LIAM TAWHHNU A CHAM RENG SI

Tluangte

Ziaktu : H.Zate, Hmar Rûn.

- www.hzate.in

"Ka duh che, ka hmangaih che. I nalh lutuk!" tia min fawp zauh pah chuan a Bike chu a tinung a. Utawk sawt tur ang maiin zei mangkhengin ka lawnkai ve a. Kan kalna tur lam chu panin kan kal a, ka hlim kher mai. Ka chhungte'n an phal lo chung bumin kan chhuak a ni a. Urlawk zan hlimawm hman ngei tumin chu December 24 zan thli thaw heuh heuh karah chuan kan tum ram chu kan pan ta a. A vawh em vangin ka kuah a, a hnung si châtin ka kuah bet a. Kan titi reng a, ka kuah nghet sauh sauh bawk. 

Kawng ṭtha laiah a kut pakhatin ka kut a rawn hmer a, "zanin na na na chu hlim takin aw?!" a ti a. Ka tan  "Aw" tih loh phal chi a ni lo, ka "aw" rang kher mai.  Thil eng eng emaw kan sawi zel a. "Zanin hi ka nghakhlel lutuk a." tiin a nghahhlelh thu a thiam ang tawkin min hrilh ve a.

A ni nen hian College aṭanga intawng kan ni a. Kan inhriat tirh chuan han duh em emna ka nei hran lo. Mahse, min bêm a, ka tan a ṭhat em a vang leh ka ṭhiante'n min tihpui  nasat vangin ka chhang ve a. Kan nih aṭang chuan Class lah kan chawl chhunzawm nghal a ni deuh mai a. Chuvang chuan class kal tawp nia kan inhmuh bak a falin hun kan la hmang hman lo.

Chumi ṭtuma kan inhmu chu a fala kan hun hman hmasak ber a ni bawk a kan lai deuh ve ve a. Mahse, a chezia leh a awm danah a theih tawp chuan min duhsakin min tihlawm a tum tih ka hre thei. Ka hlim loh a hlau a, min ngaihsakin min ngaihtuah em em a ni. Kan thil lei duhte leiin kan bazar a, kan bazar hnu chuan tlang pakhat thawveng leh nuam deuh ah hian min hruai a. A tlang chu a thengthaw nuamin ka hahdam sawng sawngin ka hria. Chutah chuan a vawi khatna atan kan pahnihin thla kan la dun a, WhatsApp DP atan kan hmang ve ve a. Min hmangaih thu leh ka chhan ve vanga a lawm thu min hrilh mawlh mawlh pahin min kuah a. Ka biangah a fawp zauh a.  Min ngaihtuah thu leh inringtawn taka engkim inhrilh ṭhin a duh thu a sawi a. A changin thla kan la a, a changin kan inkuah a. Nuam ka ti ve veng veng. Ka kut khal niap niap pah chuan a lamah min pawt hnai a, ka biangah dawmin "min hrethiam hram dawn nia." tih pahin ka hmuiah min fawp zauh a, chhanlet duh viau mahila ka chhanlet hmain a duhtawk daih a. Inthlahrun hmel deuh hian, "tihpalh i nalh em a ka insum thei lo!" a ti a. "A pawi lo."  tiin ka chhang ringawt a, kan haw ta a.

Pic : Berema Chhakchhuak

Chumi zan chuan Phone ah kan inbia a,  lawmthu min hrilh mawlh mawlh a, awm dan ka thiam lo lek lek zawk. Min ngaihsak thiam em em a, ka phu lo zawk hialin ka hre ṭhin. Kan mimal thil chu mimal thil a nih anga vawng tlat turin min hrilh ṭhin a. Phone inhman thleng, Facebook password inhrilh leh inzawh te a tih ngai loh tur thu a sawi mawlh mawlh a.  Ka lawm kher mai. Mipain an ngaihzawngte thunun tum rana an facebook account thlenga thunun an tum hi ka haw tlat a.

Kan ni rei tial tial a, kan inbe zing bawk a ka ngai ve ta riau a. A tel lova hun hman hi a nuam lo viauin ka hre ṭhin. Phone ah inbe fo mahila phone aṭang ringawt chuan engkim hi a thleng vek thei si lova inthlahlel leh inngai deuh chungin hun kan hmang a.  Kan duhthusam tipuitling turin a taka inhmuh ngei kan tum fan ṭhin.

Ka ngai ve thei em em a, a taka hmuh hlan ka nghakhlel ve takzet. A ni nena hun hlimawm hman ngei ka duh vangin hun hmanpui tura min sawmna ka pawm a. Mahse, December 24 zan a ni a, ka chhungte'n an phal dawn lo tih ka hriatin chhuanlam dang ka siama chhuah ka dil a, Ka dil tak tlut tlut hnu chuan an phal ve ta hram a. An phal ta chu ka lawm a, a ni ka hrilh vat a, amah pawh a lawm kher mai. 

Kan kal tumna kan thlen chuan kan ṭhiante pawh an lo awm ṭhap tawh a. Kan inhmukhawm chu kan hlim tlang ngei mai. Nuam zawng zawng neih tumin in chi chi hrang hrang leh ei tur nen, ri thei zawng zawng nen, kan hlim khawp mai. A ṭhenin hla play a an lam a, a ṭhenin an lo bawl a, a kawp tea lo interek hrang tawk nen. Kan kim khawp mai.

Kei pawh a kiangah ka awm bawka nuam ka ti khawp mai. Beer a in a, min pe ve a ka in ve a. Ka  hnungah a ding a, min kuah chial a. A thim china ding kan ni bawk a, min kuah pahin a kut a hlei ṭan khawp mai.  

02 January 2018 | Thingdawl