SAVA TÊ!

Ka'n phuah ve chhin a!

~Hawlthira



"Ka nu, khawnge maw i awm tak le!!?? Min pem bosan ta em ni!"

Ka naute nen chuan kan titi nak nak a, kanu lo haw hun kan nghahhlelh ziate kan sawi ve mam mam a. Ani min hmangaihna chu ka naute hnenah chuan ka thiam amg tawkin ka hrilh ve mial mial a, dawngsawng thiam ve tak ang maw.

Ka nu chu nitin hian tum 2/3 vel a chhuak ziah a. Nu a nihna hi ava han hrechiang tak êm! Kei, a fate zinga upa ber pawh hian ka la chhâwk thei mang si lo. Tlemte tala chhâwkthei ni ila chuan a hah a dam ve deuh ngei ang le. Mahse puih chu sawiloh, chaw zawnga han kual vel thei rual ka ni hauhlo mai a; keimah hi puih ngai chu ka la ni mah zawk si. Awm hmunah ka tawng ve ziap ziap thei chauh a ni a, ani han chhâwk thei rual zawng ka la ni mawlh si lo.

Ruah a sur changte hian tawmhulna tur hi min ngaihtuahsak a, a phibuai thei hle. Chutiang tawmhulna a hmuh loh leh amah chu kan inchung a ni ngawt zel a, ruahsur chu a sepui ruah tuar tlawk tlawk mai thin. Chutiang bawkin, nisa lutuk kan tawrh loh nan daihlim min zawnsak loh pawhin kan in chhete a zar tur min ngaihtuahsak thlap zel a, chutah a lungdam zân hnuin, eitur zawngin a chhuak leh chauh thin.

Chutiang vel ka ngaihtuah lai tak chuan kan te ber chu a rawn tapchhuak ta phut mai a, ka harhchhuak zawk mai. Chawhnu her anih tawh avangin riltam pawh a âwm ve tawh hlein ka hria. Mahse engtin tin emawa ka han thlem chuan a bang veleh ta mai a, rilru a thawl huai huai mai. Chutih rualin ka rilru chuan ngaihtuah pakhat a nei; Ka nu hi lo haw har ta viau se... Tap thlêm bân hleihtheihloh hun kan nei mai angem le! Mahse chu lam chu thui tak ka ngaihtuah chhunzawm duh ta lo.

Kan chhungkaw tana kanu inpêkna thûkzia mawlh mai hi aw!!! Kan tana thil chi hrang hrang min tihsak te hi a man chawitur ni ta sela ava han tam dawn tehreng êm! Rulh lêt tur ni ta sela keini unau thum hian rûlzo thei tak ang imaw. 

"U.."

Ka phu zawk a, ka naute lah chu an nuih alo za em em a.

"Ânu hi alo haw har tawh e, ka ril pawh a tâm leh tawh."

A ni tak a, khua pawh alo thim titih dêr mai! Ka ngaih a tha ta lo hle mai a. A nihna takah chuan ka naute ai mah chuan ka hlauthawng zawk hial awm e. Hetiang chen chen ka nu hi nidangah a thang ngailo. Nidangah chuan Nî suk chen vel anih hian a rawn haw thin a, tun angah hi chuan puar nalhin ka nu chuan min awp lum vung vung tawh thin. 

Ka naute pahnih chuan tahzai an rêl tan ta. Thlêm an huphurhawm dawn ta hlein ka hria a. Chawthing a han hraitlai mai na tur awm ta lo chu, engtin tak ti ang imaw!!

Zanah chuan a vawt hle mai a. Ka naute pahnih tap pawh chu thlêmbân ngai lovin, an riltam pum ruak mutchhuak chuan a awi hneh ta a niang chu, an tap a zawi telh telh a, an muthlu ta mai niin a lang.

Keilah chu kanu haw theilo chuan min tithinrim a, a chang leh ka hlauthawng em em lawi bawk si. Han tah ve vak mai te ka châk a, awmzia neiin ka ring mawlh si lo. Tap ve vak ta ila, ka naute ka ti zuau lehzual ting dawn bawk si.

Ka naute muhil chu ka han en a. An pum chu alo thêp then mai a, ka khawngaih hle mai. Mahse ka han bihchiang a, ka ngaih a tha ta lo tawp mai le! 

Nia, an mutdan a diklo. An mu zangthal hual a, emgmah an hrelo tak tak anih hmel hle mai. Ka va dek chhin a, an pum vel pawh a vawt ngiai mai. Thihna hian a man ve ta mai em ni ang le?

Keipawh chuan khawvawt chu ka hrechiang ve hle mai. Nu tel lova zankhat lek pawh han hman zawng, a lo hrehawm hle mai. Ka ril a tam ve hle a ni tih ka hrechhuak a. Ka thil ngaihtuah avang leh ka naute ka buaipui avangin ka ril a tâm a ni tih ka lo hre reng renglo a lo ni. Mahse tunah erawh zawng ka riltâm thu chu tû hrilh ngai lovin ka hre ve leh ta. 

Ka naute chu han kuahlum ve hlek chu thain ka hre ta a. Mahse ka han che chhuak dawn a, tha alawi ka nei ta hauhlo mai. Engtizia nge ni ang le? Kan unau za hian riltâmin kan tlu mai dawn em ni ang le.

Ka naute chu ka han ko va, min chhang tur reng an awm lo. A khât tawkin ka ko reng a, keima aw ngei pawh chu a zawi ta tial tial a.