INDIA LEH CHINA INDO REPORT

– Familia Fanai Lalţansanga

1962 kuma India leh China indonaah khan India a tlawm chiangin a mualpho hle a, Nehru-a zak thlu hlauh va, a ţap hial a, a rilru na lutuk kha a hriselna chhiatphah-in 1964 kum khan lung lam ţhatlohna-in a boral phah ta hial a ni.

Indonaa India tlawm chhan chhuitu Lt.General T.B.Henderson Brooks leh Brigadier Premindra Singh Bhagat te ziak, ‘The Henderson Brooks-Bhagat Report’ an tih mai chu Australia chanchinbu mi, Indo laia British chanchinbu The Times, London tana New Delhi correspondentNeville Maxwell chuan kum 2014 February thla khan a website-ah a tlang zarh a. He report-ah hian India ram venhimna lam atan thil pawimawh tam tak a chuan tel avangin India sawrkar chuan Maxwell-a website hi India ram aţanga chhiar theih loh turin a block( mirrored) ta rih a, kum 50 kal ta daiha thil thleng ni mah se, India sorkar chuan thuruk vawrtawpah ngaiin a la thup (classified) ta zel a ni.

An indo chhan

1950 kum khan China rama communist sorkar chuan Tibet ram a hneh chhuh a, kum 1959 khan Tibet mipui lungawi lo chuan an puithiam lal ber Dalai Lama hovin China sorkar lakah an hel a, buaina lian tak chuakin China sorkar chuan sipai chakna hmangin a hmetmit a, Dalai Lama leh a hote India ramah an rawn tlanchhia a, India chuan a lo humhim a ni. China sorkarin India ramri dep, Tibet ramah kawngpui lian tak tak a sial ta chiam a, India-in a sawisel a, India leh China ramri velah sipai inkahna a thleng zauh zauh. India leh China ramri km 3225 zeta thui-ah hian ramri sawi fel theih loh hmun eng emaw zat a la awm a, Nehru chuan Forward Policy a tih hmangin Aksai Chin rama India ram hauh chin bak China ram chhungah sipai outpost 43 siamin India ramri-a China sipaite supply dan chahtir a tum a. Russia ram hruaitu Nikita Khrushchev chuan China ram hruaitu Mao Zedong@ Mao Tse-tung India nen an intihbuai chungchangah a lo kamkhat a, heta ţang hian Mao Zedong thinrim chu hachang ţhialin Russia-in mahni communist-pui aia Nehru thlavang a hauh chu a ngaihdan a ni ta lo hle a, India-in Portuguese kut aţanga Goa 1961 kuma a hneh chhuh ang khan Tibet ram pawh lak mai a duh a ring ta a, indo turin thla 6 zet an inbuatsaih ta a ni. India intelligence chak loh avangin China hian ralpui phiara India ram hi a phiar an ring lova, Nehru a inhrosa nasa hle, ţawngkam feikibar hriam tak tak hmangin a invaupung a. India sipai hotuten indo turin an inralring lova, an inbuatsaih miah lo bawk.

China chuan Indo tura a inpeihfel vek tawh hnu-ah Chinese Prime Minister Zhou Enlai Delhi-ah a rawn zin a, Indona a awm lo vang tih Nehru a hrilh. Burmese Premier U Ba Shwe chuan Zhou Enlai ţawngkam ţha mai mai lakah Nehru chu fimkhur hle turin a chah a, mahse Nehru hian a bengkhawn duh lo. Hei tak hi a ni, Burmese scholars ho zinga “Zhou Enlai-an Nehru-a a bum” tih ţawngkam a lo pianchhuahna chu ni! Indian scholar ho hian he indo chungchang hi an ziak ţha duh vak lo va, India Today archive-a vai sipai China kuta in surrender lai thlalak pawh download an phal lo. Hindi Chini bhai bhai (India leh China chu u leh nau, chhul khat kual kan ni) tiin hla an phuah a, Lata Mangeshkar te zai hrulah vaiho lu bu nghawng nghawngin an lo zai ve vak vak ringawt a. Chutih mek laiin China chuan a sipai 80,000 zet ei leh in tur Calcutta kaltlangin Tibet ramah a lo chhek tlut tlut thung si a, Indo huna India rama China sipaite hman tur India pawisa Rupee pawh Hongkong Indian embassy aţangin an lo thlengtir diam tawh a ni.

An indo ta

Kum 1962 October ni 20-ah China People's Liberation Army te chuan hmun 2-ah India an rawn bei ta thut a, khawthlang lam Aksai Chin-a Chip Chap phaizawlah te leh khawchhak lam Arunachal Pradesh Namku Chu lui kamah te an rawn bei thut a, ni 4 an inkah chhung hian China chuan an tum ram leh hmun an la fai vek hman a ni. Arunachal-a india sipaite chuan China laipui mu sepui ruah tuar tlawk tlawk mai leh leh arte thiha thih ai chuan tiin Bhutan ramah an tlan lut a, China sipaite hian International border zah derin an umzui duh ta lo va, an hlahthlem. Zhou Enlai chuan Nehru hnenah lehkha thawnin ramri chungchang inbiak ţhat, tuna ram pahnih sipaite awmna aţanga km 20 ve ve mahni ram lama tawlh luh, Arunachal Pradesh aţanga China sipaite inthiar chhuah, Aksai Chin hmuna sipai ram lak chin inpawmtawnsak tih te rawtna a thlen a. Ram hausa USA leh ram dangten China an demin an mawhchhiat rawn luai luai ţan.

Zhou Enlai rawtna hi Nehru-an a pawm tak loh avangin Chawlhkar thum an chawlh hnu-ah Indo an chhun zawm leh ta a. India sipaite chuan Nehru piancham ni tak November ni 14-ah Walong hmuna China sipai an kap leh. Chawlhkar thum an chawlh chhung khan China chuan thapui thawhin ramri-ah a inchhek chiam a, India sipai te chuan chutianga China sipai inbuatsaih lai vel chu an uipui tui lian thlir vel mai mai a, an Takam chem bo hawi vel mai mai a, India sipaite indona hmun ralhmatawngah an inthawn hman lo! China chuan a siruk laiin thapui a rawn thawh leh ta ngei a, Arunachal-a India sipai 10,000 an dang chat ta reng mai! Assam rama Tezpur khua pawh an mangang phili nasa mai a, khawpui aţangin mipui tlan chhuahtirin Bramaputra lui kamah an insasengtir a, jail tangte an chhuah vek a, Treasury-a pawisa pawh an hal fai ta ringawt mai a ni. Khawthlang lam Aksai Chin lam indona mualah pawh Vai sipaite chu hniak pherh vunin an tlan chhe nasa hle a, vur ram tlang sang tak taka an ţhiante ruang pawh an hlawm ngam lova, China sipaiten zah der takin Vai sipai thi te an vuisakin an phumsak vel ta mai mai bawk. Zhou Enlai chuan November ni 21 zanlai a hman nghal turin inkah hai a puang a, inkahhai thu hi India-in darkar 24 hnu-ah chauh a hria a ni. A engti ziazangin nge kan Mizo pa chhuanawm, mahni inthunun thei, Brigadier T.Sailo kha kha Indona-ah khan a lo hmingţhat viau theih aw tih hi ka ngaihtuah chhuak fo! A sipaite Indona hmun a thlenpui hmain inkah hai an puang diam tawh.

Indo lai hian Nehru a mangang hle mai a, US President John.F.Kennedy hnenah vawi 2 lehkha a thawn a, a rang thei ang bera 12 squadrons of fighter jets leh modern radar system thawn turin a ngen chiam (pathetic) a, a ţahâwh a ni ber e. A beisei anga a dilna a tihhlawhtlinsak nghal mai theih tak loh avangin India chuan Russia ralthuam hlirin tûn thleng hian a inthuam ta a, an thlawhna MIG a tla reng a, an tuihnuailawng lah a changin a puak a, a changin a kang ta reng mai zawng anih hi! A hnua an hriat leh dânin Communist ral lian laka India thlavang hauh tur leh humhim turin khawvel ram ropuite kha an lo inkau hle a, kum 1962 TIME magazine editorial-ah chuan , “USA chuan India ţanpui turin Indo thlawhna 60 leh $ 5,000,000 man hu automatic silai, laipui leh rah puah bomb te, bungraw phur thlawhna lian C-130 Hercules 12 leh pilot te leh thlawhna khawl lam enkawltu te nen India sipaite Indona hmuna phur turin India ram panin an chhuak hman a, Britain chuan Bren gun leh Sten gun bakah silai mu ton 150 zet Inida rama thawn a tum a, Canada pawhin bungraw phur thlawhna 6 thawn a tum a, Australia ram chuan India tan silai mu $ 1,800,000 man hu bat (credit) a phalsak diam tawh” tiin a ziak. CIA-in a hnua an chhut danin Nehru khan indo thlawhna lo hmang se chuan khatih hun lai khan China khan India thlawhna bei tur thlawhna ţha leh a tui (fuel) a lo nei lo reng reng a ni, an ti.

India leh China indona kha ram 2 te hian indo an puang miah lova, thlawhna an hmang lo ve ve a, an ram palai te pawh an hawtir lo ve ve a ni. China chuan ralrel a thiam a, indo hun kha Cuba Missile Crisis avanga USA leh Russia an inngur lai tak a lo ni bawk a. Ram dangin China an sual rawn hma-in an thiltum rang takin an tihlawhtling a, inkah hai an puang ta hmiah a ni. Indo hnu hian Aksai Chin chu China ram a lo ni hlen ta a ni. US navy analyst James Calvin chhut dân chuan India hian kha Indona avang khan ramri inchuh aţangin 32,000 square miles a neih hlen phah a, Arunachal Pradesh hi a ta neih ta a, sipai ralthuam ţha tinrengin a thuam tak avangin kum 1971-a Pakistan nen an indo pawh khan India a chak chiang hle a ni, a ti ve thung.

Kha Indo laia India ram hruaitute chu Sarvepali Radhakrishnan (Vice President) Jawaharlal Nehru (Prime Minister), Brij Mohan Kaul (Army chief of General Staff), V.K.Krishna Menon (Defence Minister) te an ni a, China ram hruaitute chu Mao Zedong, Liu Bocheng, Lin Biao leh Zhou Enlai te an ni thung. India chuan Indona hmun tlâng sang tak tak, vur ram, feet 16000 zeta sangah sipai 10,000 aţanga 14,000 vel chauh a thawn theih laiin China chuan sipai 80,000 zet a thawn thei thung a ni. India sipai thi - 1, 383, hliam -1,047 leh bo - 1696 zet an awm bakah China sipaiin a nung chunga an man - 3,968 an awm laiin China sipai pakhat te mah India sipaiin an man ve lo! China sipai thi zat 722 leh hliam tuar zat 1697 chauh an ni thung a ni.

Nehru a chesual, humsual a dai!

Indopui II-na hnu lamah Cold war a rawn piang chhuak a, khawvel hmun tinah Russia sa ngawi zawnpui communist leh USA sa ngawi zawnpui democracy ram din duh pawl an indo reng a, chutiang boruak rit tak karah Nehru chuan Non-Alignment Movement chak tak a kal pui a, khawvel ram tam takin hruaitu ţha leh tling ena an en a ni a. England parliament-a a thusawi pawh, Cambridge University chhuak tih takah a Sap ţawng kha a han ţha mai mai khawp a, Sap pachal MP te pawh an chek tlawk tlawk kha a ni a. Nehru Sap ţawng thiama thiamzia chu a mak a ni, an thuziak chhiar tawh chuan mak an ti bang thei lo.  Chu a chal lanna, a hmingţhatna hmachhuanin China ram a ngur a, China ramah kel a han tlat luhtir a ni hrim a, China rawn er leh tur do ngam turin sipai lam a lo thuam ţha miah lo kha a chetchhiat phah ta a ni. Vauzam a tum a, a inhrosa pung pung a, indo turin a lo inbuatsiah miah lo a nih chu, Aihkaleihsaih!

Defence Minister Krishna Menon kha a tir aţang rengin Indi aram sipai ralthuam lei chungchhangah a bik takin Willy Jeep a chawk luh danah Jeep tuihang a lo hawp nasa a, Pu Laldinga JCB tuihang hawpa an puhte kha chu ar chil zat lek alawm! India leh China Indo lai khan Delhi tlanga politician tam zawk chuan a indona lam lungkham ta lo chuan Menon bantir dân tur ngawt kha cho-ak rual hram vak vak angin an lo iak chiam chiam bawk a ni awm e. ‘A bilh aţanga tho lo’ an tih angin India ram sipai ralthuam lei chungchangah hian man ţang fanghma no nei tum pawl hi tûn thleng hian an awm phah ta zel a ni. Entirna - Bofors laipui lei chungchangah te, Kargil indona atana hman tur sipai uniform man to uchuak lei chungchangah te, Kargil indonaa thi te vuina tur mithhi kuang man to rura lei chungchang te, Kargil indonaa thi chhungte chenna tur Mumbaia Insak-ah politician tam tak leh sorkar hnathawk lian tam takin an lo inpe ve ngawt bawk. Mizoram Police mawza manto te pawh kha a ni ve tho ang chu. Vai zia ţha lo apiang hi kan chhawm lut ve zel a, total bandh huaihawt tih angreng te nen lam mawle!

Pa ropui Jawaharlal Nehru

Chutianga a chetchhiatna pakhat kan han sawi tak mai avang leh a mawng kan han hlim tak avang chuan Nehru hi pa tlaw-ra leh pa taihai a ni e, kan tihna a ni hauh lo va, India hi ram ropui ni tura din chhuaktu (architect of modern day India) a nihna hi kan hriat reng a ţha ang e. Padmaja Naidu leh Edwina Mountbatten te nen khan inhmangaihna ril tak platonic relationship an nei a. India ram kilkhawr ber thlenga universal primary education system a neihtir thei a. All India Institute of Medical Sciences te, Indian Institute of technology leh Indian Institute of Management din chungchangah world class education ( Mizorama world class education an tih ang ni lo) a din thei bawk. India ram hnam chekhnawk tam tak awmkhawmna-ah Left Ideology hmangin ram hnuk a din a, India ram hi kum zabi 21-naa khawvel ram ropui ber te zinga super power ni thei tura kawng sialtu pawimawh tak a ni a, keini ang hnam mawl leh hnam tenau tan pawh khaw êng hmuh theihna tur kawng min sial sakin hamţthatna tam tak min siamsak a ni. Kan chhehvel ram tam takah democracy tungnung zo lovin sipai sorkar an din mek laiin India ramah chuan democracy hi a famkim tawk loh ang angin a la nung reng a. Hei pawh hi Nehru fin vang kan ti lo thei lo vang.

Congress hruaituten an hak fo kawr nghawng bul âan nei lo pawh hi Nehru jacket style a ni a. Lehkha chhiar zau, thuziak thiam hmingthang a ni bawk a. A kutchhuak lar deuhte chu - The Discovery of India, Glimpses of World History, Toward Freedom tih te leh a jail tan laia a fanu Indira Gandhi kum 10 mi, Mussoorie khua-a hostela a awm laia a lehkhathawn 30 - Letters From a Father to His Daughters te an ni a. Nehru hun aţanga Indira , Rajiv, Sonia leh Rahula te Library hi a thlalak ka hmu tawh a, hetianga tam lehkhabu awmnaah hi chuan sei lian ve ila, pa darben hi chu ka ni bik hauh lovang! Nehru hian Mizoten thlen hlan kan nghahhleh em em, kan duhthusam zawng zawng awm tura kan ngaih Van ram awm hi a ring lem lo a, a dam chhunga a hnampuite tana thil tam tak a lo tihsak ve thei kha a lawmna a ni mai. Kum 1955 khan India rama mimal dawn theih chawimawi sang ber Bharat Ratna chawimawina a dawng.

Indian declaration of independence kha Nehru ziak a ni a, a Sap ţawng la tem chhin ngai lo tân in lo chhiar ve hrim hrimah hei aw:-

“We believe that it is the inalienable right of Indian people, as of any other people, to have freedom and to enjoy the fruits of their toil and have the necessities of life, so that they may have full opportunities of growth. We believe also that if any government deprives a people of these rights and oppress them, the people have a further right to alter it or abolish it. The British government in India has not only deprived the Indian people of their freedom but has based itself on the exploitation of the masses, and has ruined India economically, politically, culturally and spiritually. We believe therefore, that India must sever the British connection and attain Purna Swaraj or complete independence”

Purna Swaraj or complete independence hian bawi ata min ban tawh em le?

And ye shall know the truth, and the truth shall make you free. (John 8:32)

“Thutak in hria ang a, thutak chuan a zalêntîr ang che u,”