Jack leh Lalfanu

JACK LEH LALFANU

Written by Ruata Ralte

Nikhat chu a khawnbawl upa te nen thupawimawh an sawiho va, rorelna hmunah an thukhawm mek a. Chutih lai tak chuan an fanu awmtunu hi rorelna In vengtu sipaite pawh zah zo lovin rorelna hmunah chuan hah em em leh thaw hlawp hlawp hian a rawn tlan lut a, chhuat laiah chuan a rawn tlu tawp mai a.

Sipaite pawh rawn tlanlutin chu nu chu man an rawn tum a. Mahse Lal chuan a phal lo va, “Enge a sawi duh kha sawitir phawt teh u,” a ti a. Nau awmtunu chuan hlauh hmel tak chung leh mittui parawl teuh chung chuan heti hian a sawi ta a.

“Lalpa, khawngaih takin min ngaidam teh khai, I fanu ka chhan thei ta lo,” a ti a, a tap zui ta chiam mai a.

Lalpa chu a tho kang awk mai a. “Enga ni? Ka fanu chu engtinnge a awm a…?” a han ti a. Nau awmtunu chuan heti hian a sawizawm ta zel a.

“Ka pu, Beth-i chu pangpar huana ka lenpui laiin, thawhlehkhatah huan hungna thing chu a che lawih a, zawng lian em em mai hi a rawn lang ta thut mai a. Ka hlau lutuk chuan Beth-i ka au vak a, ka rawn tlanchhiatpui ta a.

Chutia ka tlanlai chuan Beth-i chu zawng lianpui chuan ala ta daih mai a. Ka um a, ka umphak thlawt silo a ni. Awiii, Beth-i chu ka ngaihtuah em mai.” a ti a, a tap leh ta char char mai a.

Chuveleh rorelna In chu a reh ta thup mai a. Mitin chuan Lalpa chu an thlir ta thup mai le.

Lalpa chu a tawpah chuan a rawn dingchhuak ta a.

“Sipai-hote u, um rawh ule. In hmuh hma chu in um zel tur a ni ang…” a tih mek lai chuan Lalnu chu a rawn tlan lut ve leh ta.

“Ka fanu chungah engthil nge thleng ta? Sawi teh u, ka fanu ka duh..” a ti a, a rawn tap lut nghal rawih rawih mai a. Boruak a rit kher mai. Khawnbawl upa te-ho pawhin sawitur an hre ta lo. Lalnu taplai chu an en tlawk tlawk mai a ni.

….…………………………………………

Sipai hote chu an tlanchhuak thuai a, nau awmtunu thusawi ang ngei chuan, pangpar huan phul hmun ah chuan hniak lian tak mai chu an hmu ta thuai a. Tichuan an chhui zel a, huan hungna thing lo pe sul pawh chu an hmu ta thuai reng a. Tichuan an chhui zel a, lungthil hmun an chhui thlen chuan a kalna awm reng reng an hre ta lo. A ngaihna hre lovin an hawihai ta reng mai a. Zau deuh zawk a an bihkual hnu fe pawhin an hnuchhui thiamte pawh chuan chu zawnglian hnuhma chu an hmu zui ta reng reng lo mai le. ‘Khawiah nge a kal tak ang’ tih chu zawhna awm chhun a ni ta.

Khawchhung mipuite pawh chuan Lalfanu bo thu an lo hriat chuan an lungngai em em mai a. Sakawr tawilailir nena Lalfanu an hmuh thin leh an chhawnchhaih thin kha an hmu tawh dawn si lo. A biangsum khuar deuh kelh te, a taksa inphut mawi tawka chumbiang te, a sam sen thar mai te kha hmu tawh ngailo tura an rilru an han dah te chuan nu thenkhat leh naupang thenkhat te chu an lungngai em em mai a. Tunah hian Lalfanu chu engtintak awm ang maw tih chu an zawhna a ni.

Lalfanu chu thlakhat zet mai an zawn hnu pawhin a ngaihna reng reng an hrelo. Mitin mai chu an lungngai theuh va, Lalfanu chu a hmutu nih ngei tum mahse tuman an hmu ta lo va. LAlnu leh Lalpa pawh chu lungngaiin an indawm kun ta reng mai a ni.

Tichuan Lal chuan thu a chhuah ta.

Lalfanu hmu a him taka ka hnen rawn thlen apiang hnenah an duhzawng apiang tihssak an ni ang; ka Lalram zahve hial pawh ni se ka pe ang tiin. He thu hi khawchhungah te, kulh bangah te chuan an tarkulh mai a ni.

Nikhat chu, khawpui-ah chuan Jack chu a sakawr neihchhun nen chuan an kal dun hnak hnak mai a. Ani hi hmeithai fa niin, an nufa chauh chuan an cheng dun a. Khawpui-ah mamawh te lam turin a kal a ni. Kum 15 chauh a ni na a, puitling ang maia engkim a tih ve vek thin avangin thiltih vel a zeihawi hle mai a. A sakawr-ah te chuan hruaihrual-te paiin, a kawngah chuan chemte a pai tah mai bawk a. A sakawr nen pawh an inhmeh ve hle a ni.

Khawpui a thlen dawn chuan a han dak a, kulh kawngka a thil inziak lian tak mai chu a hmu ve ta a. Ngun takin a chhiar a, a kal leh ta zel a. Khawchhung a thlen chuan Lal In lam panin a kal nghal a. Sipai-ho hnena a han sawi chuan Lalpa hnenah chuan an luhtir ta a.

“Chibai, Lalpa. Jack ka ni e. I khua leh tui zinga mi ka ni. I fanu bo thu ka lo hre ve chauh mai a, a pawi ka ti hle mai. Tunah hian a zawng turin kal ve ka duh a. Khawilai atanga bo tan nge tih te min hrilh theih chuan ka lawm hle ang.”

“Tlangval, ila naupang hle mai si a; Sipai tawrawt tak takte pawhin an hmuh zawhloh chu I hmu thei bik dawn em ni? Mahse I tum a nih chuan ka dal hauh lovang che. Ka hnen I rawn thlen theih hlauh chuan I duh apiang min dil la, ka pe ang che. Sipai hote u, pangpar huan ah khan zu hruai ta che u”

Jack-a pawh chu lungthil hmuna thlen chuan a beidawng ve hle mai. Ngun takin zawnglian kalna tur awm chu a rilru in a ngaihtuah a, a thlen chin pawh a hre lo. Thawklehkhatah a sakawr chu a ding ta thut mai a, ani pawh a tla thelh nghe nghe a. Engdang ni lovin, kawng a tawp a lo ni.

A sakawr atang chuan a chhuk thla a, mual tawp ava thleng ta. Chu mual chu alo tawp chiang em kher lah tak a. Khamko, sang em em maiah a ding a ni reng mai. Mak a ti hle mai a. Khamko vel ah chuan a kal kual vel ta a.

A thil hmuh chu mak a ti kher mai le. Chu khamko, hmunkhat lai chu kal thanna a ni tih hriat tak hian alo pe sul mai a. Chulai chu a va belchiang ta a. Chu khan chu khamko bungvut maiah chuan a chhuk ta tlat mai le. A hnuai lamah chuan mi an awm em ni ang le?

Hriatchian a chak leh zual ta tlat mai. Tute nge a zu hmuh ang le!

A sakawr lamah chuan pheiin a hruihrual chu a va la a. Khamko thingbul remchangah chuan a nghet tawk tak mai chuan a thlung ta a. Uaithlak a tum a ni.

A hrui chuan a tlin angem? A dawl angem? A nghet tawk angem?

Zawi muang chuan a uaithla ta a. A hrui hmawr tawp a thlen hma deuh chuan a han hawi a, khamko pangah chuan puk a hmu ta. Engtinnge a luh theih tak ang le?

A theih anga nasa chuan a han inthen vak a, pukchhung ah chuan a lum lut ta tawp mai a. Chu puk chhung chu chenna In niawm fahran hian a bel hun mai a. Fankual a tum ta a.

Puk chhung-ah chuan kawkel a loawm reng mai. A kawkel pakhatah chuan a han lut a, ‘tah chuan thingrem engemawzat a hmu ta tlat mai. Thenkhat chu lian tak tak an nih laiin thenkhat chu 2fts. emaw leka lian te an ni a. A chhungah chuan eng tak awm ang maw?!

A chemte chuan a kalhna chu a han khawng a, a bal hlawk mai.A chhung an bih nak chuan le!! Rangkachak bengbeh leh thi te, ngunte a lo awm teuh mai a Mak a ti kher mai. A dang a va hawn leh pawh chuan emerald leh diamond chi hrang hrang a lo awm leh ta. A makti lutuk chu a ding ngawi ta reng mai. Heng thil zozai hi tu fa in nge khamko kara la thla ang le!!?

Puk kawkel dang a va kal leh ta a. Chu pindan ah chuan thei chi hrang hrang - Grape, Apple, Pear, Pomgranet, balhla leh thildang tam tak ava hmu leh ta. Mak a ti tulh tulh ta mai.

Kawkel pathumna ava thlen chuan a beisei loh tawp mai a va hmu ta. Lalfanu ngei mai chu khum zau em em maiah hian tui tak maiin a lo muhil siai siai mai a; mak a titawp thei lo. Hamhaih takin a ding reng ringawt mai a ni.

Lalfanu muhil pawh chu a rawn harh nghal thuai a. A bula tlangval hmeltha tak lo ding reng chu a hmu ta a. A hlau deuh nge ni, a puansin lai chuan a inkhuh tha sat sat a.

Jack chuan, “Lalfanu, min hlau suh khai. Nangmah rawn hruai tum che a lokal ka ni. I nu leh paten an ngai tawh khawp che a sin,” a han ti a. Chutia a nu leh pate a han lamrik takah chuan Lalfanu chu a lung a chhe thar ta thut mai a, a tap chhuak ta hawm hawm mai a.

Jack chuan Lalfanu chu a va kuah a, a theih ang tawkin a hnem a. A lungchhe zualpui a reh deuh ta maw tih chuan -

“Tu in nge hetah hian hruai che? An enkawl tha che em?”

“Enkawl tha ve bawk e. Mahse a khawharthlak a ni. Tleirawl kum 14 mi chauh tan zawng a hrehawm thlawt a ni. Thian kawm tur an awm si lo. Ka nu leh pate ka ngai a ni”

“I bo ni atang khan hetah char char hian ami an dah che?”

“Aw ni e. Mahse heta min hruaitu chu zawnglian kha a ni. Hei hi a In a nih ka ring. Chhunah a vakchhuak a, tlai thim hma hian a lo kir leh thin. Eitur hi a rawn hawn ziah mai a. Ka tan chuan hlauhawmin a awm ngailo. A theih ang tawkah chuan min duat ve lutuk. Mahse ka lung a leng lutuk.”

“A nih leh puk kawkel ho saw I tlawh kual tawh em?”

“Tehreng mai. Thingrem chhungah te sawn enge awm tih ka hrechak thei lutuk. A neitupa lah chu a zawh theih der si lo va. Ama dah em ni ang le?”

“Hmanlai Lal ho dah emaw, rukru ho dah emaw a nih ka ring?”

“Kei pawh chutiang vel chu a nih ka ring. Pirate ho dah te a ni angem le?”

Ka hrelo le. Engpawhnise, heta tanga kan chhuah vat hi a ngai a ni.”

“Engtinnge kan chhuah ang? Chhuah ruk tumin kham ko pawh ka en vek tawh a, ka chhuak ngam teuh lo.”

“Ngawiteh, tihdan a awm mai ang. Kan luh theih chuan kan chhuak leh thei tur a ni.”

An ngawi dun ta rauh rauh va.

Chutihlai tak chuan thawm lian tak a hre zui ta. Zawnglian inhrosa thawm ngei mai chu. Chu zawng chuan mihring rim dang a hriat avang chuan a inhrosa a lo ni.

“Chu, zawnglian. A hmuh che chuan a tihlum mai ang che. Engtinnge ni ta ang?”

Jack chu puk ko lamah chuan a phei vat a, zawng chu a va hmu ta. A lian kher mai le.

Zawng chuan a hmelmapa a han hmuh meuh chuan a then ta thu mai a, thinrimin a awm a chum ta dut dut mai le.

Jack chuan a chemte a phawi a, Red Indian ho chemte kendan chuan a han keng a. Chu zawng chu fimkhur takin a pan phei ta dan dan a.

Chu zawng lian chuan man nei tumin a rawn bawh phei ruak a, Jack lah chu inthazo tih hriat tak hian vei lama petek zeuh pah chuan zawnglian ban chu a’n thai hman hram a. Zawng lian chu na tiawm pawhin a awm hlek lo mai.

Tanhmun an inthlak ta. Zawnglian chu puk chhunglamah a tang ta a. A vawihnih nan a rawn sawt hloh hloh a, Jack chu hmeh sawm vek tum niawm takin a va bawh leh ta. Jack lah chu vei lamah bawk a lo sawt leh darh a, zawnglian chuan a man thelh thuak mai.

Tum hnih ngawt a man thelh tak avang chuan chu zawng chu a fimkhurlo sawt ta hle mai a. A thin a ur tulh tulh mai ni berin a lang. Bawh thelh mah se rang zet hian puk kotlang lam atang chuan a rawn bawh leh ta puat mai a. A fimkhurloh luatah a lian zawk chu a thi teuh hle mai.

Jack kha veilamah bawk a kat leh derh a, chumi pah chuan chu zawng chu a hnute hnuaiah a chemte hriam tak chuan a rin phei kawk mai a. Zawnglian chuan na a tuar ve ta.

A awm a thisen lo luang nguai nguai chu a en a, a fimkhurloh rah a ni tih a hre ve ta a ni ngei ang. A hma a tlangval chu a zuam ang ngawt a nilo tih hriain, fimkhur takin a veh ve ta zawk a.

Chu zawnglian chuan Jack a ral beih dan chu manthiamin a in hre ta. Thawklehkhatah a hmelma pa chu vei lama a chetsawn leh ngei ringin a va bawh leh ruak a. Mahse a rindan chu thil thlendan nen a inmil ta lo.

Jack chu chesawn lovin, chu zawnglian in a rawn bawh veleh chuan tluk zangthal pahin, a awm ah a lo tlawh kang a, chu zawng tha chakna ring chuan puk kotlang lamah chuan a bin liam ta daih mai.

Chu zawng lian chu kham ko bung vut maiah chuan boruak man tumin a in vai vuat vuat a, a te thla ta rawih rawih mai a. Chu zawng chu a thi ta angem tih chu va chian ngei duh mah se Jack atan chuan chu kham chu a sang lutuk tlat.

Jack chu a hah ve bawk a niang; a khup dawmin a thaw hlawi hlawi a, a han dahchhuah leh meuh chuan Lalfanu chuan a lo thlir reng mai tih a hmu ta a.

Lalfanu hmuhlai chuan a inbeng fai thak thak a, hahlo leh chau awmlo deuh chuan a awm leh ta a. Nuam a ti kher mai.

Tichuan chu puk atanga chhuak tur chuan an inpuahchah ta a. Jack chuan puk kotlang a va dak chung chuan a inthen luhna hrui chu man tumin a va ban ziau ziau va. Lalfanu chuan lo puiin, puk kawkel pakhat atang chuan hmawlh sei fe hi a va la a, chumi hmang chuan Jack chuan a hruizen chu a va hawlhpha ta mai a.

Jack chuan Lalfanu chu a kawngah chuan a hling a, puanthem leh hnahthem a hmuh ang ang chuan a hren nat lohnan a dam bawk a. Ani thung chuan inhling ve lovin hrui a uai chhoh pah chuan Lalfanu chu rah turte, vawn turte chu a hrilh chho pah zel a. Zawi muanga lawn chho zelin a tawo chu an thleng ve ta hram a.

Tlang an thlen chhoh zet chuan intih pa a thawk insum a theih ta loh. An pahnih chuan an mu zangthal der a, an ban kham lutuk leh an hah lutuk avang chuan an mu ta hle hle a.

Jack and Princess

 Jack chu zawi muangin a tho va, an kal vat loh chuan zanthim hnuaiah chuan engmah an ang dawn lo tih a hrereng mai. Beth-i lah chu chau tih hriat em em mai hian phul chungah chuan a la mu zangthal der mai a. Khawngaih viau mah se, a kaihthawhloh chuan chulai ramhnuaiah chuan zan hun an hman a ngai ngei dawn a. Ramsa chi hrang hrang awmna a nih tlat avangin a zuam hlawl lo a ni.

Beth-i pawh chuan an dinhmun chu hrethiamin, chawlh hahdam chu chak hle mah se chawlh muan hun a ni lo tih a hria. Ramsa ho chaw a tan ringawt chu a zuam biklo a ni.

Jack chuan a sakawr, Cole chu chang tumin a han ko raih a. Cole pawh chu a tlatna ata a rawn inlan vat a. A sakawr chuan a rawn hnim thuak thuak a, a hnu ah chuan awm pangngaiin a awm veleh ta mai a.

Jack chuan a hruizen te chu tel thain, kal mai thei tur chuan a sakawr zin te chu a han check tha vel a. Chutah Beth-i peihloh hmel zet mai chu ava kai tho va. Beck-i pawh chu tha te chuan a rawn tho chhuak ve ta a. Jack chuan ani chu a hma ah a thut tir a, chu hmun ngaihawm loh zet chu an kalsan ta a.

Khua an lut dawn ta. Kulh kawngka-a sipai te chuan Beth-i an hmu zet chu an lawm kher mai. Chutih rualin a rawn hruai hawtu, tlangval pian zen zawih pawh chu an en duh hle mai. Jack chuan a hma-a khawchhung a luhdan nen chuan inanglo a ti hle mai. Sipai te khan an lo tidingin, thu te an lo zawt vel kha a ni a; tun tumah erawh chuan thu zawh reng reng an tum lo. Lalfanu nen chuan an enchhawk sek ringawt a, zawh tur ber pawh an hrelo a ni ngei ang.

Sipai pakhat chu hlim zet hian Lal In lam pan chuan a tlan nghal a. Lal In a thlen chuan Lalpa leh Lalnu chauh ava hmu a. Lalnu phei chu lusun zo hlim ang mai hian a mitmeng te pawh ala sen rum mai a ni. Lal hnenah chuan, “Lalpa, I fanu chu a lo hawng ta e, kulh kawngka-ah ka rawn kalsan a ni,” a va ti a.

Lalpa chu a thutna atang chuan a zuangtho hluai mai a. Lalnu lah dang lo. A meng fiah kawk mai a ni. Lalpa chuan, “Enga ni? Han sawi tha leh teh. A rawn haw I tia mi? Dawt I sawi vaih chuan I chan tur I hria tiraw?” a ti a. Lalnu pawh chuan mak tia ka ho chung hian a lo en a.

“Ni e, Lalpa, ka hria alawm. Mahse he ka mit ngei hian ka hmu a ni.” a ti a

“Aw, ka fanu…” tiin Lalnu pawh a tapchhuak rawih mai.

Lalpa chu a tlanchhuak vut a, Lalnu pawh chuan a zuichhuak ve nghal a. Sipai pa erawh chu hamhaih takin a ding a,a harhchhuah hnu chuan a umzui ve leh ta zawk a.

“Sakawr tawlailir va siam vat teh khai. Ka fanu chu ka hmuak dawn a ni.”

Kawtthler-ah chuan mi an lo tam tawh hle mai. Lalfanu lo kir thu chu a thangchak bawk a, kar lovah khua a mitin te chuan an hre vek emaw tih turin an rawn chhuak khawm a; Lalfanu chu hmuh ve an chak theuh mai a ni.

Jack-a te pahnih chu zawimuangin, sipai ven chung chuan kawthhler-ah chuan an chhuk thla a. ‘Lalpa hi kawng lo kian rawh u khai,’ tiin sipai pakhat hi a lo au lauh lauh bawk a. Lal sakawr tawlailir chu an hmu chawpchilh ta nghal a.

“Ka fanu,,,”

Lalnu chu tawlailir din veleh chuan a rawn tlanchhuak nghal a, a rawn tap leh ta hawm hawm mai.

Jack a sakawr a din rual rual chuan Beth-i chu a chhuk nghal a, a nu nen chuan inkuah in an tap nghal hawm hawm mai. Amaherawhchu chung mittui te chu lawmna mittui an ni. Beth-i chu mitin mai chuan an bial tuau tuau a, dam taka a lo haw leh chu an lawm theuh mai.

Chutia lawmna chibai an inbuk lai chuan Lalpa chuan a rawn hruai hawtu tlangval chu lawmthu hrilh tumin a han zawng a, a hmu ta hlek lo mai.

"Khawnge tlangval kha?"

"Lalpa, nichin mai khan a kal ta a ni. A kalna chin erawh ka hre bik miahlo mai."

"A lakah khan lawmthu sawisenloh ka ba asin. Sipaite u, han hruai teh u khai,"

Sipai hote pawh chu an phu nghal suau mai a. An han inzawh ngial pawhin a kalna chin hria an lo awm hauhlo mai.

Lal Inah chuan mi an phu lui lui mai a, Lalfanu dam taka a lokir leh avang chuan mitin mai chu an lawm a. Kawtlai lamah leh khawchhung hmun hrang hrangah pawh ruai buatsaihin an phe suau suau mai a ni.

Amaherawhchu Lalfanu chu a lawm a kim theilo. Chu Ni, amah lawmna Ni ah ngei chuan rilru ruak takin a awm a. Amah chhanchhuaktu, a thian leh hmelhriatsa pawh nilovin thi tawh hnu kha a rawn kaitho leh a, nunna thar a rawn pe leh a nih kha. Kham kova an uai chhoh dun tuma hnai taka an in en te kha a hrechhuak uai uai a. Jack a, tlangval sang lam, sa inphut mawi tak mai kha.

A hnu kum ruk hnu-ah chuan...

Jack a pawh chu a nu nen chuan hlim takin, an eizawnna ber, bawng enkawl chuan hlim takin an khawsa chho ve nak nak a. Tlangval hrisel tak a ni bawk a, hna reng reng, a kutzala awm chu thawhhreh hi a nei ngailo a ni.

Tukkhat chu Lalfanu a chhanchhuah tak kha a ngaihtuah chhuak zawk mai le! A ngaihtuahna a kal zel a, pukchhunga rohlu a hmuh zozai te kha a ngaihtuah thleng ta. A rilru chuan kal leh a chak hle mai a, a nu hnenah chuan a sawi ta a.

"Bawiha, chutiang rohlu tam lutuk chu i it anga, he chhungkua hian i rilruah hmun a chang lovang tih ka hlau khawp mai. Tam tak chuan an chhungte, an thiante kalsan in sum leh pai an ngaihtuah a, an rilruah a len em avangin an chhungte pawh an thlauhthla hial thin asin. Amaherawhchu nang chu chutiang ni velo la ka duh khawp mai," a ti a.

Jack chuan, "Ka nu, nang hi khawvela ka neihchhun alawm i nih le. Ka thiltih reng reng te hi nangmah vanga ti vek ka ni tih i hria alawm," a han ti a.

"Ka hria alawm, Bawiha. Chuvang tak chuan ka ringtawk che a ni reng a ni. Amaherawhchu lalna leh thuneihna te hian chhungkua leh thiante hi a hrelo fo a nia. Engpawhnise i tumna lamah chuan kal la, i kalna apiang ah he i nu hi min lo hrereng dawn nia,"

A rilrua lal fanu ngaihtuah neuh neuh chung chuan a insiam ta nghal a. Lal fanu kha a kum pawh a lo zawt chianglo kha atthlak hlein a hre ta a. Chutih rualin, lo zawtin a kum pawh chu lo hre ta tehreng pawh nise, enge lem chuang ang le!?

Tunah hian a nula chho ve tawhin a ring a. A mitmeng inring tawk tak mai, a biangsum khuar kalh mai, hlim taka a nui sen sen lai tur awm te chu a han ngaihtuah a, a hmuchak hle mai. A sakawra an chuan dun laia a sambu tle siau mai, thliin a chhemlen siau siau laite chu a hmu uai uai mai a, hmuh a chak lehzual phah hle a ni.

Mahse a thiltih tum erawh a dang daih. Ro va zawnchhuah leh a ni zawk. Lalfanu khan a pa te hrilhin an lo lafai vek tawh mai angem le? Sipai te khan kha tlang kha an lo chilphul vek tawh mai angem? A rilru chu zawhna hlirin a khat ta a ni.

Ni a dul ruih a, thlifim pawh thawzeuh tur a awm lo. A sakawrah chuan a thungil auh mai a, zawi muangin, hmanhmawh hauhlo chuan a chhuak ta a.

A nuin eitur bawngsarep a kentir bakah a mutbu tlemte chu fel taka tum telin a sakawr hnungah chuan a tawnbet a. A hruihrual hman tur nen, a theih tawka infam in a thawkchhuak ta a.

A kalkawng ah chuan sakawr tawlailir hi a tawk a, pitar leh putar hian ranchaw niawm tak hi an lo phur teuh mai a. Anni, upa tawh tak lamin chutia hna an thawk a hmuh chuan a rilruah a nu a rawn lang zawk mai a.

Anni ang rual anih ve hunah a nu chuan anmahni ang hian hna a thawh a tul ve mai angem le? A nu chu tarkun a nih thlenga hna thawh ngai ni ta sela tiin a ngaihtuah a, a nu a khawngaihna a zual hle mai.

Nikhat nilenga a kal hnu chuan khua alo thim dawn tak avangin riah a ngai dawn ta tlat mai. Ramhnuaia riah aia khawchhunga riah a thlan zawk vei nen; a tumloh zawka riah a ngai dawn ta tlat mai le.

Khawthim hma deuh chuan riahna tur thingzar tha deuh a awm dah law maw tia a vahkual velna ah chuan puk hul tha deuh mai tur hi a hmu fuh ta hlauh mai le.

Chu puk tualah chuan a sakawr chu a thlung a, a mutbu pawh la thla lovin, chu puk chu han belhchian deuh thain a hria a ni.

A kawngka chu a zimin a hniam hle mai. Kun hniam chunga luh ngai hi a ni roh va. Chumi puk bang chu Jack chuan va hnaihin, belhchian tumin a va kal ta a.

A kawngka biang chu tuma kal ngai lohna niawm tak hian,  ramsa hnuhma takngial pawh engmah a hmulo tlat mai.

Awmzel tur...