhat chuan sual nei mihringte hmachhawn ṭhin hrisêl lohna leh tarna chu an hmachhawn ve a. Chutiang dinhmun hnuaia a âwm tâwka kan hrisêlna lam ngaihsak chu thil pângngai tak a ni a, a ṭangkai hial a ni. ‘Kan chakna zawng zawnga’ Jehova rawngbâwl chu kan duh a ni lâwm ni? (Mk. 12:30) Amaherawhchu, hrisêl thawkhata awm kan tum rualin, tarna emaw, natna zawng zawng emaw pumpelh tûrin tih theih kan nei tlêm hle tih kan pawm a ngai a ni.

5. Pathian chhiahhlawh rinawmte’n natna an hmachhawn dân aṭangin eng nge kan zir theih?

⁵ Jehova chhiahhlawh rinawm tam takte chuan hrisêlna lamah harsatna an tâwk a ni. Chûng zîngah chuan Epaphrodita pawh a tel a. (Phil. 2:​25-27) Tirhkoh Paula ṭhian rinawm tak Timothea chuan pum lam ṭhat lohna a nei fo va; chuvângin, Paula chuan “uain tlêm tê” hmang tûrin a fuih a ni. (1 Tim. 5:23) Tin, Paula ngei pawhin ‘tisaa hlîng’ a tuar bawk a, chu chu a hun laia tihdam theih loh mit ṭhat lohna emaw, natna dang emaw a ni thei ang. (2 Kor. 12:7; Gal. 4:15; 6:11) Paula chuan a ‘tisaa hlîng’ chungchângah Jehova hnênah damna dîlin a ṭawngṭai fo va. (2 Korinth 12:​8-10 chhiar rawh.) Pathian chuan Paula ‘tisaa hlîng’ chu thil mak tih theihna hmangin a lâk bosak lo. A tawrh chhuah theih nân a tichak zâwk mah a. Chutiang chuan Jehova thiltihtheihna chu Paula chak lohnaah a lo lang ta a ni. Hetah hian zir tûr kan nei em?

A Lutuka Hrisêlna Ngaihsak Chu Pumpelh Rawh

6, 7. Engvângin nge a lutuka kan hrisêlna ngaihsak chu kan pumpelh ang?

⁶ I lo hriat tawh angin, Jehova Thuhretute chuan damdawi lama inenkawlna chi hrang hrang chu an pawm thei a. Hrisêlna chungchânga thuziakte chu kan Awake! magazine-ah hian a chuang fo a ni. Inenkawlna engemaw bîk chu fak mawi chuang lo mah ila, damdawi lama mi thiamte ṭanpuina leh kan duhzâwng anga min enkawl duhna avângin an chungah kan lâwm a. Mahse, hrisêlna ṭha famkim chu neih theih a la ni hrih lo tih kan hria a ni. Chuvângin, kan hrisêlna a lutuka ngaihsak emaw, buaipui reng emaw loh chu a finthlâk a ni tih kan hria. Kan rilru put hmang chu “beiseina rêng nei lo,” tûn dam chhûng mai hi nunna awmchhun a nih ring a, an damna tûra inenkawl dân eng pawh pawm mai tumte rilru put hmang nên chuan a inang tûr a ni lo. (Eph. 2:​2, 12) Pathian laka kan rinawm reng chuan “nunna taktak,” a thutiam khawvêl thara chatuan nunna chu kan nei ang tih kan rin tlat avângin, tûna kan nun chhan nâna Jehova duhsakna chân chu kan duh lo rêng rêng a ni.​—⁠1 Tim. 6:​12, 19; 2 Pet. 3:⁠13.

⁷ Chhan dang pakhat avângin kan hrisêlna a lutuka ngaihsak chu kan pumpelh bawk a; chu chu a hleihluaka kan hrisêlna ngaihsakna chuan mahni hmasial tak min nihtîr thei hi a ni. Paula chuan Philippi khuaa mite chu “mahni ta ta mai en lovin, mi dang ta pawh en ṭheuh zâwk rawh u,” tia fuihin, he hlauhawm ata anni chu a vaukhân a ni. (Phil. 2:⁠4) A âwm tâwka mahni inngaihsak chu thil inâwm tak a ni a; mahse, kan unaute leh “he ram chanchin ṭha” kan hrilhnate ngaihsakna chuan kan hrisêlna ringawt buaipui lo tûrin min vêng ang.​—⁠Mt. 24:⁠14.

8. Kan hrisêlna âtchilhna chuan eng nge min tihtîr mai theih?

⁸ Kristian tân chuan Lalram dah hmasak aia mahni hrisêlna ngaih pawimawh zâwk a hlauhawm a. Hrisêlna âtchilhna chuan ei leh in te, inenkawlna te, a nih loh leh hrisêlna atân liau liauva thil dang ei belhte chungchânga kan ngaih dân chu mi dangte pawmtîr tumna min neihtîr thei bawk. He mi chungchângah hian: “Krista nî atân chuan ataktak leh sawisêlbo in nih theihna tûrin thil ṭha bîkte [“thil pawimawh zâwkte,” New World Translation] chu ṭha in ti thei ang,” tih Paula thusawia awm thu bul chu ngaihtuah ang che.​—⁠Phil. 1:​10, 11.

Eng Nge Thil Pawimawh Zâwk Chu?

9. Kan ngaihthah hauh loh tûr thil pawimawh zâwkte zînga pakhat chu eng nge ni a, engvângin nge kan ngaihthah loh vang?

⁹ Thil pawimawh zâwkte kan thliar chuan, thlarau lam tihdamna hnaah thatho takin kan tel ang. Chu chu Pathian Thu hrilhna leh zirtîrna hmanga thawh a ni a. Chu hna hlim awm tak chu keimahni leh kan zirtîrna dawngtute’n kan hlâwkpui ve ve a ni. (Thuf. 17:22; 1 Tim. 4:​15, 16) Vênnainsâng leh Awake! magazine-ahte chuan natna khirh tak nei kan thlarau lam unaute’n an natna an tawrh chhuah dân chungchâng a tel a. Hêng thuziakte hian a châng chuan mi dangte chu Jehova leh a thiltum ropui takte hre tûra ṭanpuina hmanga rei lo te chhûng an rilru thil danga an lâk pên dân a hrilhfiah a ni.*

10. Engvângin nge inenkawlna kan thlan chu Jehova’n a ngaih pawimawh?

¹⁰ Hrisêl lohna kan hmachhawn hunah, Kristian mi puitling tawh phawt chuan inenkawlna tûr thlan chungchângah “mahni phur an phur ṭheuh” tûr a ni. (Gal. 6:⁠5) Mahse, inenkawlna kan thlan chu Jehova’n a ngai pawimawh tih kan hre tûr a ni a. Bible thu bulte kan zahna chuan ‘thisen laka inthiarfihlîm’ tûra min chêttîr ang bawkin, Pathian Lehkha Thu nasa taka zahna chuan kan thlarau lam emaw, Pathian Jehova nêna kan inlaichînna emaw tichhe thei inenkawlnate pumpelh tûrin min chêttîr tûr a ni. (Tirh. 15:20) Inenkawlna ṭhenkhat chu dawithiamna lam hawi a ni a. Jehova chuan dawithiamna thila inhnamhnawih kal pêng Israelte chu a lâwm lo. Ani chuan: “Thilpêk mai maite chu rawn keng tawh suh u; englo rimtui chu ka tân thil tenawm tak a ni; thla thar te, chawlhni te, khâwmpuia insâwm khâwm te mai mai chu ka ngaithei tawp lo mai; khawlohna [“ramhuai thlarau thiltihtheihna,” NW] a ni, inkhâwm ropui tak pawh hi,” a ti. (Is. 1:13) Dam loh chhûng chu kan ṭawngṭaina dang chat thei a, Pathian nêna kan inlaichînna tichhe thei thil engemaw tih hun a ni lo rêng rêng.​—⁠ṬH. 3:⁠44.

Rilru Fel Tak Put A Pawimawh

11, 12. Engtin nge inenkawlna thlanna kawngah ‘rilru fel tak put’ a pawimawh?

¹¹ Kan dam loh hunah, Jehova’n thil mak tihtheihna hmanga min tihdam chu kan beisei thei lo va; mahse, inenkawlna kan thlanna kawnga finna min pe tûrin kan dîl thei a ni. Inenkawlna kan thlannaah Bible thu bulte leh remhriatna ṭha inkaihhruaitîr kan tum tûr a ni. Kan natna chu a khirh deuh a nih chuan, Thufingte 15:22 thu: “Remruat lâwk lova thil tih a hlawhtling duh lo, remhria an tam chuan a hlawhtling ṭhîn,” tih nêna inremin doctor thiam pakhat aia tam râwn chu a ṭha ang. Tirhkoh Petera chuan a unaute chu he khawvêla ‘rilru fel tak pua awm’ tûrin a fuih a ni.​—⁠1 Pet. 4:⁠7.

¹² Mi tam takte chu Isua leia a awm laia hmeichhe dam lo pakhat dinhmun angah an ding a. Marka 5:​25, 26-ah heti hian kan chhiar a ni: “Hmeichhe pakhat kum sâwm leh kum hnih thi pûtin a dam lo va, dâktawr tam tak lakah nasa takin a tuar tawh a, a neih zawng zawng pawh a dekral zo tawh a, ṭhathnem ahnêkin a lo zual zâwk mah a,” tiin. Isua chuan chu hmeichhia chu tidamin, zahngai takin a dâwr a ni. (Mk. 5:​27-34) Kristian ṭhenkhat chu an beidawn avângin, biakna thianghlim thu bulte kalhtu inenkawlna thlang tûra thlêm an ni.

13, 14. (a) Engtin nge Setana chuan inenkawlna kan thlan chu kan rinawmna tihchhiat nân a hman theih? (b) Engvângin nge ramhuai lam thil nêna inkûngkaih chi rêng rêng lakah kan inthiar fihlîm ang?

¹³ Setana chuan biakna dik ata min lâk pên nân eng thil pawh a hmang ang. Mi ṭhenkhat tihtlûk nâna nungchang bawlhhlawhna leh hausak âtchilhna a hman ang bawkin, mi dangte rinawmna tihchhiatsak nân ramhuai thiltihtheihna leh dawithiamna ni thei inenkawlna a hmang bawk a ni. Jehova hnênah “mi sual” lak ata leh “bawhchhiatna zawng zawng” lak ata min chhanhim tûrin kan ṭawngṭai a. Chuvângin, Setana min thlêm theih nân dawithiamna leh ramhuai lam thil nêna inkûngkaih chi rêng rêng chu kan pumpelh tûr a ni.​—⁠Mt. 6:13; Tit. 2:⁠14.

¹⁴ Jehova chuan Israelte chu aien chîn leh mitlâkdawi hman a khap a. (Deut. 18:​10-12) Paula chuan “dawithiamna” chu “tisa thiltihte” zîngah a telh a ni. (Gal. 5:​19, 20) Chu bâkah, “dawithiam te” chuan Jehova khawvêl tharah hmun an nei lo bawk ang. (Thup. 21:⁠8) Chuti chu, dawithiamna lam thil engpawh chu Jehova tân thil tenawm a ni tih a chiang hle.

A Awm Tâwk I Hriatzia Lang Rawh Se

15, 16. Engvângin nge inenkawlna tûr thlanna kawngah finna neih a ngaih a, kum zabi khatnaa governing body chuan eng zilhna thu finthlâk tak nge a pêk?

¹⁵ Kan sawi tâkte ngaihtuahin, inenkawl dân ṭhenkhat kan ringhlel deuh a nih chuan, chutiang inenkawlna hnâwl mai chu a finthlâk ang. Mahse, inenkawlnain hna a thawh dân kan hrilhfiah theih loh apiang chuan dawithiamna nên inkûngkaihna a nei tihna erawh a ni lo. Bible thlîr dân anga hrisêlna ngaihsak tûr chuan, Pathian finna leh remhriatna kan neih a ngai a ni. Thufingte bung 3-ah chuan he fuihna thu hi kan hmu a ni: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che. . . . Finna leh remruat thiamna chu vawng tlat rawh; i nunna atân nunna a ni ang a, i nghâwng atân khawngaihna,” tiin.​—⁠Thuf. 3:​5, 6, 21, 22.

¹⁶ Chuti chu, a theih ang tâwka hrisêl ṭhat kan tum rual rualin, natna emaw, tarna emaw hmachhawn paha Jehova duhsakna chân lo tûrin kan fîmkhur tûr a ni. Thil dang ang bawkin hrisêlna inenkawlna kawngah Bible thu bulte mila nungin, a âwm tâwk kan hriatzia, a nih loh leh ‘kan dawhtheihzia chu mi zawng zawng hriatah’ a lang chhuak tûr a ni. (Phil. 4:⁠5) Kum zabi khatnaa governing body chuan an lehkha thawn pawimawh takah Kristiante chu milem biakna te, thisen te, leh inngaihte laka inthliar fihlîm tûrin a zirtîr a. Chu lehkha thawnah chuan he thutiam hi a tel a ni: “Hêng hi in bân chuan in tân a ṭha ang,” tih hi. (Tirh. 15:​28, 29) Eng kawngin nge?

Hrisêlna Ṭha Famkim Beisei Chunga A Awm Tâwka Inngaihsak

17. Bible thu bulte nunpui chu eng angin nge kan ṭhatpui?

¹⁷ Mi tinin heti hian an inzâwt ṭheuh tûr a ni, ‘Thisen leh inngaih chungchânga Bible thu bulte ka zawm tlat avânga ka neih hlâwknate ka hria em?’ tiin. ‘Tisa leh thlarau bawlhhlawhna zawng zawnga intihfai’ kan tum avânga hlâwkna kan dawnte pawh chu ngaihtuah bawk teh. (2 Kor. 7:⁠1) Mi mal invawn thianghlimna lama Bible tehnate kan zawm avângin, natna tam tak kan pumpelh a ni. Thlarau lam leh tisa lama min tibawlhhlawhtu vaihlo leh ruihhlo hman dik lohna kan pumpelh chu kan ṭhatpui a. Tin, a tâwk chauhva kan ei inna aṭanga kan neih hrisêlna pawh hi han ngaihtuah bawk teh. (Thufingte 23:20; Tita 2:​2-5 chhiar rawh.) Chawlh hahdam leh insâwizawi chu ṭhatpui hle mah ila, tisa lam leh thlarau lama kan ṭhat bîk nachhan chu Pathian Lehkha Thua kaihhruainate kan pawm vâng a ni.

18. Eng nge kan ngaih pawimawh ber tûr chu ni a, hrisêlna lama eng hrilh lâwkna thlen famkimna nge kan beisei theih?

¹⁸ Eng dang zawng aiin, kan thlarau lam hrisêlna leh kan Pa vâna mi, kan “nunna tûna awm sa leh la awm leh tûr” min Petu nêna kan inlaichînna hlu tak chu kan tinghet sauh tûr a ni. (1 Tim. 4:8; Sâm 36:⁠9) Pathian khawvêl tharah chuan, Isua tlanna inthâwina zâra sual ngaihdamna hmangin, thlarau lam leh tisa lama tihdamna pumhlûm chu a awm ang. Pathian Berâm No, Isua Krista chuan “nunna tuikhurahte” min hruai ang a, Pathian chuan kan mit ata mittui zawng zawng chu a hru fai ang. (Thup. 7:​14-17; 22:​1, 2) Chu bâkah, he hrilh lâwkna phûrawm tak: “Khuaa awm chuan ‘Ka dam lo ve,’ an ti lo vang,” tih thlen famkimna pawh kan tawng bawk ang.​—⁠Is. 33:⁠24.

19. Kan hrisêlna a âwm tâwka ngaihsak pahin, eng nge kan rin tlat theih?

¹⁹ Chhan chhuah kan ni ṭêp tawh tih kan hria a, Jehova’n mihring natna leh thihna a sût lêt leh hun tûr chu kan nghâkhlel hle bawk. Chu mi hun a lo thlen hma loh chuan, kan Pa duh takin ‘min ngaihsak’ avângin tûna kan tawrh natnate tuar chhuak tûrin min ṭanpui ang tih kan ring tlat a ni. (1 Pet. 5:⁠7) Chuvângin, Pathian thlarauva thâwk khum Thua kaihhruaina chiang takte nêna inremin, kan hrisêlna chu i enkawl reng ang u! (w08 11/15)

[Footnote]

Vênnainsâng September 1, 2003 chhuak phêk 17-naa awm bâwmah chuan chutiang thuziak ṭhenkhat târ lanna a awm.

Ennawn Nân

• Natna hi tu awmtîr nge ni a, sual sawhkhâwk aṭangin tuin nge min chhan chhuak ang?

• Kan hrisêlna ngaihsak chu thil pângngai tak ni mah se, eng nge kan pumpelh ang?

• Engvângin nge inenkawlna kan thlan chu Jehova’n a ngaih pawimawh?

• Hrisêlna chungchângah, Bible thu bulte nunpui chu engtin nge kan hlâwkpui theih?

Jehova mite chuan an hrisêl lo chung pawhin rawngbâwlnaah hlimna an hmu.

Thu lakna : Click